1, 2. Ebyahandiikirwe nibyoreka bita ngu rukundo ni nkuru?

RUKUNDO nigwo mutwarize gwa Yehova ogurikukirayo obukuru. (1 Yoh. 4:16) Yesu, ou Yehova yaabandize kuhanga, akatuura omu iguru kumara emyaka mingi kandi akeega ebirikukwata ahari Ruhanga. (Kol. 1:15) Obwire bwa Yesu bwona, otwariiremu n’obu yaabaire ari omu nsi, atwire naamanya ngu Yehova ni Ruhanga wa rukundo, kandi arikumutooreza omu kugyoreka. N’ahabw’ekyo, nitubaasa kuhamya ngu obwebembezi bwa Yehova na Yesu nibwija kuguma nibwegamira ahari rukundo.

² Yesu ku yaabuuziibwe ekiragiro ekirikukira ebindi, akagira ati: “Kunda Mukama Ruhanga waawe n’omutima gwawe gwona, n’amagara gaawe goona, n’obwengye bwawe bwona. Eki nikyo kiragiro kikuru kandi eky’okubanza. Ekya kabiri ekirikukishusha n’eki, kunda mutaahi waawe nk’oku oyekunda.”—Mat. 22:37-39.

3. ‘Mutaahi’ waitu n’oha?

³ Yetegyereze ngu Yesu akooreka ngu okukunda Yehova nikyo kiragiro ky’okubanza kandi ekya kabiri n’okukunda abataahi. Eki nikyoreka oku kiri kikuru kugirira rukundo abu orikuba oine  omukago nabo boona. Kwonka shi ‘omutaahi’ n’oha? Ku oraabe ori omu bushwere, mutaahi waawe okuri haihi munonga n’ou oshweraine nawe. Kandi abandi abari haihi naitwe n’abo abari omu kibiina Ekikristaayo, abarikuramya naitwe Ruhanga ow’amazima. Abandi n’abu turikushanga omu kubuurira. Abarikuheereza Yehova kandi abarikukuratira enyegyesa z’Omwana we nibooreka bata ngu nibakunda abataahi?

4. Ahabw’enki abari omu bushwere barikubaasa kusingura n’obu baraabe batahikiriire?

⁴ Yehova akakora obushwere bw’okubanza obu yaahanga Adamu na Haawa reero akabagaita hamwe. Akaba agyendereire ngu bagire okushemererwa, bagume hamwe kandi bazaare baijuze ensi. (Kut. 1:27, 28) Kwonka, okugomera obushoboorozi bwa Yehova obw’okutegyeka kikashiisha obushwere bw’okubanza, kandi kyareetera abantu kugira ekibi ekyarugiremu okufa. (Rom. 5:12) N’obu kiraabe kiri kityo, Ebyahandiikirwe nibitworeka oku turikubaasa kugira obushwere burungi. Birimu obuhabuzi oburikukirayo oburungi aha nshonga egi ahakuba niburuga ahari Yehova, Owaatandikireho obushwere.—Shoma 2 Timoseo 3:16, 17.

5. Ahabw’enki rukundo neyetengyesa omu bushwere?

⁵ Ekigambo kya Ruhanga nikyoreka ngu abantu kubaasa kukoragana gye bashemereire kuba baine rukundo. Kandi eki buzima nikyetengyesa omu bushwere. Entumwa Paulo omu bigambo ebi yaahandiikire ekibiina, akagira ati: “Okukunda kugumisiriza, kugira embabazi; okukunda tikugira ihari; okukunda tikwehimbisa, tikwetunguura; tikukora birikwitsa enshoni, tikwesherurira byakwo, tikurahuka kuguubwa kubi, tikuteekateeka kibi aha muntu; tikushemerererwa kutahikiirira, kureka kushemerererwa amazima. Okukunda kwemera byona, kwikiriza byona, kugira amatsiko ahari byona, kugumisiririza byona. Okukunda tikuhwaho ebiro byona.” (1 Kor. 13:4-8) Okuteekateeka n’okugyendera aha bigambo ebi buzima nikiija kwongyera okushemererwa omu bushwere.

6, 7. (a) Baibuli neegamba ki aha bwebembezi omu ka? (b) Omushaija Omukristaayo ashemereire kutwariza ata omukazi we?

⁶ Rukundo nigwo mutwarize mukuru  omu ntebeekanisa ya Ruhanga ey’obwebembezi. Paulo akashoboorora ati: “Niinyenda ngu imwe mumanye ku omutwe gw’omushaija ari Kristo, n’omutwe gw’omukazi ku ari iba, kandi omutwe gwa Kristo ku ari Ruhanga.” (1 Kor. 11:3) Kwonka emitwe y’amaka tibashemereire kuba nibategyekyesa eikama. Nk’eky’okureeberaho, Yehova n’omutwe gwa Kristo omu muringo gwa rukundo, kandi Yesu nawe naakora nikyo kimwe. Yesu naasiima obwebembezi bwa Ishe, ahakuba akagira ngu ‘naakunda Ishe.’ (Yoh. 14:31) Kikaba kitarikwija kubaasika Yesu kwehurira atyo ku ogire ngu Yehova akaba naatwariza kubi Omwana we.

⁷ N’obu omushaija araabe niwe mutwe gw’omukazi we, Baibuli neemuhabura ‘kumuha ekitiinisa.’ (1 Pet. 3:7) Omuringo gumwe ogu abashaija barikuhamu abakazi baabo ekitiinisa n’okuteekateeka aha byetengo byabo kandi bakashagika n’ebi barikukunda. Buzima, Ekigambo kya Ruhanga nikigira kiti: “Abashaija, mukunde abakazi baanyu, nk’oku Kristo yaakunzire” ekibiina, akeehayo ahabwakyo. (Efe. 5:25) Eego, Yesu akahayo amagara ge ahabw’abakuratsi be. Omushaija yaatooreza omuringo ogu Yesu arikwebemberamu, nikyorobera omukazi we kumukunda, kumuha ekitiinisa kandi akamworobera.—Shoma Tito 2:3-5.

8. Abaheereza ba Yehova baine kureeba bata Abakristaayo bagyenzi baabo?

⁸ Omu nsi yoona, harimu obukaikuru bw’abantu abarikuramya Yehova bakabuurira ebirikukwata aha iziina rye n’ekigyendererwa kye. Abarikuramya Yehova bashemereire kureeba bata ab’eishe-emwe bagyenzi baabo? Ekigambo kya Ruhanga nikigira kiti: “Tukore gye abantu boona, kwonka okukira munonga abari omu nju y’okwikiriza.” (Gal. 6:10; shoma Abarooma 12:10.) Entumwa Petero akahandiika ati: “Mbwenu nk’oku muherize kweza amagara gaanyu omu kworobera amazima, ngu mubone kukunda ab’eishe-emwe mutarikuryarya, mukundane munonga mwihire aha mutima.” Kandi Petero akagambira abaikiriza bagyenzi be ati: “Okukira byona, mukundane.”—1 Pet. 1:22; 4:8.

9, 10. Ahabw’enki abaheereza ba Ruhanga baine obumwe?

⁹ Ahabw’okugira ngu nitukundira kimwe abaheereza ba Yehova bagyenzi baitu, twine ekibiina ky’omutaano omu nsi yoona. Kandi ahabw’okukunda Yehova kandi tukoorobera ebiragiro bye, naatushagika arikukoresa amaani ge agarikukirirayo kimwe omu nsi yoona, nigwo omwoyo gwe ogurikwera. Eki nikitubaasisa kugira obumwe nk’ab’eishe-emwe omu nsi yoona.—Shoma 1 Yohaana 4:20, 21.

¹⁰ Paulo arikworeka ekyetengo ky’okukundana eky’ab’eishe-emwe, akahandiika ati: “Abarikukundwa, mujware omutima gw’esaasi, embabazi, okutwaza gye, obucureezi n’okugumisiriza, nimugumisiririzana; kandi ku haraabe hariho oine eki arikufa na mugyenzi we, musaasirane; nk’oku Mukama yaabasaasiire, mube nikwo mwatwaza. Kandi okwongyera ahari ebyo byona, mujware okukunda, nikwo kukomerana byona bikakwatanisibwa kimwe.” (Kol. 3:12-14) Ka twine okushemererwa kureeba ngu twine okukunda ‘okurikukomerana byona bikakwatanisibwa kimwe’ n’obu turaabe tutakuriire omu mbeera zitarikushushana!

11. Ni mitwarize ki erikutaanisaho ekibiina kya Yehova?

¹¹ Rukundo eyaabuzima n’obumwe bw’abaheereza ba Yehova nibihamiza kimwe ngu nibo bari omu diini ey’amazima, ahakuba Yesu akagira ati: “Ku muriguma nimukundana, nibwo abantu boona baribamanya  ku muri abeegi bangye.” (Yoh. 13:34, 35) Kandi entumwa Yohaana akahandiika ati: “Ekyo nikyo kimanyisa abaana ba Ruhanga n’abaana ba Sitaane; weena otakora by’okuhikiirira ti wa Ruhanga, n’obu yaakuba otakunda mwene ishe. Ahakuba obu nibwo butumwa obu mwahuriire okwiha iranaira, ngu tukundane.” (1 Yoh. 3:10, 11) Rukundo ei Abajurizi ba Yehova baine ahabw’okugira obumwe, nebareetera kuba abakuratsi ba Kristo ab’amazima abu Ruhanga arikukoresa kuhikiiriza ekigyendererwa kye eky’okubuurira amakuru marungi omu nsi yoona.—Mat. 24:14.

12, 13. Ab’omutwe omuhango hati nibakora ki, kandi bari haihi kutunga migisha ki?

¹² Baingi aha baheereza ba Yehova ‘n’ab’omutwe muhango . . . abaarugire omu mahanga goona n’enganda zoona n’abantu boona n’endimi zoona, beemereire omu maisho g’ekitebe ky’Obukama [bwa Ruhanga] n’omu maisho g’Omwana gw’entaama [Yesu Kristo].’ Abo ni baahi? “Abo nibo baarugire omu kubonabona kwingi, bakoozya ebijwaro byabo omu shagama y’Omwana gw’entaama,” ahabw’okugira ngu nibaikiririza omu kitambo kya Yesu. Ab’omutwe omuhango nibakunda Yehova n’Omwana we kandi ‘nibaheereza [Ruhanga] nyomushana na nyekiro.’—Kush. 7:9, 14, 15.

¹³ Juba Ruhanga naija kucwekyereza ensi egi embi omu ‘kubonabona kwingi.’ (Mat. 24:21; shoma Yeremia 25:32, 33.) Kwonka ahabwa rukundo ei Yehova ainiire abaheereza be, naija kubacungura boona hamwe nk’ekibiina bataahe omu nsi ensya. Nk’oku kyagambirwe emyaka 2,000 enyima, Ruhanga “aryaragaza amarira goona aha maisho gaabo; tiharibaho kufa bundi, n’obu kwakuba okucura nari okurira nari obusaasi.” Oine ekihika ky’okutuura omu Paradiso ‘ebya ira byaba byahweireho’?—Rev. 21:4.

14. Ab’omutwe omuhango nibaingana ki?

¹⁴ Obu ebiro by’emperu byatandika omuri 1914, hakaba hariho abaheereza ba Yehova bakye omu nsi yoona. Abashukirweho amajuta abaabaire bari omu nsi ahabw’okukunda abataahi, n’ahabw’okuhwerwa omwoyo gwa Ruhanga, bakagumisiriza omu murimo gw’okubuurira. Kandi hati ab’omutwe omuhango abaine amatsiko g’okutuura omu nsi bariyo nibarundaanwa. Tweyongyeire twahika nka 8,000,000 omu bibiina ebirikurenga 115,400 omu nsi yoona, kandi nitugumizamu kweyongyera. Nk’eky’okureeberaho, Abajurizi ba Yehova abasya abarikurenga 275,500 bakabatizibwa omu mwaka gw’obuheereza ogwa 2014, ekirikumanyisa ngu abantu nka 5,300 nibo baabaire nibabatizibwa buri saabiiti.

15. Shoboorora oku omurimo gwaitu gw’okubuurira gujanjaire.

¹⁵ Omurimo gw’okubuurira gujanjaire munonga. Ebitabo byaitu ebirikushoboorora aha Baibuli hati nibiteerwa omu ndimi ezirikurenga 700. Omunaara gw’Omurinzi niyo magaziini erikukirayo kujanjaara omu nsi yoona. Magaziini ezirikuhika 52,000,000 nizo zirikuteerwa buri kwezi omu ndimi 247. Obutabo oburikurenga omu 200,000,000 obwa Niki Eki Baibuli Buzima Erikwegyesa? buteirwe omu ndimi ezirikurenga 250.

16. Niki ekirikureetera ekicweka eky’omu nsi eky’ekibiina kya Yehova kutunguuka omu by’omwoyo?

¹⁶ Entunguuka ei turikureeba obunaku obu neerugiirira aha kwikiririza omuri Ruhanga n’okwesiga Baibuli Ekigambo kya Yehova ekirikutangaaza. (1 Tes. 2:13) Ekirikukira obukuru n’oku abaheereza ba Yehova barikutunguuka omu by’omwoyo, n’obu Sitaane “ruhanga w’ensi egi” araabe naabanga kandi arikubahiiganisa.—2 Kor. 4:4.

17, 18. Abaheereza ba Ruhanga baine kugira miteekateekyere ki aha batari baikiriza?

¹⁷ Abaheereza ba Yehova bashemereire kugira miteekateekyere ki ahari abo abatarikuheereza Ruhanga? Omu murimo gwaitu gw’okubuurira, abantu nibatutwariza omu miringo etarikushushana, abamwe nibatwakiira, kandi abandi batutwariza kubi. Yaaba abantu baatutwariza bata, Ekigambo kya Ruhanga nikyoreka omutindo ogu abaheereza be baine kukuratira. Nikigira kiti: “Ebigambo byanyu bigume biri eby’embabazi, nk’ebirimu omwonyo, mubone kumanya oku mushemereire kugarukamu omuntu weena.” (Kol. 4:6) Twaba nitushoboororera abantu enshonga ahabw’enki twine amatsiko, twine kukikora “n’obucureezi” kandi turikubaha ekitiinisa, ahakuba okukunda abataahi nikyo kirikutuhiga.—1 Pet. 3:15.  

¹⁸ Nitworeka ngu nitukunda abataahi nangwa n’obu abu turikubuurira baakwanga amakuru marungi nari bakatujuma. Nitutooreza Yesu ahakuba “ku yaajumirwe, tiyaabagaruriza, ku yaabonabonesiibwe, tiyaabahayira, kureka akeehayo ahari ogwo ocwa emanja z’amazima.” (1 Pet. 2:23) Yaaba turi n’abaikiriza bagyenzi baitu, nitworeka obucureezi kandi tugyendera aha buhabuzi obu: “Murekye kwihurana ebibi, nari okugarurirana ebijumo; kureka omu mwanya gw’ebyo mushabirane omugisha.”—1 Pet. 3:8, 9.

19. Yesu akaha musingye ki aha bikwatiraine n’abarikutuhiiganisa?

¹⁹ Abaheereza ba Yehova ahabw’okuguma bari abacureezi, niboorobera omusingye mukuru ogu Yesu yaahaire. Omu Rubazo rwe orw’aha Rushozi, akagira ati: “Mukahurira ku kyagambirwe ngu: Okunde mutaahi waawe, oyangye omuzigu waawe. Kwonka nyowe nimbagambira nti: Mukunde abazigu baanyu, kandi mushabire n’abarikubahiiga, mubone kuba abaana ba Shoimwe ori omu iguru; ahabw’okuba eizooba rye arijwisiza ababi n’abarungi, kandi agwisiza enjura abahikiriire n’abatahikiriire.” (Mat. 5:43-45) Buzima, itwe abaheereza ba Ruhanga twine kwega ‘kukunda abazigu baitu,’ tutarikwihirira aha ku baatutwariza.

20. Ahabw’enki abantu boona nibaija kuba nibakunda Ruhanga n’abataahi omu nsi ensya? (Reeba ekishushani aha kutandika.)

²⁰ Omu mbeera zoona, abaheereza ba Yehova baine kukyoreka omu miteekateekyere yaabo n’omu bikorwa byabo ngu nibakunda Yehova n’abataahi. Nk’eky’okureeberaho, nangwa abamwe n’obu baakwanga kwakiira amakuru g’Obukama, nitworeka ngu nitukunda abataahi baaba baine eki barikwetenga. Entumwa Paulo akahandiika ati: “Mutarigira eibanja ryona aha muntu, kureka ery’okukundana; ahakuba okunda mutaahi we, aba ahikize Ebiragiro. Ahabw’okuba ebi ngu Otarishambana, Otariita, Otariiba, Otaryetenga eby’abandi, n’ebindi biragiro byona, biteeranira omu kigambo eki ngu: Kunda mutaahi waawe nk’oku oyekunda. Oine okukunda tagirira mutaahi we kubi; n’ahabw’ekyo okukunda nikwo kuhitsya Ebiragiro.” (Rom. 13:8-10) Itwe Abajurizi ba Yehova, nitworeka rukundo eyaabuzima omu nsi egi embi erikutegyekwa Sitaane etarimu kukwatanisa, kandi erimu obushaarizi. (1 Yoh. 5:19) Buzima, rukundo niyo eraabe neeyebembera buri kimwe ekiraakorwe omu nsi ensya yaaba etakirimu Sitaane, baadaimoni be, n’abantu abagomi. Ka nigwija kuba guri omugisha gw’amaani abantu boona abaraabe nibatuura omu nsi kuba nibakunda Ruhanga n’abataahi!