1, 2. Tusi Hmitrötr a amamane tune kaa ka hape, ka nyipiewekë la ihnim?

IHNIMI la thiina ka sisitria i Iehova. (1 Ioane 4:16) Pine laka Iesu la hna pane xup hnei Iehova, haawe, hnei nyidroti hna ce mel e koho hnengödrai a traqa koi itre miliar lao macatre. Öhne hnyawa hi Iesu e cili laka, ka tru ihnimine lae Iehova. (Kolose 1:15) Hnei Iesu pë hë hna melëne la thiina cili e koho hnengödrai me e celë fen. Haawe, tha tro kö sa luelue laka, tro pala kö la ihnim a nyitrepene la aqane musi Iehova me Iesu.

² Ame lo kola hnyingëne koi Iesu hnene la ketre atr ekö ka hape, nemene la wathebo ka sisitria, öni Iesu jë hi: “Tro eö a aja Joxu Akötesi ’ö hnene la hni’ö ka pexej, me u i ’ö ka pexej, me mekune i ’ö ka pexej. Celë hi wathebo ka tru nge hnapan. Nge ame la hnaaluen, te, tune mina hi, ka hape, Tro eö a hnime la ate lapa eashenyi ’ö tui eö hi.”—Mataio 22:37-39.

3. Drei la atr ‘lapa easenyi’ së?

³ Nyipiewekë catre tro sa amamane la ihnimi së kowe la itre atr  hne së hna ce mele memin. Öni Iesu lo ka hape, qa së troa hnimi Iehova me itre ka lapa easenyi së. Ngo drei la atr ‘lapa easenyi’ së? Maine ka faipoipo epun, kola qaja la föe maine trahmanyi epun. Kolo fe a qaja la itre trejin e hnine la ekalesia, memine fe la itre atr hne së hna cainöje kow. Ame ngöne la tane mekune celë, tro sa ce wange la aqane tro sa amamane la ihnimi së kowe la atr lapa easenyi së.

4. Hnei nemene matre ijije pala hi troa tro loi la faipoipo?

⁴ Hnei Iehova ekö hna acasi Adamu me Eva ngöne la faipoipo. Celë hi pane faipoipo lai hna acil. Ame lo aja i Akötresie koi nyidro lue trefën, tre ene la troa tro loi la mele i nyidro, nge tro fe nyidroti a atiqane la fen hnene la itre nekö i nyidro. (Genese 1:27, 28) Ngazo pe, thupene la hnei nyidroti hna eni wathebo, saze pi hi la mele nyidro lue trefën, nge goi traqa fe la ngazo me mec koi së, itre matra i nyidro. (Roma 5:12) Eloine pe, ijije pala hi enehila troa tro loi la mele ne la lue trefën. Nge pine laka Iehova la qaane la faipoipo, haawe, hnei Nyidrëti hna hamëne ngöne la Tusi Hmitrötr la itre eamo ka nyipi lolo kowe la lue trefën.—E jë la 2 Timoteo 3:16, 17.

5. Pine nemene matre ka nyipiewekë la ihnim e hnine la faipoipo?

⁵ Tusi Hmitrötr a amamane hnyawa ka hape, nyipiewekë catr e troa jui me keukawahnine la ihnimi së koi itre xan. Nga the qaja pala ha e hnine la faipoipo! Hnei Paulo aposetolo hna qejepengöne la nyipi ihnim me hape: “Ihnimi la ate xome ahoeane me ka menyik ; tha ate ikucanyi kö la ihnim ; tha ate selëne kö la ihnim, nge tha ate pi tru kö, tha thina ka qali kö, tha ate thele ewekë i nyëne kö, tha ate canga elëhni kö, tha ate meku ngazo kö ; tha ate madine kö la thina ka tha meköti, ngo ate madine la nyipici ; ate juetëne la nöjei ewekë asë, ate kapa la nöjei ewekë asë, ate mejiune la nöjei ewekë asë, ate xomi hnine la nöjei ewekë asë. Tha tro kö a ase la ihnim.” (1 Korinito 13:4-8) Maine tro epon, lue trefën a lapa mekune hnyawa me trongëne la hna qaja hnei Paulo, eje hi laka, tro hë epone lai a mele madrin.

6, 7. (a) Nemene la hna qaja hnei Tusi Hmitrötr koi itre ka trene mus? (b) Nemene la aqane tro la trahmanyi a ujë kowe la föe hmunë?

⁶ Ase hë Iehova acile la atr ka troa musi ngöne la hnepe lapa. Öni Paulo: “Ajange tro nyipunie a ate laka, Keriso la he ne la nöjei trahmany ; nge trahmanyi la he i fö ; nge Akötesieti la he i Keriso.” (1 Korinito 11:3) Ngo, aja i Iehova tro la itre trahmanyi a ihnim ngöne la aqane tro angatr a mus. Tha tro pi kö angatr a qanangazone me ithanata akökötrenyi kowe la hnepe lapa. Hnei Iehova hna amamai tulu, ke ka menyik Nyidrëti nge ka imeku. Nemene ju hë la thangan? Hnei Iesu hna metrötrëne la musi Iehova me hape: “Ini a hnine la Tetetro.” (Ioane 14:31) Tha hnei Iesu fe kö hna mekune ka hape, ka catrehnine catre pala ha la aqane musi Iehova.

⁷ Ngacama trahmanyi la he ne la föe, ngo Tusi Hmitrötr a upi angeic troa metrötrëne hnyawa la föe. (1 Peteru 3:7) Troa mama  tune kaa? Loi e tro angeic a mekune hnyawa la hna ajan hnei föe me nyipiewekën. Öni Tusi Hmitrötr mina fe: “Ange trahmany hnimeju la ite fö’ i nyipunie, tune lo hnei Keriso hna hnime la ekalesia, me hamë nyidëti kö thatraqan’ ej.” (Efeso 5:25) Hnei Iesu lo hna meci pine la itretre drei nyidrë. Haawe, maine ka tru ihnimi ne la trahmany tui Iesu, tha jole kö koi föe troa hnime me metrötrëne la föi angeic, me sajuëne la itre mekune hna axecien hnei trahmany.—E jë la Tito 2:3-5.

8. Nemene la aqane tro sa ujë kowe la itre trejin?

⁸ Ala nyimu catre enehila la itre atr ka nyihlue i Iehova e cailo fen. Angatre hi la itre trejin me easë. Nemene la aqane tro sa ujë koi angatr? Tusi Hmitrötr a upi së me hape: “Tro sha kuca la loi kowe la nöjei ate asëjëihë . . . ngo sisitia kowe la nöjei ate ne la lapa i angete lapaun.” (Galatia 6:10; e jë la Roma 12:10. *) Hnei Peteru mina fe hna cinyihane ka hape, hnene la aqane drengethenge së la nyipici, haawe, tro ha mama ‘la ihnimi ka pë thoi ngön the së, itre tejin.’ Hnei Peteru fe hna ahnithe kowe la itre pane keresiano ka hape: “Hune la nöjei ewekë asëjëihë tro nyipunie a ihnimikeu cat.”—1 Peteru 1:22; 4:8.

9, 10. Pine nemene matre ka casi la itre hlue i Iehova?

 ⁹ Pëkö ketre organizasio e cailo fen ka tune la organizasio së. Pine nemen? Pine laka, ka jui me ka keukawahnine la ihnim ka eje the së, itre trejin. Ketre, easë asë hi a hnimi Iehova me trongëne la itre hna amekötine hnei Nyidrë. Matre Nyidrëti a xatua së jëne la men ka pë sane i Nyidrë, ene la uati hmitrötr. Ej a xatua së matre tro sa casi memine la lapa i ange trejin asë e cailo fen.—E jë la 1 Ioane 4:20, 21.

¹⁰ Hnei Paulo fe hna amexeje la enyipiewekëne la ihnim thene la itre keresiano. Öni angeic: “xetëneju nyipunie la ihnimi ka tru, me utipin, me thina ka loi, me hni ka ipië, me thina ka menyik, me xomi hni ahoeany, tui ange hna iëne hnei Akötesie ange ka hmitöte me hnimina ; loi e ixomi hninekeune me inuekeune nyipunie, maine hete gele i kete ate koi kete ; hna nue nyipunie hnei [Iehova, MN], kete tro nyipunie a tun. Nge ihnimi e hune la nöjei ewekë celë asë, celë hi otene ka nyipi loi.” (Kolose 3:12-14) Ngacama isa pengö së kö, ngo hetrenyi the së la nyipi ihnim. Haawe, loi e tro sa olene la manathithi ka tru cili, la “otene ka nyipi loi,” ene la ihnim!

11. Nemene la hatrene la itre nyipi keresiano?

¹¹ Kola anyipicine hnene la ihnimi me casi ka eje thene la itre hlue i Iehova laka, thei angatre la nyipi hmi. Öni Iesu: “tro nöjei ate asëjëihë a wangate hmekune laka itete dei ni nyipunie, e tro nyipunie a ihnimikeu.” (Ioane 13:34, 35) Nge hnei Ioane Aposetolo mina fe hna cinyihane ka hape: “Mamapi la ite nekö i Akötesie, me ite nekö i diabolo ngöne laka tha qa thei Akötesieti kö la ate tha kuca kö la thina ka meköt, memine la ate tha hnime kö la tejine me angeic. Ke dei lola wesi ula hnei nyipunie hna denge qa ngöne la qane laka qa shë troa ihnimikeu.” (1 Ioane 3:10, 11) Haawe, mama hnyawa pi hi ka hape, Itretre Anyipici Iehova hi la itre nyipi keresiano, nge angatre hi la itre hna upe hnei Akötresie troa cainöjëne la Baselaia i Nyidrë e cailo fen.—Mataio 24:14.

12, 13. Nemene la hna kuca enehila hnene la “ka ala nyimu atraqat”? Nemene la hnei angatr hna trengeneun?

¹² Ala nyimu catre kö thene la itre hlue i Iehova la itre ka sine la lapa ne la “ka ala nyimu atraqat.” Angatr a traqa qa ngöne la itre nöje ka nyimutre, nge angatr a catre sajuëne la itre huliwa ne la Baselaia. ‘Angatre hi la angetre tropi qa ngöne la akötr atraqat, nge angatr a hnea la itre ixete i angatr, me awiën’ it’ eje ngöne la madra ne la Arenio.’ Kolo lai a hape, angatr a amamane la lapaune i angatr kowe la thupene mel. Nge tru la ihnimi angatr koi Iehova me Iesu, nge tha mano kö angatr nyihlue i Akötresie e “lai me jidi.”—Hna Amamane 7:9, 14, 15.

¹³ Easenyi hë matre apatrene pi Akötresieti la fene celë ngöne la ijine “aköte atraqate.”  (Mataio 24:21; E jë la Ieremia 25:32, 33.) Ngo tro kö Nyidrëti a amelene la itre hlue i Nyidrë me lö sai angatr kowe la Paradraiso, ke tru la ihnimi Nyidrë koi angatr. Nge tro ha eatr e cili lo hna thingehnaean ekö ka hape: “Tro [Iehova] a köle tije la nöjei tenge timida asëjëihë qa ngöne la ite lue meke i angat ; nge pa hmaca kö mec ; me hace hni me teij, me aköt.” Hapeu, eö fe kö a hane trengeneun troa mel elanyi ngöne la Paradraiso laka, pë hmaca kö akötr me mec?—Hna Amamane 21:4.

14. Nemene la etrune la itre atrene la “ka ala nyimu atraqat”?

¹⁴ Qaane lo 1914, ijine kola nyiqaane la itre drai ne la pun, xalaithe hi la itre hlue i Iehova. Hnene la ixatua ne la uati hmitrötr, memine la ihnimi angatr kowe la atre lapa easenyi angatr, matre hnene la itre trejin cili hna iën hna catre cainöjëne la maca ne Baselaia, ngacama traqa ju hë la itre jol koi angatr. Nemene ju hë la thangane lai? Hna acasine la “ka ala nyimu atraqat,” itre ka mejiune troa mel e celë fen. Enehila kola e la ala 8 000 000 lao itretre Anyipici Iehova ngöne la 115 400 nge hetre munën lao ekalesia e cailo fen. Ngo tro pala kö a kökötre la nöje i Iehova. Hanawange la hna e kowe la macatre 2014: ase hë sasaithe la 275 500 lao atr ka xomi bapataiso lo macatre cili. Kösë ala 5 300 lao atr hna bapataison e nöjei wiik.

15. Nemene la hna kuca göi troa drenge la maca ne Baselaia?

¹⁵ Nyine haine la etrune la itre atr ka drenge hë la maca ne Baselaia. Ketre, ijije hë troa e la itre itusi së ngöne la 700 lao qene lapa. Nge pëkö ketre zonal e cailo fen ka atreine weje la etrune la itre Ita Ne Thup hna fejan. Ase hë sasaithe la 52 milio lao Ita Ne Thup hna fejan e nöjei treu ngöne 247 lao qene lapa. Nge ame pena lo itusi së, Nemene La Nyipi Ini Hna Hamën Hnei Tusi Hmitrötr? tre, hna ujëne ngöne la 250 lao qene lapa, nge hna fejane hë la itusi cili koi 200 milio.

16. Pine nemene matre kolo pala hi a kökötre lolo la organizasio i Iehova?

¹⁶ Kolo pala hi a kökötre lolo la organizasio i Iehova, pine laka easa mejiune koi Nyidrë me kowe la Wesi Ula i Nyidrë, ene la Tusi Hmitrötr. (1 Thesalonika 2:13) Nge ketre, Iehova pala hi a amanathithi së ngacama catrehnine catre la icilekeu me imethinë i Satana.—2 Korinito 4:4.

17, 18. Nemene la aqane tro sa ujë kowe la itre ka xele ma kepe së?

¹⁷ Isapengöne kö la aqane ujë ne la itre atr kowe la maca hne së hna tro fë. Itre xan a kapa, nge itre xan a thipën. Nemene la aqane tro sa ujë kowe la itre ka xele ma kepe së? Kapa ju hë lai atr maine thipëne pena, ngo qa së troa trongëne la hna amekötine hnei Tusi Hmitrötr. Kola hape: ‘Loi e ewekë pala hi nyipunie memine la ihnim, hna aloine hnei sootr matre, hnyapa e troa kapa.’ (Kolose 4:6) Pine laka easa hnime la itre atr, haawe ame ngöne la nöjei ijine easa catre fë la itre ini hne së hna mejiune kow, loi e tro pala hi sa ithanata koi angatr cememine “la menyike me qou.”—1 Peteru 3:15.

¹⁸ Wesitre ju hë maine thipëne pena la itre atr la maca ka loi, ngo tui Iesu, loi e tro pala hi a mama la ihnimi së koi angatr. Ame lo kola qaqa Iesu ekö, tha ‘hane kö nyidrë iqaqa ; hnei nyidrëti hna akötr ; ngo tha hna thele kö troa të.’ Hnei Iesu pe hna catre mejiune koi Iehova. (1 Peteru 2:23) Haawe, maine traqa ju koi së la nöjei pengöne ewekë, loi e tro sa ipië me trongëne la eamo celë, ka hape: ‘The  të kö la ngazo hnei ngazo, me iqaqa hnei iqaqa, ngo amanathithine pe.’—1 Peteru 3:8, 9.

19. Nemene la aqane tro sa ujë kowe la itre ithupëjia me easë?

¹⁹ Maine hetrenyi së la ipië, tro së lai a canga trongëne la eamo i Iesu. Öni nyidrë: “Dengë hë nyipunie lo hna qaja, ka hape, Hnimeju eö la ate lapa eashenyi ’ö,’ nge xelenejë la ithupëjia me eö; ngo ini pe a qaja koi nyipunie, ka hape, Hnimeju la ite ithupëjia me nyipunie, qeje tenge ka loi ju koi angete ëji nyipunie; kucajë la loi koi angete methinë nyipunie; nge thithiju thatraqai angete qaqa me axösisi nyipunie; mate itete neköne nyipunie me Tetetro i nyipunie e koho hnengödrai; ke anganyidëti a axulune la jö i anganyidë hune la nöjei ka ngazo me ka loi, me upe la manie kowe la nöjei ka meköti me ka tha meköti kö.” (Mataio 5:43-45) Pine laka itre hlue i Akötresieti së, qa së asë hi troa hnime la itre ithupëjia me easë, ngacama ngazo catre ju hë la aqane ujë i angatr koi së.

20. Hne së hna atre tune kaa ka hape, tro ha lapane la fen hnene la ihnimi koi Akötresie me kowe la itre atr? (Wange ju la pane iatr.)

²⁰ Loi e pëkö drai gufa hne së hna tha amamane la ihnimi së koi Iehova, me kowe la atre lapa easenyi së. Ngacama icilekeu ju hë me easë hnene la itre atr, maine xelene pena angatr la maca hne së hna tro fë, ngo qa së troa xatua angatr ngöne la angatr a aja ixatua. Hna cinyihan hnei Paulo aposetolo ka hape: “The xome umuthe kö la ewekë i kete ate, ngo loi pe la ihnimikeu ; ke kola aeatene la wathebo hnei angeice ate hnime la kete. Nge dei la, ka hape, ‘The tro kö eö a kuci ngazo, The tro kö eö a ihumuth, The tro kö eö a ënö, The tro kö eö a meciun ;’ nge maine hete kete wathebo, ej’ e hnine la tenge ewekë celë, ka hape, ‘Tro eö a hnime la ate eashenyi ’ö tune lo eö hi :’ Ame la ihnimi, tha ate angazone la ate easheny ; ke ihnimi la ate aeatene la wathebo.” (Roma 13:8-10) Ame ngöne la fene i Satana enehila ka iangazo nge ka iakötrë, hetrenyi la itre hlue i Akötresie, itre ka hnime la itre ka lapa easenyi angatr. (1 Ioane 5:19) Ase jë hi Iehova apatrene triji elanyi la fene celë me Satana, me itre dremoni, tro ha lapane asë la fene hnengödrai hnene la ihnim. Ketre manathithi ka tru elanyi e tro la itre atr a hnimi Iehova me itre ka lapa easenyi angatr!