1, 2. Amasako akakangaya athi omughaso w’olhwanzo?

OLHWANZO ni mubere mukulhu wa Yehova. (1 Yn. 4:16) Mwatsuka erihangika Yesu, amabya nayu elhubulha aha bw’emyaka mingyi neryo am’igha olhwanzo lhwa Nyamuhanga. (Kol. 1:15) Omw’ibyaho liwe lyosi n’omwa ngebe yiwe y’okwa kihugho, Yesu mwakangania ngoku asi ndeke Nyamuhanga w’olhwanzo, Yehova, kandi mwagherererya olhwanzo olho. Busana n’ekyo, thukayikethera ngoku obuthabali bwa Yehova na Yesu bukendi syasondolhwa omwa lhwanzo kera na kera.

² Yesu abere abulibwa ekihano kikulhu nga ni kyahi, mwabugha athi: “‘Wanze Omukama Nyamuhanga wawu n’omuthima wawu wosi, n’ekirimu kyawu kyosi n’obulengekania bwawu bwosi.’ Ekihano kikulhu n’eky’erimbere ky’ekyo. Omughambo w’akabiri owali ngagho, athi, ‘Wanze mulikyenyu ngoku wuyanzire.’”—Mt. 22:37-39.

3. Omuliranwa wethu y’owahi?

³ Wanamalhangira ngoku Yesu amakania okw’anza mulikyenyu kutse omuliranwa akanaghunza erikania okw’anza Yehova. Eki kikakanganaya ngoku ni kikulhu erikangania olhwanzo okwa bandu. Aliwe omuliranwa wethu y’owahi? Thwamabya ithuli omwa  butheke, omuliranwa wethu ow’ahakuhi-kuhi y’oyo thuli nayu omwa butheke. N’abandi baliranwa b’abathuli nabu omwa kithunga, n’ibugha ambu abo thukaramaya nabu. N’abandi b’abathukabana omw’ithulira. Abakaramaya Yehova n’erighendera okw’ikangirirya lya Yesu banga kangania bathi olhwanzo okwa muliranwa?

4. Nomwakine indi sithuhikene, ni kyahi ekyanga leka ithwathoka obutheke?

⁴ Yehova yuwalungisaya omulhume n’omukali ab’erimbere omw’ihangika Adamu na Eva n’eribahira haghuma. Abahangika ini b’eribya haghuma ibanatsemire n’eryusulya omwa kihugho mw’abaana babu. (Enz. 1:27, 28) Aliriryo habere habya eriyisamambulha okwa buthabali bwa Yehova, obutheke bw’erimbere mubwatsandalikana neryo n’ekibi n’olhuholho byam’ingira omwa bandu. (Abar. 5:12) Nomwabine bithya, Amasako akathubwira ngoku thwanga thoka obutheke. Ali mw’amahano awahikire awahambire okwa butheke kundi akalhua oku Yehova, iyo ng’Oyuwatsukisaya obutheke.—Soma 2 Timoteo 3:16, 17.

5. Olhwanzo ni lhw’omughaso lhuthi omwa butheke?

⁵ Ekinywa kya Nyamuhanga kikakanganaya ngoku abandu erithoka eritsemera obughuma, batholere ibabya n’omubere w’olhwanzo. Eki kikakolha ndeke omwa butheke. Omwa binywe ebya mukwenda Paulo ahandikira ekithunga, mwabugha athi: “Olhwanzo lhukayibombeka kandi lhuli n’obwenge. Olhwanzo silhulibya n’obuha. Silhuliyihalhamba, silhuliyiheka. Olhwanzo silhulibulha erisikya, silhuliyironderaya ndundi ilholhwene-lhwene kandi silhulihithana lithya-lithya, silhulitsungirira ekibi. Olhwanzo silhulitsemera ebithathunganene, nikwa lhukatsemera eby’ekwenene. Olhwanzo silhulilhuha, omwa myatsi yosi lhuk’ikiriraya, lhukabya n’amaha, lhukayiyinaya. Olhwanzo lhukakotha.” (1 Kor. 13:4-8) Ahathe erithika-thika, erighanirya n’erighendera okwa binywe ng’ebyo irikendyongera obutseme omwa butheke.

6, 7. (a) E Biblia yikabugha yithiki okwa bukulhu? (b) Omulhume Omukristayo atholere iniathwalha athi mukali wiwe?

⁶ Kundi omwa ndegheka ya Yehova mune abakabya bakulhu b’abandi, olhwanzo ni mubere ow’atholere omwa ndegheka eyo. Paulo  mwabugha athi: “Nyanzire imwaminya Kristo kw’ali mukulhu w’obuli mundu, n’omulhume ni mukulhu w’omukali wiwe kandi Nyamuhanga ni mukulhu wa Kristo.” (1 Kor. 11:3) Aliwe eribya mukulhu si fundikirya abandi. Ng’eky’erileberyako, Yehova akakanganaya obukulhu bwiwe oku Yesu omwa mibere y’obwolho-bwolho, omuthe eriyitsomana, na Yesu iniamughondera. Akatsemera emibere y’olhwanzo eyo Nyamuhanga akakanganiraya mw’obukulhu, kundi mwabugha athi: “Nyanzire Thatha.” (Yn. 14:31) Yesu syangabughire athya Yehova kw’abya iniakamukalhako n’erimufundikirya.

⁷ Nomwakine indi abalhume ba bakulhu ba bakali babu, e Biblia yikabugha yithi ‘basikayebo.’ (1 Pet. 3:7) Enzira nguma eyo balhume bangasikiryamu bakali babu ly’eribayitheghererya ndeke n’erihira ebindi biyithawa byabu by’embere kyamayithaghisibwa. Ky’ekikaleka ekinywe kya Nyamuhanga ikyabugha kithi: “Abiba mwanze bakali benyu, ngoku Kristo mwanza ekanisa. Kusangwa Kristo mwayihayo busana n’ekanisa.” (Efe. 5:25) Sithwamalhangira Yesu ku mwahayo engebe yiwe busana n’abigha biwe. Omulhume akabya amagherererya emibere y’olhwanzo eya Yesu akakoleseraya mw’obukulhu bwiwe, ikikendyolhobera omukali erimwanza n’erimusikya.—Soma Tito 2:3-5.

8. Abaramya ba Yehova batholere ibalhangira bathi Abakrisitayo balikyabo?

⁸ Omwa kihugho kyosi mune abandu bangyi abanemuramya Yehova n’er’imanira erina liwe n’erikania okwa bilhubirirwa biwe. Obuli mwema wa Yehova atholere inialhangira omuramya mulikyabu y’athi? Okw’ekyo, e Biblia yithi: ‘Thukole ebibuya oko bandu abosi, aliwe kwilhaba aho thukole ebibuya okw’abo abali omwa kithunga ky’abikirirye.’ (Gal. 6:10; soma Abanya Roma 12:10.) Omukwenda Petero mwahandika athi: “Neryo kusangwa mwabiry’erya emithima yenyu busana n’eriowa omwatsi w’ekwenene, kandi mwabiribya n’olhwanzo olhuthe n’eritheba busana n’abalikyethu, lino litholere imwanzana n’emithima yenyu yosi n’omuhwa.” Kandi Petero mwathasyabugha athi: “Kwilhaba emyatsi yosi, mukwe omuhwa w’erianzana kutsibu.”—1 Pet. 1:22; 4:8.

9, 10. Ni kyahi ekikathokesaya abandu ba Nyamuhanga eribya bughuma?

⁹ Busana n’olhwanzo lhunene olhwa thuwithire abaghombe balikyethu, lhukaleka ekithunga kyethu ikyabya ky’embaghane omwa kihugho kyosi. Kandi busana n’eribya ithwanzire Yehova n’eriowa ebihano biwe, akathusighika omwa mulimu wiwe abuyirire—akaghalha akalengethukireyo omwa byosi. Amaaka w’omulimu wiwe ayo w’akaleka ithwathoka eribya bughuma ng’abasubeneko omwa kihugho kyosi.—Soma 1 Yoane 4:20, 21.

¹⁰ Erikangania ngoku Abakristayo batholere ibanzana, Paulo mwahandika athi: “Muyire emithima y’erighanyira, omuthima w’obubuya, ow’eriyikehya, ow’obwolho, n’ow’eriyibombeka. Neryo mughanyirane mubuyirane omughulhu omundu awithe omwatsi oko wundi. Ngoku Omukama ababuyira, nenyu ku mwanga buyira abandi bo muthya. Kandi kwilhaba ebyosi muyire omuthima w’olhwanzo olhukahikanaya ebyosi haghuma omo bughuma.” (Kol. 3:12-14) Ka thukasima eribya omwa kathi-kathi kethu imune olhwanzo olhukathuhikanaya ithwe bosi omwa bughuma nomwakine indi sithulhuire haghuma!

11. Olhwanzo n’obughuma bikaleka ekithunga kya Yehova ikyaminywa kithi?

¹¹ Olhwanzo olhw’okwenene n’obughuma ebiri omwa baramya ba Yehova bikaleka ibalhangirika ku n’ibo bali omwa dini y’okwenene, kundi Yesu mwabugha athi: “Mwamabya  n’olhwanzo, omughuma busana n’owundi, abandu bosi basyaminya ko muli bigha baghe.” (Yn. 13:34, 35) N’omukwenda Yoane mwahandika athi: “Omw’eki, abaana ba Nyamuhanga n’abaana ba Sitani baminyikere: Oyuthekolha ebithunganene kutse omundu oyuthanzire mulikyabu, abo si baana ba Nyamuhanga. Kusangwa omwatsi ogho mwatsuka eriowa erimbere w’oyu; thwanganzana.” (1 Yn. 3:10, 11) Olhwanzo olhukaletha obughuma obukamathire ng’obu lhukaleka Abema ba Yehova ibaminyikalha ngoku b’abigha ba Yesu ab’okwenene, abo Nyamuhanga anemukolesya munabwire eriberererya ekighendererwa kiwe eky’erihikya engulhu mbuya y’Obwami omwa kihugho kyosi.—Mt. 24:14.

12, 13. Munabwire “endeko nene” yinemukolhaki, kandi abali muyo bakayabana mighisaki?

¹² Abaghombe ba Yehova abanene ni b’okwa “ndeko nene . . . erilhua oko buli kithunga n’ebihanda byosi n’abandu bosi n’emibughe yosi.” “B’imene embere w’ekithumbi ky’Obwami [ekya Nyamuhanga] n’embere w’Ekyana ky’Embuli [Yesu Kristo].” Aba ni bahi? “Aba ni bandu abakalhua omw’enderererya linene, ibabiry’erya esyokanzu syabu n’eriyirasyo mo nyeru-nyeru omwa musasi w’Ekyana ky’Embuli,” kundi bawithe erikirirya omwa kihongwa kya Yesu. Abali omwa “ndeko nene” eyinemughenda yikakanyirira, banzire Yehova na Yesu “kandi bakamukolera [ya Nyamuhanga] omwa musibo n’omwa kiro.”—Erib. 7:9, 14, 15.

¹³ Omwa buthuku obuthe bwa hali, Nyamuhanga akendi thoghothya ekihugho kibi kino omwa “bulighe bunene.” (Mt. 24:21; soma Yeremia 25:32, 33.) Aliwe busana n’olhwanzo olhw’awithire abandu, Yehova akendisya balhamya ng’ekithunga n’eribingirya omwa kihugho kihya-kihya. Ngoku kyana bughawa kera, emyaka nga 2,000 enyuma, Nyamuhanga “asyasangulha emisoni yosi oko meso wabu, kandi olhuholho silhwendi syasabyaho, erisusumana kutse eririra kutse eriaghalhwa.” Wukana kandira erisyabya omwa Paradiso “emyatsi y’erimbere iyabiri lenga”?—Erib. 21:4.

14. Endeko nene hathya ni bangahi?

¹⁴ Emighulhu y’enyuma-nyuma yabere yatsuka omwa 1914, okwa kihugho kw’abya abaghombe ba Yehova bake buyira. Busana n’erianza abaliranwa, abake abo, emisighalira y’okwa bahakabibwa, mubawathikibwa n’omulimu wa Nyamuhanga erikolha omubiiri w’erithulira. Busana n’eki, munabwire abangyi abawithe amaha w’erisyabya okwa kihugho banemuhindanibwa. Thuli Bema ba Yehova abahikire omu 8,000,000 omwa bithunga ebilhabire omu 115,400 omwa kihugho kyosi, kandi thukinayongera. Ng’eky’erileberyako, balikyethu bahya-bahya abalhabire omwa 275,500 ba babatizibawa omwa mwaka owa 2014. Omw’ibaririra, ithwangana bugha thuthi abandu nga 5,300 ibakabatizibawa obuli yenga.

15. Soborera omubiiri w’erithulira ng’abiriyongera athi.

¹⁵ Omubiiri w’erithulira abiriyongera kutsibu. Ebitabu byethu hathya bikahindulhawa omwa mibughe eyilhabire omu 700. Omwa gazeti syosi, ey’Akaleberyo y’eyikaghabawa kutsibu omwa kihugho kyosi. Obuli kwezi, esyogazeti esilhabire omwa 52,000,000 sikabya isinemuhulhukibwa omwa mibughe 247. Ekitabu kyethu ekya E Biblia Kwenene Yikakangiriraya Ki? kyabirihulhukibwa mw’esyokopi esilhabire omu 200,000,000 omwa mibughe eyilhabire omu 250.

16. Ni kyahi ekyalekire ekithunga kya Yehova ikyakulha-kulhana?

¹⁶ Eriyongera erikathikaya erya thukalhangira eri ni busana n’erikirirya eryathuwithe omu Nyamuhanga n’eriligha Ekinywe kiwe, e Biblia, ekyo ahandikisaya erilhabira omwa  mulimu wiwe abuyirire. (1 Tes. 2:13) Ekikaswekaya kutsibu, ly’erikulha-kulhana bunyakirimu ly’abandu ba Yehova nomwakine indi Sitani, “nyamuhanga mubi w’ekihugho kino” abaponire n’eribendererya.—2 Kor. 4:4.

17, 18. Abaghombe ba Nyamuhanga batholere ibabya bakathwalha bathi abath’ikirirye?

¹⁷ Ni malengekania wahi agho abaghombe ba Yehova batholere ibathunga okwa bandu abatheramaya Nyamuhanga w’okwenene? Omw’ithulira, thukabana mw’abolho n’abatsurumire. Aliwe nomubanga yithwa bathi, e Biblia yikathukanganaya emisingyi eyo thwanga ghenderako. Yikabugha yithi: “Erikania lyenyu libye omwa lhukogho kandi libye iryuwene.” (Kol. 4:6) Thukabya thukasubirya abakathubulhaya okw’ikirirya lyethu, thukabasubiraya ‘omwa bwolho-bwolho n’erikenga’ kundi thwanzire abaliranwa bethu.—1 Pet. 3:15, 16.

¹⁸ Ithwe thukalholha embere erikangania olhwanzo okwa baliranwa nomubanga ghana omwatsi wethu kutse erithutsurumira. Thukabya ithwama gherererya Yesu, kundi iyo ‘omughulhu atsumawa, mwathatsumabo, omughulhu bamwaghalhaya, mwathubahyabo, aliwe mwayihira omwa byalha by’oyukatswera ebithunganene ye Nyamuhanga.’ (1 Pet. 2:23) Mbulha thuwithe mwatsi oku mulikyethu kutse wundi mundu, thukakanganaya eriyikehya n’erighendera okwa kihano kino: “Simuthuhulhaye ekibi busana n’ekibi kutse eritsuma busana n’eritsuma, nikwa kumbe mutsumulebo.”—1 Pet. 3:8, 9.

19. Yesu mwabugha athi ithwalhangira thuthi esyonzighu syethu?

¹⁹ Busana n’eribya n’omubere w’eriyikehya, abandu ba Yehova bakabya ibamaghendera okwa musingyi mukulhu owa Yesu abugha omw’Ikangirirya liwe ly’okwa Kithwe athi: “Mwabiriowa ngoku kyabughawa kithi; ‘Wanze mulikyenyu, wukwe enzighu yawu y’obusu.’ Nikwa ingye ngababwira nyithi: Mwanze esyonzighu syenyu, musabire abakab’endereraya, mwangathoka eribya baghalha ba Thatha oyuli elhubulha. Kusangwa akahulhukaya eryuba liwe oko babi n’oko babuya kandi akathuma embulha oko bathunganene n’oko bathathunganene.” (Mt. 5:43-45) Neryo kwesi, ithwe ng’abaghombe ba Nyamuhanga thutholere ithwalhangira thuthi ‘thukanza esyonzighu syethu,’ nomubanga thukolha bathi.

20. Ni kyahi ekikendi syaleka erianza Nyamuhanga n’omuliranwa iryabya ehosi omwa kihugho? (Lebaya ekisasani ekiri okw’itsuka.)

²⁰ Omwa ngebe yabu yosi, abandu ba Yehova batholere ibakangania omwa mibere yabu n’omwa mikolere ngoku banzire Yehova n’abaliranwa. Ng’eky’erileberyako, abandi n’omubanga ghana erihulikirira engulhu y’Obwami, thukabakanganaya olhwanzo omughulhu bali n’obuyithawa. Omukwenda Paulo mwahandika athi: “Siwubye n’omwinda w’omundu n’omughuma, lyan’eryanzana lisa kusangwa oyukanza mulikyabu, abiriberererya emighambo. Kusangwa ebihano bithi, ‘isiwasingira, isiwitha, isiw’iba, isiwarumawa.’ Kandi hamabya ekindi kihano, ebyosi bikahika omwa kihano kighuma kithi: ‘Wanze mulikyenyu ngoku wukayanza.’ Olhwanzo silhulikolha mulikyabu y’ekibi. Neryo olhwanzo lhukaberereraya emighambo yosi.” (Abar. 13:8-10) Ng’Abema ba Yehova, ithwe thukakanganaya olhwanzo olhw’ekwenene ng’olhu omwa kihugho kibi kino ekithe mw’obughuma, ekiri mw’obwithi ekiri omwa buthoki bwa Sitani. (1 Yn. 5:19) Omwa kwenene, olhwanzo lhukendi syalhangirika omwa byosi ebikakoleka okwa kihugho Sitani abirilhusibwako n’esyombinga siwe n’abosi abakamukwama. Ka kikendi syatsemesya, eribya okwa kihugho okuli abandu abanzire Nyamuhanga na balikyabo!