1, 2. ?Baebol i soemaot olsem wanem se lav i impoten?

LAV i stamba fasin blong Jehova God. (1 Jon 4:16) God i wokem Jisas Kraes fastaem long ol narafala samting. Jisas i spenem plante milian yia long heven wetem Papa blong hem, mo i luk olsem wanem Jehova i lavem ol narafala. (Kolosi 1:15) Jisas i soemaot sem lav ya long ful laef blong hem long heven mo long wol. Taswe yumi sua se oltaem rul blong Jehova mo Jisas bambae i soemaot lav.

² Taem wan man i askem long Jisas se wanem loa i hae moa, Jisas i talem se: “‘Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.’ Hemia nao loa ya we i hae moa long ol narafala loa, mo i nambawan blong folem. Mo narawan, we klosap i sem mak long hem, i talem se, ‘Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.’”—Matiu 22:37-39.

3. ?Hu ya “ol man we oli stap raonabaot” long yumi?

 ³ I impoten we yumi soemaot lav long olgeta man. Jisas i talem se yumi mas lavem Jehova mo ol man raonabaot long yumi. ?Be hu ya “ol man we oli stap raonabaot” long yumi? Sipos yumi mared, man we i stap raonabaot long yumi mo i klosap moa, hemia man no woman blong yumi. Mo tu, ol brata mo sista long kongregesen mo ol man we yumi prij long olgeta, oli ol man we oli stap raonabaot long yumi. Long stadi ya, bambae yumi tokbaot olsem wanem blong soemaot lav long ol man ya we oli stap raonabaot long yumi.

4. ?Olsem wanem man mo woman i save gat wan hapi mared, nating se tufala i sinman?

⁴ Jehova i wokem Adam mo Iv mo i joenem tufala long mared. Hemia nao fas mared. God i wantem se tufala i hapi mo tufala i gat plante pikinini blong fulumap wol ya. (Jenesis 1:27, 28) Be taem tufala i no moa obei long Jehova, tufala i no moa hapi long mared blong tufala. Mo tufala i pasem sin mo ded i kam long yumi evriwan. (Rom 5:12) Nating se i olsem, tede man mo woman i save gat wan hapi mared. Jehova we i Stamba blong mared, i givim ol nambawan advaes long Baebol, blong givhan long mared.—Ridim 2 Timoti 3:16, 17.

5. ?From wanem i mas gat lav insaed long mared?

⁵ Baebol i soemaot se man i mas gat lav, blong i save fren gud wetem ol narafala. Lav i mas stap insaed long mared tu. Aposol Pol i tokbaot tru lav, i se: “Man we i stap lavem man, tingting blong hem i longfala, mo hem i gat sore long man. Man olsem, hem i no save jalus, mo i no save mekem tingting blong hem i go antap, mo i no save flas. Hem i no save jikim man, mo i no save tingbaot hem nomo. Hem i no save kros kwik, mo i no save stap kros longtaem. Sipos hem i luk we wan narafala man i mekem i no stret, be hem i no save glad from, hem i save glad long ol trutok nomo. Hem i no save letem wan samting i daonem tingting blong hem, oltaem hem i stap bilif strong long God, mo i stap putum tingting blong hem i strong long hem. Maet bigfala trabol i save kasem hem, be tingting blong hem i no save foldaon. Fasin ya we oltaem man i lavem man, bambae i no save finis samtaem.” (1 Korin 13:4-8) Taem yumi tingting gud long ol tok blong Pol mo yumi folem, yumi save gat wan mared we i hapi.

6, 7. (1) ?Fas Korin 11:3 i talem se hu nao i hed blong narafala? (2) ?Kristin man i mas mekem wanem fasin long woman blong hem?

⁶ Jehova i jusum man nao blong i hed blong famle. Pol i talem se: “God, hem i hed blong Kraes, mo Kraes, hem i hed blong man, mo man, hem i hed blong woman blong hem.” (1 Korin 11:3) Be Jehova i wantem se taem man i mekem wok ya blong hed long famle, hem i no mas mekem i strong tumas long woman blong hem, be i mas lavem hem. Jehova i Hed long fasin we i kaen mo i tingbaot narafala. From samting ya, Jisas i respektem God se hem nao i Hed. Long Jon 14:31, Jisas i talem se: “Mi lavem Papa blong mi.” Jisas i no save harem olsem sipos Jehova i mekem i strong tumas long hem.

⁷ Nating se man i hed blong woman, be Baebol i talem se hem i mas ona long woman blong hem. (1 Pita 3:7) ?Olsem wanem hem i save mekem olsem? Hem i mas tingbaot samting we woman blong hem i nidim mo i laekem. Baebol  i talem se: “Yufala ol man we i mared, yufala i mas lavem ol woman blong yufala, olsem we Kraes i lavem jos [kongregesen] ya. Taswe hem i letem laef blong hem, blong sevem jos ya.” (Efesas 5:25) Jisas i ded from ol man blong hem. Man i mas lavem woman blong hem olsem we Jisas i lavem ol disaepol blong hem, we hem i hed blong olgeta. Sipos man i mekem olsem, bambae i isi moa blong woman i lavem mo i respektem hem, mo i folem ol desisen blong hem.—Ridim Taetas 2:3-5.

8. ?Yumi gat wanem tingting long ol brata mo sista blong yumi?

⁸ Tede, plante milian man long wol oli stap wosipim Jehova. Olgeta ya oli ol brata mo sista blong yumi. ?Yumi gat wanem tingting long olgeta? Baebol i talem se: “Yumi mas mekem i gud long olgeta man. Antap moa, yumi mas mekem olsem long olgeta ya we oli brata mo sista blong yumi from we olgeta tu oli bilif long Kraes.” (Galesia 6:10; ridim Rom 12:10.) Aposol Pita i talem se, from we yumi “obei long trutok,” yumi “lavem ol brata” blong yumi long fasin we yumi no giaman. Mo tu, Pita i talem long ol Kristin se: “Antap long ol narafala samting, yufala i mas lavlavem yufala.”—1 Pita 1:22; 4:8.

9, 10. ?From wanem ol man blong God oli joen gud?

⁹ Ogenaesesen blong yumi i defren long ol  narafala ogenaesesen long wol. ?From wanem? From we yumi lavlavem yumi long fasin we yumi no giaman. Samting we i impoten moa, se yumi lavem Jehova mo yumi obei long ol loa blong hem, nao hem i givim tabu spirit long yumi. Hemia wan paoa we i bigwan moa i bitim ol narafala samting long heven mo long wol. Spirit blong God i givhan long yumi blong yumi joen gud wetem ol brata mo sista long fulwol, long fasin we yumi no giaman.—Ridim 1 Jon 4:20, 21.

¹⁰ Pol i talem se ol Kristin oli mas lavlavem olgeta, i se: “Yufala i mas gat sore long ol man mo yufala i mas mekem i gud long olgeta. Tingting blong yufala i mas stap daon, mo yufala i mas kwaet man, mo tingting blong yufala i mas longfala. Yufala i mas givgivhan long yufala, mo taem wan long yufala i gat sam poen agens long narawan, tufala ya i mas fofogivim tufala. Yufala i mas fofogivim yufala, long sem fasin ya we Masta blong yumi i fogivim yumi. Mo wetem ol fasin ya, yufala i mas lavem ol man, from we fasin ya blong lavem man, hem i save joenemgud olgeta samting, blong oli kam wan.” (Kolosi 3:12-14) Yumi glad tumas se lav i “joenemgud” yumi, nomata se yumi kamaot long wanem kantri long wol.

11. ?Olsem wanem blong luksave ogenaesesen blong God?

¹¹ Taem ol man blong Jehova oli gat lav we i no giaman mo oli joen gud, hemia i soemaot se skul blong olgeta i tru. Jisas i talem se: “From we yufala i stap lavlavem yufala, bambae olgeta man oli luksave se yufala i man blong mi.” (Jon 13:34, 35) Mo aposol Jon tu i talem se: “Fasin blong man i stap soemaot i klia, se hu i pikinini blong God, mo hu i pikinini blong Setan. Man we i no stap mekem ol fasin we i stret, no we i no lavem Kristin brata no sista blong hem, hem i no pikinini blong God, hem i pikinini blong Setan. Tok we yufala i harem taem gud nius i kamtru long yufala fastaem, i talem se yumi mas lavlavem yumi.” (1 Jon 3:10, 11) Samting we i soemaot se ol Witnes blong Jehova oli man blong Kraes we God i stap yusum olgeta blong talemaot gud nius blong Kingdom long fulwol, hemia se oli gat lav mo oli joen gud.—Matiu 24:14.

12, 13. ?Tede olgeta long ‘bigfala kampani’ oli stap mekem wanem? ?I no longtaem, laef blong olgeta bambae i olsem wanem?

¹² Bighaf blong ol man blong Jehova tede oli joen long ‘bigfala kampani.’ Oli kamaot long ol defdefren kantri long wol, mo oli soemaot se oli sapotem Kingdom. Olgeta ya bambae oli laef tru long taem blong “bigfala trabol.” Oli soemaot se oli bilif long sakrefaes blong Jisas we i pemaot yumi. Hemia i olsem we “oli wasem ol klos blong olgeta finis long blad blong Smol Sipsip ya we i ded, blong mekem ol klos ya oli waet.” Olgeta long ‘bigfala kampani’ ya oli lavem Jehova mo Pikinini blong hem, mo oli wosipim Jehova “long dei mo long naet.”—Revelesen 7:9, 14, 15.

¹³ I no longtaem God bambae i spolem rabis wol ya, long taem blong “bigfala trabol.” (Matiu 24:21; ridim Jeremaea 25:32, 33.) Be  Jehova bambae i lukaot gud long ol man blong hem mo i lidim olgeta oli go long niufala wol, from we hem i lavem olgeta. Hem i mekem promes klosap 2,000 yia finis se, bambae hem “i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem.” ?Olsem wanem? ?Yu stap tingbaot taem ya we ol rabis fasin bambae i lus, ol man oli no moa harem nogud, mo ded i finis? ?Yu glad blong tingbaot taem ya we bambae yu laef long Paradaes?—Revelesen 21:4.

14. ?Tede i gat hamas man long bigfala kampani?

¹⁴ Long stat blong ol las dei long yia 1914, i gat samwe long 5,000 man blong Jehova nomo long wol. Tabu spirit i makemaot olgeta blong oli go long heven. From we smol grup ya i lavem ol man raonabaot long olgeta mo tabu spirit i givhan long olgeta, oli talemaot gud nius blong Kingdom nating se i no isi. ?Wanem frut i kamaot? Tede, plante man oli joen olsem wan bigfala kampani we bambae oli laef long wol blong olwe. I gat samwe long 8 milian Witnes blong Jehova long 115,400 kongregesen long wol, mo namba ya i stap kam bigwan moa. Long seves yia blong 2014, bitim 275,500 man oli baptaes blong kam ol Witnes blong Jehova. Hemia i min se i gat 5,300 man oli baptaes evri wik.

15. ?Plante man tede oli harem gud nius olsem wanem?

¹⁵ Yumi sapraes blong luk bigfala namba blong man we oli harem gud nius blong Kingdom finis. Tede ol buk blong yumi oli stap long bitim 700 lanwis. Buk we yumi seremaot moa long ol man, hemia Wajtaoa. Evri manis oli printim 52 milian Wajtaoa long 247 lanwis. Mo buk ya ?Wanem Samting We Baebol i Rili Tijim? we yumi yusum blong stadi wetem ol man, oli transletem i go long bitim 250 lanwis. Kam kasem naoia, oli printim 200 milian kopi blong buk ya.

16. ?From wanem ogenaesesen blong Jehova i stap kam bigwan moa?

¹⁶ Ogenaesesen blong Jehova i stap kam bigwan moa, from we yumi bilif long Jehova, mo yumi bilif se Baebol i kamaot long hem. (1 Tesalonaeka 2:13) Yumi stap harem gud long ol blesing blong Jehova, nating se Setan i no laekem yumi mo i agensem yumi.—2 Korin 4:4.

17, 18. ?Jehova i wantem se yumi gat wanem tingting long ol man we oli no wosipim hem?

¹⁷ Ol man we yumi prij long olgeta, oli gat defdefren tingting long wok blong yumi. Sam man oli lesin long yumi, be samfala oli no laekem ol tok we yumi talemaot. ?Jehova i wantem se yumi gat wanem tingting long ol man we oli no wosipim hem? Nating se oli lesin no oli no lesin, be yumi folem ol advaes long Baebol, we i talem se: “Yufala i mas toktok gud long olgeta, long ol tok we olgeta oli save glad long hem. Mo yufala i mas save rod blong givim ansa long evri man, we i stret gud long olgeta evriwan.” (Kolosi 4:6) Taem yumi eksplenem bilif blong yumi long ol man, yumi mas “toktok gud long olgeta” mo yumi ona long olgeta. Yumi mekem olsem from we yumi lavem ol man we oli stap raonabaot long yumi.—1 Pita 3:15, 16.

¹⁸ Nating se ol man oli kros mo oli no wantem lesin, i gud yumi folem eksampol blong Jisas mo yumi soemaot se yumi lavem ol man we oli stap raonabaot long yumi. Taem ol man oli tok nogud long Jisas, “hem i no tok nogud bakegen long olgeta. Taem oli mekem hem i harem nogud tumas long bodi blong hem, hem  i no talem se bambae i givimbak fasin ya long olgeta.” Be hem i trastem Jehova. (1 Pita 2:23) Taswe, oltaem yumi mekem tingting blong yumi i stap daon, mo yumi folem advaes ya se: “Sipos man i mekem i nogud long yufala, bambae yufala i no givimbak long hem bakegen. Taem man i tok nogud long yufala, bambae yufala i no tok nogud long hem bakegen. Yufala i mas askem long God blong hem i mekem i gud long ol man olsem.”—1 Pita 3:8, 9.

19. ?Yumi mas mekem olsem wanem long ol enemi blong yumi?

¹⁹ Sipos yumi gat tingting daon, bambae yumi obei long impoten advaes ya we Jisas i givim, se: “Yufala i harem finis we ol tija oli talem bifo se, ‘Yu mas lavem ol man we oli stap raonabaot long yu, be yu mas agensem ol enemi blong yu.’ Be mi mi talem long yufala, se yufala i mas lavem ol enemi blong yufala, mo yufala i mas prea from olgeta we oli stap mekem i nogud tumas long yufala. Long fasin ya, bambae yufala i soemaot we yufala i pikinini blong Papa blong yufala long heven, from we hem i stap letem san blong hem i saen long ol gudfala man, mo long ol man nogud long sem mak nomo. Mo hem i stap sanem ren i kam long ol man we laef blong olgeta i stret, mo long olgeta we laef blong olgeta i no stret tu.” (Matiu 5:43-45) From we yumi man blong God, yumi mas lavem ol enemi blong yumi, nating se oli mekem i nogud long yumi.

20. ?Olsem wanem yumi save se long fiuja, olgeta man long wol bambae oli lavem God mo ol man raonabaot long olgeta? (Yu luk pija long stat blong stadi.)

²⁰ Oltaem yumi mas soemaot se yumi lavem Jehova mo ol man we oli stap raonabaot long yumi. Nating se sam man oli agensem yumi mo oli no wantem lesin long ol tok we yumi talemaot, be taem oli sot long wan samting, yumi givhan long olgeta. Aposol Pol i talem se: “I nogud yufala i gat kaon long sam man. Be i gat wan samting i stap we yufala i mas mekem, we i olsem kaon blong yufala. Hemia we yufala i mas laeklaekem yufala. Sipos wan man i stap laekem tumas ol man we oli stap raonabaot long hem, man ya, hem i folem evriwan blong Loa ya we God i givim. I gat ol loa ya oli stap, we oli talem se ‘Bambae yu no stilim woman. Bambae yu no kilim man. Bambae yu no stil. Bambae yu no wantem ol samting blong narafala man.’ Ol loa ya, mo plante narafala loa bakegen, be i gat wan loa nomo we hem i kavremap olgeta. Hemia loa ya we i talem se ‘Yu mas laekem tumas ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu nomo.’ Sipos wan man i laekem tumas ol man we oli stap raonabaot long hem, bambae hem i no save mekem i nogud long olgeta. From samting ya, man we i laekem ol man, hem i folem Loa blong God.” (Rom 13:8-10 Nyutesteman Wetem Ol Sam Long Bislama) Long rabis wol ya we Setan i rul long hem, ol man oli seseraot mo oli kilkilim olgeta. Be ol man blong God oli lavem ol man we oli stap raonabaot long olgeta, long fasin we oli no giaman. (1 Jon 5:19) Afta we Jehova i spolem ol rabis man mo Setan wetem ol rabis enjel blong hem, bambae i gat lav long fulwol. Bambae i wan bigfala blesing taem evriwan long wol oli lavem Jehova mo ol man raonabaot long olgeta.