1, 2. Bõe la Biiblã yeel tɩ wilgdẽ tɩ nonglem tara yõodo?

BIIBLÃ yeelame tɩ Wẽnnaam a Zeova yaa nonglem. (1 Zã 4:16) A Zeezi Kiris sẽn yaa a pipi bõn-naandgã zĩnda ne-a saasẽ n kaoos yʋʋm kõn bãng n sõde, n yã a sẽn wilgd to-to t’a yaa nonglmã. (Kol. 1:15) A Zeezi rɩka a Zeova togs-n-taar nonglmã wɛɛngẽ. A maana woto saasẽ, la tẽngã zug me. Rẽnd d tõe n kɩsa sɩd t’a Zeova ne a Zeezi fãa na n kell n dɩ b naamã ne nonglem.

² Daar a ye, ned n sok a Zeezi n dat n bãng tõog ning sẽn yaa-a kãseng n yɩɩdã, t’a leok woto: “ ‘Nong Zu-soaba fo Wẽnnaam ne f sũur fãa, la ne f sɩɩgã fãa, la ne f tagsgã fãa.’ Yẽnda n yaa pipi tõogo, n leb n yɩɩd b fãa. La tõog a to me sẽn pʋgd yẽnda n yaa kãseng wa yẽnda: ‘Nong f to wa f menga.’ ”—Mat. 22:37-39.

3. Ãnda la tõnd “to”?

³ Sẽn na yɩl tɩ zems-n-taar zĩnd tõnd ne d taabã sʋka, nonglem yaa tɩlɛ. A Zeezi yeelame tɩ d segd n nonga a Zeova, la d nong d taabã me. La ãnda la tõnd “to”? Sã n yaa ne ned sẽn kẽ kãadem, a pagã wall a sɩdã n yaa a to meng-menga. La tõnd ned kam fãa tẽed-n-taag yaa a to. Neb nins d sẽn segd koɛɛgã mooneg sasa wã me yaa d  taaba. Sõs-kãngã pʋgẽ, d na n bao n bãnga d sẽn tõe n wilg to-to tɩ d nonga d taabã.

4. Baa tõnd sẽn yaa koangdbã, bõe yĩng tɩ neb sẽn kẽ kãadem tõe n zĩnd ne taab ne sũ-noogo?

⁴ A Zeova naana d yaab a Ãdmã, la a naan a Hawa n tall-a n kẽng a Ãdem nengẽ. Rẽ n yɩ pipi yi-kãadem. A ra ratame tɩ b zĩnd ne taab ne sũ-noogo, la b rog kamb n pid dũniyã. (Sɩng. 1:27, 28) La b sẽn kɩɩs a Zeova wã, waa ne zu-loees b kãadmã pʋgẽ, la kɩt tɩ yel-wẽndã long nebã fãa, tɩ b yaa kiidba. (Rom. 5:12) Baa ne rẽ, bũmb n be neb sẽn kẽ kãadem sẽn tõe n maan n tõog n zĩnd ne taab ne sũ-noogo. A Zeova sẽn yaa kãadmã lugundã kõo sagls Biiblã pʋgẽ, tɩ pagbã ne b sɩdbã tõe n tũ tɩ naf-ba.—Karm-y 2 Tɩmote 3:16, 17.

5. Bõe yĩng tɩ nonglem tar yõod kãadem pʋgẽ?

⁵ Biiblã wilgame tɩ sẽn na yɩl tɩ zems-n-taar zĩnd neb sʋka, nonglem yaa tɩlɛ. Yaa vẽeneg tɩ yaa woto me ne neb sẽn kãadem. Tʋm-tʋmd a Poll bilga nonglem hakɩɩkã sẽn yaa bũmb ninga, n yeel woto: “Nonglem tara sũ-mare, nonglem sõngda neb a taaba, a ka maand sũ-kiir ye. Nonglem ka fʋʋmd a menga, a ka maand wilg-m-menga, a ka maand zãmb baa bilfu, a ka baood a meng nafr bal ye, a ka yikd a sũuri, a ka bĩngd wẽng ning b sẽn maan-a wã a sũurẽ ye, a ka maand sũ-noog ne ka-tɩrlem ye. Ayo! A maanda sũ-noog ne sɩda, a maanda sugr bũmb fãa yĩnga, a tẽeda bũmb fãa, a tara saag-sõng ne bũmb fãa, la a sakda bũmb fãa. Nonglem ka sɛt abada.” (1 Kor. 13:4-8) Neb sẽn kẽ kãadem sã n bao n wʋm a Poll goamã võore, la b tũ a sẽn yeelã, tõe n sõngame tɩ b kãadmã yɩ sõma.

6, 7. a) Bõe la Biiblã yeel zu-sobendã wɛɛngẽ? b) Manesem bʋg la kiris-ned segd n tall ne a paga?

⁶ Wẽnnaam sẽn sigl yɛlã to-to zu-sobendã wɛɛngẽ wã kɩtame tɩ nonglem tar yõod wʋsgo. A Poll yeela woto: “Mam yaool n datame tɩ yãmb bãng tɩ Kiris yaa rao fãa Zu-soaba, la  dao yaa pag zu-soaba, la tɩ Wẽnnaam yaa Kiris Zu-soaba.” (1 Kor. 11:3) La a Zeova ratame tɩ rao zã a pag ne nonglem, n da yɩ nin-toaag ye. Yẽ mengã rɩta a naamã ne bʋgsem. Woto kɩtame t’a Zeezi sakd-a. A sũur nooma ne Wẽnnaam sẽn dɩt a naamã to-to wã, bala, a yeela woto: “Mam nonga m ba.” (Zã 14:31) A Zeova sã n da yaa na-toaaga, a Zeezi ra na yeelẽ woto sɩda?

⁷ Yaa sɩd tɩ rao yaa pag zu-soaba. La Biiblã yeelame tɩ rao segd n nanda a paga. (1 Pɩy. 3:7) Bũmb rao sẽn tõe n maan n wilg t’a nanda a pag yaa a sẽn na n tagsd bũmb nins a sẽn datã yelle, la a mi n bas t’a maan sẽn noom-a. Biiblã paasa woto: “Raopã, bɩ yãmb ned kam fãa nong a paga, a wa Kiris sẽn nong b tẽedbã, n kõ b meng b yĩnga.” (Efɛ. 5:25) A Zeezi sakame meng n ki a tẽedbã yĩnga. Rao sã n dɩk a Zeezi togs-n-taar n zãad a pagã ne nonglem, na n yɩɩ nana ne a pagã tɩ yẽ me nong-a, n waoogd-a la a sakd-a.—Karm-y Tit 2:3-5.

8. D manesem segd n yɩɩ wãn ne d tẽed-n-taasã?

⁸ Rũndã-rũndã, neb milyõ-rãmb n tũud a Zeova dũniyã gill zugu. D manesem segd n yɩɩ wãn ne d tẽed-n-taasã? Ad Biiblã sẽn yeele: “Woto yĩnga, tõnd sẽn paam weer ning fãa, bɩ d maan nebã fãa neere, la sẽn yɩɩd fãa yaa tẽeb pʋgẽ ba-biisã.” (Gal. 6:10; karm-y Rom-dãmb 12:10.) Tʋm-tʋmd a Pɩyɛɛr yeelame: “Yãmb sẽn sak sɩdã n yɩlg y mensã, sẽn na n yɩlẽ n paam nonglem meng-meng ba-biisã yĩngã, bɩ y nong taab wʋsg ne y sũyã fãa.” A paasa woto: “La sẽn deng bũmb fãa, nong-y taab daar fãa.”—1 Pɩy. 1:22; 4:8.

9, 10. Bõe yĩng tɩ zems-n-taar be Wẽnnaam nin-buiidã sʋka?

⁹ Dũniyã gill zugu, tõnd siglgã yaa toor fasɩ. Bõe yĩnga? Bala, tõnd nonga taab ne nonglem hakɩɩka. Sẽn paase, d sẽn nong a Zeova la d sakd a noyã yĩnga, a sõngda tõnd ne a vʋʋsem sõngã sẽn yaa pãng sẽn ka to wã maasem, tɩ kɩt tɩ d zemsd taab dũniyã gill zug wa zak a ye neba.—Karm-y 1 Zã 4:20, 21.

¹⁰ A Poll wilgame tɩ kiris-nebã segd n nonga taaba. A yeelame tɩ b “yelg nimbãan-zoeer meng-menga, la sõmblem, la sik-m-menga, la sũ-bʋgsem, la sũ-mar wa futu.” A paasame tɩ b ‘tʋk taab zɩɩbo, la b maan taab sugri,’ wa bãmb me sẽn paam tɩ b kõ b sugrã. A le yeela woto: “La sẽn yɩɩd fãa, bɩ y nong taab bala, tɩ nonglem yaa loɛtg sɩd-sɩda.” (Kol. 3:12-14) D sẽn paam tɩ nonglem sẽn ‘yaa loɛtg sɩd-sɩdã’ be d sʋkã pa noom-d sɩda?

11. Wãn to la d tõe n bãng Wẽnnaam nin-buiidã n bake?

¹¹ Nonglem hakɩɩkã sẽn be a Zeova Kaset rãmbã sʋkã, n paas b sẽn zemsd taabã wilgdame tɩ yaa bãmb n be tũudum hakɩɩkã pʋgẽ. A Zeezi yeela woto: “Yãmb sã n nong taaba, nebã fãa na bãng tɩ yãmb yaa mam karen-biisi.” (Zã 13:34, 35) Tʋm-tʋmd a Zã me yeelame: “Yaa woto la b bãngd sẽn ya-b Wẽnnaam kambã la sẽn ya-b sʋtãanã kamb n bake. Ned ning fãa sẽn ka maand tɩrga la sẽn ka nong a ba-biig ka Wẽnnaam biig ye. Ad koɛɛg ning  yãmb sẽn wʋm hal sɩngrẽ wã: Bɩ d nong taaba.” (1 Zã 3:10, 11) A Zeova Kaset rãmbã sẽn nong taab la b zemsd taabã wilgdame tɩ bãmb n sɩd yaa Kirisã karen-biisi, n yaa neb nins Wẽnnaam sẽn yeel tɩ b moon a Rĩungã koe-noogã dũniyã gillã.—Mat. 24:14.

12, 13. Bõe la kʋʋn-kãsengã neb maand rũndã-rũndã, la bõe la b na n paam ka la bilfu?

¹² Rũndã-rũndã, a Zeova Kaset rãmbã wʋsg yaa kʋʋn-kãsengã nebã. Kʋʋn-kãsengã yaa neb sẽn yit “soolem dãmbã fãa pʋse, buud toay-toayã fãa pʋse, tẽms toay-toayã fãa pʋse, la sẽn gomd goam buud toay-toayã.” B yasa Wẽnnaam “geerã taoore, la pe-bila [a Zeezi Kiris] taoore.” Yaa bãmb la sẽn na n põs to-kãsengã sasa wã. “Bãmb pegsa b fut pe-bilã zɩɩmẽ tɩ b lebg peelse,” rat n yeel tɩ b tẽeda a Zeezi sẽn ki tɩ yɩ maoongã. Kʋʋn-kãsengã neb sõor sẽn tar paasgã nonga a Zeova ne a Bi-riblã, ‘n tʋmd Wẽnnaam tʋʋmd wĩndg la yʋngo.’—Vẽn. 7:9, 14, 15.

¹³ Ka la bilfu, Wẽnnaam na n sãama dũni-kãngã. Na n yɩɩ ‘to-kãsengã’ sasa. (Mat. 24:21; karm-y Zeremi 25:32, 33.) La a sẽn nong a nin-buiidã yĩnga, a na n kogl-b lame, tɩ b põs n kẽ dũni-paalgã pʋgẽ. Rẽ poore, bũmb ning Biiblã sẽn yeel na maan yʋʋm 2 000 wã na n pidsame. A yeela woto: “Wẽnnaam na n yẽesa nintãm fãa sẽn be b ninẽ wã. Kũum kõn le zĩnd ye, la sũ-sãang wall yãbre, wall toog kõn leb n zĩnd ye.” Y pa gũud wakat ning wẽnemã, namsgã, la kũumã sẽn pa na n le zĩndã ne y sũur fãa sɩda?—Vẽn. 21:4.

14. Kʋʋn-kãsengã neb sõor taa wãna?

¹⁴ Dũni-kãngã yaoolem wakatã sẽn wa n sɩng yʋʋmd 1914, rẽ t’a Zeova nin-buiidã sõor zemsa neb tus a wãn bala. Nin-kãens sẽn da paam vʋʋsem sõng zaeebã sega zu-loees wʋsgo. La b sẽn da nong b taabã, n paas b sẽn paam Wẽnnaam vʋʋsem sõngã sõngrã, b kell n moona Rĩungã koe-noogã. Rẽ woma bi-bʋse? Rũndã-rũndã, b tõog n tigma neb kʋʋng sẽn saagd n na n vɩɩmd tẽngã zug wakat sẽn kõn sa yĩnga.Dũniyã gill zugu, a Zeova Kaset rãmbã taa neb 8 000 000, n be tigims 115 400 pʋsẽ. B sõorã ket n tara paasgo. Wala makre, yʋʋmd 2014 pʋgẽ, neb 275 500 la zak n deeg lisgu. Yaa wa neb 5 300 sẽn deeg lisg semen fãa.

15. Bõe la d maand tɩ neb wʋsg wʋmd koe-noogã rũndã-rũndã?

¹⁵ Koe-moonegã sẽn paamd pãng to-to wã sɩd bee yamleoogo. Rũndã-rũndã, tõnd sɛbã bee buud-goam 700 la zak pʋgẽ. Dũniyã gill zugu, zʋrnall ka be tɩ b sẽn yiisd-a to-to wã ta Gũusg Gasgã ye. Kiuug fãa, b yiisda bãmb 52 000 000 la zak buud-goam 247 pʋgẽ. Tags-y Biiblã sɩd yetame tɩ bõe? sebrã me yelle. D tar-a lame n zãmsd nebã Biiblã. A bee ne buud-goam 250 la zaka. B sẽn zoe n yiis seb-kãngã sõor yɩɩda 200 000 000.

16. Bõe n kɩt t’a Zeova siglgã neb sõor tar paasgo?

¹⁶ Yaa d sẽn tẽed Wẽnnaam, la d kɩs sɩd tɩ Biiblã yaa a Gomdã yĩng la d siglgã neb sõor sẽn tar paasgã. (1 Tes. 2:13) Bũmb sẽn yaa lingr me yaa tɩ baa a Sʋɩtãan sẽn kis tõnd la a namsd tõndã, d ket n paamda bark buud toor-toore.—2 Kor. 4:4.

17, 18. Manesem bʋg la sẽn tũud-b a Zeova wã segd n tall ne neb a taabã?

¹⁷ Manesem bʋg la sẽn tũud-b a Zeova wã segd n tall ne neb a taabã? D sã n wa moond koɛɛgã, d segda neb sẽn tar manesem toor-toor ne tõndo. Kẽer kelgdame, tɩ sãnda pa tol n dat n wʋm koɛɛgã ye. La baa nebã manesem sẽn yaa to-to, d segd n tũu saglg Biiblã sẽn kõ. A yeela woto: “Kɩt-y tɩ yãmb goam tall bark wakat fãa n tar yamsem noom, tɩ yãmb na bãng y sẽn tog n leok ned kam fãa to-to tɩ zemse.” (Kol. 4:6) D sã n wa leokd ned sẽn sok tõnd n dat n bãng d sẽn tẽed bũmb ninsã, d segd n goma “ne sũ-maasem la ne sik-m-menga,” d sẽn nong d taabã yĩnga.—1 Pɩy. 3:15.

¹⁸ Baa d sã n wa seg ned t’a sũur yik t’a tʋ-do, d na n dɩka a Zeezi togs-n-taare, n kell n wilg tɩ d nonga d taabã. Biiblã goma a Zeezi yelle, n yeel woto: “Neb tʋʋ bãmba, la b ka tʋʋs n lebs ye. Neb namsa bãmba, la b ka zab ne-b ye. B basa b yɛlã [a Zeova] sẽn kaood-a bʋʋd tɩrgã nugẽ.” (1 Pɩy. 2:23) Rẽnd d sã n wa be ne d tẽed-n-taasã tɩ yaa ne neb a taab me, d segd n yɩɩ sik-m-mens rãmba, n tũ Biiblã sagl-kãngã: “Da lebs-y ned wẽnga, a sẽn maan yãmb wẽng yĩng ye, la y ra tʋʋs n lebs b sẽn tʋʋs yãmb yĩng ye. Da maan-y-yã a woto ye. Bɩ y lebs barka.”—1 Pɩy. 3:8, 9.

19. Manesem bʋg la d segd n tall ne d bɛɛbã?

¹⁹ D sã n yaa sik-m-mens rãmba, na n sõng-d lame tɩ d tũ saglg a Zeezi sẽn kõ. A yeelame: “Yãmb dag n wʋmame tɩ b yeelame tɩ f nong f to la f kisg f bɛyã. La mam yeta yãmb tɩ y nong y bɛɛbã . . . la y pʋʋs neb nins sẽn maand yãmb wẽngã, la sẽn namsd yãmbã yĩnga, tɩ yãmb tõe n yɩ yãmb ba sẽn be arzãnã [“saasẽ,” MN] kamba. Bala bãmb kɩtdame tɩ bãmb wĩntoogã zẽkd nins-wẽnse, la nin-sõamyã yĩnga, la b kɩtdame tɩ saagã niid nin-tɩrse, la sẽn ka-b tɩrsã yĩnga.” (Mat. 5:43-45) Rẽnd tõnd sẽn yaa wẽn-tũudbã, d segd n ‘nonga d bɛɛbã,’ baa b manesem sẽn yaa a soab ne tõndo.

20. Bõe n kɩt tɩ d miẽ tɩ tẽngã na n wa pida ne neb sẽn nong a Zeova la b taabã? (Ges-y sõsgã sɩngrẽ fotã.)

²⁰ D vɩɩmã nens fãa pʋgẽ, d manesmã la d tʋm-tʋmdɩ wã segd n wilgame tɩ d nonga a Zeova la d taabã. Wala makre, baa neb nins sẽn kɩɩsd tõndã sã n wa rat sõngre, d sẽn nong d taabã yĩnga, d na n sõng-b lame. Tʋm-tʋmd a Poll yeela woto: ‘Da tall-y ned samde, sã n ka tɩ nong taab ye. Bala, ned ning sẽn nong a taab pidsa Wẽnnaam tõogã zãnga. Sɩd me, d tõe n gila tõod nins sẽn yet tɩ: Da yo ye, da kʋ ye, da zu ye, da ges f to bũmb n dat ye, la tõod a taabã, n yeel tɩ: Nong f to wa f menga. Nonglem kɩtdame tɩ f ka maand f to wẽng ye. Dẽ, nonglem yaa tõogã pidsgu.’ (Rom. 13:8-10) Baa dũni-kãngã sẽn be a Sʋɩtãan nugẽ, n pid ne nen-kɛglem la wẽnem tɩ zems-n-taar ka be a nebã sʋkã, tõnd a Zeova Kaset rãmbã wilgdame tɩ d tara nonglem hakɩɩkã. (1 Zã 5:19) A Zeova sã n wa sãam a Sʋɩtãan ne a zĩn-dãmbã, la dũni-kãngã, tẽngã na n pida ne nonglem. D sã n wa paam tɩ tẽngã pid ne neb sẽn nong a Zeova la b taabã, pa na n yɩ bark tɛkẽ sɩda?