1, 2. Oinsá mak eskritura sira hatudu katak domin importante tebes?

DOMIN mak Maromak Jeová nia hahalok neʼebé furak liu hotu. (1 João 4:16) Ninia kriasaun primeiru mak Jesus, no Jesus hela hamutuk ho nia iha lalehan ba tinan barak tebes. Tan neʼe Jesus mós aprende dalan neʼebé Jeová hatudu domin. (Koloso 1:15) Dalan neʼebé Jesus halaʼo ninia moris iha lalehan no rai, nia hatudu duni katak nia komprende domin neʼebé Jeová iha mak hanesan saida no nia mós banati-tuir Jeová nia domin neʼe. Hodi nuneʼe mak ita bele fiar ho laran tomak katak dalan neʼebé Jeová no Jesus Kristu halaʼo sira-nia ukun sempre liuhusi domin.

² Bainhira ema husu Jesus mandamentu ida-neʼebé mak boot liu hotu husi Moisés nia Ukun-Fuan, Jesus dehan: “‘Ó tenke hadomi Jeová ó-nia Maromak ho ó-nia laran tomak, ho ó-nia moris tomak, no ho ó-nia neon tomak.’ Neʼe mak mandamentu neʼebé boot liu no uluk liu. Ida tuirmai neʼebé hanesan nia mak: ‘Ó tenke hadomi ó-nia maluk hanesan ó-nia an rasik.’”—Mateus 22:37-39.

3. Sé mak ita-nia “maluk”?

³ Ita nota ka lae Jesus hatete katak hadomi Jeová mak uluk liu  hotu no tuirmai ita tenkesér hadomi ita-nia maluk. Maibé sé mak ita-nia “maluk”? Se ita mak harii umakain ona, ita-nia kaben mak ita-nia maluk neʼebé besik liu ema hotu. Ita-nia irmaun-irmán sira mós ita-nia maluk. Ema neʼebé ita hasoru iha haklaken fatin mós ita-nia maluk. Entaun, nuʼudar ema neʼebé adora Jeová, oinsá mak ita bele halo tuir Jesus nia hanorin atu hatudu ita-nia domin ba ita-nia maluk sira-neʼe.

4. Maski la perfeitu, maibé oinsá mak moris kaben nian bele iha susesu nafatin?

⁴ Jeová mak halaʼo kazamentu primeiru bainhira nia kria Adão no Eva no tau sira naʼin-rua hamutuk. Ninia hakarak ba sira mak atu iha moris kaben neʼebé kontente, dura, no halo nakonu mundu ho sira-nia oan no bei-oan. (Gênesis [Kejadian] 1:27, 28) Maibé tanba mosu lia neʼebé kontra Jeová nia direitu atu ukun mak estraga moris kaben primeiru neʼe no lori mós sala no mate ba ema hotu. (Roma 5:12) Maski nuneʼe, eskritura barak mak bele ajuda ita atu iha nafatin moris kaben neʼebé susesu. Eskritura sira-neʼe fó konsellu neʼebé diʼak tebes kona-ba moris kaben nian, tanba konsellu sira-neʼe mai husi Jeová, moris kaben nia Hun.—Lee 2 Timóteo 3:16, 17.

5. Tanbasá mak domin importante ba moris kaben nian?

⁵ Maromak nia Liafuan hatete katak domin mak hahalok importante atu bele iha relasaun neʼebé diʼak ho ema seluk. Hanesan neʼe mós ho moris kaben nian, presiza iha domin. Bainhira apóstolu Paulo hakerek karta ba kongregasaun, nia esplika domin hanesan neʼe, nia dehan: “Domin mak pasiénsia no laran-diʼak. Domin la laran-moras, la gaba an, la foti-an. Domin hatudu respeitu, la buka nia rasik nia diʼak, la sai hirus lalais. Domin la hanoin fali buat aat neʼebé nia simu. Domin la haksolok ho hahalok laloos, maibé haksolok ho lia-loos. Domin lori todan hotu, fiar buat hotu, tau esperansa iha buat hotu, no tahan buat hotu. Domin nunka lakon. Maibé se ita simu kbiit atu koʼalia nuʼudar profeta, neʼe sei lakon; se ita iha kbiit atu koʼalia lia oioin, neʼe sei para; se ita iha matenek, neʼe sei lakon.” (1 Korinto 13:4-8) Se ita hanoin didiʼak no uza matadalan sira-neʼe, ita bele fiar katak solok ba moris kaben nian mós sei aumenta.

6, 7. (a) Bíblia hatete saida kona-ba arranju ulun nian? (b) La’en kristaun ida tenkesér trata ninia feen iha dalan oinsá?

⁶ Maromak arranja buat hotu tuir arranju  ulun nian, tan neʼe mak importante tebes atu iha domin. Apóstolu Paulo dehan: “Haʼu hakarak imi hatene katak mane ida-idak nia ulun mak Kristu, no feto nia ulun mak mane, no Kristu nia ulun mak Maromak.” (1 Korinto 11:3) Maibé arranju ulun nian laʼós atu domina malu. Porezemplu, nuʼudar ulun ba Jesus, Jeová sempre trata Jesus iha dalan neʼebé diʼak no nia nunka buka diʼak ba ninia an deʼit. Tan neʼe Jesus respeitu tebes Jeová nia pozisaun nuʼudar ulun, nia dehan: “Haʼu hadomi Aman.” (João 14:31) Jesus sei la koʼalia hanesan neʼe se Jeová mak siʼak ka domina liu nia.

⁷ Maski laʼen mak feen nia ulun, maibé Bíblia haruka la’en atu “hatudu respeitu ba feen”. (1 Pedro 3:7) Dalan ida neʼebé la’en hatudu respeitu ba feen mak hanoin kona-ba feen nia presiza no respeitu ninia hakarak kona-ba buat balu. No mós Maromak nia Liafuan hatete: “Laʼen sira, kontinua hadomi imi-nia feen, hanesan Kristu mós hadomi kongregasaun no fó nia moris ba kongregasaun.” (Éfeso 5:25) Loos, Jesus fó duni ninia moris ba ninia dixípulu sira. Se la’en mak banati-tuir Jesus nia domin hodi halaʼo ninia knaar nuʼudar ulun, neʼe fasil ba feen atu hadomi, respeitu, no hakruʼuk ba nia.—Lee Tito 2:3-5.

8. Oinsá mak ema neʼebé adora Jeová haree sira-nia maluk kristaun?

⁸ Iha mundu tomak ita iha ema juta ba juta neʼebé adora Jeová no fó sasin kona-ba ninia naran no planu sira. Oinsá mak ema neʼebé adora Jeová tenke haree kona-ba sira-nia maluk Testemuña ida-idak? Bíblia dehan: “Mai ita halo buat neʼebé diʼak ba ema hotu, maibé liuliu ba ita-nia maluk fiar-naʼin.” (Galásia 6:10; lee Roma 12:10.) Apóstolu Pedro hatete: “Agora imi hamoos tiha ona imi-nia moris hodi halo tuir lia-loos no imi iha domin neʼebé loos ba malu, entaun hadomi malu bá husi laran.” Pedro mós hatete ba maluk fiar-naʼin sira katak: “Buat neʼebé importante liu mak imi tenke hadomi malu tebetebes.”—1 Pedro 1:22; 4:8.

9, 10. Tanbasá mak Maromak nia povu bele iha unidade?

⁹ Ita-nia organizasaun mak úniku tebes iha mundu tomak tanba ita iha domin neʼebé kleʼan ba malu. No tanba ita hadomi no halo tuir Jeová nia ukun-fuan sira mak Jeová fó ninia forsa neʼebé boot liu hotu iha mundu tomak atu apoia ita. Tan ninia espíritu santu neʼe mak ita bele iha unidade iha mundu tomak.—Lee 1 João 4:20, 21.

¹⁰ Apóstolu Paulo hatete katak domin importante tebes iha ema kristaun nia leet, nia dehan: “Tau hahalok domin ho laran-sadiʼa nuʼudar imi-nia hatais hamutuk ho laran-diʼak, haraik-an, laran-maus, no pasiénsia. Kontinua hatudu pasiénsia ba malu no fó perdua ba malu ho laran tomak maski ema halo buat ruma hasoru imi. Nuʼudar Jeová fó perdua ba imi ho laran tomak, imi mós tenke halo nuneʼe. Maibé, iha buat sira-neʼe hotu nia leten, tau domin nuʼudar imi-nia hatais, tanba domin mak kesi ita hamutuk iha dalan neʼebé kompletu.” (Koloso 3:12-14) Ita agradese duni tanba maski ita mai husi rai neʼebé la hanesan, maibé domin kaer metin ita!

11. Tanba iha domin no unidade, neʼe hatudu saida kona-ba Jeová nia organizasaun?

¹¹ Domin neʼebé loos no unidade mak fó sasin katak Jeová nia atan sira mak halaʼo relijiaun neʼebé loos, tanba Jesus hatete: “Ho ida-neʼe mak ema hotu sei hatene katak imi haʼu-nia dixípulu sira, se imi iha domin ba malu.” (João 13:34, 35) No apóstolu João mós hatete: “Nuneʼe, ita bele hatene Maromak nia oan no Diabu nia oan liuhusi  ida-neʼe: Ema hotu neʼebé iha toman atu halo hahalok laloos la mai husi Maromak, nuneʼe mós ho ema neʼebé la hadomi ninia maluk. Neʼe mak lia-menon neʼebé imi rona ona horiuluk kedas katak ita tenke hadomi malu.” (1 João 3:10, 11) Domin neʼebé halo ita iha unidade mak hatudu katak Testemuña ba Jeová mak ema kristaun neʼebé loos, ita mak ema neʼebé Jeová uza atu halo ninia hakarak hodi haklaken liafuan diʼak toʼo mundu tomak.—Mateus 24:14.

12, 13. Agora daudauk “ema-lubun boot” halo saida, no lakleur tan sira sei simu bensaun saida?

¹² Maioria husi Jeová nia atan ohin loron mak “ema-lubun boot . . . neʼebé mai husi nasaun, suku, povu no lian hotu, sira hamriik iha kadunan nia oin no iha Bibi-Oan nia oin”. Sira mak sé? “Sira mak ema neʼebé liu terus boot, no sira fase tiha ona sira-nia unuk no halo mutin ona ho Bibi-Oan nia raan” liuhusi tau fiar ba Jesus nia sakrifísiu. Ema ida-idak husi “ema-lubun boot” neʼe hadomi Jeová no Jesus no “sira halo serbisu santu ba [Maromak] loron no kalan”.—Apokalipse 7:9, 14, 15.

¹³ Lakleur tan iha “terus boot” Maromak sei halakon mundu aat neʼe. (Mateus 24:21; lee Jeremias [Yeremia] 25:32, 33. *) Maibé tanba nia hadomi ninia atan sira, nia sei salva sira nuʼudar grupu ida hodi lori sira tama ba ninia mundu foun. Tuirmai, liafuan neʼebé hakerek iha tinan 2.000 liubá sei sai loos, neʼe dehan, Maromak “sei hamaran sira-nia matan-been hotu husi sira-nia matan, no mate sei la iha tan, no ema sei la tanis tan ka laran-susar ka laran-triste”. Ita gosta atu hela iha Paraízu neʼebé “buat neʼebé uluk nian lakon tiha ona” ka lae?—Apokalipse 21:4.

14. Ema-lubun boot aumenta toʼo ema naʼin-hira ona?

¹⁴ Bainhira loron ikus sira hahú iha tinan 1914, iha mundu tomak ema neʼebé adora Jeová maizumenus ema naʼin-5.000 deʼit. Maibé, domin ba “maluk” no apoia husi espíritu santu book ema kose-mina sira tahan hodi haklaken nafatin. No liuhusi haklaken, sira hakaʼas an hodi halibur ema-lubun boot neʼebé iha esperansa atu moris iha mundu foun. Ohin loron, ema-lubun boot aumenta ona toʼo maizumenus hamutuk ema naʼin-8.000.000 neʼebé namkari iha kongregasaun 115.400 liu iha mundu tomak. Loroloron, ema neʼe mós aumenta ba beibeik. Porezemplu, iha tinan serbisu 2014 nian, ema hamutuk naʼin-275.500 mak hetan batizmu, buat ida karik neʼe hanesan kada semana ema naʼin-5.300 mak hetan batizmu.

15. Fó toʼok ezemplu neʼebé hatudu katak serbisu haklaken habelar lalais tebes.

¹⁵ Serbisu haklaken habelar lalais tebes. Ita-nia livru sira agora halo ona ba língua hamutuk 700 liu. La iha livru seluk iha mundu neʼe mak fahe barak liu fali Livru Haklaken. Kada fulan, ita print Livru Haklaken hamutuk 52.000.000 liu ho língua hamutuk 247. Ita mós halo livru Tuir Loloos, Saida mak Bíblia Hanorin? hamutuk 200.000.000 liu ho língua hamutuk 250 liu hodi uza atu estuda ho ema.

16. Saida mak halo Jeová nia organizasaun parte rai nian kontinua laʼo ba oin?

¹⁶ Lalaʼok diʼak husi Jeová nia organizasaun neʼebé ita haree ohin loron mak evidénsia ida neʼebé hatudu katak ita iha fiar ba Maromak no ita halo tuir Bíblia ho laran tomak. (1 Tesalónika 2:13) Maski Satanás,  “maromak mundu neʼe nian” odi no kontra makaʼas ita, maibé ita-nia relasaun ho Jeová sai buras ba beibeik.—2 Korinto 4:4.

17, 18. Jeová nia atan tenkesér hatudu hahalok saida ba ema neʼebé seidauk adora Jeová?

¹⁷ Hahalok saida mak Jeová nia atan sira tenkesér hatudu ba ema neʼebé seidauk adora Jeová? Iha serbisu haklaken, ita hasoru ema oioin, balu simu, balu kontra ita. Maski nuneʼe mós Bíblia hatete katak ita tenke hatudu nafatin Maromak nia hahalok ba sira. Bíblia dehan: “Sempre koʼalia ho laran-diʼak hodi tau masin uitoan atu imi bele hatene oinsá imi tenke hatán ba ema ida-idak.” (Koloso 4:6) Bainhira ita atu esplika ita-nia fiar ba ema, ita hakarak esplika ho “laran-maus no respeitu”, tanba ita iha domin ba ita-nia maluk.—1 Pedro 3:15.

¹⁸ Maski uma-naʼin ida hirus no siʼak lakohi simu ita-nia mensajen, ita hatudu domin nafatin ba nia nuʼudar ita-nia maluk. Ita hakarak banati-tuir Jesus tanba bainhira “ema koʼalia aat hasoru nia, nia la koʼalia aat fali ba sira. Kuandu nia hetan terus, nia la ameasa sira neʼebé fó-terus ba nia, maibé nia entrega nia an ba ida neʼebé tesi lia ho loloos”. (1 Pedro 2:23) Biar ho ita-nia irmaun-irmán ka ema seluk, ita hakarak hatudu haraik-an no halo tuir Bíblia nia konsellu neʼebé dehan: “Keta selu aat ho aat ka hirus-malu ho hirus-malu. Maibé, koʼalia ho laran-diʼak, tanba Maromak bolu imi ba dalan neʼe, atu nuneʼe imi bele simu bensaun nuʼudar liman-rohan.”—1 Pedro 3:8, 9.

19. Jesus fó matadalan saida kona-ba ema neʼebé kontra ita?

¹⁹ Hahalok haraik-an mak bele ajuda ita atu halo tuir matadalan ida husi Jesus nia liafuan, Jesus hatete: “Imi rona liafuan ba ema iha tempu uluk dehan: ‘Ó tenke hadomi ó-nia maluk no odi ó-nia inimigu.’ Maibé, haʼu hatete ba imi: Hadomi nafatin imi-nia inimigu no harohan ba sira neʼebé haterus imi, atu imi bele hatudu katak imi mak oan husi imi-nia Aman iha lalehan, tanba nia halo loro-matan saʼe ba ema aat no mós ema diʼak, no halo udan tun ba ema laran-loos no mós ema aat.” (Mateus 5:43-45) Loos duni, atu ema trata ita iha dalan neʼebé diʼak ka ladiʼak, nuʼudar Jeová nia atan, ita tenkesér ‘hadomi nafatin ita-nia inimigu’.

20. Oinsá mak ita bele hatene katak domin ba Maromak no maluk mak sei domina iha mundu foun? (Haree foto iha pájina 21.)

²⁰ Iha ita-nia moris tomak ita hakarak hatudu katak ita hadomi Jeová no ita-nia maluk hotu. Porezemplu, se ema ida mak la gosta ita-nia mensajen, maibé loron ida nia presiza ita-nia ajuda, ita hakarak ajuda nia nafatin. Apóstolu Paulo hatete: “Keta iha tusan ho ema ida, maibé imi-nia tusan mak hadomi malu; basá ema neʼebé hadomi nia maluk halo tuir ona ukun-fuan. Tanba ukun-fuan sira inklui mandamentu neʼebé dehan: ‘Ó keta halo sala-foʼer, ó keta oho, ó keta naʼok, ó keta kaan buat neʼebé ema seluk nian’, no mandamentu seluk hotu habadak ho liafuan tuirmai neʼe: ‘Ó tenke hadomi ó-nia maluk hanesan ó-nia an rasik.’ Domin la halo aat ba nia maluk; tan neʼe domin kumpre ukun-fuan.” (Roma 13:8-10) Nuʼudar Testemuña ba Jeová, ita hakarak hatudu domin ba ema hotu iha mundu aat neʼebé Satanás ukun daudauk, mundu neʼebé laiha unidade no nakonu ho violénsia. (1 João 5:19) Bainhira Satanás, ninia anju aat, no ema hotu neʼebé kontra Jeová lakon hotu ona, domin mak sei domina ema hotu iha mundu foun. Neʼe mak bensaun neʼebé boot tebes ba mundu neʼebé ema hotu sei hadomi Jeová ho maluk hotu iha mundu tomak!