1, 2. Ia duwen Paipel eh kasalehda kesempwalpen limpoak?

 LIMPOAK iei sapwellimen Siohwa Koht irair me keieu kaselel. (1 Sohn 4:16) Tepin sapwellimen Koht kepikipik, Sises Krais, ketiket rehn Semeo nanleng sounpar lik lik kei oh sukuhlkihdi ia uwen Siohwa eh ketin wia Koht limpoak men. (Kol. 1:15) Sises ketin kasalehda soangen limpoakohte erein sapwellime mour, nanleng oh pil sampah. Eri kitail kak uhdahn kamehlele me Siohwa oh Sises pahn ahnsou koaros ketin kaunda ni limpoak.

² Ni ahnsou me emen patohwan kalelapak rehn Sises mehnia kosonned me keieu kesempwal, Sises mahsanih: “‘Ke pahn poakohng Kaun-o omw Koht sang nan kapehdomw unsek, sang ni [“omw mour,” NW] unsek, sang ni omw lamalam koaros unsek.’ Ih met kosonned me keieu lapalap oh kesempwal. A me keriaun kesempwal, me rasehngete met, iei: ‘Ke pahn poakohng mehn mpomw duwen omw kin poakohng pein uhk.’”​—Mad. 22:37-39.

3. Ihs ‘mehn mpatail’ kan?

³ E kesempwal kitail en kasalehda limpoak ong koaros me kitail kin ehuong. Sises mahsanih me kitail anahne poakohng Siohwa oh pil poakohng mehn mpatail kan. Ahpw ihs ‘mehn mpatail’ kan?  Ma kitail pwopwoud, mehn mpatail me keieu keren iei atail pwoud. Mehn mpatail kan iei pil riatail Kristian kan nan mwomwohdiso, oh aramas akan me kitail kin tuhwong nan kalohk. Nan iren onop wet, kitail pahn sukuhlki ia duwen atail kak kasalehda limpoak ong mehn mpatail kan.

4. Ia duwen mouren pwopwoud eh kak pweida mwahu mendahki aramas sohte unsek?

⁴ Siohwa ketin kapikada Adam oh Ihp oh kapwopwoudihirahla. Met iei tepin kapwopwoud. Koht ketin kupwurki ira en ahneki mouren pwopwoud nsenamwahu ehu oh audehkihda sampah kadaudokara kan. (Sen. 1:27, 28) Ahpw, mwurin ara sapeikiong Siohwa, ara mouren pwopwoud ohla, oh dihp oh mehla lelohng kitail koaros. (Rom 5:12) Mendahki met, mouren pwopwoud kak pweida mwahu rahnwet. Nan Paipel, Siohwa, me ketin wiahda koasoandi en pwopwoud, ketikihongehr pwopwoud kan kaweid me keieu mwahu.​—Wadek 2 Timoty 3:16, 17.

5. Ia uwen kesempwal en limpoak nan mouren pwopwoud ehu?

⁵ Paipel kasalehda me limpoak, pepehm en karanih de ahneki pepehm loal ong emen, kin uhdahn anahn pwe aramas en kak ahneki nanpwungmwahu me nsenamwahu. Met uhdahn mehlel nan mouren pwopwoud. Wahnpoaron Pohl kawehwehda duwen limpoak mehlel ni eh nda: “Limpoak me kanengamah oh kadek; e sohte kin peirin de aklapalap de pohnmwahso; limpoak sohte kin aklemei, e sohte kin mehwo, de kin mwadang lingeringerda; limpoak sohte kin inaptihnmwomw; limpoak sohte kin perenkihda me sapwung, pwe me mehlelete me e kin perenki. Limpoak kin sewesei kitail en loalenohng apwal akan koaros, e kin sewese atail pwoson ahnsou koaros, e kin sewesei kitail en liki Koht, oh en pil kanengamah ni mehkoaros. Limpoak me poatopoat, sohte imwi.” (1 Kor. 13:4-8) Ni atail kin medewe duwen dahme Pohl nda oh kapwaiada, kitail kak ahneki mouren pwopwoud ehu me nsenamwahu.

6, 7. (a) Dahme Paipel mahsanih duwen tapwi? (b) Ia uhdahn mwomwen Kristian ohl pwopwoud men eh pahn apwalih eh pwoud?

⁶ Siohwa ketin piladahr ihs me pahn wia tapwin peneinei. Pohl kawehwehda: “I men kumwail en dehdehkihla mwahu padahk wet: duwen Krais eh tapwin [“ohl,” NW] koaros,  duwen ohl pwopwoud eh moangen eh pwoud, oh duwen Koht eh tapwin Krais.” (1 Kor. 11:3) Ahpw Siohwa ketin kasik ohl pwopwoud men en wia tapwin peneinei limpoak men, en sohte douluhl lemei. Pein Siohwa ketin wia Tapwi me kadek oh soh roporop. Pwehki met, Sises ketin wauneki sapwellimen Koht kaunda limpoak. E mahsanih: “I poakohng Semei.” (Sohn 14:31) Sises sohte pahn ketin sapwellimanki pepehm wet ma Siohwa ketin lemei ong ih.

⁷ Mendahki ohl pwopwoud men wia tapwin eh pwoudo, Paipel mahsanih me en wauneki eh pwoudo. (1 Pit. 3:7) Ia duwen ohl pwopwoud men eh kak wia met? E kak tehk dahme eh pwoudo anahne oh wauneki dahme liho mwahuki. Paipel mahsanih: “Ohl pwopwoud kan, kumwail poakohng amwail werek kan duwehte Krais eh ketin poakohng mwomwohdiso oh ketin pangala pein ih pwehki mwomwohdiso.” (Ep. 5:25) Ei, Sises pil ketin tounmeteikihla pein sapwellime mour ong sapwellime tohnpadahk kan. Ni ohl pwopwoud men eh wia tapwi limpoak men duwehte Sises, e pahn mengei ong eh pwoudo en poakohng oh wauneki ih oh pil eh pilipil kan.​—Wadek Taitus 2:3-5.

8. Ia pahn atail pepehm ong riatail Kristian kan?

⁸ Rahnwet, aramas rar rar kei nan sampah pwon kin kaudokiong Siohwa. Irail iei riatail Kristian kan. Ia pahn atail pepehm ong irail? Paipel mahsanih: “Kitail en wia mwahu ong aramas koaros; ahpw mehlel ong irail kan me kisehn atail pwoson.” (Kal. 6:10; wadek Rom 12:10.) Wahnpoaron Piter ntingihedi me atail “peikiong me mehlelo” en imwikihla limpoak mehlel ong riatail Kristian kan. Piter pil padahkihong rie Kristian kan: “Mwohn mehkoaros kumwail nantihong en limpoakpene.”​—1 Pit. 1:22; 4:8.

9, 10. Dahme kahrehda sapwellimen Koht aramas akan kin miniminpene?

⁹ Atail pwihn uhdahn weksang pwihn teikan koaros. Dahme kahrehda? Pwehki kitail ahneki limpoak laud oh mehlel ong riatail Kristian kan. Kesempwal sang met, pwehki atail poakohng Siohwa oh peikiong sapwellime kosonned kan, e kin ketin sewesehkin kitail manaman me keieu laud nan lahng oh sampah, me iei sapwellime manaman. Sapwellimen Koht manaman kin sewese kitail en wia pirien ehu me kin uhdahn miniminpene nan sampah pwon.​—Wadek 1 Sohn 4:20, 21.

¹⁰ Pohl kasalehda duwen anahnepen limpoak nanpwungen Kristian kan ni eh ntingihedi: “Kumwail en limpoak ong me mi nan apwal akan, kadek, mpahi oh karakarahk, aktikitik oh kanengamah. Kumwail en sawaspene oh mahkpene nanpwungamwail, ni emen rehmwail eh pahn kin kaulime emen. Kumwail uhdahn pahn mahkpene nanpwungamwail, nin duwen Kaun-o eh ketin mahkohngkumwailehr. Eri, kumwail kapatahiong soahng pwukat limpoak, pwe ih me kin kapatapene oh oarepene mehkoaros pwe en wiahla ehu ni mehlel.” (Kol. 3:12-14) Ia uwen atail kalahnganki me limpoak, “me kin kapatapene oh oarepene mehkoaros pwe en wiahla ehu ni mehlel,” kin mie nanpwungatail sohte lipilipil ia wasa kitail kohsang ie!

11. Dahme kin kasalehda ihs me wia sapwellimen Koht pwihn?

¹¹ Limpoak mehlel oh miniminpenehn sapwellimen Siohwa ladu kan kin kasalehda me irail me kin wia kaudok mehlel. Sises mahsanih: “Pwe ihme aramas koaros pahn esehki me kumwail nei tohnpadahk, ma kumwail pahn limpoakpene.” (Sohn 13:34, 35) Oh wahnpoaron Sohn ntingihedi: “Iei me kasalehda wekpeseng en sapwellimen Koht kan oh serien  Tepil kan: mehmen me sohte wiahda me pwung de pil sohte poakohng rie, kaidehk ih sapwellimen Koht. Pwe iei met padahk me kumwail rongehr nin tapio: kitail en limpoakpene.” (1 Sohn 3:10, 11) Limpoak oh miniminpene kin kasalehda me Sounkadehdehn Siohwa kan iei sapwellimen Krais tohnpadahk mehlel kan, me iei aramas me Koht kin ketin doadoahngki pwehn kalohki rongamwahu en Wehio nan sampah pwon.​—Mad. 24:14.

12, 13. Dahme irail kan me wia kisehn pokon kalaimwuno wiewia rahnwet, oh dahme pahn wiawihong irail ni ahnsou keren?

¹² Pali laud en sapwellimen Siohwa ladu kan rahnwet wia kisehn pokon kalaimwuno me kohsang soangsoangen wasa kan nin sampah, oh re kin kasalehda arail utung Wehio. Irail me “keidier nan kamakam laudo; re kamwakeledahr ar likou kan, oh ntahn Sihmpwulo me re mwakelekelkilahr” sang arail kasalehda arail pwoson sapwellimen Sises meirong. Irail me wia kisehn pokon kalaimwuno kin poakohng Siohwa oh sapwellime Ohlo, oh re kin kaudokiong Siohwa ni rahn oh pwohng.​—Kaud. 7:9, 14, 15.

¹³ Ni ahnsou keren Koht pahn ketin kasohrehla sampah suwed wet nan ‘kahn kamakam kowahlapo.’ (Mad. 24:21, NW; wadek Seremaia 25:32, 33.) Ahpw Siohwa pahn ketin doarehla oh kahluwalong sapwellime ladu kan nan sapwellime sampah kapw pwehki e ketin poakohng irail. Nin duwen eh ketin inoukidahr kereniong sounpar 2,000 samwalahro, “e pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.” Ia duwe, ke kin kasik en mour nan Paradais mwurin soahng suwed koaros, lokolok, oh mehla ar sohralahr?​—Kaud. 21:4.

14. Ia uwen laudlahn pokon kalaimwuno?

¹⁴ Ni imwin rahn akan eh tepida nan pahr 1914, sapwellimen Koht ladu meh kid keite mie nan sampah pwon. Pwehki limpoak ong mehn mparail kan oh sawas me kohsang sapwellimen Koht manaman, pwihn tikitik en Kristian keidi wet kin kalohki rongamwahu en Wehio mendahki kahpwal kan. Ia imwilahn met? Rahnwet pokon kalaimwun en aramas me ahneki koapworopwor en mour kohkohlahte nan sampah kin wie kohkohpene. Mie mpen Sounkadehde 8,000,000 nan mwomwohdiso daulih 115,400 nan sampah pwon, oh nempe wet wie kekeirdahte. Karasepe, Sounkadehde kapw kan me daulih 275,500 papidaisla erein pahr en kalohk en 2014. Met duwehte mpen meh 5,300 me papidaisla ehuehu wihk.

15. Ia duwen me tohto ar rong duwen rongamwahwo rahnwet?

¹⁵ E kapwuriamwei en kilang ia uwen tohto en irail kan me rong duwen rongamwahu en Wehio. Rahnwet neitail pwuhk kan miehier ni lokaia daulih 700. Kahn Iroir wia kisin pwuhk me keieu kohpeseng nan sampah. Daulih meh limedep rierar (52,000,000) me kin wiawihda ni lokaia 247 ehuehu sounpwong. Oh neitail pwuhk en onop Dahme Paipel Uhdahn Padahngki? kawehwehdi ni lokaia daulih 250, oh daulih meh riesapw (200,000,000) me wiawihdahr.

16. Dahme kahrehda sapwellimen Siohwa pwihn kin pousehlahte wie kekeirda?

¹⁶ Atail pwihn kin wie kekeirda pwehki atail kin pwoson Koht oh pwungki me Paipel iei sapwellime Mahsen. (1 Des. 2:13) Kitail kin pousehlahte perenki sapwellimen Siohwa kapai mendahki ahn Sehdan kailok oh uhwong.​—2 Kor. 4:4.

17, 18. Dahme Siohwa ketin kasik duwen mwomwen atail pepehm ong irail kan me sohte kin kaudokiong ih?

¹⁷ Aramas akan kin mwekidki atail kalohk ni soangsoangen ahl tohto. Ekei kin rong kitail a meteikan kin kailongki atail padahk kan. Dahme Siohwa ketin kasik duwen mwomwen atail pepehm ong irail kan me sohte kin kaudokiong ih? Sohte lipilipil ia duwen aramas ar kin mwekidki atail padahk, kitail kin idawehn kaweido me mi nan Paipel. E mahsanih: “Amwail koasoi mwohn aramas en katapan oh kansenamwahu; oh kumwail uhdahn pahn ese duwen amwail pahn sapeng koaros ni pwung.” (Kol. 4:6) Ni ahnsou me kitail uhki dahme kitail kamehlele, kitail men wia met ni “tiahk en kadek oh wahu” pwehki kitail poakohng mehn mpatail kan.​—1 Pit. 3:15, 16.

¹⁸ Pil ni ahnsou me aramas akan lingeringerda oh sohte men rong atail padahk, kitail kin kasalehda atail limpoak ong mehn mpatail kan. Kitail alasang sapwellimen Sises mehn kahlemeng mwahu. Ni aramas akan ar lahlahwe Sises “e soh mwahn dupukohng irail; nan sapwellime lokolok mwuledek, e sohte angiangihada sounkamakam ko.” Ahpw, Sises ketin likih Siohwa. (1 Pit. 2:23) Eri ahnsou koaros, kitail en kasalehda aktikitik oh doadoahngki kaweid wet: “Kumwail dehr dupungki me suwed ong me suwed, de lokaia suwed ong lokaia suwed; ahpw dupungkihong me suwed amwail kupwuramwahu.”​—1 Pit. 3:8, 9.

19. Ia pahn mwomwen atail wiewia ong atail imwintihti kan?

¹⁹ Aktikitik kin sewese kitail en peikiong kaweid de ire mehlel kesempwal ehu me Sises ketikihda. E mahsanih: “Kumwail pil rongehr padahk pwoatet: ‘Ke en poakohng mehn mpomw kan, ah kailongki omw imwintihti kan.’ A ngehi I ndaiong kumwail met: kumwail poakohng amwail imwintihti kan oh kapakapki me kin kalokei kumwail, pwe kumwail en wiahla sapwellimen Sahm me ketiket nanleng, me kin ketin dakerki sapwellime ketipin pohn me suwed oh me mwahu kan, oh kin ketin kamwerehdi keteu pohn me lelepek kan oh me dipan akan.” (Mad. 5:43-45) Nin duwen sapwellimen Koht ladu kan, kitail anahne poakohng atail imwintihti kan sohte lipilipil dahme re wiahiong kitail.

20. Ia duwen atail ese me limpoak ong Koht oh mehn mpatail kan pahn kadirehla sampah pwon? (Menlau kilang tepin kilel.)

²⁰ Ahnsou koaros, kitail anahne kasalehda me kitail poakohng Siohwa oh pil mehn mpatail kan. Mehnda ma aramas akan uhwong kitail oh dahme kitail kin padahngki, kitail kin sewese irail ahnsou kan me anahn. Wahnpoaron Pohl ntingihedi: “Kumwail dehr pweipwand ong emen-iei soangen pweipwandteieu me kumwail pahn wia: limpoakpene nanpwungamwail. Mehmen me kin poakohng mehn mpe kin kapwaiada Kosonned en Moseso. Kosonned ko me mahsanih, ‘Dehr kamwahl; dehr kemehla aramas; dehr pirap; dehr noahrok’ -mouren kosonned pwukat, oh pil mouren kosonned teikan, oaralape mehteieu: ‘Ke en poakohng mehn mpomw, duwen omw kin poakohng pein uhk.’ Ma ke kin poakohng mehn mpomw, ke sohte pahn wiahiong me suwed. Eri, limpoak iei kapwaipen Kosonnedo pwon.” (Rom 13:8-10) Nan sampah saminimin, tiahk lemei, oh suwed wet me mi pahn kaundahn Sehdan, sapwellimen Koht ladu kan kin kasalehda limpoak mehlel ong mehn mparail kan. (1 Sohn 5:19) Mwurin Siohwa ketin kasohrehla Sehdan, nah ngehn saut kan oh sampah suwed wet, limpoak pahn kadirehla sampah pwon. Ia uwen eh pahn wia kapai ehu ni ahnsou me koaros nin sampah pahn poakohng Siohwa oh mehn mparail kan!