1, 2. Baibel ese edena dala ai lalokau ia herevalaia?

LALOKAU be Iehova Dirava ena kara badana. (1 Ioa. 4:16) Ia havaraia tauna ginigunana be Iesu. Ia be lagani bilioni momo Dirava ida guba dekenai ia noho bona ena lalokau karadia ia dibaia. (Kol. 1:15) Iesu be guba ai bona tanobada ai ia noho neganai, ia diba Iehova be lalokau Diravana bona unai kara ia tohotohoa. Unai dainai ita diba Iehova bona Iesu be lalokau dalanai do idia lohia ela bona hanaihanai.

² Iesu idia nanadaia edena taravatu be hereadae neganai, ia gwau: “‘Namona be Iehova emu Dirava oi lalokau henia mai emu kudouna ibounai, mai emu mauri ibounai, bona mai emu darana ibounai ida.’ Unai taravatu be hereadae bona ia be ginigunana. Iharuana be inai: ‘Namona be emu dekena tauna oi lalokau henia, oi sibona oi lalokau henia hegeregerena.’”—Mat. 22:37-39.

3. Daika be iseda “dekena tauna”?

³ Iseda hetura karana lalonai lalokau ita hahedinaraia be gau badana. Iesu ia gwau namona be Iehova ita lalokau henia, bona iseda dekena tauna danu. To daika be iseda “dekena tauna”?  Bema ita be headava taudia, iseda dekena tauna be iseda adavana. Kongrigeisen lalonai idia noho tadikaka taihu danu be iseda dekena taudia. Bona haroro gaukara ai ita davaria taudia danu. Inai stadi ai, ita ese iseda dekena taudia dekenai lalokau ita hahedinaraia dalana do ita herevalaia.

4. Herevana ita be goevadae lasi, to dahaka dainai headava ia namo diba?

⁴ Iehova ese Adamu bona Heva ia hatamonaia karana amo headava ginigunana ia hamatamaia. Ia ura do idia moale bona natudia idia havaraia bona tanobada idia hahonua. (Gen. 1:27, 28) To Iehova idia gwau-edeede henia murinai, edia headava ia dika, bona ita ibounai dekenai kara dika bona mase idia henia hanai. (Roma 5:12) To hari headava ia namo diba. Baibel lalonai, Iehova, headava ia Hamatamaia Tauna, ese headava tau bona hahine dekenai sisiba namona ia henia.—2 Timoteo 3:16, 17 duahia.

5. Dahaka dainai headava lalonai lalokau ia noho be gau badana?

⁵ Baibel ese ia hahedinaraia ita moale totona ita huana lalokau ia noho be namo. Headava lalonai unai be momokani. Aposetolo Paulo ese lalokau korikorina ia herevalaia, ia gwau: “Lalokau be ia boga-auka, bona ia hebogahisi. Lalokau be ia mama lasi, ia heagi lasi, bona ia hekokoroku lasi. Lalokau be dala kererena ai ia kara lasi, ia be sibona ena namo ia tahua lasi, bona ia badu haraga lasi. Bona ia be ta ena kerere ia laloatao noho lasi. Lalokau be kara maoromaoro lasi karana ia moalelaia lasi, to hereva momokani ia moalelaia. Lalokau be gau ibounai dekenai ia gini goada, gau ibounai ia abidadama henia, gau ibounai lalonai ia be mai ena helaro, bona gau ibounai ia haheaukalaia. Lalokau be ia ore diba lasi.” (1 Korinto 13:4-8) Paulo ena hereva ita laloa bona badinaia neganai, iseda headava do ita moalelaia.

6, 7. (a) Baibel ese kwara dagina be edena bamona ia herevalaia? (b) Tau ese edena dala ai ena adavana do ia kara henia?

⁶ Iehova ese ruma bese ena kwarana ia abia hidi. Paulo ia gwau: “Lau ura umui diba, tatau ibounai edia kwarana be Keriso, hahine ena kwarana be tau, bona Keriso ena kwarana be Dirava.” (1 Kor. 11:3) Ena be tau be hahine ena kwarana, to ia ese hahine do ia biagua auka lasi. Hegeregere, ena be Iehova be Keriso ena Kwarana, to mai hebogahisi  ida ia kara, bona sibona ena namo ia laloa lasi. Unai dainai Iesu ese ia matauraia, ia gwau: “Tamana lau lalokau henia.” (Ioa. 14:31) Iesu be unai bamona do ia hereva lasi, bema Iehova ese ia biagua auka.

⁷ Oibe, ena be tau be hahine ena kwarana, to Baibel ia gwau ia ese ena adavana do ia matauraia. (1 Pet. 3:7) Iena adavana ia matauraia dalana ta be, ena ura gaudia ia laloa bona ena namo ia atoa guna. Baibel ia gwau: “Tatau e, emui hahine do umui lalokau henidia noho, Keriso ese kongrigeisen ia lalokau henia bona ia dainai sibona ia henia hegeregerena.” (Efe. 5:25) Oibe, Iesu be ena hahediba taudia totona ena mauri ia henia. Unai hegeregerena, bema tau be mai lalokau ida ena kwara dagina ia gaukaralaia, iena adavana ese ia do ia lalokau henia, matauraia, bona ena henunai do ia noho.—Tito 2:3-5 duahia.

8. Iseda tadikaka taihu be edena bamona ita laloa be namo?

⁸ Hari tanobada hegegemadai, taunimanima milioni momo ese Iehova idia tomadiho henia. Iseda tadikaka taihu be edena bamona ita laloa be namo? Baibel ia gwau: “Namona be taunimanima ibounai dekenai kara namo ita karaia, to gau badana be iseda abidadama tamona tadikaka bona taihu dekenai, kara namo ita hahedinaraia.” (Gal. 6:10; Roma 12:10 duahia.) Aposetolo Petero ia gwau: “Umui ese hereva momokani badinaia karana amo umui sibona umui hagoevaia vadaeni. Unai dainai mai momokani ida tadikaka lalokau henia karana umui hahedinaraia, bona mai emui kudouna ibounai ida ta ta umui lalokau henia.” Danu, ena tadikaka ia hamaoroa: “Gau badana be do umui lalokau heheni momokani, badina lalokau ese kara dika momo ia koua.”—1 Pet. 1:22; 4:8.

9, 10. Dahaka dainai Keristani taudia huanai lalotamona ia noho?

⁹ Iseda tanobada hegegemadai oreana sibona be edia tadikaka taihu idia lalokau henia. Danu, Iehova ita lalokau henia bona iena taravatu ita badinaia dainai, ia ese iena lauma helaga amo ita ia durua. Unai dainai ibounai tadikaka oreana lalonai lalotamona ia noho.—1 Ioane 4:20, 21 duahia.

¹⁰ Keristani taudia huanai lalokau ia noho be namo. Paulo ia gwau: “Inai bamona kara be dabua bamona do umui hahedokilaia, hebogahisi mai lalokauna, hariharibada, lalomanau, manau, bona boga-auka. Bema ta be badina ta dainai ma ta dekenai ia maumau, ta ta emui kara do umui haheaukalaia noho bona mai kudouna ibounai ida do umui gwauatao heheni. Iehova ese mai kudouna ibounai ida umui ia gwauatao hegeregerena, namona be umui danu be unai bamona do umui karaia. Bona unai gaudia sibona lasi, to lalokau be dabua bamona do umui hahedokilaia danu, badina ia be taunimanima ia hatamonaia gauna hereadaena.” (Kol. 3:12-14) Ita moale badina herevana iseda noho dalana o bese be idau, to ita ia “hatamonaia gauna hereadaena” be lalokau!

11. Edena kara ese Iehova ena orea ia hahedinaraia?

¹¹ Iehova ena hesiai taudia huanai ia noho lalokau bona lalotamona karana ese ia hahedinaraia, idia be tomadiho momokani idia badinaia. Iesu ia gwau: “Unai amo taunimanima ibounai do idia diba umui be egu hahediba taudia, bema umui huanai lalokau ia noho.” (Ioa. 13:34, 35) Bona aposetolo Ioane ia gwau: “Dirava ena natudia bona Diabolo ena natudia be inai ese ia hahedinaraia: Kara maoromaoro ia karaia noho lasi tauna be Dirava amo lasi, bona iena tadikaka ia lalokau henia lasi tauna danu be Dirava amo lasi. Matamana amo umui  kamonai herevana be inai, namona be ita lalokau heheni.” (1 Ioa. 3:10, 11) Oibe, Iehova ena Witnes taudia huanai ia noho lalokau bona lalotamona karana ese ia hahedinaraia, idia be Keriso murinai idia raka taudia momokanidia, bona Dirava ese idia ia gaukaralaia tanobada hegegemadai Basileia ena sivarai namona idia harorolaia totona.—Mat. 24:14.

12, 13. Hutuma bada be hari dahaka idia karaia noho, bona kahirakahira dahaka do ia vara?

¹² Hari Iehova ena hesiai taudia momo be “hutuma bada” taudia. Idia be ta ese “ia duahia diba lasi, idia be bese ibounai, iduhu ibounai, kopina bona gado idauidau amo.” Bona “[Dirava ena] terona vairanai bona Mamoe Natuna [Iesu ena] vairanai idia gini.” Idia be daidia? “Inai taudia be hisihisi badana amo idia hanaia mai taudia, bona Mamoe Natuna ena rarana lalonai edia dabua idia huria bona idia hakurokuroa vadaeni,” badina idia be Iesu ena mauri davalaia boubouna idia abidadama henia. “Hutuma bada” taudia be Iehova bona iena Natuna idia lalokau henia bona “dubu helaga lalonai dina bona hanuaboi iena hesiai gaukara helagana idia karaia.”—Apok. 7:9, 14, 15.

¹³ Kahirakahira Dirava ese “hisihisi badana” ai, inai kara dika tanobadana do ia hadikaia ore. (Mat. 24:21; Ieremia 25:32, 33 duahia.) To Iehova be ena hesiai taudia ia lalokau henia dainai, ia ese idia be orea tamona bamona do ia hamauria bona ena tanobada matamata lalonai do ia hakaudia vareai. Lagani 2,000 bamona gunanai ia peroveta, Dirava “ese mata ranu ibounai be edia matana amo do ia dahua oho, bona mase be do ia ore, bona lalohisihisi, taitai, bona hisihisi danu be do idia ore.” Unai “gau gunadia be idia ore” neganai, oi ura Paradaiso lalonai oi noho, a?—Apok. 21:4.

14. Hari hutuma bada taudia be hida?

¹⁴ Lagani 1914 ai nega dokona ia matamaia neganai, tanobada hegegemadai Iehova idia hesiai henia horoa taudia be tausen haida sibona. Idia ese edia dekena taudia idia lalokau henia bona Dirava ena lauma helaga ena heduru amo, Basileia haroro gaukarana idia goadalaia. Unai dala amo hari hutuma bada gogoa gaukarana idia durua. Witnes taudia be 8,000,000 bamona bona edia kongrigeisen be 115,400 mai kahana, bona unai namba be ia do tubu daekau noho. Hegeregere, lagani 2014 ena hesiai laganina ai, Witnes taudia matamatadia 275,500 mai kahana idia bapatiso. Anina be wiki ta ta ai, taunimanima 5,300 bamona idia bapatiso.

15. Basileia harorolaia gaukarana ia bada ia lao dalana herevalaia.

¹⁵ Haroro gaukara be ia bada ia lao noho. Iseda Baibel buka bona magasin be hari gado 700 mai kahana ai idia halasia. Tanobada hegegemadai, hua ta ta ai Gima Kohorona ena kopi 52,000,000 mai kahana be gado 247 ai idia printaia. Bona iseda Baibel stadi bukana, Baibel be Dahaka Ia Hadibaia? ena kopi 200,000,000 mai kahana be gado 250 mai kahana ai idia halasia.

16. Dahaka dainai Iehova ena orea ia tubu daekau noho?

¹⁶ Iseda orea be ia tubu daekau noho, badina ita ese Dirava ita abidadama henia bona iena Hereva, Baibel, ita abia dae. (1 Tes. 2:13) Bona Iehova ese ita ia hanamoa noho, ena be “inai nega oromana ena dirava,” Satani, ese ita ia inai henia.—2 Kor. 4:4.

17, 18. Witnes lasi taudia be edena bamona ita kara henia be namo?

¹⁷ Witnes lasi taudia be edena bamona ita  kara henia be namo? Haroro gaukara ai taunimanima idauidau ita davaria, haida be idia kamonai, bona ma haida idia kara auka. Herevana taunimanima be unai bamona idia kara, to ita ese Baibel ena hereva ita badinaia. Ia gwau: “Namona be hanaihanai mai gado namo ida do umui hereva, damena umui atoa bamona, unai amo do umui diba edena bamona ta ta do umui haere henia.” (Kol. 4:6) Iseda abidadama ita gwauraia hedinarai neganai, namona be “mai manau bona hemataurai bada ida” ita hereva, badina iseda dekena taudia ita lalokau henia.—1 Pet. 3:15.

¹⁸ Ena be taunimanima idia badu bona ita harorolaia sivaraina idia dadaraia, to namona be eda dekena tauna ita lalokau henia bona Iesu ita tohotohoa. “Ia idia hereva dika henia neganai, idia ia hereva dika henia lou lasi. Hisihisi ia abia neganai, idia ia hagaria lasi,” to Iehova ia abidadama henia. (1 Pet. 2:23) Unai dainai namona be nega ibounai ita manau bona inai sisiba ita badinaia: “Namo lasi umui dekenai dika ia karaia tauna ena dika davana umui henia lou. To namona be umui ia hereva dika henia tauna umui hereva dika henia lou lasi, to dala namona ai idia umui hereva henia.”—1 Pet. 3:8, 9.

19. Edena dala ai iseda inai taudia do ita kara henia?

¹⁹ Manau karana ese ita ia durua Iesu ena hakaua herevana ita badinaia totona. Ororo Harorona ai ia gwau: “Umui kamonai vadaeni idaunegai idia gwau: ‘Namona be emu dekena tauna do oi lalokau henia bona emu inai tauna do oi inai henia.’ To umui lau hamaoroa, emui inai taudia do umui lalokau henia noho bona umui idia dagedage henia taudia totona do umui guriguri noho. Unai amo emui Tamana guba ai ia noho ena natudia ai do umui lao, badina ia ese kara dika taudia bona kara namo taudia latanai dina ena diari ia henia noho. Bona medu danu be kara maoromaoro bona kara maoromaoro lasi taudia latanai ia siaia diho.” (Mat. 5:43-45) Ita be Dirava ena hesiai taudia dainai, namona be iseda inai taudia ita lalokau henia, herevana edena bamona ita idia kara henia.

20. Edena bamona ita diba tanobada ai lalokau do ia noho? (Laulau ginigunana herevalaia.)

²⁰ Namona be nega ibounai ita hahedinaraia ita be Iehova bona iseda dekena taudia ita lalokau henia. Ena be taunimanima ese ita idia dadaraia bona ita harorolaia sivaraina idia ura lasi kamonai, to heduru idia ura neganai, idia ita durua. Aposetolo Paulo ia gwau: “Namo lasi umui be mai emui abitorehai ma ta dekenai, to umui lalokau heheni sibona, badina ena dekena tauna ia lalokau henia tauna ese taravatu ia hagugurua. Badina taravatu ia gwau, ‘Oi heudahanai lasi, Oi ala-ala lasi, Oi henaohenao lasi, Ma haida edia gau oi ura henia dikadika lasi.’ Unai ibounai bona taravatu oredia ma haida be inai hereva tamona lalonai: ‘Namona be emu dekena tauna oi lalokau henia, oi sibona oi lalokau henia hegeregerena.’ Mai ena lalokau tauna ese ena dekena tauna ia kara dika henia lasi. Unai dainai lalokau ese taravatu ia hagugurua.” (Roma 13:8-10) Ita be Iehova ena Witnes taudia dainai, Satani ese ia lohiaia tanobada dikana lalonai, ita ese iseda dekena taudia ita lalokau henia be namo. (1 Ioa. 5:19) Momokani, Iehova ese Satani bona ena demoni bona ena tanobada dikana ia haorea murinai, tanobada hegegemadai lalokau do ia noho. Tanobada ai taunimanima ibounai ese Iehova bona edia dekena taudia do idia lalokau henia be hahenamo badana!