1, 2. Мукаддес Язгыларда сөйгиниң ваҗыплыгы нәдип гөркезилйәр?

СӨЙГИ Ехова Худайың эсасы хәсиетидир (1 Яхя 4:16). Ехованың илкинҗи ярадан Оглы Иса Месих гөкде миллиардларча йыл Атасы билен биле яшап, Худайың сөйгүден долы ёлларыны өвренди (Кол. 1:15). Иса бүтин өмрүне, шол санда ер йүзүнде яшанда-да Ехованың сөйгүден долы Худайдыгына дүшүнйәндигини гөркезди ве онуң сөйгүсинден нусга эдинди. Шол себәпли биз Ехованың хем-де Исаның элмыдама сөйги билен хөкүм сүрҗекдигине ынамлы болуп билерис.

² Исадан Худайың канунында иң ваҗып табшырыгың нәмедигини соранларында, ол: «„Худайың Ребби бүтин йүрегиң, бүтин җаның, бүтин дүшүнҗәң билен сөй“. Шу биринҗи ве иң улы табшырыкдыр. Икинҗи хем шонуң ялы: „Гоңшыңы өзүң ялы сөй“» дийди (Мат. 22:37—39).

3. Бизиң «гоңшымыз» ким?

³ Үнс берен болсаңыз, Иса гоңшымыза болан сөйгини диңе Ехованы сөймекден ашак тутды. Бу якынларымыза сөйги билдирмегиң өрән ваҗыпдыгыны гөркезйәр. Эмма бизиң «гоңшымыз» ким? Эгер биз дурмуш гуран болсак, онда иң якын гоңшымыз бизиң янёлдашымыздыр.  Месихчилер йыгнагындакы имандашларымыз хем бизе якын адамлар боляр. Шейле-де вагыз гуллугында душян адамларымыз бизиң гоңшымыз хасапланяр. Эйсем, Ехова сежде эдйән ве онуң Оглуның өвреденлерине эерйән адамлар якынына нәдип сөйги билдирмели?

4. Адамларың бикәмиллигине гарамаздан, машгаланы нәдип багтлы эдип боляр?

⁴ Ехова Адам ата ве Хов энәни ярадып, олары бирикдирмек билен, илкинҗи машгаланы дөретди. Худай оларың агзыбир ве багтлы яшамагыны хем-де бүтин ер йүзүни несиллеринден долдурмагыны иследи (Гел. чык. 1:27, 28). Эмма Ехованың хөкүмдарлыгына гаршы туран питне себәпли, илкинҗи ынсан машгаласына зыян етип, адамларың әхлисине гүнә ве өлүм гечди (Рим. 5:12). Муңа гарамаздан, Мукаддес Язгыларда машгаланы нәдип багтлы эдип боляндыгы айдыляр. Худайың Сөзүнде бу бабатда иң говы маслахатлар берилйәр, себәби олары машгаланы дөреден Ехова яздырды (2 Тимотеос 3:16, 17-нҗи аятлары окаң).

5. Машгалада сөйгиниң нәхили әхмиети бар?

⁵ Худайың Сөзүнде адамлар билен якын гатнашык сакламак үчин сөйги билдирмегиң, ягны ыснышыклы гатнашып, бирек-биреге долы вепалы болмагың ваҗыпдыгы ныгталяр. Бу машгала гатнашыкларында-да өрән мөхүмдир. Павлус ресул месихчилере шейле сөзлери язды: «Сөйги сабырлыдыр, шепагатлыдыр, сөйги гөрипчилик эдйән дәлдир, сөйги өвүнип, текепбирлик эдйән дәлдир. Биабрайчылыклы иш эдйән дәлдир, өз непини гөзлейән дәлдир, гахарланян дәлдир, ичинде хылт саклаян дәлдир. Адалатсызлыга шатланман, хакыката шатланяндыр. Хер зада дөз гелйәндир, хер зада ынаняндыр, хер зада умыт баглаяндыр, хер зада чыдаяндыр. Сөйги асла түкенмез» (1 Кор. 13:4—8). Худайың ылхамы билен язылан шейле сөзлер барада ойланып, дурмушда уланмак машгаланың хас багтлы болмагына ярдам эдйәр.

6, 7. а) Мукаддес Язгыларда баштутанлык этмек бабатда нәме айдыляр? б) Месихчи әр аялы билен өзүни нәхили алып бармалы?

⁶ Худайың гоян дүзгүнине гөрә, әхли затда баштутанлык принципиниң бардыгы үчин, сөйги билдирмек хас-да ваҗыпдыр.  Павлус ресул муны шейле дүшүндирди: «Сизиң муны-да билмегиңизи ислейәрин: хер эркегиң баяры Месих, аялың баяры эркек, Месихиң баяры хем Худайдыр» (1 Кор. 11:3). Эмма баштутанлык этмек бириниң үстүнден агалык этмеги аңлатмаяр. Мысал үчин, Ехова Иса Месихиң үстүнден сөйги ве мәхир билен баштутанлык эдйәр, Иса-да оңа табын боляр. Иса Худайың сөйги билен баштутанлык эдйәндигини гыммат сайып: «Мен Атамы сөййәрин» дийди (Яхя 14:31). Эгер Ехова Оглуның үстүнден агалык эдип, өзүни гөдек алып баран болса, Исаның өз Атасына шейле дуйгусы болмазды.

⁷ Эркек адам машгалада баштутанлык этсе-де, Мукаддес Язгыларда онуң өз аялыны сыламалыдыгы айдыляр (1 Пет. 3:7). Әрлер аялының зерурлыкларыны гөз өңүнде тутуп, кәбир меселелерде онуң ислегине гөрә карара гелмек билен, оны сылаяндыгыны гөркезип билер. Худайың Сөзүнде: «Эй әрлер, Месихиң иманлылар йыгнагыны сөйши ялы, сиз хем аялыңызы сөйүң» дийилйәр (Эфес. 5:25). Хава, Иса шәгиртлери үчин өз җаныны хем гурбан этди. Эгер эркек адам Исадан гөрелде алып, сөйги билен баштутанлык этсе, онда аяла әрини сөйүп, хормат гоймак ве табын болмак аңсат боляр (Титус 2:3—5-нҗи аятлары окаң).

8. Ехованың гуллукчылары имандашларына нәхили гарайышда болмалы?

⁸ Ер йүзүнде яшаян миллионларча адамлар Ехова сежде эдип, онуң ады ве ниетлери барада шаятлык эдйәрлер. Ехованың гуллукчылары имандашларына нәхили гарайышда болмалы? Худайың Сөзүнде: «Хеммелере, ылайта-да, иманлылар ичерисине ягшылык эделиң» дийилйәр (Гал. 6:10; Римлилер 12:10-ы окаң). Петрус ресул хем имандашларына шейле язды: «Рух аркалы хакыката боюн болмак билен, җанларыңызы хилесиз доган сөйгүси үчин тәмизләниңизден соң, бирек-биреги йүрекден ыхлас билен сөйүң. Хер затдан өң бирек-биреге болан сөйгиңиз җошгунлы болсун» (1 Пет. 1:22; 4:8).

9, 10. Худайың халкы нәме үчин агзыбир яшаяр?

⁹ Ехова гуллук эдйән имандашларымызы йүрекден сөййәндигимиз үчин, бизиң үйтгешик бүтиндүнйә гурамамыз бар. Шейле-де Ехованы сөйүп, канунларына гулак асяндыгымыз себәпли, Худай бизи Әлемде иң ёкары гүйч, ягны херекетдәки гүйҗи болан мукаддес рухы аркалы голдаяр. Бу бизе халкара доганлыгымыз билен агзыбир яшамага көмек эдйәр (1 Яхя 4:20, 21-нҗи аятлары окаң).

¹⁰ Павлус ресул месихчилериң бири-бирини сөймелидигини ныгтап: «Рехимдарлык йүрегини, ягшылыгы, кичигөвүнлилиги, юмшаклыгы ве сабры гейниң... Буларың хеммесиниң үстүнден-де кәмил бирлигиң багы болан сөйгини гейиң» дийип язды (Кол. 3:12, 14). Шейле-де ол: «Бири-бириңизе мәхрибан, гамхор болуң, Худайың сизи Месихде багышлайшы ялы, сиз хем бири-бириңизи багышлаң» дийди (Эфес. 4:32). Хава, миллетимизе ве тире-тайпамыза гарамаздан, бизиң арамызда «кәмил бирлигиң багы» болан сөйгиниң хөкүм сүрйәндигине дийсең бегенйәрис!

11. Ехованың гурамасындакы сөйги ве агзыбирлик нәмәни гөркезйәр?

¹¹ Ехованың гуллукчыларының арасындакы хакыкы сөйги ве агзыбирлик оларың догры ёлдан йөрейәндигини субут эдйәр. Иса: «Бири-бириңизе сөйгиңиз болса, сизиң Мениң шәгирдимдигиңизи хеммелер билер» дийди (Яхя 13:34, 35). Яхя ресул хем шейле язды:  «Худайың балалары билен иблисиң балалары шундан беллидир: догрулыгы ерине етирмейән, доганыны сөймейән адам Худайдан дәлдир. Чүнки сизиң озал-башдан эшиден хабарыңыз шудур: бири-биримизи сөелиң» (1 Яхя 3:10, 11). Ехованың гурамасындакы деңи-тайы болмадык агзыбирлик ве сөйги Ехованың Шаятларының Иса Месихиң хакыкы шәгиртлеридигини хем-де Патышалык барадакы хош хабарың бүтин ер йүзүнде вагыз эдилмеги үчин, Худайың олары уланяндыгыны гөркезйәр (Мат. 24:14).

12, 13. Шу гүнлер «улы мәреке» нәме эдйәр ве олара нәме гарашяр?

¹² Ехованың гуллукчыларының көпүси «хер миллетден, хер тайпадан, хер халкдан ве хер дилден болан... улы мәрекә» дегишли. Олар «(Худайың) тагтының хем Гузының (Иса Месихиң) өңүнде дурлар». Аслында, бу адамлар ким? «Булар шол агыр мушакгатдан чыкып геленлер. Булар донларыны Гузының ганы билен ювуп, чув ак этдилер», себәби Исаның төлег гурбанына иман эдйәндиклерини гөркездилер. Шу гүнлер саны барха артян «улы мәрекәниң» агзалары Ехованы ве онуң Оглуны сөйүп, Худая «гиҗе-гүндиз хызмат эдйәрлер» (Ылх. 7:9, 14, 15).

¹³ Тизден Худай агыр мушакгатда бу залым дүнйәни ёк эдер (Мат. 24:21; Ермея 25:32, 33-нҗи аятлары окаң). Эмма Ехова гуллукчыларыны сөййәндиги үчин, оларың әхлисини халас эдип, Җеннете гечирер. Ики мүң йыл мундан озал айдылышы ялы, Худай «оларың гөзлеринден әхли яшларыны сүпүрер. Инди не өлүм, не яс, не агы, не-де агыры болар». Сиз хем «өңки затлар арадан айрылансоң», Җеннетде яшамак ислейәрмисиңиз? (Ылх. 21:4).

14. Улы мәрекәниң саны нәчә етди?

¹⁴ 1914-нҗи йылда соңкы гүнлер башланда, ер йүзүнде Ехованың бары-ёгы бирнәче мүң гуллукчысы барды. Месх эдилен месихчилериң аз санлы галындысы якыныны сөййәндиги үчин, Худайың мукаддес рухуның голдавы билен ыхласлы вагыз этдилер. Шу гүнлер ер йүзүнде яшамага умыт эдйән улы мәреке йыгналяр. Хәзир бүтин дүнйәде 115 мүң 400-ден говрак йыгнак бар ве Ехованың Шаятларының саны такмынан 8 миллиона етди. Бизиң санымыз гитдигиче көпелйәр. Мысал үчин, 2014-нҗи гуллук йылында 275 мүң 500-ден говрак адам Ехованың Шаяды болуп, ортача хер хепде 5 мүң 300-е голай адам сувда чокундырылды.

15. Вагыз иши нәхили депгинде алнып барыляр?

¹⁵ Вагыз ишиниң мөчбери дийсең хайран галдыряр. Мукаддес Язгылара эсасланан эдебиятларымыз 700-ден говрак диле терҗиме эдилйәр. «Гаравул диңи» дүнйәде иң гиңден яйрадылян журнал болуп, хер ай онуң 52 миллиондан говрагы 247 дилде чап эдилйәр. «Мукаддес Язгылар нәме өвредйәр?» атлы китабымызың 200 миллиондан говрагы 250-ден хем көп дилде чыкарылды.

16. Ехованың халкы нәме үчин рухы тайдан гүлләп өсйәр?

¹⁶ Биз Ехова иман эдйәндигимиз ве Худайың гудраты билен ылхамланып язылан Сөзүни, ягны Мукаддес Язгылары йүрекден кабул эдйәндигимиз үчин, рухы тайдан хас-да өсйәрис (1 Сел. 2:13). «Бу дүнйәниң таңрысы»  Шейтан йигренч билен гаршылык гөркезсе-де, Ехованың халкының рухы тайдан гүлләп өсмеги өрән тәсин! (2 Кор. 4:4).

17, 18. Худайың гуллукчылары иман этмейән адамлара нәхили гарамалы?

¹⁷ Ехованың гуллукчылары хак Худая сежде этмейән адамлара нәхили гарамалы? Вагыз эденимизде адамларың кәбири говы диңлесе, кәбирлери гаршылык гөркезйәр. Эмма адамларың нәхили сесленйәндигине гарамаздан, Худайың гуллукчыларының өзүни нәхили алып бармалыдыгы барада Мукаддес Язгыларда шейле дийилйәр: «Хер киме нәхили җогап бермелидигини билер ялы, сөзүңиз дуз билен тагамлы эдилип, якымлы болсун» (Кол. 4:6). Биз якынымызы сөййәндигимиз үчин, умыдымыз хакда сораг берен хер кесе хемише «юмшаклык, сайхаллылык билен» җогап берйәрис (1 Пет. 3:15, 16).

¹⁸ Адамлар бизи кемсидип, вагыз эдйән хабарымыза гахар билен гаршы чыксалар-да, биз якынымызы сөййәндигимизи гөркезйәрис. Биз «сөгүленде сөгмән, гөрги гөренде горкы салман, Өзүни адыл хөкүм чыкарян Худая табшыран» Исадан гөрелде алярыс (1 Пет. 2:23). Биз ниреде болсак-да: имандашларымызың ве башга адамларың янында-да кичигөвүнли болуп, «яманлыга яманлык, сөгүнҗе сөгүнч билен гайтаргы бермән, терсине, хайыр-дога эдиң» диен маслахата эерйәрис (1 Пет. 3:8, 9).

19. Иса душманларымыз бабатда нәхили табшырык берди?

¹⁹ Ехованың халкы кичигөвүнли болмак билен, Исаның берен ваҗып табшырыгына эерйәр. Ол Дагдакы вагзында шейле сөзлери айтды: «Сиз: „Гоңшыңы сөй, душманыңы йигрен“ дийленини хем эшиденсиңиз. Мен велин сизе диййәрин, гөклердәки Атаңызың огуллары болар ялы, душманларыңызы сөйүң... сизи ызарлаянлар үчин дога эдиң. Чүнки гөклердәки Атаңыз Гүнүни яманларың хем, ягшыларың хем үстүне догуряр, ягмырыны догруларың хем, эгрилериң хем үстүне ягдыряр» (Мат. 5:43—45). Хава, душманларымыз бизе нәхили гарайышда болса-да, биз Худайың гуллукчылары хөкмүнде олары сөймели.

20. Тәзе дүнйәде адамларың әхлиси нәме үчин Худая ве якынына сөйги билдирер? (Макаланың башындакы сурата середиң).

²⁰ Ехованың гуллукчылары гарайшы ве эдйән ишлери билен Ехованы хем-де якыныны сөййәндигини дурмушының әхли пудагында гөркезмели. Кәбир адамлар Патышалык барадакы хош хабары кабул этмесе-де, биз олары көмеге мәтәч боланларында голдап, якынымызы сөййәндигимизи гөркезйәрис. Павлус ресул шейле язды: «Бири-бириңизи сөймекден башга хич киме бергили болмаң; себәби ким башганы сөййән болса, кануны берҗай эдйәндир. Чүнки: „Зына этме, адам өлдүрме, огрулык этме, ялан гүвәлик берме, ачгөз болма“ ве ене-де буйрук бар болса, ол хем шу сөзде җемленендир: „Гоңшыңы өзүң ялы сөй“. Сөйги гоңша хич хили яманлык этмез. Сөйги кануның берҗай эдилишидир» (Рим. 13:8—10). Шейтаның голы астындакы азгынлыкдан, дава-җенҗелден ве зорлук-сүтемден долы дүнйәде биз Ехованың Шаятлары хөкмүнде хакыкы сөйги билдирйәрис (1 Яхя 5:19). Шейтан ве онуң җынлары хем-де эрбет адамлар ёк эдиленсоң, әхли ерде диңе сөйги хөкүм сүрер. Ер йүзүниң яшайҗыларының хеммеси Худайы ве якыныны сөйсе, гөр, нәхили аҗайып болар!