1, 2. Kon Beibel ta enfatisá e importansia di amor?

AMOR ta e kualidat di mas importante di Yehova Dios. (1 Huan 4:16) Hesus, kende ta Dios su promé kreashon, a biba míles di miónes di aña den shelu huntu kuné i a siña di Yehova su kamindanan di amor. (Kol. 1:15) Durante henter Hesus su bida, asta ora e tabata riba tera, el a mustra ku e ta komprondé plenamente kon grandi Yehova su amor ta, i e ta imitá e amor ei. Pues, nos por ta sigur ku Yehova i Hesus semper lo goberná ku amor.

² Na un okashon, ora un hòmber a puntra Hesus kua ta e mandamentu di mas grandi di Lei, Hesus a kontest’é: “‘Stima Yehova bo Dios ku henter bo kurason, ku henter bo alma i ku henter bo mente.’ Esaki ta e mandamentu di mas grandi i esun di promé. E di dos, igual kuné, ta esaki: ‘Stima bo próhimo meskos ku bo mes.’”—Mat. 22:37-39.

3. Ken ta nos “próhimo”?

³ Tuma nota ku Hesus a menshoná amor pa próhimo nèt despues di amor pa Yehova. Esaki ta demostrá kon importante  ta pa semper mustra amor den nos relashon ku otro hende. Pero ken ta nos “próhimo”? Si nos ta kasá, nos próhimo mas pegá ta nos esposo òf esposa. Nos rumannan den kongregashon tambe ta nos próhimo. Otronan ku nos ta konsiderá nos próhimo ta esnan ku nos ta topa den sirbishi. Kon nos por mustra amor pa próhimo?

4. Kon nos por tin un matrimonio felis apesar di imperfekshon?

⁴ Yehova a instituí e promé matrimonio ora el a krea Adam ku Eva i a uni nan. Su propósito tabata pa nan tabata felis, pa nan union a dura pa semper i pa nan a yena e tera ku nan desendientenan. (Gén. 1:27, 28) Sinembargo, rebelion kontra Yehova su soberania a ruiná e felisidat di e promé matrimonio i a trese piká i morto pa henter humanidat. (Rom. 5:12) Apesar di esei, nos sí por tin un matrimonio felis. E Palabra di Dios ta mustra kon nos por logra esei. Beibel tin e mihó konseho tokante e tema akí pasobra e ta bini di Yehova, e Originadó di matrimonio.—Lesa 2 Timoteo 3:16, 17.

5. Kon importante amor ta den un matrimonio?

⁵ Kiko ta nesesario pa bo por tin un bon relashon ku otro hende? Segun Beibel, nos mester di amor, esta, un sintimentu di apego òf kariño profundo pa un otro persona. Esaki siguramente ta e kaso den un matrimonio. Apòstel Pablo a bisa e kristiannan di su tempu: “Amor tin pasenshi i ta bondadoso. Amor no ta yalurs, e no ta broma, e no ta halsa su mes, e no ta komport’é indesentemente, e no ta buska su mes interes, e no ta rabia lihé. E no ta keda kòrda e malu ku hende a hasié. E no ta alegrá ku inhustisia, ma ta alegrá ku loke ta bèrdat. E ta wanta tur kos, kere tur kos, spera tur kos, soportá tur kos. Amor no ta kaba nunka.” (1 Kor. 13:4-8) Si bo meditá riba e palabranan inspirá akí i apliká nan, bo matrimonio lo ta mas felis.

6, 7. (a) Kiko 1 Korintionan 11:3 ta bisa tokante outoridat den famia? (b) Kon un esposo kristian mester trata su esposa?

 ⁶ Yehova a disidí ken mester ta e kabes di famia. Pablo a splika: “Mi ke pa boso sa ku kabes di tur hòmber ta Kristu; kabes di muhé ta hòmber; anto kabes di Kristu ta Dios.” (1 Kor. 11:3) Pero Yehova ke pa e esposo ehersé su outoridat ku amor, no na un manera dominante. Por ehèmpel, Yehova ta kabes di Hesus, pero semper el a trat’é ku bondat i konsiderashon. Komo resultado, Hesus a respetá e outoridat di su Tata, i el a bisa: “Mi ta stima e Tata.” (Huan 14:31) Hesus lo no a sinti asina si Yehova a trat’é na un manera dominante.

⁷ Aunke e esposo ta kabes di su esposa, Beibel ta bisa pa e “duna [su esposa] onor.” (1 Ped. 3:7) Kon un esposo por hasi esaki? Wèl, e por tene konsiderashon ku e nesesidat- i preferensianan di su esposa. Beibel ta bisa: “Esposonan, sigui stima boso esposa, meskos ku Kristu tambe a stima e kongregashon i a entregá su bida p’e.” (Efe. 5:25) Hesus a asta duna su bida pa su siguidónan. Ora un esposo ta un kabes amoroso meskos ku Hesus, lo ta mas fásil pa su esposa stim’é, respet’é i ser sumiso na dje.—Lesa Tito 2:3-5.

8. Kon nos mester trata nos rumannan?

⁸ Rònt mundu, tin miónes di hende ku ta adorá Yehova i ta hasi su nòmber i propósito konosí. Kon nos mester trata nan? Beibel ta kontestá: “Laga nos hasi loke ta bon pa ku tur hende, pero spesialmente pa ku nos rumannan den fe.” (Gal. 6:10; lesa Romanonan 12:10.) Apòstel Pedro a skirbi: “Awor ku boso a purifiká boso alma dor di obedesé e bèrdat, loke a resultá den amor sin hipokresia pa e rumannan, stima otro intensamente di kurason.” Despues el a sigui bisa: “Riba tur kos, stima otro intensamente.”—1 Ped. 1:22; 4:8.

9, 10. Dikon tin union entre sirbidónan di Dios?

⁹ E amor profundo ku nos tin pa nos rumannan ta hasi nos organisashon mundial realmente úniko. I komo ku nos ta stima Yehova i ta obedesé su leinan, e ta sostené nos ku e forsa mas poderoso di universo, esta, su spiritu santu. Esei ta yuda nos pa nos ta uní i disfrutá di un hermandat internashonal.—Lesa 1 Huan 4:20, 21.

¹⁰ Pablo a enfatisá e importansia di tin amor pa nos rumannan. El a skirbi: “Bisti tierno kompashon, bondat, humildat, suavedat i pasenshi. Sigui soportá otro i pordoná otro libremente, asta si un di boso tin motibu pa keha un otro. Meskos ku Yehova a pordoná boso libremente, boso tambe mester hasi meskos. Pero, ademas di tur e kosnan akí, bisti amor, pasobra e ta e laso perfekto di union.” (Kol. 3:12-14) Esta gradisidu nos ta ku amor, “e laso perfekto di union,” ta reina entre nos sin importá di unda nos ta bini!

11. Kiko ta identifiká Yehova su organisashon?

¹¹ E amor berdadero i union ku tin entre sirbidónan di Yehova ta mustra ku nan ta di e religion berdadero, pasobra Hesus a bisa: “Na esaki tur hende lo sa ku boso ta mi disipelnan, esta, si boso ta stima otro.” (Huan 13:34, 35) I apòstel Huan a bisa: “Na esaki ta bisto ken  ta e yunan di Dios i ken ta e yunan di Diabel: ken ku no ta praktiká hustisia no ta bini di Dios; esun ku no ta stima su ruman tampoko. Pasobra esaki ta e mensahe ku boso a tende na kuminsamentu: nos mester stima otro.” (1 Huan 3:10, 11) E amor i union ku tin entre e Testigunan di Yehova ta un prueba konvinsente ku ta nan ta e berdadero disipelnan di Kristu i ku Dios ta usando nan pa prediká e bon notisia di Reino rònt mundu.—Mat. 24:14.

12, 13. Kiko e “multitut grandi” ta hasiendo awor, i kiko nan lo eksperensiá un den futuro serkano?

¹² Mayoria di Yehova su sirbidónan ta forma parti di “un multitut grandi . . . for di tur nashon, tribu, pueblo i idioma.” Nan ta “pará dilanti di e trono [di Dios] i dilanti di e Lamchi [Hesukristu].” Ken nan ta? “Nan ta esnan ku a sobrebibí e tribulashon grandi, i nan a laba nan pañanan largu i a hasi nan blanku den sanger di e Lamchi,” pasobra nan a pone fe den e sakrifisio di reskate di Hesus. Esnan ku ta pertenesé na e “multitut grandi” ta stima Yehova i su Yu i ‘ta rindi sirbishi sagrado na [Dios] di dia i anochi.’—Rev. 7:9, 14, 15.

¹³ Pronto Dios lo destruí e mundu malbado akí den e “gran tribulashon.” (Mat. 24:21; lesa Yeremías 25:32, 33.) Pero Yehova ta stima su sirbidónan, i p’esei lo e protehá nan komo grupo i yuda nan drenta e mundu nobo. Manera Dios a primintí kasi 2.000 aña pasá, “lo e seka tur lágrima for di nan wowo, i lo no tin morto mas; ni tristesa ni sklamashon ni doló lo no tin mas.” Abo ta anhelá pa biba den Paradeis ora ku “e kosnan ku tabata pasa ántes no t’ei mas”?—Rev. 21:4.

14. Kuantu hende ta forma parti di e multitut grandi awe?

¹⁴ Ora e último dianan a kuminsá na aña 1914, tabatin mas o ménos 5.000 sirbidó di Yehova rònt mundu. Motivá pa amor pa próhimo i ku e sosten di Dios su spiritu santu, e grupo chikitu di ruman ungí a perseverá den e trabou di prediká. Ku ki resultado? Awe, Dios ta reuniendo un multitut grandi ku tin speransa di biba pa semper riba tera. Awor nos ta mas ku 8.000.000 Testigu ku ta reuní den mas ku 115.400 kongregashon rònt mundu, i e kantidat ta sigui krese. Por ehèmpel, mas ku 275.500 persona a batisá komo Testigu di Yehova durante e aña di sirbishi di 2014. Esei ta un averahe di mas o ménos 5.300 hende tur siman.

15. Deskribí e alkanse di nos trabou di prediká.

¹⁵ E alkanse di e trabou di prediká ta remarkabel. Awe nos publikashonnan ta disponibel den mas ku 700 idioma. E Toren di Vigilansia ta e revista mas distribuí na mundu. Nos ta imprimí mas ku 52.000.000 di e revista akí tur luna, i e ta disponibel den 247 idioma. Ademas, nos a imprimí mas ku 200.000.000 di e buki di estudio titulá Kiko Beibel Ta Siña Realmente? den mas ku 250 idioma.

16. Dikon e organisashon di Yehova ta sigui krese?

¹⁶ E organisashon ta sigui krese pasobra nos tin fe den Dios i nos ta mira Beibel komo su palabra inspirá. (1 Tes. 2:13) Nos ta sigui disfrutá di Yehova su bendishon apesar di odio i oposishon  di parti di Satanas, kende ta “e dios di e mundu akí.”—2 Kor. 4:4.

17, 18. Kon sirbidónan di Yehova mester trata hende ku no ta adorá e Dios berdadero?

¹⁷ Kon sirbidónan di Yehova mester trata hende ku no ta adorá e Dios berdadero? Den nos trabou di prediká nos ta haña hende ku ta skucha nos i otronan ku ta trata nos malu. Maske kon hende ta reakshoná na nos mensahe, nos mester sigui e konseho ku Beibel ta duna. Beibel ta bisa: “Laga boso palabranan semper ta ku grasia, sasoná ku salu, pa boso por sa kon boso mester kontestá kada persona.” (Kol. 4:6) Ora nos ta defendé nos fe, nos ke hasi esei “na un manera suave i ku rèspèt profundo.”—1 Ped. 3:15.

¹⁸ Asta ora hende rabia i rechasá nos mensahe, nos ta mustra amor pa próhimo i imitá e ehèmpel di Hesus: “Ora nan tabata insult’é, e no a insultá bèk. Ora e tabata sufri, e no a menasá.” En bes di esei, el a konfia den Yehova. (1 Ped. 2:23) Sea ku nos ta ku nos rumannan òf ku otro hende, nos ta mustra humildat i apliká e siguiente konseho: “No paga malu ku malu òf insulto ku insulto. Pasobra Dios a skohe boso pa bendishoná otro hende.”—1 Ped. 3:8, 9.

19. Kon nos mester trata nos enemigunan?

¹⁹ Humildat ta yuda nos obedesé un prinsipio importante ku Hesus a duna. Den su Sermon Riba Seru el a bisa: “Boso a tende den pasado: ‘Stima bo próhimo i odia bo enemigu.’ Ma ami ta bisa boso: Sigui stima boso enemigunan i hasi orashon pa esnan ku ta persiguí boso, pa boso por demostrá ku boso ta yu di boso Tata ku ta den shelu, ya ku e ta laga su solo sali riba mal hende i bon hende i ta laga awa kai riba hende hustu i inhustu.” (Mat. 5:43-45) Sí, komo sirbidó di Dios, nos mester siña “stima [nos] enemigunan,” sin importá kon nan ta trata nos.

20. Kon nos sa ku amor pa Dios i pa próhimo lo reina riba henter e tera? (Wak e promé plachi.)

²⁰ Den tur área di bida, e pueblo di Yehova mester mustra pa medio di nan aktitut i nan akshonnan ku nan ta stima Yehova i nan próhimo. Por ehèmpel, asta si hende oponé nos mensahe, nos ta mustra amor pa próhimo ora nan ta den nesesidat. Apòstel Pablo a skirbi: “No debe ningun hende nada; úniko debe ku boso tin ta di stima otro, pasobra esun ku ta stima su próhimo a kumpli ku lei. Pasobra e mandamentunan—‘no kometé adulterio,’ ‘no mata,’ ‘no hòrta,’ ‘no kudishá,’ i kualke otro mandamentu ku tin—ta keda resumí den e palabra akí: ‘Stima bo próhimo meskos ku bo mes.’ Un hende ku tin amor no ta hasi malu ku su próhimo; p’esei amor ta kumplimentu di lei.” (Rom. 13:8-10) Komo Testigu di Yehova, nos ta mustra amor berdadero den e mundu malbado, dividí i violento akí ku ta bou di kontrol di Satanas. (1 Huan 5:19) Despues ku Yehova destruí Satanas, e demoñonan i hende malbado, amor lo reina riba henter e tera. Lo ta un gran bendishon ora tur hende riba tera stima Yehova i nan próhimo.