1, 2. Kodi Bhibhlya isapangiza tani kufunika kwa ufuni?

UFUNI ndi n’khaliro ukulu kakamwe wa Yahova Mulungu. (1 Jwau 4:16) Pakutoma Mulungu acita Yezu, mbakhala pabodzi na iye mu pyaka pizinji kakamwe kudzulu. Yezu apfundza makhaliro aufuni a Mulungu. (Akol. 1:15) Mu umaso wace onsene, kuphatanizambo pikhali iye pa dziko yapantsi, Yezu apangiza kuti asadziwa mwadidi kuti Yahova ndi Mulungu waufuni, iye asatowezera ufuni unoyu. Natenepa, tiri na cinyindiro cakuti utongi wa Yahova na Yezu unadzatsogolerwa na ufuni kwenda na kwenda.

² Pidabvundzwa iye kuti ndi api matongero makulu a Mwambo, Yezu alonga: ‘Funa Yahova Mulungu wako na ntima wako onsene, na umaso wako onsene, na ndzeru zako zonsene. Anewa ndi matongero makulu na akutoma. Aciwiri ndi sawasawa na akutoma: ‘Funa ndzako ninga iwe ene.’’​—Mat. 22:37-39.

3. Kodi “ndzathu” mbani?

³ Onani kuti Yezu alonga kuti kufuna ndzathu ndi kwakufunikambo ninga kufuna Yahova. Pyenepi pisapangiza kuti mphyakufunika kakamwe kupangiza ufuni mu kutsalakana kwathu anango. Mphapo, “ndzathu” mbani? Khala tamanga banja, ndzathu wakufunika kakamwe ndi  nkazathu peno mamunathu. Andzathu akufunikambo kakamwe ndi abale na alongo m’mpingo, ale analambira Mulungu wandimomwene na ife pabodzi. Anango ndi ale anacedza na ife mu utumiki. Mu nsolo uno tinadzapfundza kuti tinapangiza tani ufuni kwa andzathu.

4. Thangwi yanji banja inakwanisa kukhala yakutsandzaya mwakukhonda tsalakana kusowa ungwiro kwa anthu?

⁴ Yahova ndiye adakhazikisa banja yakutoma pidacita iye Adhamu na Eva, mbaagumanya pabodzi. Iye akhafuna kuti banja yawo ikhale yakutsandzaya, mbabala anawo toera kudzadza dziko yapantsi. (Gen. 1:27, 28) Mbwenye kukhonda bvera utongi ukulu wa Yahova kwafudza banja yakutoma mbapibweresa madawo na kufa kwa anthu onsene. (Arom. 5:12) Ngakhale tenepo, Bhibhlya isapangiza kuti tinakwanisa tani kukhala akutsandzaya m’banja. Bhibhlya iri na uphungu wadidi kakamwe kwa mabanja, thangwi Yahova, mwanaciro Bhibhlya ndiye Adakhazikisa masasanyiro a banja.​—Lerini 2 Timoti 3:16, 17.

5. Thangwi yanji ufuni ndi wakufunika m’banja?

⁵ Bhibhlya isapangiza kuti ufuni, wakuti ndi mabvero akuwanga akuphatana na unango, ndi wakufunika kakamwe kwa anthu toera kukhala na uxamwali wakutsandzayisa. Mwandimomwene, pyenepi pinaphedza m’banja. Mpostolo Paulu afokotoza ufuni wandimomwene mudalonga iye kuti: ‘Ufuni usapirira mbucita pyadidi. Ufuni nkhabe kucita ntcanje, nkhabe kugaya, nkhabe kudzikuza, ufuni nkhabe kucita pyakukhonda thema, nkhabe kucita pinafuna iwo basi, nkhabe kuipirwa, nkhabe kukoya pinthu muntima. Nkhabe kukomerwa na pyakukhonda lungama, mbwenye usakomerwa na undimomwene. Ufuni usapirira pyonsene, usakhulupira pyonsene, usatawira pyonsene, usadikhira pyonsene. Ufuni nkhabe kumala.’ (1 Akor. 13:4-8) Kunyerezera mwacidikhodikho mafala anewa akupumirwa na kuaphatisira mwakukhonda penula kunadzathimizira kutsandzaya m’banja.

6, 7. (a) Kodi Bhibhlya isalonganji thangwi yakukhala nsolo? (b) Kodi amuna Acikristu asafunika kutsalakana tani akazawo?

⁶ Yahova asankhula kuti mbani asafunika kukhala nsolo wa banja. Mpostolo Paulu afokotoza: ‘Ndakudziwisani kuti nsolo wa mamuna ndi Kristu. Nsolo wa nkazi ndi mamunace. Nsolo wa Kristu ndi Mulungu.’ (1 Akor. 11:3) Mbwenye nsolo wa banja nee asafunika kutsogolera  mwaukali. Mwacitsandzo, Yahova asatsogolera Kristu munjira yadidi na mwakudzimana, pontho Yezu asabvera utongi unoyu. Yezu asakomerwa na utongi waufuni wa Mulungu thangwi iye alonga: “Ine ndisafuna Baba.” (Jwau 14:31) Mwakukhonda penula, Yezu nee mbadalonga pyenepi khala Yahova asatsalakana Mwanace mwaukali peno mwahaxa.

⁷ Maseze mamuna ndi nsolo wa nkazace, Bhibhlya isalonga kuti iye asafunika ‘kupangiza cilemedzo’ kwa nkazace. (1 Ped. 3:7) Njira ibodzi yakuti amuna anakwanisa kulemedza akazawo ndi kutsalakana pifuno pyawo, na kuikha patsogolo pisankhulo pyawo m’makhundu anango. Mafala a Mulungu asalonga: ‘Imwe amuna, funani akazanu sawasawa ninga mudafunira Kristu anthu a m’mpingo wace, mbaperekeka thangwi ya mpingo.’ (Aef. 5:25) Inde, Yezu aperekeka thangwi ya atowereri ace. Mamuna angatowezera njira inaphatisira Yezu utongi wace, mphyakukhonda nentsa kakamwe kuti nkazi afune, alemedze na kungonjera mamunace.​—Lerini Tito 2:3-5.

8. Kodi alambiri a Yahova asafunika kuona tani Akristu andzawo?

⁸ Pa dziko yonsene pana pikwi na pikwi pya anthu akuti asalambira Yahova mbapereka umboni wa dzina yace na cifuniro cace. Kodi m’bodzi na m’bodzi wa alambiri a Yahova asafunika kuona tani Nkristu ndzace? Mafala a Mulungu asalonga: ‘Ticite mphapo midzidzi yonsene pinthu pyadidi kwa anthu onsene, makamaka kwa abale athu akukhulupira.’ (Agal. 6:10; lerini Aroma 12:10.) Mpostolo Pedhro alemba: ‘Imwe mudamala kuceneswa thangwi yakubvera kwanu undimomwene mwa ufuni wakusowa umpfakafaka, pangizani ufuni wakuwanga kwa unango na ndzace wakubulukira muntima.’ Pedhro apangambo Akristu andzace: “Makamaka mufunane ntsiku zonsene.”​—1 Ped. 1:22; 4:8.

9, 10. Thangwi yanji atumiki a Mulungu ndi akuphatana?

⁹ Nakuti tiri na ufuni wakuwanga kwa ale anatumikira Yahova pabodzi na ife, tonsene tisacita khundu ya gulu yakupambulika pa dziko yonsene. Mwa pyonsene, nakuti tisafuna Yahova na kubvera mitemo yace, iye asatiphedza na mphambvu ikulu kakamwe yakudzulu na pantsi​—nzimu wace wakucena. Pyenepi pisatiphedza toera kukhala akuphatana kakamwe ninga abale pa dziko yonsene.​—Lerini 1 Jwau 4:20, 21.

¹⁰ Paulu afokotoza kuti thangwi yanji Akristu asafunika kufunana, iye alemba: “Mukhale na ntima wakufunana na wa ntsisi, wadidi, wakucepeseka, wakupfulika na wakupirira. Pitirizani kupirirana unango na ndzace mbamulekererana na ntima onsene, khala munthu ali na mathangwi toera kusumira ndzace. Ninga Yahova akulekererani na ntima onsene, imwe citanimbo pyenepi. Makamaka khalani akufunana, tenepa munadzaphatana mwadidi ninga akumangiwa na nkhambala.’ (Akol. 3:12-14) Tisapereka takhuta kakamwe thangwi ya ufuni unapitiriza ife kupangiza, wakuti usatiphedza toera kukhala akuphatana kakamwe mwakukhonda tsalakana makhaliro athu peno mbuto idabuluka ife!

11. Kodi ufuni na kuphatana pisapangiza tani gulu ya Yahova?

¹¹ Ufuni wandimomwene na kuphatana pisapangiza kuti atumiki a Yahova ndiwo anaphatisira ulambiri wandimomwene, Yezu alonga: “Na kufunana kwanu anthu onsene anadzadzindikira kuti ndimwe anyakupfundza anga.” (Jwau 13:34, 35) Mpostolo Jwau alemba: ‘Ana a Mulungu na ana a Dyabo anadziwika tenepa: Uyu anakhonda kucita pya ulungami, si wa Mulungu tayu; nee uyu anakhonda kufuna m’bale  wace. Inde, mphangwa zidabva imwe kutomera pa nkhomo ndi izi, tifunane unango na ndzace.’ (1 Jwau 3:10, 11) Ufuni wakuti usatiphedza toera kukhala akuphatana kakamwe, usapangiza kuti Mboni za Yahova ndi atowereri andimomwene a Kristu. Iwo asaphatisirwa na Mulungu toera kukwanirisa cifuniro cace cakuti mphangwa zadidi za Umambo zimwazwe pa dziko yonsene.​—Mat. 24:14.

12, 13. Ninji pinacita ‘mwinji ukulu’ lero? Mphapo ninji pinafuna kucitika mwakukhonda dembuka kwa ale anacita nkhundu ya mwinji ukulu?

¹² Azinji mwa alambiri a Yahova ndi a ‘mwinji ukulu, akuti asabuluka m’mitundu yonsene, madzindza onsene, mbumba zonsene, na pilongero pyonsene.’ Iwo alimira patsogolo pa mpando wa Mulungu na pamaso pa Mwanabira, Yezu Kristu.’ Mbani anthu anewa? Ndi ‘ale anabuluka mu nyatwa ikulu, iwo afula nguwo zawo mbazicenesa na ciropa ca Mwanabira,’ thangwi iwo asakhulupira ntsembe ya ciomboli ca Yezu. Ale anacita khundu ya ‘mwinji ukulu,’ wakuti ukuthimizirika asafuna Yahova na Mwanace ‘mbacita basa yakucena ya Mulungu masiku namasikati.’​—Apok. 7:9, 14, 15.

¹³ Mwakukhonda dembuka Mulungu anadzafudza dziko ino yakuipa pa ‘nyatwa ikulu.’ (Mat. 24:21; lerini Yeremiya 25:32, 33.) Nakuti Yahova asafuna atumiki ace, iye anadzaapulumusa ninga nsoka, mbaapitisa mu dziko ipswa. Ninga mudalongerwa ipyo cifupi na pyaka 2.000 nduli, “Mulungu anadzakhala pabodzi na anthu, mbapukuta misozi yonsene m’maso mwawo. Kufa hakunadzakhalapo pontho tayu, nee kutsukwala, nee kulira, nee nyatwa.” Kodi imwe musadikhira na cifuno cikulu kukhala mu paradizu mu ndzidzi wakuti ‘pinthu pya kale pinadzamala’?​—Apok. 21:4.

14. Kodi mwinji ukulu wathimizirika mpaka papi?

¹⁴ Pidatoma ntsiku zakumalisa mu caka 1914, atumiki a Yahova akudzodzwa pa dziko yonsene akhali pikwi pyakucepa. Thangwi yakufuna andzawo, na ciphedzo ca nzimu wakucena wa Mulungu, Akristu akucepa akudzodzwa akusalikira apirira m’basa yakumwaza mphangwa za Umambo. Ninga maphindu, mwinji ukulu wa anthu akuti ali na cidikhiro cakukhala pa dziko yapantsi asagumanywa. Lero, kuli Mboni za Yahova cifupi na 8.000.000 zinasonkhana m’mipingo yakupiringana 115.400 pa dziko yonsene. Numero ineyi isapitiriza kuthimizirika. Mwacitsandzo, anthu akupiringana 275.500 abatizwa ninga Mboni za Yahova mu caka ca basa ca 2014, pyenepi pisapangiza kuti anthu 5.300 akhabatizwa pa sumana.

15. Fokotozani kuthimizirika kwa basa yakumwaza mphangwa za Umambo inacitwa lero.

¹⁵ Kuthimizirika kwa basa yakumwaza mphangwa ndi kwakudzumisa kakamwe. Mabukhu athu akubuluswa m’Bhibhlya asabuluswa mu pilongero pyakupiringana 700. Revista ya Ncenjezi ndiyo inagawirwa kakamwe pa dziko yonsene. Makopya akupiringana 52.000.000 asadhindwa nthanda zonsene mu pilongero pyakukwana 247. Ife tisaphatisira bukhu Kodi Mwandimomwene Bhibhlya Isapfundzisanji? toera kupfundzisa Bhibhlya, makopya akupiringana 200.000.000 a bukhu ineyi adhindwa mu pilongero pyakupiringana 250.

16. Ninji pinaphedzera kuthambaruka kwauzimu kwa khundu yapantsi ya gulu ya Yahova?

¹⁶ Kuthimizirika kwakudzumisa kunaona ife lero ndi thangwi yakuti tisakhulupira Mulungu na kutawira na ntima onsene kuti Bhibhlya ndi Mafala akupumirwa a Yahova. (1 Ates. 2:13) Pyakudzumisa kakamwe ndi kuthambaruka kwa makhaliro auzimu a atumiki a Yahova, mwakukhonda tsalakana kuidiwa na kutcingwa na Sathani—‘mulungu wa makhaliro ano a pinthu.’​—2 Akor. 4:4.

17, 18. Kodi atumiki a Mulungu asafunika kutsalakana tani anyakukhonda khulupira?

¹⁷ Ndi makhaliro api asafunika kupangiza atumiki a Yahova kuna ale akuti nee asalambira Mulungu wandimomwene? M’basa yathu yakumwaza mphangwa, tisagumana anthu akuti asatawira munjira zakusiyana-siyana. Anango asatawira mwadidi, anango mwaukali. Mbwenye mwakukhonda tsalakana njira inatawira anthu, Bhibhlya isapangiza midida yakuti isafunika kuphatisirwa na atumiki a Yahova. Bhibhlya isalonga: ‘Mafala anu adzipe ninga akuikhwa munyu ntsiku zonsene mbamudziwa kuti munatawira tani munthu onsene na mafala adidi.’ (Akol. 4:6) Pa kutsidzikiza cikhulupiro cathu pamaso pa ale anafuna kudziwa mathangwi a cidikhiro cathu, ife tisacita pyenepi “na ntima wakukhurudzika na cilemedzo cikulu.”​—1 Ped. 3:15.

¹⁸ Ife tisapangiza ufuni kwa andzathu mwakukhonda tsalakana khala mphangwa zathu zakhondiwa na mwanaciro nyumba wakuipirwa adatitsalakana mwakuipa. Ife tisatowezera Yezu wakuti ‘pikhaxolwa iye, iye hadaxola tayu; pakuona nyatwa, iye hadathusa tayu; mbwenye apereka pyonsene kuna ule anatonga mwaulinganiri.’ (1 Ped. 2:23) Mwakukhonda tsalakana khala tikucedza na anyakukhulupira andzathu peno na anango, ife tisapangiza kucepeseka mbatiphatisira uphungu uyu: ‘Lekani kubwezera pyakuipa na pyakuipa, peno kuxola na kuxola; mbwenye longani mafala akupasa nkhombo.’​—1 Ped. 3:8, 9.

19. Kodi Yezu alonga kuti tisafunika kutsalakana tani anyakutcinga?

¹⁹ Mu kupitiriza kupangiza nzimu wakucepeseka, atumiki a Yahova asabvera n’dida wakufunika kakamwe udapereka Yezu. Pa Nkhani yace ya Paphiri, Yezu alonga: ‘Mwabva mphangwa zakuti: ‘Funa ndzako, tcinga nyamalwa wako.’ Mbwenye ine ndinakupangani: Funani anyamalwa anu. Phembererani ale anakutcingani, toera mukhale ana a Babanu wakudzulu. Iye asabulusira dzuwa anthu adidi na akuipa. Asabvumbisa madzi kuna anthu akulungama na akukhonda kulungama.’ (Mat. 5:43-45) Inde, ninga atumiki a Mulungu, tisafunika kupfundza kufuna anyamalwa athu, mwakukhonda tsalakana pinaticitira iwo.

20. Thangwi yanji kufuna Mulungu na andzathu kunadzatsogolera pinthu pyonsene mu dziko ipswa? (Onani cithundzithundzi cakutoma.)

²⁰ Ninga atumiki a Yahova, m’makhaliro athu na macitiro athu tisafunika kupangiza kuti tisafuna Yahova na andzathu m’makhundu onsene a umaso wathu. Mwacitsandzo, maseze anango nee asatawira mwadidi mphangwa za Umambo, ife tisapangiza ufuni kuna iwo mu ndzidzi unafuna iwo ciphedzo. Mpostolo Paulu alemba: ‘Lekani kukhala anyamangawa, nee na munthu m’bodzi, mbwenye mufunane thangwi anafuna ndzace asabverambo mwambo. Thangwi matongero awa: ‘Leka kucita upombo, leka kupha munthu, leka kuba, leka kukhala mboni wauthambi, leka kusirira,’ na matongero anango onsene anagumanyizwa kudza mabodzi basi: ‘Ufune ndzako ninga iwe ene’. Munthu anafuna ndzace, hanancitira pyakuipa tayu. Natenepa, kufuna ndi kukwanirisika kwa mwambo.’ (Arom. 13:8-10) Ninga Mboni za Yahova, ife tisapangiza ufuni wandimomwene mu dziko ino yakuipa na yakukhonda phatana yakuti iri m’manja mwa Sathani. (1 Jwau 5:19) Mwandimomwene, ufuni unadzatsogolera pinthu pyonsene mu dziko ipswa mu ndzidzi wakuti Sathani, mademonyo, na anthu akukhonda bvera nee anadzaoneka pontho. Unoyu unadzakhala ndzidzi wakutsandzayisa kakamwe wakuti anthu onsene pa dziko yapantsi anadzafuna Mulungu na andzawo!