1, 2. Bibliarjamajja, ¿kunatsa munasirïñajj wali wakiskirejja?

JEHOVÁ DIOSAJJA, wali munasiriwa (1 Juan 4:16). Jesucristojj Awkipjam munasirirakiwa. Diosajj juparuw taqe kunat sipansa nayraqat luratayna, walja millón millón maranakaw Jesusajj Awkipampi chikajj alajjpachan jakäna. Ukhamatwa Awkipat munasirïña yateqäna (Col. 1:15). Alajjpachankkäna ukhasa, aka Oraqenkkäna ukhasa, Awkipat yateqasisajj munasiñ uñachtʼayapunïnwa. Ukhamasti Jehová Diosasa, Jesusasa munasiñampipuniw alajjpachat apnaqanipjjestani.

² Mä kutejja akham arunakampiw mä chachajj Jesusar jisktʼäna: “¿Kawkïr mandamientos taqet sipansa wali jachʼajja?” sasa. Jesusasti juparojj sänwa: “‘[Jehová] Tatit Diosamaruw munäta taqe chuymamampi, taqe almamampi, taqe amuyumampiraki’. Akawa taqet sipansa jachʼa mandamientojja. Payïri mandamientosti ukar uñtatarakiwa: ‘Jaqe masimarusti juma kipkarjam munarakim’” sasa (Mat. 22:36-39).

3. Jaqe masi sasinjja, ¿khitinakatsa Jesusajj parlaskäna?

³ Cristianonakjamajj taqeniruw munasiñasa. Jesusajja, Jehová Diosampiru jaqe masinakamampiruw munasipjjañama sasaw  säna. Ukampis jaqe masi sasinjja, ¿khitinakatsa Jesusajj parlaskäna? Cheqas taqe jaqenakatwa parlaskäna. Amuytʼañataki, jiwasatï casadöstan ukhajja, jaqe masisajj chachasa, jan ukajj warmisawa. Tamankir jilat kullakanakasa, Diosan arunakapat yatiyktan uka jaqenakasa jaqe masisarakiwa. Kunjamsa taqe jupanakarojj munasiña uñachtʼaysna ukwa aka yatichäwin yatjjataskañäni.

4. Casado chacha warminakajj kusisitaw jakasipjjaspa sasajja, ¿kunatsa sistanjja?

⁴ Nayrïr awk taykasarojj Jehová Diosaw jaqechawayi. Ukhamajj Jehová Diosaw matrimonio uttʼayirejja. Diosajja, Adanampi Evampejj kusisita jakasipjjaspa ukhamarak aka Oraqe jaqenakampi phoqantapjjaspa ukwa munäna (Gén. 1:27, 28). Ukampis Adanampi Evampejj janiw Diosarojj istʼapkänti, ukhamatwa kusisita jakasiñ aptʼasipjjäna. Janiw ukakïkänti, jiwasarojj juchampiru jiwañampiruw aptʼawayistu (Rom. 5:12). Niyakejjay pantjasiri jaqëstanjja, ¿casado chacha warminakajj kusisita jakasipjjaspati? Jïsa, kusisitaw jakasipjjaspa. ¿Kunatsa ukham sistanjja? Cheqas Jehová Diosajj Biblia toqew chacha warminakarojj suma ewjjtʼanak churi (2 Timoteo 3:16, 17 liytʼañataki).

5. Casado chacha warminakantï munasiñajj utjani ukhajja, ¿kunjamas jakasipjjani?

⁵ Casado chacha warmin suma jakasiña utjañapatakejj munasiñaw utjañapa sasaw Bibliajj qhanañchi. Apóstol Pablojj cheqpach munasiñat akham sänwa: “Khitintejj munasiñajj utjki ukajj llampʼu chuymaniwa, suma jaqewa, janiw envidiasirïkiti, janiw jachʼa jachʼa tukurïkiti. Janiw kuna jan walsa lurkiti, janirakiw kunsa jupatakiki munirïkiti, janiw coleraskiti, janirakiw colerasitapsa imjjäsiskiti. Janiw kunatejj jan walïki ukatjj kusisiñ yatkiti, jan ukasti kunatejj cheqapäki ukat kusisiñ yati. Taqe kun tʼaqhesi, taqe kun iyawsi, taqe kun llampʼu chuymampi suytʼaraki. Munasiñajj janipuniw tukuskiti” sasa (1 Cor. 13:4-8). Casado chacha warminakatï Pablon uka arunakapat lupʼipjjani, ukarjam sarnaqapjjarakini ukhajja, kusisitaw jakasipjjani.

6, 7. 1) Familiar pʼeqtʼañ toqetjja, ¿1 Corintios 11:3 qellqatajj kamsisa? 2) ¿Kunjamsa cristiano chachajj warmiparu uñjañapa?

⁶ Familia taypin pʼeqtʼirirojja, Jehová Diosaw uttʼayawayi. Pablojj sänwa: “Cristowa taqe  chachan pʼeqepajja, chachasti warmin pʼeqeparakiwa, kunjämatejj Diosajj Criston pʼeqepäki ukhama” sasa (1 Cor. 11:3). Kunjamtï uñjktanjja, familia taypin pʼeqtʼirejj chachawa. Pʼeqtʼirjamajja, familiapar janiw jan wal uñjañapäkiti, jan ukasti wali munasiñampiw uñjañapa, ukwa Jehová Diosajj muni. Uka toqetjja, Jehová Diosajj wali yateqaskayawa, Jupajj wali munasiñampiw Jesusar uñji, janipuniw Diosajj jupan askipak thaqkiti. Ukatwa Jesusajj Awkipar wali respetompi uñjaraki. Jesusajj akham sänwa: ‘Nayajj Awkirojj munastwa’ sasa (Juan 14:31). Jehová Diosatï Jesusar jan wal uñjaspäna ukhajja, janipuniw kunapachas ‘Awkirojj munastwa’ sasin siskaspänti.

⁷ Kunjamtï uñjaniwayktanjja, chachajj warmin pʼeqepawa sasaw Diosan Arupajj qhanañchi. Ukampis warmiparojj jachʼaruw aptañapa sarakiwa (1 Ped. 3:7). ¿Kunjamsa chachajj warmiparu jachʼar aptaspa? Kunjamäskis warmipajja ukwa amuyañapa, ukatsti kuntï siski uksa istʼañaparakiwa. Bibliajj siwa: “Chachanaka, munasipjjam warminakamaru, kunjämtejj Cristojj [tamaru] munasi, ukhamarak jakañapsa jupa layku aptʼasiwayi ukhama” sasa (Efe. 5:25). Jesusajj walpun arkirinakaparojj munasïna, ukatwa jupanak laykojj jakañapsa aptʼasiwayi. Chachanakatï Jesusat yateqasisina warmiparu munasiñampi uñjapjjani ukhajja, warminakatakejj chachapar munasiñasa, respetañasa, amtanakapar yanaptʼañas janiw chʼamäkaniti (Tito 2:3-5 liytʼañataki).

8. ¿Kunjamsa jilat kullakanakasar uñjañasa?

⁸ Aka Oraqpachanjja, millón millón jaqenakaw Jehová Diosar servipjje, ¿kunjamsa jupanakar uñjañasa? Bibliajj akham sistuwa: “Taqeniruw aski lurañäni, jukʼampis [tamankir] jilatanakasaru” sasa (Gál. 6:10; Romanos 12:10 liytʼañataki). Apóstol Pedrojj akham sänwa: “Jichhajj jumanakajja, qollan ajayu toqe Tatitun arunakap istʼasinjja, almanakamjja qʼomachasjjapjjtawa jilatanakaru cheqpachan munañataki. Ukhamajj maynit maynikamaw munasipjjañama taqe chuyma, ukhamarak taqe chʼamampi” sasa. Ukatsti akham sarakïnwa: “Ukat sipansa jumanakanjja munasiñajj utjapunpan” sasa (1 Ped. 1:22; 4:8).

9, 10. ¿Kunatsa Diosan servirinakapajj mayachtʼatätanjja?

⁹ Jehová Diosan servirinakapajja, jilat kullakanakasarojj taqe chuymaw munastanjja. Jehová Diosarus wal munastanjja, leyinakaparus istʼaraktanwa. Ukatwa Jehová Diosajj qollan ajayupa churistu. Uka qollan ajayun yanaptʼapampiw taqe jilat kullakanakasampejj mayachtʼatätanjja (1 Juan 4:20, 21 liytʼañataki).

¹⁰ Cristianonakan maynit maynikam munasipjjañapajj kunja wakiskirisa ukjja apóstol Pablojj akham sänwa: “Khuyapayasiñampi, suma jaqëñampi, jiskʼar tukuñampi, llampʼu chuymanïñampi isthapitay sarnaqapjjam. [...] Ukatsipansa wali munasiñanïpjjam, munasiñasti mayaruw tukuyi, taqe kunsa phoqharakiwa” sasa (Col. 3:12, 14). Ukatsti Pablojj saskakïnwa: “Sumankapjjam, maynit maynikama khuyaptʼayasirïpjjam, perdonasirïpjjarakim maynit maynikama, kunjämtejj Diosajj jumanakaru perdonapjjtam Cristo toqe ukhama” sasa (Efe. 4:32). Cristianonakjamajja, kawkhansay jikjjataskstanjja taqeniw mayachtʼatätanjja, ¿kunas ukatakejj yanaptʼistu? Munasiñaw yanaptʼistu. Ukham munasiña utjatapat wali kusisitapuniw jikjjatastanjja.

11. ¿Kunas cheqa religionätas uñachtʼayi?

¹¹ Jehová Diosan Testigonakapajj taqeniw munastanjja, ukhamarus mayachtʼatarakïtanwa. Ukaw cheqa religionätas uñachtʼayi. Jesusajj akham sänwa: “Jumanakatejj maynit  maynikama munasipjjätajja, taqeniw amuyapjjani nayan discipulonakajjäpjjatama” sasa (Juan 13:34, 35). Apóstol Juanajj sarakïnwa: “Ukhamatwa yatisi khitinakas Diosan wawanakapajja, khitinakarakis Supayan wawanakapäkarakis ukajja. Kawkïritejj jan aski lurkejja, ukhamarak jan jilaparus munaski ukajja, janiw Diosankkiti. Aka arunakwa istʼapjjtajja qalltäwitpacha: ‘Munasipjjam maynit maynikama’” sasa (1 Juan 3:10, 11). Jehová Diosan Testigonakapakiw munasiñ uñachtʼaytanjja ukat mayachtʼatas sarnaqaraktanjja, ukaw Jesusan arkiripätas uñachtʼayi. Ukatwa Diosajj Reinopat aka Oraqpachan yatiyasiñapatakejj jiwasar ajllisistu (Mat. 24:14).

12, 13. ¿Kunsa jichhürunakan Diosan servirinakapajj lurasipki, ukat kunsa katoqapjjani?

¹² Jichhürunakanjja, Jehová Diosan Testigonakapat jila partejj ‘walja jaqenakat’ uñtʼatäpki uka taypitäpjjewa. Jupanakasti taqe markanakatäpjjewa, ukatsti Diosan Reinopat yatiyasiñapatakiw yanaptʼasipki. Bibliajj jupanakat akham siwa: “Akanakajj wali jachʼa llakinakwa pasanipjje, isinakapsti Corderon wilapampi tʼajjsusarakiw janqʼoptayanipjje” sasa. Uka arunakajja, Jesusan loqtasitapar iyawsapjjatapwa uñachtʼayi. Jupanakajj Diosar wal munasipjje ‘uruy arumaw’ servipjjaraki, Jesusarus munasipjjarakiwa (Apo. 7:9, 14, 15).

¹³ Jehová Diosajja, niyaw aka jan wali pachjja ‘jachʼa tʼaqhesiña’ urun tukjani (Mat. 24:21; Jeremías 25:32, 33 liytʼañataki). Niyakejjay Jehová Diosajj servirinakapar wal munaschejja, ‘jachʼa tʼaqhesiña’ urunjja jarkʼaqaniwa, ukatsti wiñay jakañwa jupanakar churarakini. Kunjamtï niya 2.000 maranak nayrajj mä profeciajj siskänjja, “Diosajj taqe jachanakapwa nayranakapatjja picharani, janirakiw jiwañas, jachañas utjkjjaniti, warariñasa ni usuyasiñasa”. Kunapachatï jan walinakasa, tʼaqhesiñasa, jiwañasa jan utj-jjani ukhajja, jakasiñajj wali sumapunïniwa (Apo. 21:4).

14. ¿Jehová Diosan Testigonakapajj qawqhanëjjapjjesa?

¹⁴ Qhepa urunakajj 1914 maran qalltkäna ukhajja, alajjpachar sarañataki ajllit cristianonakajj 5.000 ukhanikïpjjänwa. Jan walinakansa uñjasipkchïnjja, jaqe masipar munasipjjatap laykojj yatiyasipkakïnwa. Cheqas Diosan qollan ajayupaw yanaptʼaskäna. Ukham yatiyasitapatjja, jichhakamajj walja jaqenakaruw tantachthapisiski, jupanakajj wiñay jakañ katoqañwa suyasipki. Jichhürunakanjja, Jehová Diosan Testigonakapajj niya kimsaqallq millonäjjtanwa. Ukatsti 115.400 tamanakaw aka Oraqpachan utj-jjaraki. Cheqas Diosan markapajj ¡walipuniw jiljjattaski! Sañäni, 2013 septiembre phajjsit 2014 agosto phajjsikamajja, 275.500 jilat kullakanakaw bautisasiwayapjje. Sapa semanajj 5.300 jilat kullakas bautisasipkaspa ukhamawa.

15. ¿Kunas Diosan arunakap jaqenakar yatiyañatakejj yanaptʼistu?

¹⁵ Diosan Reinopat suma yatiyäwinakjja waljaniw istʼasipki, uk yatiñajj wali kusiskañapuniwa. Walja jaqenakaru purtʼañatakejja, Bibliat apstʼat qellqatanakaw yanaptʼistu, ukasti 700 jila arunakanwa utji. Amuytʼañataki, Oraqpachana yaqha qellqatanakajj lakiraski ukat sipansa, Yatiyañataki revistaw jilpach lakirasi. Sapa phajjsejj 52 millón jila revistanakaw 247 arunakan imprimisi. ¿Kunsa chiqpachapuni Bibliax yatichi? librojja, jichhakamajj 200 millón jilaw 250 arunakan imprimisiwayi.

16. ¿Kunatsa Jehová Diosan servirinakapajj jiljjattaski?

¹⁶ Jehová Diosan servirinakapajj Diosaruw iyawstanjja, ukatsti Bibliajj Jupan amuytʼayatäsin qellqatätapwa amuyaraktanjja, ukatwa jukʼampi jiljjattasktanjja (1 Tes. 2:13). Supayan  uñisitpachasa, arknaqatpachasa, Jehová Diosampejj sumwa apastanjja (2 Cor. 4:4).

17, 18. Jaqenakan jan istʼañ munatajja, ¿kun lurañassa Jehová Diosajj muni?

¹⁷ Yatiyir sarktan ukhajja, yaqhep jaqenakajj istʼapjjestuwa yaqhepasti janiraki. Jan istʼapkistu ukhajja, ¿kun lurañassa Jehová Diosajj muni? Jaqenakan kun luratpachasa, Bibliar istʼsna ukwa muni. Colosenses 4:6 qellqatajj akham siwa: “Parlatanakamasti sumäñapapuniwa jan khitirus coler churirjama, sapa mayniru kunjäm arusjjatañsa yatipjjañamarakiwa” sasa. Ukhamasti jaqe masisar munasitas laykojja, cheqa yatichäwinakjja ‘suma chuymampi’ respetompiw qhanañchañasa (1 Ped. 3:15).

¹⁸ Jaqenakajj jiwasatak colerapkchini ukhasa, cheqa yatichäwinak jan istʼañ munapkchistani ukhasa, Jesusat yateqasisaw munasiñampi jupanakar uñjañasa. Bibliajj Jesusat akham siwa: “Jan wali arunakampi toqepkän ukkhajja, janiw jupajj jan wali arumpiraki kuttʼaykänti; tʼaqhesiyapkän ukkhasti, janiw ‘suytʼam’ siskänti, jan ukasti cheqaparu taripir Diosaruw katuyänjja” sasa (1 Ped. 2:23). Ukhamajj jaqenakatï jiwasar jan walinak lurapjjestani ukhajja altʼat chuymanïñasawa, janiw kikpat kikpa kuttʼayañasäkiti. Jan ukasti aka ewjjarjamaw sarnaqañasa: “Jan ñanqhat ñanqhjja kuttʼayapjjamti, ni jan wali arut jan wali arsa kuttʼayapjjarakimti. Jan ukasti aski arumpi kuttʼayapjjam” sasa (1 Ped. 3:8, 9).

19. ¿Kunjamsa uñisirinakasar uñjañasa?

¹⁹ Altʼat chuymanïstan ukhajja, Jesusan aka arunakapar istʼañäniwa, jupasti sänwa: “Istʼapjjaraktawa kunatï satäkänsa ukjja: ‘Jaqe masimarojj munam, uñisirimarusti uñisirakim’ sasa. Ukampis nayajj sapjjsmawa: Uñisirinakamarojj munapjjam, maldecirinakamarojj bendecipjjam, uñisirinakamarusti aski lurapjjam, Diosat mayirapipjjarakim khitinakatejj jumanakar toqepktam, ukhamarak jan walinaks lurapktam ukanakatakisa. Ukhamatwa jumanakajj alajjpachankir Awkiman wawanakapäpjjätajja. Jupasti taqenitakiw intsa jalsuyani, ukhamarak aski jaqenakatakisa, jan aski jaqenakatakisa jallsa puriyaniraki” sasa (Mat. 5:43-45). Diosan servirinakapjamajja, uñisirinakasan jan wali uñjatpachasa jupanakar munasiskakiñasawa.

20. ¿Kunapachas taqe jaqenakajj Jehová Diosarusa jaqe masiparusa munasipjjani? (21 janankir foto uñjjattʼam.)

²⁰ Jehová Diosar munasitassa jaqe masisaru munasitassa taqe horasanwa uñachtʼayañasa. Jaqenakan uñisitpachasa, jan istʼañ munatpachasa, yanaptʼa munapkani ukhajj yanaptʼañasawa. Apóstol Pablojj akham sänwa: “Janipun khitirus manüpjjamti, jan ukasti jumanak pura munasiñanak manüpjjam. Jaqe masipar munirejja kuntejj leyejj siski ukwa phoqhe. Mandamiento arunakajj siwa: ‘Jan wachoqa juchjja luramti, jan jiwayamti, jan lunthatamti, jan jaqe masimaru kʼarintamti, jan jaqenkïri munapayamti’ sasa. Taqe aka mandamientonakajja yaqhanakamp kunajja, aka arunakwa phoqhasi: ‘Jaqe masimarojj juma kipkarjam munasim’ sasa. Maynitejj munasiñanïchejja, janiw kuna jan wals masiparojj lurkaspati, ukhamasti munasiñanwa leyejj sum phoqhasi” sasa (Rom. 13:8-10). Supayajja, jaqenakarojj jupanak pura uñisisipjjañapatakiw chʼamañchi, ukampis jiwasajj jaqe masisaruw munastanjja (1 Juan 5:19). Kunapachatï Jehová Diosajj Supayampiru, sajjranakapampiru, aka ñanqha pachampiru tʼunjani ukhajja, taqe jaqenakaw Jehová Diosarusa jaqe masiparus munasipjjani. Ukhaman jakasiñajj ¡mä suma bendicionapunïniwa!