1. Gini sino Mbori nga banguaha, na wai pa ino mo ho asa ro mo ni biko?

FUGO Yekova gako toro adu kugii pa kehe nga Ziazia Kekeapai nagumba gupai furani nga, “Mbori nga nyemuse.” Si apenga gupai gbua nga nyemuse nga wenesino sa dagba asinoko yo te, ono si naya ‘Mbori nga nyemuse.’ (1 Yo. 4:8) Si nga bangua sinoko nyakipaha gbe. Anga Yekova gbua na gu sino nga ga nyemuse te, ono si nga gupai i aino ko ti ni. Nangba wai ka ino gupai nga Bakusi zegino na gu rakirakiahe dunduko du rogoho nga Mbori nyemuse! Agu apai dunduko ko amangaha ko namangaha mbiko gu sinoko re.

2. Gini kido ga Mbori nyemuse afuhe furani? (Oni bi gu sura du ti tonatonaha.)

² Gu wenesino du Mbori na ni tipa gako kusikusiahe nakido rani nga gu gako ringbisapai dunduko du tipa aboro nika digiso tihe adigiso ngba wene gene na si nika fu bakere undo fu agu aboro dunduko nika du tii gako zogarago. Ni kpiapai, mbiko nyemuse, Yekova ‘ringbisi rame ko nika sapangbanga zegino ni rurupai rogo yo be gu kumba ko aasia paha fuko’ nga Yesu Kristo. (Amo. 17:31) Ani rengbe kadu na kido nga gupai ko akpinyemuhe  nika manga amanga. Mbori nika sapangbanga ni ruruhe fu aboro giasangba dunduko nga gu nika ye na amaku fuyo kumbatayo nyeanye kindi.

3. Oni nabihe nga ka raka du wai ka si nidu nga Mbori akpingo nyemu aboro te?

³ Mo berẽnga pa wai ka zegino nidu ka si nidu nga Mbori na nyemuse tipa aboro te. Gupai ka ani nabihe nga gu gbegberẽ pangbanga nga ga gi zegino re na gaha gbegberẽ abazogo tiibe gaha gbegberẽ mbori nga Satana Bakitingbanga. (2 Kor. 4:4; 1 Yo. 5:19; oni gedi Yugoti 12:9, 12.) Gere nayugo wai ka raka nidu kumbatayo ni gbegberẽhe ka si nidu nga apai namanga rogo zegino zanga ga Mbori nyemuse.

4. Tipagine du Yekova ambu samungu ti ni kuti ruru zogarago?

⁴ Ho Bakitingbanga asamungu ni kuti ga Yekova zogarago, ko agbarasi ri Adamu na Eva yo i mangi wakina ko. Ko aya Mbori na rengo beko ka zoga aboro te. Gupai nzunzu Satana aaida ka gumbaha nga, gako zogarago ngba ti ga Bakusiahe. (Bam. P. 3:1-5) Wa vura duhe nga Yekova ambu regbo tipa Satana yuguhe singia ko na rengo beko, gupai re adu tipa wiri umba regbo gbua. Mbiko ga Yekova bakere tatamana, ko ima mbu regbo ni bakerehe tipa ka yugo gupai gbayaga nga zogarago ho rengbe ka ngba kisusi gako te. Apangbanga ima yugoho nga aboro watadu Satana arengbanga ka manga gupai ani aidaha tipa wene zogarago te.

5. Ginipai gu pangbanga nga ga aboro nayuguhe ziazia?

⁵ Vuru agu agarã 100 susi kusayo, bange agu aboro kpi be agu avura rikaaboro asoho ima susa amirioni 100. Areme, apai nagberã kina kumbatayo rogo zegino. Gere nga gupai Fugo Mbori aima fura tipaha kumbatayo nga si amanga rogo “kusa rago” nga ga gi sino raka re ho ‘gbegberẽ aboro nika gberã ni kisusi.’ (2 Tim. 3:1, 13) Apangbanga ima yugoho zanga kapa nga gupai Ziazia Kekeapai agumbaha nga: “Ako Yekova, mi ini he ya gu pai nga ga boro si rogo ni yo te, gu boro nata, pa ruga gani apai si rogo ni yo te” nga kina rengo. (Yere. 10:23) Mbori aakusanga aboro na tandu watadu gu rengo nga i nimangi gayo apai nitiyo zanga ko te.

6. Ginipai Mbori nambu gbegberẽpai ti ni si mangi tipa bete regbo?

⁶ Kupati pa yugo wai gberẽ ga aboro zogarago, pa mbu Mbori gene fu gbegberẽ apai si nimangi tipa bete regbo nayugopa gupai ko nika mangaha kumbatayo. Si nayugo gupai gbayaga nga kina ga Mbori zogarago sa rengbe kadu na diabese. Tingbafuo Yekova nyasiriipa gbegberẽ apai gbiati agu aboro namangaha, ka boro idi ka samungu kuti ga Yekova zogarago nga ga nyemuse berewe, ndupai adu nga ho tipa Mbori mbu gu boro re berewe te. Ko ima rengba ka mangasunge na gupai naamangi rogo ga aboro raka yo ni gu gopai naza gene fuko ko nyasariipa agu aboro ka samungu re, zanga mbuyo tipa i mangi gbegberẽpai berewe.

7, 8. Gini dungu agene Yekova ayugu gako bakere nyemuse ngbaha?

⁷ Yekova ima yugo gako bakere nyemuse rogo dungu agene yo. Ni kpiapai, oni bingo wai kii zegino. Abirioni nga ga abadona akerekuru du ti ni, na badona ra sa na abirioni nga ga akerekuru rogoho gbiati kura azegino. Rogo gu badona akerekuru nga gu ani abi akerekuru rogoho ariyo, kerekuru sa dagba agu akerekuru re nga gaani uru,  na zangaha, gu dungu rakirakiahe du auru kpotosende ane arengbanga ka du te. Gi kusikusiahe re dunduko nayugopa ga Yekova pagbia na asinoko wa gu nga ome, tatamana, na nyemuse. Nirengo, “gu gako apai ka i abi nga ya nga gako nyenye tandu na sino Mbori i nabi he abi ziazia, tona kina ho rago aenge ni. I nabi he kina rogo agu ahe yo ko amangi.”—Rom. 1:20.

⁸ Yekova ambakadi ahe dunduko auru kpotosende tipa si undo gu kusikusiahe ko ambakadihe si niraki auru kpotosende. Ko ambakadi bawene ati nangia paradizo na ki fuhe fu rengberengbe aboro i raki rogoho nyeanye kindi. (Oni gedi Yugoti 4:11.) Kurigure, “ko nafu riahe fu aboro dunduko, bambiko gako wenengirise nye anye kindi.”—Tam. 136:25.

9. Kupati nyemuse, gini kurapai sino Yekova nasako ko mangihe, na tipagine?

⁹ Wa vura duhe nga Mbori nayugo tiko ni gu Mbori nga ga nyemuse ko, ko nasoga gbegberẽpai asogaha. Ni kpiapai, Atambuahe 5:4-6 naya tipa Yekova wẽ: “Mo adu nga ni gu Mbori du na ngbarago ti ro tipa gbegberẽpai te . . . Mo nagbarasa agu yo nagumba zire; Yekova nasoga abaimiaboro na airanangahe a.”

10, 11. (a) Ginipai du Yekova nika manga gbegberẽ aboro na ni? (b) Wai du Yekova nika fu maku fu aboro giasangba?

¹⁰ Wa duhe nga ko nga Mbori nyemuse na ko nasoga gbegberẽ apai asoga, ko nika nyasariipa gbegberẽ apai rogo zegino nabaha ho ko nika ruga gupai ni du tipa gako pagbia si ki da bangiriko. Fugo Mbori nakidohe nga ‘i agbandaka amangi gbigbitapai agbandaka; ono agu yo nasunguda Yekova i adia kumbo ringara. Bambiko fuo rago ngbutuko, gbegberẽ boro adú nga ho berewe te; avura Yekova anyasa wa wene abanambu, i nanyasa - wa ngime nagbandaka.’—Tam. 37:9, 10, 20.

¹¹ Na berewe a, Fugo Mbori nakido rani nga: “Ruru aboro adía kumbo ringara, ki nye anye kindi.” (Tam. 37:29) Ngbatunga gu ruru aboro re adu “na ngbarago tipa gu wenepia du kpaima.” (Tam. 37:11) Gipai re nika manga amanga mbiko Mbori nyemuse naamangapai dedede ni wenehe tipa gako ruru amoyambu. Ziazia Kekeapai naya furani wẽ: “Ko awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te, bambiko bambata apai aima nyasa.” (Yugo. 21:4) Nairiwo gu bawenepai nasungudo rani kumbatayo re nga agu aboro nzunzu nabipa ga Yekova nyemuse na kikiipaha na kini gisangbako ni gaani Bazogo!

12. Da rengbe yo ka bi ni nga “ruru boro”?

¹² Fugo Yekova naya furani wẽ: “Mo kparia pa ziazia boro, ki bi ruru boro, bambiko wenepai adu fu boro zereda ku mbata yo. Ono atiandika, i amongo gbárasi yo; digida ga gbegberẽ aboro apai i adía ha ku sa yo.” (Tam. 37:37, 38) “Ruru boro” naye ka ino Yekova na Wiriko na kini mangi gupai Mbori akpinyemuhe. (Oni gedi Yoane 17:3.) Ngbatunga gu boro re nadia agu afugo du rogo 1 Yoane 2:17 na nyanyakipaha naya: “Zegino napaya apaya, na gaha nyemuhe: ono gu ni ka amanga gu pai Mbori akpi nyemu he ni nye anye kindi.” Wa digido gi zegino re ambeda si naida ani mangipai niˈipo ka ‘sungudo Yekova, ki kakuti gako pai.’—Tam. 37:34.

13. Gini bakere mangapai nga ga nyemuse Yekova namangihe tipa aboro ingapai?

¹³ Wa vura duhe nga ani nga aboro ingapai, ani ima rengba ka ‘kakuti ga Yekova  pai.’ Ani rengbe arengba a kadu na wene pagume na Yekova bambiko gako bakere mangapai nga ga nyemuse. Ko afu motumo tumorii nga ga Yesu Kristo, nga gu nazaka gene fu ruru aboro i bati be gu ingapai na kpio i adihe ti Adamu. (Oni gedi ARomo 5:12; 6:23.) Yekova aima du na kido kuti bangisa Wiriko, naadu ni ruruko fuko ngbangbaturũ yo tipa dungu agarã. Ni du ko ni gu Baagude du na nyemuse, rago aima gberã tigaha tiko ka bi wai i aambusa Yesu auru kpotosende ane. Ono tie, Yesu anye ni ruruko ki mangipai kuti ga Mbori bakerepa gbia, na ki yugu gupai nga rengberengbe boro ima rengba ka kakuti ruru mangapai fu Yekova zavura ti regbo kere akpakarapai vurũ.

14, 15. Ginipai kpio Yesu adigisihe?

¹⁴ Yesu akakuti gako ruru mangapai na ki tumbapa ga Yekova bakere pagbia ti regbo kere asada na ki kpi ni ruruko fu Bako. Nairiwo gu ngbarago si aida ani du na ni tipa kpio Yesu, ko afu gu motumo si aidaha tipa ka batasa aboro na ki zaki gene fuyo tipa nyenye unga rogo gu vovo zegino Mbori nakido paha! Gu mokedi nangia Pauro ayugupa gu nyemuse naadu ti Yekova na Yesu ni peko gipai re: “Ani anyaka nga ni ya, Kristo akpi ragoho tipa azangasinombori. Bambiko kpakara pai nga ha boro kpi tipa ruru boro, ono isoke gu ni nibasa apai abasa ka kpi tipa wene boro. Mbori amoi dezire gako nyemuse fu  rani nikpi Kristo tipa rani wa ani adu ni aboro ingapai.” (Rom. 5:6-8) Gu mokedi nangia Yoane ake gupai nga: “Gi i ayugu ga Mbori nyemuse tipa rani ti ni re, nga Mbori akedi bangisa Wiriko ku zegino, ani du ni ungarani mbiko ko. Gi nga nyemuse re, nga nyemu Mbori adu nga ti rani te, kina rani du nyemurani ti ko, ko akedi Wiriko ko du ni motumo gaani ingaapai.” —1 Yo. 4:9, 10.

¹⁵ Nibipa ga Mbori nyemuse tipa aboro, Yesu aya: “Bambiko Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.” (Yo. 3:16) Ga Mbori nyemuse tipa aboro ni bakerehe mbiko ko aakanga na guhe be aboro si aidaha tipa yo wa si avura du vurũ nga si aima imisa ko te. Gako nyemuse adigonga te. Ani ima rengba ka kido dedede kuti gako nyemuse. Gu mokedi nangia Pauro aya: “Mi ini aina ni rengo ya kpio, na unga, na amaraika, na angbi, na agu apai du awere, na agu apai nikaye, na atandu, na ari yo, na dudungura rago, na kura ũzegino, ka si kpara nga rani ti ga Mbori nyemuse du rogo Kristo Yesu yo nga gaani Gbia te.”—Rom. 8:38, 39.

16. Gine nga gu Kindo Nga ga Masiya, na Yekova fu pa gako zogarago fu da?

¹⁶ Ga Mbori nyemuse tipa aboro ni yuguyuguhe rogo gu mbakadapai ko namangihe nga ga gu Kindo Nga ga Masiya. Yekova ima fu pa gu zogarago re fu Wiriko, nga gu boro nakpinyemu aboro na ko ima rẽ tipa ka zogarago. (Snz. 8:31) Ho agu aboro nika zogarago na Yesu du bangeyo nga 144,000 azinga ni ka ga ku ngbangbaturũ yo, i naga koyo na gu inohe du yo na ni tipa ga aboro raka. (Yugo. 14:1) Kindo angia gu banguapai Yesu ayugopai tipaha, na ko ayugu gupai fu gako abawiriki i ni kpari nga: “Barani du ngbangbaturũ yo, ani írisi rimoro airisa. Ga ngbi yé, ani mángi rogo kpotosende wa mo akpi nyemu he, wa du he ngbangbaturũ yo.” (Mt. 6:9, 10) Nairiwo gu maku nika ngiaha re fu ruru aboro ho gu kparakpee re nika digiso tihe ni!

17. Oni yugungo gu kparakparapai du dagba gu zogarago nga Yesu na gu nga ga wiri aboro.

¹⁷ Nairiwo gu kparakparapai du dagba gu wene zogarago nga ga Yesu du ngbangbaturũ yo re ti gu nga ga wiri aboro naye na kina kpio dungu amirioni aboro areme rogo avura yo! Yesu nakpinyemu gako aboro na ko nayugo ga Mbori asino, gbe gu nga nyemuse. (Yugo. 7:10, 16, 17) Yesu aya: “Oni yé fuo re, agu roni nambu dunduko, ki du na rõrõi tindiro, mi ki fu ongoda fu roni. Oni dí gi gonga ku gorõroni, ki wiriki pare; bambiko bayee boro nga mi nga irazerangbaduse, oni ki bi ongoda tipa mbisimoroni. Bambiko kii nga gi gonga te, na gi tindiro ni aakpura ha.” (Mt. 11:28-30) Nairiwo gu wene kidohe re!

18. (a) Ginipai ga Mbori Kindo adigi nimangihe tona ti gu regbo i asigiraha ti ni? (b) Ginipai ani ka sakapai tipaha rogo gu kekeapai ngbefuo gere?

¹⁸ Gu sangbaanebi du rogo Ziazia Kekeapai yo nayugo gupai nga i asigira ga Mbori kindo rogo gu garã nangia 1914. Natona ti gu regbo re, i aima tona dungura gu yangara aboro nika zogarago na Yesu ngbangbaturũ yo kodihe na “bakere rimbasa” nga agu aboro nika bata ti gi yangara sinoraka re na ki rimi ku rogo vovo zegino. (Yugo. 7:9, 13, 14) Bakio gu bakere rimbasa aboro re wai? Ginipai si aidaha be agu aboro du rogo gi badona re? Gu kekepai ngbefuo gere nika sakapai tipa gu sanahe re.