1, 2. Ayat ni Bibel na dia do na mandok ringkot do patuduhon holong?

HOLONG do parange ni Debata Jahowa na umbalga. (1 Joh. 4:16) Marmiliar taon lelengna Jesus di surgo rap dohot Amana, jala marsiajar do ibana taringot holong ni Jahowa. (Kol. 1:15) Saleleng di tano on dohot di surgo dipatudu Jesus do holong. On paposhon rohanta molo Jahowa dohot Jesus tongtong do mamarenta di bagasan holong.

² Tingki sasahalak manungkun Jesus taringot parenta na umbalga, dialusi ma, ”Sihaholonganmu do Tuhan Debatam sian nasa ateatem, sian nasa hosam dohot sian nasa roham! I do patik raja jala parjolo. Alai dos do arga ni na paduahon on: Sihaholonganmu do donganmi doshon dirim!”—Mat. 22:37-39.

3. Ise do na digoari dongan?

³ Ringkot do patuduhon holong tu aleale. Jesus mandok ingkon tahaholongi do Jahowa dohot angka dongan. Alai, ise do na digoari dongan? Molo nunga marhasohotan hita, donganta na umsolhot, i ma tunggani doli manang  tunggani boru. Dung i, donganta sahuria dohot halak na tajumpangi tingki marbarita. Di artikel on, taparsiajari ma songon dia patuduhon holong tu angka dongan.

4. Songon dia do parsaripeon boi martua saonari?

⁴ Jahowa manompa si Adam dohot si Hawa gabe sada keluarga. On ma mula ni parsaripeon. Lomo roha ni Debata asa martua parsaripeon jala nasida marpinompari manggohi tano on. (1 Mus. 1:27, 28) Ala ndang dioloi nasida Jahowa, susa ma parsaripeon, mardosa jala mate ma nasida, songon i ma sahat tu pinomparna. (Rom 5:12) Nang pe songon i, boi do martua parsaripeon saonari. Di Bibel, dilehon Jahowa do poda na denggan tu tunggani doli dohot tu tunggani boru, ala Ibana do na manompa parsaripeon.—Jaha 2 Timoteus 3:16, 17.

5. Sadia ringkot do holong di parsaripeon?

⁵ Dipaboa do di Bibel, ringkot do patuduhon halambohon dohot holong asa martua paralealeon. Tontu, porlu do on di na mardongan saripe. Apostel Paulus manggombarhon holong na marsihohot. Ibana mandok, ”Na lambas do haholongon i jala na sorta, ndang na mangiburu haholongon i, ndang tenga jala ndang dipaburnangburnang dirina. Maradat situtu do haholongon i, ndang na ahut, ndang olo pangarimason, ndang dipajujurjujur na jahat. Ndang las rohana mida hageduhon; alai tongtong do dihalashon hasintongan i. Saluhut do ditanom rohana, saluhut do dihaporseai, dihirimi jala ditaon. Ndang na olo salpu haholongon i.” (1 Kor.13:4-8) Molo tarimangi jala taulahon ayat on martua ma parsaripeonta.

6, 7. (a) Aha do na didok Bibel taringot na manguluhon? (b) Songon dia do tunggani doli maradophon tunggani boruna?

⁶ Jahowa do na manontuhon ise manguluhon keluarga. Si Paulus patorangkon, ”Naeng ma botoonmuna di rohangku: Kristus i do ulu ni ganup baoa, baoa i do ulu ni boruboru; alai Debata do ulu ni Kristus i.” (1 Kor.  11:3) Jahowa mangido tu angka tunggani doli asa di bagasan holong manguluhon keluargana, unang ma kejam jala mura muruk. Jahowa ndang mangkaringkothon diriNa sandiri alai burju do tingki manguluhon naposoNa. Alani i, Jesus mangargai hak ni Debata mamarenta. Didok ibana ma, ”Holong do rohangku di Ama i.” (Joh. 14:31) Tontu, ndang dokkonon ni Jesus songon i molo mura tarrimas Jahowa.

⁷ Nang pe baoa na gabe ulu di borua, alai didok do di Bibel molo tunggani doli ingkon sangap tu tunggani boruna. (1 Ptr. 3:7) Songon dia do tunggani doli boi mangulahon on? Ingkon parrohahononna do aha na dihaporluhon tunggani boruna jala diargai na dipillitna. Dipaboa do di Bibel, ”Hamu angka baoa, haholongi hamu ma pardihutamuna be songon Kristus, na mangkaholongi huria i jala dilehon do dirina humongkopsa.” (Eps. 5:25) Jesus mangalehon ngoluna humongkop angka siihuthon ibana. Molo ditiru tunggani doli holong ni Jesus, mura ma tunggani boru patuduhon holong, pangargaion dohot sangap tu haputusan na dibahen ni tunggani doli.—Jaha Titus 2:3-5.

8. Songon dia do hita maradophon dongan sahaporseaon?

⁸ Saonari, marjuta halak di liat portibi on manomba Jahowa. Nasida, i ma angka donganta sahaporseaon. Songon dia do hita maradophon nasida? Disurat do di Bibel, ”Taulahon ma na denggan di saluhut halak, alai gumodang ma tu donganta sahaporseaon!” (Gal. 6:10; jaha Rom 12:10.) Apostel Petrus manurat molo ”marpangoloion di hasintongan” gabe tapatudu ma holong na marsihohot tu ”dongan”. Didok si Petrus do muse tu halak Kristen, “Alai di jolo ni saluhutna, masihaholongan situtu ma hamu.”—1 Ptr. 1:22; 4:8.

9, 10. Boasa boi marsada ni roha naposo ni Debata?

⁹ Tandi do punguan ni dongan sahaporseaonta di liat portibi on. Boasa? Ala tapatudu do holong na marsihohot tu angka dongan sahaporseaon. Alai na rumingkot, ala na tahaholongi do Jahowa, taulahon lomo ni rohaNa jala dilehon tu hita tondi parbadia. Tondi parbadia mangurupi hita marsada ni roha dohot dongan sahaporseaon di liat portibi on.—Jaha 1 Johannes 4:20, 21.

¹⁰ Si Paulus manjujui hita patuduhon holong maradophon dongan sahaporseaon. Ibana mandok, ”Solukkon hamu ma parasirohaon situtu, habasaron, haserepon, lambok dohot lambas ni roha!” Alani i, marpamuati ma hita tu donganta, songon Jahowa tu hita. Jala dipaboa ma muse asa tapatudu holong, ai i do ”rahutrahut ni nasa harimpason”. (Kol. 3:12-14.) Las ma rohanta, nang pe hita ro sian houm na marasingasing alai boi do hita marsada alani holong!

11. Aha do tanda ni organisasi ni Debata?

¹¹ Holong dohot sada ni roha na dipatudu ni naposo ni Jahowa gabe tanda molo nasida mangihuthon panombaon na sintong. Jesus mandok, ”Apala sian on ma tandaon ni halak saluhutna, hamu siseanku—molo masihaholongan hamu.” (Joh. 13:34, 35) Jala disurat  apostel Johannes muse, ”Disi do tanda anak ni Debata dohot anak ni sibolis: Ndang sian Debata ganup halak na so mangulahon hatigoran, jala na so marholong ni roha di donganna. Ai on do barita na binegemuna sian mulana: Ingkon masihaholongan hita.” (1 Joh. 3:10, 11) Holong dohot sada ni roha gabe tanda ni Sitindangi Ni Jahowa, jala nasida mamaritahon barita na uli taringot Harajaon ni Debata di liat portibi on.—Mat. 24:14.

12, 13. Aha do na diulahon punguan na balga i saonari, jala aha do na laho masa tu nasida?

¹² Saonari, godang do naposo ni Jahowa na ro sian marragam bangso parsidohot tu punguan na ”mansai torop” na digoari punguan na balga. Marsihohot do nasida tu Harajaon ni Debata. Nasida ”angka naung ro sian haporsuhon godang; nunga diburi nasida abitnasida jala dipasaksak di bagasan mudar ni Birubiru i” na patuduhon pangargaion tu tobusan ni Jesus. Halak na adong di punguan na balga on, mangkaholongi Jahowa dohot Jesus jala nasida manomba Jahowa ”arian dohot borngin”.—Pgk. 7:9, 14, 15.

¹³ Satongkin nai, ripashonon ni Debata do portibi na jahat di haporsuhon godang. (Mat. 24:21; jaha Jeremia 25:32, 33.) Alai, toguon jala ondinganNa do naposoNa sahat tu tano na imbaru. Gohan ni Debata ma janji na mandok, ”Apusan ni Debata ma nasa iluilunasida sian matanasida: Ndang adong be hamatean nang arsak ni roha; nang angguhangguk, nang na hansit, ndang disi be; ai nunga salpu na parjolo i!” Lomo do rohamu mangolu di Paradeiso na so adong be hajahaton, hasusaan dohot hamatean?—Pgk. 21:4.

14. Sadia torop do punguan na balga i nuaeng?

¹⁴ Taon 1914, marribu dope bilangan ni naposo ni Debata. Alai, punguan na metmet, i ma angka na nimiahan ni tondi, mamaritahon barita harajaon nang pe mangadopi hasusaan. On diulahon nasida alani holong dohot pangurupion ni tondi parbadia. Aha do labana? Dipapungu ma mansai torop halak na gabe punguan na balga. Nasida marpangkirimon mangolu salelengna di tano on. Nunga adong hirahira 8.000.000 Sitindangi Ni Jahowa di lobi sian 115.400 huria di liat portibi on. Jala tongtong do nasida martambatamba. Umpamana, lobi sian 275.500 Sitindangi Ni Jahowa tardidi di taon 2014. On patuduhon hirahira 5.300 halak na tardidi ganup minggu.

15. Songon dia do godang halak boi manangihon barita na uli?

¹⁵ Longang do rohanta mangida torop ni halak na manangihon barita na uli. Saonari, publikasi nunga diparade lobi sian 700 bahasa. Majalah Joujou Paboahon nunga disarhon di liat portibi on. Ganup bulan, lobi sian 52.000.000 dicetak di bagasan 247 bahasa. Jala buku na dipangke laho marsiajar Bibel, i ma buku Aha do na Diajarhon Bibel? nunga diterjemahon lobi sian 250 bahasa. Sahat tu tingki on, lobi sian 200.000.000 buku on dicetak.

16. Boasa organisasi ni Jahowa tongtong mambahen hamajuon?

¹⁶ Lam godang do hamajuon di organisasi ala marhaporseaon do hita tu Debata dohot tu hataNa, i ma Bibel. (1 Tes. 2:13) Alani i, tongtong ma las  rohanta mangulahon tudutudu sian organisasi ni Jahowa, nang pe mangadopi ambatambat ni Sibolis.—2 Kor. 4:4.

17, 18. Aha do na dihalomohon Jahowa tingki jumpangta halak na mangkasogohon barita na uli?

¹⁷ Marragam do pandapot ni halak taringot barita na uli. Adong do na olo manangihon alai na deba mangkasogohon. Aha do na dihalomohon Jahowa tingki taadopi sisongon i? Nang pe marragam pandapot ni halak, taihuthon ma poda na adong di Bibel. Dipaboa do di Bibel, ”Sai tong ma lambok hatamuna, songon na siniraan, asa botoonmuna alus na patut tu ganup jolma.” (Kol. 4:6) Tingki marbarita hita, ingkon ”mardongan lambok ni roha” jala taargai ma pandapot ni nasida. On ma tanda na tahaholongi angka dongan.—1 Ptr. 3:15.

¹⁸ Tingki adong halak na muruk jala ndang manjangkon barita na uli, tapatudu ma holong jala tatiru ma Jesus. Tingki marbarita Jesus ”ndang manginsahi Ibana, di na hona insak, ndang mangasupi, di na manaon na porsuk”. Alai, porsea do Ibana tu Jahowa. (1 Ptr. 2:23) Jadi, tingki marbarita taputudu ma serep ni roha jala taulahon ma poda na mandok, ”Unang ma baloshon hamu na jat alo ni na jat, panginsahion alo ni panginsahion; lam mamasumasu ma hamu.”—1 Ptr. 3:8, 9.

19. Songon dia do hita maradophon angka musu?

¹⁹ Serep ni roha mangurupi hita mangulahon prinsip na dilehon ni Jesus. Jesus mandok, ”Dibege hamu do hata na mandok: ”Holong ma roham di donganmi; hosom ma ia di musum!” Alai Ahu do mandok tu hamu: Holong ma rohamu di musumuna; tangiangkon hamu ma angka na paburuburu hamu. Asa tung gabe anak ni Amamuna na di banua ginjang i hamu: Ai dipabinsar do mata ni arina tu angka parroha na jahat nang tu na bonar, diparo do udan tu parroha na tigor nang tu na geduk.” (Mat. 5:43-45) Ingkon tahaholongi do musunta, nang pe dihasogohon hita.

20. Aha do na paposhon rohanta molo tano on laho digohi halak na masihaholongan? (Ida gombar di mula ni parsiajaran.)

²⁰ Di sude parngoluonta ingkon tapatudu do na tahaholongi Jahowa dohot dongan. Nang pe adong halak na so manjangkon barita na uli, alai taurupi ma nasida. Apostel Paulus manurat, ”Unang marutang hamu manang tu ise, dungkon ni ruhut masihaholongan; ai na mangkaholongi dongan, i do manggohi patik i. Ai na nidok ni patik i: ”Unang ho mangalangkup! Unang ho mambunu! Unang ho manangko! Unang marpangkaliangi roham!” Ro di nasa patik na asing, on do pamusatanna: ”Haholongi donganmi songon dirim!” Ia parholong ni roha, ndang diulahon na jahat tu angka dongan; asa haholongon ni roha i do tutu hagogok ni patik i.” (Rom 13:8-10) Nang pe gok hajahaton di portibi on, naposo ni Debata patuduhon holong tu angka dongan. (1 Joh. 5:19) Ripashonon ni Jahowa ma Sibolis, angka begu dohot angka parjahat, dung i digohi halak na masihaholongan ma tano on. Sada pasupasu do tingki sude jolma di portibi on mangkaholongi Jahowa dohot dongan!