1, 2. Paonan-o iginpapakita han Kasuratan an pagkaimportante han gugma?

GUGMA an nangunguna nga kalidad ni Jehova nga Dios. (1 Juan 4:16) An iya siyahan nga linarang amo hi Jesus, nga nakaupod niya ha langit hin binilyon nga katuigan ngan nahibaro han iya mahigugmaon nga mga paagi. (Col. 1:15) Ha bug-os nga kinabuhi ni Jesus, pati na an iya kinabuhi ha tuna, iya iginpakita nga nasasabtan gud niya kon mationan-o kamahigugmaon hi Jehova, ngan ginsusubad niya ito nga gugma. Salit, makakasiguro kita nga pirme magmamando hi Jehova ngan hi Jesus ha mahigugmaon nga paagi.

² Han ginpakianhan hi Jesus kon ano an pinakaimportante nga sugo ha Balaud, hiya binaton: “‘Higugmaa hi Jehova nga imo Dios ha bug-os mo nga kasingkasing, ha bug-os mo nga kalag, ngan ha bug-os mo nga hunahuna.’ Ini an pinakaimportante ngan an siyahan nga sugo. An ikaduha amo ini: ‘Higugmaa an imo igkasi-tawo sugad ha imo kalugaringon.’”—Mat. 22:37-39.

3. Hin-o an aton “igkasi-tawo”?

³ Tigamni nga nagsiring hi Jesus nga an gugma ha igkasi-tawo ikaduha ha gugma kan Jehova. Iginpapakita hini nga importante gud  an pagpakita hin gugma ha iba. Pero hin-o an aton “igkasi-tawo”? Kon inasaw-an kita, an aton padis an aton pinakaduok nga igkasi-tawo. Duok liwat ha aton an kabugtoan ha kongregasyon. Ngan igkasi-tawo liwat naton an mga nakakaistorya naton ha ministeryo. Paonan-o maipapakita an gugma ha igkasi-tawo han mga nagsisingba kan Jehova ngan nagsusunod han katutdoan han iya Anak?

4. Kay ano nga mahimo maglampos an pag-asawa bisan kon diri hingpit an mga tawo?

⁴ Ginlarang ni Jehova hira Adan ngan Eva ngan gintig-ob sugad nga an siyahan nga mag-asawa. Katuyoan niya nga magkaada hira malipayon ngan nagpapadayon nga pag-asawa, ngan pun-on nira an tuna han ira mga anak. (Gen. 1:27, 28) Pero nadaot an siyahan nga pag-asawa tungod han ira pagrebelde ha pagkasoberano ni Jehova, ngan nagresulta ito ha sala ngan kamatayon han ngatanan nga tawo. (Roma 5:12) Kondi ginsusumatan kita han Kasuratan kon paonan-o magigin malampuson an pag-asawa. Mababasa dida hito an pinakamaopay nga sagdon ha pag-asawa tungod kay tikang ito kan Jehova, an nagpatikang han pag-asawa.—Basaha an 2 Timoteo 3:16, 17.

5. Mationan-o kaimportante an gugma ha pag-asawa?

⁵ Iginpapakita han Biblia nga importante an gugma basi magkaada malipayon nga relasyon. Aplikado gud ini ha pag-asawa. Ginhulagway ni apostol Pablo an tinuod nga gugma han hiya nagsiring: “An gugma nagpapasensya ngan buotan. An gugma diri nangangabugho, diri naghahambog, diri nagpapahitaas, diri nagawi hin diri desente, diri naghuhunahuna han kalugaringon la nga kaopayan, ngan diri madali masina. Diri ito nag-iihap han karat-an. Diri ito nalilipay ha pagkadiri-matadong, pero nalilipay ha kamatuoran. Nag-aantos ito han ngatanan nga butang, natuod han ngatanan nga butang, naglalaom han ngatanan nga butang, ngan nagpapailob han ngatanan nga butang. An gugma diri gud napapakyas.” (1 Cor. 13:4-8) An pagpamalandong ngan pag-aplikar hiton giniyahan nga mga pulong makakadugang gud han kalipay han mag-asawa.

6, 7. (a) Ano an ginsisiring han Biblia mahitungod ha pagkaulo? (b) Paonan-o sadang trataron han bana an iya asawa?

⁶ Labi nga importante an pagpakita hin gugma ha kahikayan han Dios ha pagkaulo. Hi Pablo nagsiring: “Karuyag ko hibaroan niyo nga an ulo han tagsa nga lalaki amo an Kristo; an ulo  han babaye amo an lalaki; ngan an ulo han Kristo amo an Dios.” (1 Cor. 11:3) Pero an pagkaulo diri sadang ipakita ha dominante nga paagi. Pananglitan, iginpapakita ni Jehova an iya pagkaulo ha Kristo ha buotan ngan diri makikalugaringon nga paagi, salit nagpapasakop hi Jesus. Gin-aapresyar gud ni Jesus an mahigugmaon nga pagpakita han Dios han iya pagkaulo, kay hi Jesus nagsiring: “Hinigugma ko an Amay.” (Juan 14:31) Diri gud unta sugad hito an iya aabaton kon nagin mapintas o dominante hi Jehova ha iya.

⁷ Bisan kon an bana an ulo han asawa, ginsusugo hiya han Biblia nga ‘tagan hin dungog’ an iya asawa. (1 Ped. 3:7) Mahihimo niya ito pinaagi ha pagin mahunahunaon ha panginahanglan han iya asawa ngan pagsunod han iya mga suhestyon ha pipira nga butang. Ngani, an Biblia nasiring: “Mga bana, padayon nga higugmaa an iyo asawa, sugad la nga hinigugma han Kristo an kongregasyon ngan iginhatag an iya kalugaringon para hito.” (Efe. 5:25) Oo, ginhatag pa ngani ni Jesus an iya kinabuhi para ha iya mga sumurunod. Kon ginsusubad han bana an mahigugmaon nga pagkaulo ni Jesus, mas masayon para ha iya asawa nga higugmaon ngan respetuhon hiya ngan magpasakop ha iya.—Basaha an Tito 2:3-5.

8. Paonan-o naton sadang tagdon an aton kabugtoan?

⁸ Ha bug-os nga tuna, minilyon an nagsisingba kan Jehova ngan nagpapasamwak han iya ngaran ngan katuyoan. Paonan-o naton sadang tagdon an aton kabugtoan? An Biblia nasiring: “Buhaton naton an maopay ha ngatanan, pero labi na gud ha mga kapariho naton hin pagtoo.” (Gal. 6:10; basaha an Roma 12:10.) Hi apostol Pedro nagsurat: “Yana nga ginputli na niyo an iyo mga kalag pinaagi han iyo pagkamasinugtanon ha kamatuoran nga tungod hito kamo may-ada minagburugto nga gugma nga diri-hipokrito, kinasingkasing nga maghigugmaay gud kamo ha usa kag usa.” Ginsidngan gihapon niya an iya mga igkasi-Kristiano: “Labaw ha ngatanan, magkaada kamo daku nga gugma ha usa kag usa.”—1 Ped. 1:22; 4:8.

9, 10. Kay ano nga nagkakaurosa an katawohan han Dios?

⁹ Tungod kay hinigugma gud naton an kabugtoan, naiiba an aton bug-os-kalibotan nga organisasyon. Dugang pa, tungod kay hinigugma naton hi Jehova ngan ginsusunod an iya mga balaud, gintatagan kita niya han pinakagamhanan nga pwersa ha uniberso, an iya baraan nga espiritu, o aktibo nga pwersa. Nabulig ini ha aton nga magkaada tinuod ngan nagkakaurosa nga internasyonal nga pagminagburugto.—Basaha an 1 Juan 4:20, 21.

¹⁰ Ginpabug-atan ni Pablo an pagkaimportante han pagpakita hin gugma ha kabugtoan, hiya nagsurat: “Isul-ot niyo an pagpalangga nga may kalooy, pagkabuotan, pagpaubos, pagkamalumo, ngan pagkapasensyoso. Padayon nga mag-inantosay ngan kinasingkasing nga magpinasayloay kamo bisan kon may hinungdan an usa ha pagreklamo kontra ha iba. Sugad la nga hi Jehova kinasingkasing nga nagpasaylo ha iyo, kinahanglan ito liwat an iyo buhaton. Pero labot hini ngatanan, isul-ot niyo an gugma, kay ini an hingpit nga bugkos han pagkaurosa.” (Col. 3:12-14) Mapasalamaton gud kita nga an gugma—“an hingpit nga bugkos han pagkaurosa”—makikita ha aton pagminagburugto, anoman an aton gintikangan o nasyonalidad!

11. Ano an pangirilal-an han organisasyon han Dios?

¹¹ An tinuod nga gugma ngan pagkaurosa han mga surugoon ni Jehova nagpapakilala nga hira an nagbubuhat han tinuod nga pagsingba, kay hi Jesus nagsiring: “Tungod hini an ngatanan mahibabaro nga mga disipulo ko kamo, kon naghihigugmaay kamo.” (Juan 13:34, 35) Dugang pa, hi apostol Juan nagsurat: “An mga  anak han Dios ngan an mga anak han Yawa nakikilala pinaagi hini nga kamatuoran: An tagsa nga diri nagbubuhat han katadongan diri tikang ha Dios, sugad man an diri nahigugma ha iya bugto. Kay an mensahe nga iyo nabatian tikang ha tinikangan amo ini: kinahanglan higugmaon naton an usa kag usa.” (1 Juan 3:10, 11) An gugma nga nagriresulta ha tinuod nga pagkaurosa nagpapakilala ha mga Saksi ni Jehova sugad nga tinuod nga mga sumurunod han Kristo, an mga ginagamit han Dios ha pagtuman han iya katuyoan nga maisangyaw an maopay nga sumat han Ginhadian ha bug-os nga tuna.—Mat. 24:14.

12, 13. Ano an ginbubuhat yana han “daku nga grupo,” ngan ano an hirani na gud nira maeksperyensyahan?

¹² Kadam-an han mga surugoon ni Jehova bahin han “daku nga grupo, . . . tikang ha ngatanan nga nasud, tribo, katawohan, ngan pinulongan. Natindog hira ha atubangan han trono [han Dios] ngan ha atubangan han Kordero [nga hi Jesu-Kristo].” Hin-o hira? “Hira an nakatalwas ha daku nga kasakitan, ngan ira ginlabhan an ira hilaba nga bado ngan ginpabusag ito ha dugo han Kordero,” kay nagpapakita hira hin pagtoo ha halad-lukat ni Jesus. An mga kaapi han “daku nga grupo” nahigugma kan Jehova ngan ha iya Anak ngan “nagbubuhat hira hin sagrado nga pag-alagad ha [Dios] ha adlaw ngan gab-i.”—Pah. 7:9, 14, 15.

¹³ Diri mag-iiha, bubungkagon ni Jehova inin maraot nga kalibotan ha “daku nga kasakitan.” (Mat. 24:21; basaha an Jeremias 25:32, 33.) Pero tungod kay hinigugma niya an iya mga surugoon, tatalwason niya hira sugad nga grupo ngan gigiyahan ngadto ha bag-o nga kalibotan. Sugad han igintagna haros 2,000 ka tuig na an naglabay, “Papahiron [han Dios] an mga luha ha ira mga mata, ngan mawawara na an kamatayon, pati an kabido, pagtangis, ngan kasakit.” Hingyap mo ba nga magkinabuhi ha Paraiso diin “an daan nga mga butang naglabay na”?—Pah. 21:4.

14. Pira na an kadamu han daku nga grupo?

¹⁴ Han nagtikang an kataposan nga mga adlaw han 1914, gutiay la an surugoon ni Jehova ha bug-os nga kalibotan. Tungod han ira gugma ha igkasi-tawo ngan ha bulig han baraan nga espiritu han Dios, inin gutiay nga grupo han dinihogan nga mga Kristiano nagsangyaw han maopay nga sumat bisan pa han mga kakurian. Sugad nga resulta, gintitirok yana an daku nga grupo han katawohan nga may paglaom nga mabuhi ha tuna ha waray kataposan. Mga 8,000,000 na an mga Saksi ha sobra 115,400 nga kongregasyon ha bug-os nga kalibotan, ngan padayon kita nga nagdadamu. Pananglitan, sobra 275,500 an nabawtismohan sugad nga Saksi han 2014 nga tuig han pag-alagad—mga 5,300 kada semana.

15. Isaysay an kahaluag han naaabot yana han pagsangyaw nga buruhaton.

¹⁵ Makatirigamnan gud an kahaluag han naaabot han pagsangyaw nga buruhaton. An aton basado-ha-Biblia nga mga literatura iginpupublikar na ha sobra 700 nga yinaknan. An magasin nga An Barantayan an may pinakadamu nga naipapanaltag ha bug-os nga kalibotan. Sobra 52,000,000 nga kopya an gin-iimprinta kada bulan, ngan iginpupublikar ito ha 247 nga linggwahe. Ngan an libro nga aton ginagamit ha pag-aram ha Biblia nga Ano Gud ba an Igintututdo han Biblia? naihubad na ha sobra 250 nga linggwahe. Yana, sobra 200,000,000 nga kopya an naimprinta na.

16. Kay ano nga padayon nga nag-uuswag an organisasyon ni Jehova?

¹⁶ An daku nga pag-uswag nga nakikita naton yana resulta han aton pagtoo ha Dios ngan pagkarawat ha Biblia sugad nga iya giniyahan nga Pulong. (1 Tes. 2:13) Makatirigamnan gud an espirituwal nga pag-uswag han katawohan ni Jehova bisan pa han kangalas ngan pagkontra  ni Satanas, an “dios hini nga sistema.”—2 Cor. 4:4.

17, 18. Ano an ginlalaoman ni Jehova nga magigin pagtratar naton ha mga diri-tumuroo?

¹⁷ Ano an ginlalaoman ni Jehova nga magigin pagtratar han iya mga surugoon ha mga tawo nga diri nagsisingba ha iya? Ha aton pagsangyaw, iba-iba an reaksyon han mga tawo—may namamati, may-ada liwat nasisina. Pero anoman an ira reaksyon, ginsusunod naton an sagdon han Biblia. Ito nasiring: “Magin buotan kamo pirme ha iyo pagyakan, sugad hin gintitimplahan ito hin asin. Kon buhaton niyo ini, mahibabaro kamo kon paonan-o mabaton ha tagsa nga tawo.” (Col. 4:6) Kon gindidepensahan naton an aton gintotoohan, ginbubuhat naton ito “ha malumo nga paagi ngan may daku nga respeto” tungod kay hinigugma naton an aton igkasi-tawo.—1 Ped. 3:15.

¹⁸ Nagpapakita kita hin gugma ha aton igkasi-tawo bisan kon diri ginkakarawat an aton mensahe ngan nasisina an tagbalay. Ginsusubad naton hi Jesus: “Han gin-iinsulto hiya, waray hiya bumulos hin pag-insulto. Han nag-aantos hiya, waray hiya manarhog, lugod iginsarig niya an iya kalugaringon ha usa [hi Jehova] nga naghuhukom ha matadong nga paagi.” (1 Ped. 2:23) Kaupod man naton an kabugtoan o an mga diri Saksi, nagpapakita kita hin pagpaubos ngan gin-aaplikar ini nga sagdon: “Ayaw pagbulos hin maraot ha maraot o hin insulto ha insulto. Lugod, paghatag hin bendisyon ha iba.”—1 Ped. 3:8, 9.

19. Ano nga prinsipyo an iginhatag ni Jesus may kalabotan ha mga nakontra ha aton?

¹⁹ Pinaagi ha pagpabilin nga mapainubsanon, ginsusunod han katawohan ni Jehova an importante nga prinsipyo nga ginhatag ni Jesus. Ha iya Sermon ha Bukid, hiya nagsiring: “Hinbatian niyo an ginsiring: ‘Higugmaa an imo igkasi-tawo ngan kasinahi an imo kaaway.’ Pero ginsisidngan ko kamo: Padayon nga higugmaa an iyo kaaway ngan ig-ampo an nagtitimaraot ha iyo, basi mapamatud-an niyo nga mga anak kamo han iyo Amay nga aadto ha langit, kay iya ginpapasirang an adlaw ha magraot ngan mag-opay nga tawo ngan nagpapauran ha magtadong ngan diri-magtadong.” (Mat. 5:43-45) Oo, sugad nga mga surugoon han Dios, kinahanglan mahibaro kita nga ‘higugmaon an aton kaaway,’ anoman an ira pagtratar ha aton.

20. Paonan-o kita nahibaro nga maabot an panahon nga an tuna mapupuno han gugma ha Dios ngan ha igkasi-tawo? (Kitaa an retrato ha tinikangan hini nga artikulo.)

²⁰ Ha ngatanan nga bahin han aton kinabuhi, kinahanglan ipakita naton ha aton disposisyon ngan buhat nga hinigugma naton hi Jehova ngan an aton igkasi-tawo. Pananglitan, bisan kon diri ginkakarawat han iba an mensahe han Ginhadian, nagpapakita kita ha ira hin gugma kon nagkikinahanglan hira hin bulig. Hi apostol Pablo nagsurat: “Ayaw kamo pangutang hin bisan ano ha bisan hin-o, gawas la han paghigugma ha usa kag usa, kay an nahigugma ha igkasi-tawo nakakatuman na han balaud. Kay an Balaud nga ‘Diri ka mag-adulteryo, Diri ka magpatay, Diri ka mangawat, Diri ka maipa,’ ngan an anoman nga iba pa nga sugo ginsumaryo ha sugad hini: ‘Higugmaa an imo igkasi-tawo sugad ha imo kalugaringon.’ An tawo nga may gugma diri nagbubuhat hin maraot ha igkasi-tawo; salit an gugma an katumanan han balaud.” (Roma 13:8-10) Hinin nagkakabahin-bahin, madarahog, ngan maraot nga kalibotan nga ginkukontrol ni Satanas, an katawohan han Dios nagpapakita hin tinuod nga gugma ha ira igkasi-tawo. (1 Juan 5:19) Sigurado nga mapupuno na hin gugma an kalibotan kon mawara na hi Satanas, an iya mga demonyo, ngan an magraot nga katawohan. Daku gud nga bendisyon kon umabot na an panahon nga an ngatanan nga umurukoy ha tuna nahigugma ha Dios ngan ha ira igkasi-tawo!