1, 2. Paano ipinapahiling kan Kasuratan an kahalagahan kan pagkamuot?

AN PAGKAMUOT iyo an nangingibabaw na kuwalidad kan Diyos na Jehova. (1 Juan 4:16) An inot niyang linalang iyo si Jesus, na nakaibanan niya sa langit sa laog nin binilyon na taon asin nanudan kaini an saiyang pagigin mamumuton. (Col. 1:15) Sa bilog na buhay ni Jesus, kaiba na an buhay niya sa daga, ipinahiling niya na aram niyang marhay na sarong mamumuton na Diyos si Jehova, asin inarog niya an pagkamuot na iyan. Kaya, makakapagtiwala kita na daing sagkod na magigin mamumuton an pamamahala ni Jehova asin ni Jesus.

² Kan haputon kun arin an pinakaimportanteng tugon sa Katugunan, sinabi ni Jesus: “‘Kamutan mo si Jehova na saimong Diyos sa bilog mong puso asin sa bilog mong kalag saka sa bilog mong isip.’ Iyo ini an pinakaimportante asin inot na tugon. An ikaduwa, na kaagid kaiyan, iyo ini: ‘Kamutan mo an saimong kapwa nin siring sa saimong sadiri.’”—Mat. 22:37-39, NW.

3. Siisay an satong “kapwa”?

³ Mangnuhon na sinambit ni Jesus na panduwa sa pagkamuot ki Jehova an pagkamuot sa kapwa. Ipinapahiling kaini kun gurano  kaimportante na magpahiling nin pagkamuot sa gabos na klase nin relasyon niyato sa iba. Pero siisay an satong “kapwa”? Kun kita may agom, an pinakaharani tang kapwa iyo an satong agom. Harani man sa sato an mga tugang ta sa kongregasyon, an mga kapwa niyato parasamba sa tunay na Diyos. Mga kapwa man niyato an mga nanunumpungan ta sa ministeryo. Paano maipapahiling kan mga nagsasamba ki Jehova asin nagsusunod sa mga itinukdo kan saiyang Aki an pagkamuot sa kapwa?

4. Taano ta puwedeng magin mapanggana an relasyon nin mag-agom dawa bakong perpekto an mga tawo?

⁴ Linalang ni Jehova si Adan saka Eva asin kinasal niya sinda. Sinda an inot na mag-agom. An gusto ni Jehova, magkaigwa sinda nin maugma saka nagdadanay na relasyon bilang mag-agom asin panuon ninda an daga kan saindang mga aki. (Gen. 1:27, 28) Pero, naraot kan pagrebelde sa soberaniya ni Jehova an inot na relasyon nin mag-agom asin naipasa sa gabos na tawo an kasalan patin kagadanan. (Roma 5:12) Dawa arog kaiyan, sinasabi sa sato kan Kasuratan kun paano magigin mapanggana an relasyon nin mag-agom. Mababasa ta diyan an pinakamarahay na sadol dapit sa pag-aguman huling hali iyan ki Jehova, an Kag-establisar kan pag-aguman.—Basahon an 2 Timoteo 3:16, 17.

5. Gurano kaimportante sa relasyon nin mag-agom an pagkamuot?

⁵ Ipinapahiling kan Tataramon nin Diyos na mahalagang marhay an mainit asin hararom na pagkamuot tanganing magkaigwa nin maugmang relasyon an mga tawo. Totoo nanggad ini sa relasyon nin mag-agom. Isinurat ni apostol Pablo sa kongregasyon nin Corinto: “An pagkamuot mapasensiya asin mabuot. An pagkamuot bakong maurihon. Dai iyan naghahambog, dai nagigin mapalangkaw, dai minagawi nin bakong disente, dai naghahanap kan sadiring kapakanan kaiyan, dai napapaanggot. Dai iyan nagkukuwenta kan danyos. Iyan dai nag-uugma sa pagkabakong matanos, kundi nag-uugma sa katotoohan. Iyan nakakatios kan gabos na bagay, nagtutubod kan gabos na bagay, naglalaom kan gabos na bagay, nagtatagal kan gabos na bagay. An pagkamuot nungkang nasusudya.” (1 Cor. 13:4-8, NW) Kun huhurop-hurupon asin iaaplikar an ipinasabong na tataramon na ini, siguradong magigin mas maugma an relasyon nin mag-agom.

6, 7. (a) Ano an sinasabi kan Bibliya mapadapit sa pagkapayo? (b) Paano dapat trataron nin sarong Kristiyanong agom na lalaki an saiyang agom?

⁶ Mahihiling sa gabos na areglo nin Diyos an  prinsipyo nin pagkapayo, kaya lalo nang kaipuhan an pagkamuot. Sinabi ni Pablo: ‘Buot ko na maaraman nindo, na si Cristo an payo nin lambang lalaki, asin an lalaki iyo an payo nin babayi, an Diyos man iyo an payo ni Cristo.’ (1 Cor. 11:3) Pero dai dapat gamiton sa dominanteng paagi an pagkapayo. Halimbawa, ginagamit ni Jehova an pagkapayo niya ki Cristo sa mabuot saka bakong makasadiring paagi. Kaya iginalang ni Jesus an mamumuton na pagkapayo nin Diyos, asin sinabi niya: ‘Namumutan ko an Ama.’ (Juan 14:31) Posibleng marhay na bakong arog kaiyan an mamamatian ni Jesus kun nagin diktador o daing hirak an pagtratar ni Jehova sa saiya.

⁷ Dawa ngani an agom na lalaki an payo kan saiyang agom na babayi, pinagbubutan siya kan Bibliya na ‘tawan nin onra’ an agom na babayi. (1 Ped. 3:7, NW) Naipapahiling ini kan mga agom na lalaki pag kinokonsiderar ninda an mga pangangaipo asin an gusto kan saindang agom na babayi. Sa katunayan, sinasabi kan Bibliya: ‘Mga agom na lalaki, mamutan nindo an saindong sadiring mga agom na babayi, siring na si Cristo man namuot sa [kongregasyon] asin iinatang an saiyang [sadiri] huli kaiyan.’ (Efe. 5:25) Iyo, itinao ni Jesus sa saiyang mga parasunod dawa an saiyang buhay. Kun inaarog kan agom na lalaki an mamumuton na paggamit ni Jesus kan saiyang pagkapayo, mas madali para sa agom na babayi na kamutan saka igalang siya, asin magpasakop sa saiya.—Basahon an Tito 2:3-5.

8. Ano an dapat na mamatian kan lambang parasamba ni Jehova sa kapwa niya Kristiyano?

⁸ Minilyon sa bilog na daga ngunyan an nagsasamba ki Jehova asin nagpapatotoo dapit sa saiyang pangaran saka katuyuhan. Ano an dapat na mamatian kan lambang parasamba ni Jehova sa kapwa niya Saksi? An Bibliya nagsasabi: ‘Gumibo kita nin karahayan sa gabos na tawo, asin urog na sa mga kapagtubod.’ (Gal. 6:10; basahon an Roma 12:10.) Si apostol Pedro nagsurat: ‘Ngunyan na malinig na an saindong buhay huli sa pagkuyog sa katotoohan, dangan igwa na kamo nin tunay na pagkamuot sa kapwa nindo mga paratubod, magkaminuruot-muutan kamo nin udok sa puso.’ Sinabi pa ni Pedro sa saiyang mga kapagtubod: ‘Urog sa gabos, magkaminuruot-muutan nin udok sa puso.’—1 Ped. 1:22; 4:8, BPV. *

9, 10. Taano ta nagkakasararo an mga lingkod nin Diyos?

⁹ Huling namumutan tang marhay an mga kapwa niyato lingkod ni Jehova, daing kaagid an satong pambilog na kinaban na organisasyon. Saro pa, huling namumutan ta si Jehova asin kinukuyog an saiyang mga ley, tinatabangan niya kita paagi kan pinakamakapangyarihan na puwersa sa uniberso, an saiyang banal na espiritu, o aktibong puwersa. Pinapangyayari kaini na magkaigwa kita nin makangangalas na pagkasararo bilang sarong tunay na internasyonal na kasararuan nin magturugang.—Basahon an 1 Juan 4:20, 21.

¹⁰ Tanganing iduon na dapat kamutan nin mga Kristiyano an kada saro, si Pablo nagsurat: “Isulot nindo an mamumuton na mga pagmati nin pagmalasakit, kabuutan, kapakumbabaan, kahuyuan, asin pagpasensiya. Padagos na magin matinios sa kada saro asin magin lubos na mapagpatawad sa kada saro dawa kun an siisay man may dahilan na magreklamo tumang sa iba. Kun paanong lubos kamong pinatawad ni Jehova, dapat na arog man kaiyan an gibuhon nindo. Pero apuwera sa gabos na bagay na ini, isulot nindo an pagkamuot, huli ta iyan bugkos nin lubos na pagkasararo.” (Col. 3:12-14, NW) Nagpapasalamat nanggad kita na igwa kita nin pagkamuot—an “bugkos nin lubos na pagkasararo”—ano man an satong pinaghalian o nasyonalidad!

11. Ano an nagpapamidbid sa organisasyon ni Jehova?

¹¹ An tunay na pagkamuot asin pagkasararo an nagpapamidbid sa mga lingkod ni Jehova bilang  an tunay na relihiyon, huling sinabi ni Jesus: ‘Mamimidbid kamo kan gabos na kamo mga disipulo ko, kun kamo magkaminuruot-muutan.’ (Juan 13:34, 35) Isinurat man ni apostol Juan: ‘Digdi nahahayag an mga aki nin Diyos asin an mga aki nin Diyablo: An siisay man na dai naggigibo nin katanusan bakong [gikan] sa Diyos, ni an dai namumuot sa saiyang tugang. Huli ta ini iyo an [mensahe] na nadangog nindo magpuon pa sa kapinunan, na kita magkaminuruot-muutan.’ (1 Juan 3:10, 11) An pagkamuot na nagreresulta nin pambihirang pagkasararo tanda na an Mga Saksi ni Jehova tunay na mga parasunod ni Cristo, an banwaan na ginagamit ni Jehova para ihulit sa bilog na daga an maugmang bareta kan Kahadian.—Mat. 24:14.

12, 13. Ano an ginigibo ngunyan kan “dakulang kadaklan,” asin ano an madali na nindang maeksperyensiyahan?

¹² An mayoriya kan mga lingkod ni Jehova kabilang sa ‘sarong dakulang kadaklan na hali sa gabos na nasyon, asin sa gabos na tribo asin mga banwaan patin mga tataramon.’ Sinda ‘nagtitirindog sa atubangan kan trono [nin Diyos] asin sa atubangan kan Kordero [si Jesu-Cristo].’ Siisay sinda? ‘An mga ini iyo an nagharali sa dakulang kahurasaan, asin sinda naghugas kan saindang mga gubing, asin nagpaputi kaiyan sa dugo kan Kordero,’ paagi sa pagpahiling ninda nin pagtubod sa atang na pantubos ni Jesus. An mga kabilang sa nagdadakul na “dakulang kadaklan” namumutan si Jehova asin an saiyang Aki saka sagradong ‘naglilingkod sa [Diyos] aldaw asin banggi.’—Kap. 7:9, 14, 15.

¹³ Madali nang laglagon nin Diyos an maraot na kinaban na ini sa ‘dakulang kahurasaan.’ (Mat. 24:21; basahon an Jeremias 25:32, 33.) Pero huling namumutan ni Jehova an saiyang mga lingkod, ililigtas niya sinda bilang grupo asin palalaugon sinda sa saiyang bagong kinaban. Arog kan ihinula haros 2,000 na taon na an nakaagi, ‘papahidon [nin Diyos] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmundo, ni pagtangis, ni kulog.’ Gustong-gusto mo na daw na mabuhay sa Paraiso ‘pakalihis kan dating mga bagay’?—Kap. 21:4.

14. Gurano na ngunyan kadakula an dakulang kadaklan?

¹⁴ Kan magpuon an huring mga aldaw kan 1914, pipirang ribo sana an lingkod ni Jehova sa bilog na kinaban. Huli sa pagkamuot sa kapwa, asin sa tabang kan banal na espiritu nin Diyos, an dikit na natatada kan linahidan na mga Kristiyano nagmaigot na ihulit an maugmang bareta kan Kahadian. Bilang resulta, natitipon ngunyan an sarong dakulang kadaklan na may paglaom na mabuhay digdi sa daga. Mga 8,000,000 na an Saksi sa bilog na daga na nakaasosyar sa labing 115,400 na kongregasyon, asin padagos pa kitang nagdadakul. Halimbawa, labing 275,500 na bagong Saksi—mga 5,300 kada semana—an nabawtismuhan kan 2014 taon nin paglilingkod.

15. Gurano na kahiwas ngunyan an satong ginigibong paghuhulit kan Kahadian?

¹⁵ Pambihira nanggad kun gurano na kahiwas an satong ginigibong paghuhulit. Ipinupublikar na ngunyan sa labing 700 na lengguwahe an satong literatura na basado sa Bibliya. An Torrengbantayan iyo an magasin na may pinakamahiwas na sirkulasyon sa bilog na kinaban. Labing 52,000,000 na kopya an iniimprenta kada bulan, asin ipinupublikar iyan sa 247 lengguwahe. Labing 200,000,000 na kopya man kan Ano Man Nanggad an Itinotokdo kan Biblia?, an librong ginagamit ta sa pag-adal sa Bibliya, an naimprenta na sa labing 250 lengguwahe.

16. Taano ta padagos na nag-uuswag an daganon na kabtang kan organisasyon ni Jehova?

¹⁶ An pambihirang pag-uswag na nahihiling ta ngunyan resulta kan satong pagtubod sa Diyos asin lubos na pag-ako sa Bibliya bilang an ipinasabong na Tataramon ni Jehova. (1 Tes. 2:13) Lalo nang pambihira an pagigin abunda sa espirituwal kan banwaan ni Jehova sa ibong kan pagkaungis  asin pagkontra ni Satanas, an ‘diyos kan kinaban na ini.’—2 Cor. 4:4.

17, 18. Ano an dapat na magin pagtratar kan mga lingkod nin Diyos sa mga bakong kapagtubod?

¹⁷ Ano an dapat na magin pagtratar kan mga lingkod ni Jehova sa mga dai nagsasamba sa iyo sanang tunay na Diyos? Pag naghuhulit kita, manlain-lain an reaksiyon kan mga tawo—an iba nagdadangog, an iba naaanggot. Pero, ano man an reaksiyon ninda, sinusunod kan mga lingkod nin Diyos an sadol na ini kan Bibliya: “An saindong tataramon pirming magin mabuot, na tinimplahan nin asin, tanganing maaraman nindo kun paano nindo dapat simbagon an kada saro.” (Col. 4:6, NW) Pag idinedepensa niyato an satong pagtubod, ginigibo ta iyan “na may mahuyong buot asin hararom na paggalang” huling namumutan niyato an satong kapwa.—1 Ped. 3:15, NW.

¹⁸ Dawa kun maanggot sa sato an kagharong asin habuan niya an satong mensahe, ipinapahiling pa man giraray niyato an pagkamuot sa kapwa. Inaarog ta si Jesus: ‘Kan siya pinag-ulog-ulog, dai nagbalos na mag-ulog-ulog. Kan siya magtios, dai nagpatakot, kundi [ipinagkatiwala] an saiyang buhay [ki Jehova] na naghuhukom nin matanos.’ (1 Ped. 2:23) Kaya kapagtubod man o bako an kaiba niyato, ipinapahiling ta an kapakumbabaan asin inaaplikar an sadol na ini: ‘Dai kamo magbalos nin maraot sa naggibo saindo nin maraot, o mag-ulog-ulog sa nag-uulog-ulog sa saindo; kundi bendisyunan nindo sinda.’—1 Ped. 3:8, 9, BPV.

19. Anong prinsipyo an itinao ni Jesus manungod sa mga nagkokontra sa sato?

¹⁹ Huli sa pagigin pirming mapakumbaba, nasusunod kan banwaan ni Jehova an sarong mahalagang prinsipyo na itinao ni Jesus. Sinabi niya sa saiyang Sermon sa Bukid: ‘Nagkadarangog nindo na sinabi: “Kamutan mo an saimong kapwa, asin kaungisan mo an saimong kaiwal.” Alagad ako nagsasabi sa saindo: [Padagos] nindong kamutan an saindong mga kaiwal, asin ipamibi nindo an mga naglalamag sa saindo, tanganing kamo magin mga aki kan saindong Ama na nasa langit, huli ta pinapasirang niya an saiyang aldaw sa mga maraot asin sa mga marahay asin pinapauranan an mga matanos asin bakong matanos.’ (Mat. 5:43-45) Iyo, bilang mga lingkod nin Diyos, dapat tang manudan na ‘kamutan an satong mga kaiwal,’ ano man an magin pagtratar ninda sa sato.

20. Taano ta masisigurado niyato na mapapano nin pagkamuot sa Diyos asin sa kapwa an bagong kinaban? (Hilingon an ritrato sa kapinunan kan artikulo.)

²⁰ Sa gabos na panahon, dapat ipahiling kan mga lingkod ni Jehova sa saindang isip asin gibo na namumutan ninda si Jehova asin an saindang kapwa. Halimbawa, dawa kun an mga tawo kontra sa sato asin sa mensahe kan Kahadian, ipinapahiling ta an pagkamuot sa kapwa paagi sa pagtabang sa sainda pag nangangaipo sinda. Si apostol Pablo nagsurat: “Dai magkautang nin ano man sa kiisay man kundi kamutan an lambang saro; huling an siisay man na namumuot sa saiyang kapwa nakakautob na kan katugunan. Huli ta an mga tugon na ‘Dai ka magsambay, dai ka maggadan, dai ka maghabon, dai ka magin maaraon,’ asin an gabos na iba pang tugon, mabibilog sa arog kaining mga tataramon: ‘Kamutan mo an saimong kapwa nin siring sa saimong sadiri.’ An pagkamuot dai naggigibo nin maraot sa kapwa; kun siring, an pagkamuot iyo an kautuban kan katugunan.” (Roma 13:8-10, NW) Bilang mga Saksi ni Jehova, ipinapahiling ta an tunay na pagkamuot sa dai nagkakasararo, madahas, asin maraot na kinaban na ini na kontrolado ni Satanas. (1 Juan 5:19) Pag linaglag na si Satanas, an saiyang mga demonyo, asin an rebeldeng mga tawo, siguradong mapapano nin pagkamuot an bagong kinaban. Dakulaon na bendisyon nanggad kun an gabos na nakaistar sa daga namumutan an Diyos asin an saindang kapwa!