1, 2. ʼE fakaha feafeaʼi te maʼuhiga ʼo te ʼofa ʼi te Tohi-Tapu?

KO TE ʼofa ko te kalitate tafitō ʼaia ʼo Sehova ʼAtua. (1 Soane 4:16) Ko tana ʼuluaki fakatupu, ko Sesu Kilisito, neʼe nofo ia tafa ʼo tana Tamai ʼi selo lolotoga ni taʼu ʼe lauʼi miliale, pea neʼe ina ako ai ko Sehova ko te ʼAtua ʼofa. (Kolose 1:15) Neʼe toe fakaha e Sesu te ʼofa ʼaia lolotoga tona maʼuli katoa ʼi te kele ohage pe ko tona maʼuli ʼi selo. Koia, ʼe tou tui papau ai, ko Sehova mo Sesu ʼe nā fakahoko tuʼumaʼu pe anai tanā takitaki ʼaki te ʼofa.

² ʼI te fakafehuʼi ʼo Sesu pe ʼe ko te folafola fea ʼae ʼe lahi tokotahi, neʼe ui fenei e Sesu: “E ke ofa anai [kia Sehova], tou Atua, i tou loto katoa, mo tou laumalie katoa, pea mo tau manatu katoa. Ko te uluaki aia pea mo te fakatotonu lahi [tokotahi]. Pea koeni te lua, ae e tatau mo ia: E ke ofa anai ki tou oloi [“tatau,” MN] o hage ko tou ofa kia koe totonu.”—Mateo 22:37-39.

3. Ko ai koa totatou tatau?

 ³ ʼE maʼuhiga ke tou fakaha te ʼofa ʼi ʼatatou felogoʼi mo te hahaʼi fuape. Neʼe ui e Sesu ʼe tonu ke tou ʼoʼofa kia Sehova mo totatou tatau. Kaʼe ko ai koa totatou tatau? Kapau kua tou ʼohoana, ko totatou tatau ko tokita ʼohoana. ʼE toe kau ai mo ʼotatou tehina mo tuagaʼane ʼo te kokelekasio, mo natou ʼae ʼe tou felaveʼi ʼi te faifakamafola. Koia, ʼi te alatike ʼaeni, ʼe tou ako ai anai pe ʼe tou fakaha feafeaʼi te ʼofa ki totatou tatau.

4. ʼE feala ke fua lelei feafeaʼi te maʼuli fakataumatuʼa, logope totatou ʼuhiga agahala?

⁴ Neʼe fakatupu e Sehova ia Atama mo Eva, pea neʼe ina fakatahiʼi naua. Neʼe ko te ʼuluaki ʼohoana ʼaia. Neʼe loto e Sehova ke fiafia tonā maʼuli fakataumatuʼa pea mo nā fakahahaʼi te kele ʼaki tanā fanau. (Senesi 1:27, 28) Kaʼe ʼi tanā talagataʼa kia Sehova, neʼe fua kovi ai tona maʼuli fakataumatuʼa, pea nā tuku holo ai te agahala mo te mate kia tatou fuli. (Loma 5:12) Logo la te faʼahi ʼaia, ʼe feala pe ki te maʼuli fakataumatuʼa ke fua lelei ia ʼaho nei. ʼI te Tohi-Tapu, ko Sehova te Matapuna ʼo te ʼohoana, neʼe ina foaki te ʼu tokoni lelei kia natou ʼae kua ʼohoana.—Lau ia 2 Timoteo 3:16, 17.

5. He koʼe ʼe maʼuhiga te ʼofa ʼi te maʼuli fakataumatuʼa?

⁵ ʼE fakaha mai ʼi te Tohi-Tapu ʼe maʼuhiga te ʼofa ke tou fiafia ai ʼi ʼatatou felogoʼi mo te hahaʼi. Pea ʼe moʼoni te faʼahi ʼaia ʼi te maʼuli fakataumatuʼa. Neʼe talanoa te apositolo ko Paulo ʼo ʼuhiga mo te ʼofa moʼoni ʼo ina ui fenei: “Ko te ofa e kataki, e fonu ia i te agalelei; ko te ofa e mole maheka; ko te ofa e mole laupisi, e mole mapula ia i te fiamealahi, e mole ina fai he mea e patapata, e mole ina kumi tona lelei, e mole hoko ita ia, e mole mahalohalo ia, e mole fakafiafia ia i te hala, kae e fakafiafia ia i te mooni; e ina uufi te mea fuli, e tui ia ki te mea fuli, e falala ia ki te mea fuli, e ina katakii te mea fuli. Ko te ofa e mole puli i he aho.” (1 Kolinito 13:4-8) Kapau ʼe tou fakakaukauʼi mo maʼuliʼi te ʼu palalau ʼa Paulo, ʼe feala ke tou maʼu he maʼuli fakataumatuʼa fiafia.

6, 7. (1) Kotea ʼae ʼe ui ʼi te Tohi-Tapu ʼo ʼuhiga mo te pule famili? (2) ʼE tonu ke feafeaʼi te aga ʼa he tagata Kilisitiano ki tona ʼohoana?

⁶ Ko Sehova ʼae neʼe ina filifili pe ʼe ko ai te pule ʼi te famili. Neʼe fakamahino fenei e Paulo: “E au loto ke kotou iloi ko Kilisito ko te pule aia o te tagata fuli; ko te tagata ko te pule aia o te fafine; ko te Atua ko te pule aia o Kilisito.” (1 Kolinito 11:3) Kaʼe ʼe fakaʼamu Sehova ki te tagata ʼohoana ke liliu ko he pule famili ʼofa kaʼe mole agamalohi mo agafefeka. Ko Sehova ko he pule agalelei ʼe mole manatu pe kia ia totonu. Koia ʼe fakaʼapaʼapa ai Sesu ki te takitaki ʼofa ʼa te ʼAtua. Neʼe ina ui fenei: “E au ofa i te Tamai.” (Soane 14:31) Ka na pau la neʼe agakovi Sehova, ʼe mole palalau feia Sesu.

⁷ Tatau aipe pe ʼe pule te tagata ki tona ʼohoana, kaʼe ʼe ui ʼi te Tohi-Tapu ʼe tonu ke fakaʼapaʼapa ki tona ʼohoana. (1 Petelo 3:7) ʼE fakahoko feafeaʼi anai e te tagata ʼohoana te faʼahi ʼaia? ʼE ina tokagaʼi anai te ʼu meʼa ʼae ʼe ʼaoga kia ia mo fakaʼapaʼapa ki te ʼu meʼa ʼae ʼe ina leleiʼia. ʼE ui fenei ʼi te Tohi-Tapu:  “U tagata ohoana, koutou tahi ofa ki tona ohoana, o hage ko Kilisito nee ofa ki te Ekelesia, pea nee ina foaki ia ia totonu o uhiga mo ia.” (Efeso 5:25) ʼEi, neʼe toe foaki e Sesu mo tona maʼuli ki ʼana tisipulo. Koia, ʼe faigafua anai ki te fafine ke ʼofa, mo fakaʼapaʼapa pea mo mulimuli ki te ʼu tonu ʼae ʼe toʼo e tona ʼohoana, mo kapau ko he pule famili ʼofa ohage ko Sesu.—Lau ia Tito 2:3-5.

8. Kotea tatatou manatu ʼo ʼuhiga mo ʼotatou tehina mo tuagaʼane?

⁸ Ia ʼaho nei, ko te toko lauʼi miliona hahaʼi ʼi te kele katoa ʼe natou tauhi kia Sehova. Ko ʼotatou tehina mo tuagaʼane. Koia kotea tatatou manatu ʼo ʼuhiga mo natou? ʼE ui fenei ʼi te Tohi-Tapu: “Tou fai te mea e lelei ki te u tagata fuli, kae tafito ki te u tehina i te tui.” (Kalate 6:10; lau ia Loma 12:10.) Neʼe tohi e te apositolo ko Petelo, ko tatatou “fakalogo ki te mooni” ʼe tonu ke ha ʼi totatou “ofa fakatautehina.” Neʼe toe ui fenei e Petelo ki ʼona kaumeʼa Kilisitiano: “Ko te meʼa ʼae ʼe maʼuhiga tafitō, ke kotou feʼofamamahiʼaki.”—1 Petelo 1:22; 4:8, MN.

9, 10. He koʼe ko te hahaʼi ʼa Sehova ʼe logotahi?

⁹ Ko tatatou kautahi fakamalamanei ʼe mole hona fakatatau. Kotea tona tupuʼaga?  Koteʼuhi ʼe tou ʼoʼofa moʼoni ki ʼotatou tehina mo tuagaʼane. Kaʼe tafitō, ʼe lagolago mai ia Sehova mo tona laumalie maʼoniʼoni, te malohi makehe ʼaia ʼo te ʼatulaulau, koteʼuhi ʼe tou ʼoʼofa kia te ia mo tou fakalogo ki ʼana lao. Pea ʼe tokoni mai te laumalie maʼoniʼoni ʼo te ʼAtua ki te logotahi fakamalamanei ʼo te ʼu tehina mo tuagaʼane.—Lau ia 1 Soane 4:20, 21.

¹⁰ Neʼe fakamaʼuhigaʼi e Paulo te ʼaoga ʼae ki te kau Kilisitiano ke natou maʼu te ʼofa, koia neʼe ina ui fenei ai: “Ke kotou kofu ni manatuloto o te manavaofa, mo te agalelei, mo te fakamalalo, mo te agavaivai, pea mo te kataki. Ke kotou fekatakiaki i okotou vahaa, pea kapau e mamahi he tahi ki he tahi i he mea, ke kotou fefakamolemoleaki. Ke kotou fakamolemole foki o hage ko [Sehova] ae nee fakamolemole kia koutou. Kae i oluga o te u mea fuli aia, kotou kofu te ofa, ae ko te hai o te lelei pau.” (Kolose 3:12-14) Koia, ʼe tou lotofakafetaʼi koteʼuhi ko te ʼofa ʼaia, ko “te hai o te lelei pau” ʼe maʼu ʼi tatatou kautahi logope te kehekehe ʼo totatou haʼuʼaga.

11. Kotea ʼae ʼe iloa kehe ai te kautahi ʼa te ʼAtua?

¹¹ Ko te ʼofa moʼoni mo te logotahi ʼe iloa kehe ai te ʼu kaugana ʼa Sehova ko natou ʼae ʼe natou maʼuliʼi te lotu moʼoni. Neʼe ui fenei e Sesu: “I te mea aia e iloi anai e te tagata fuli, ko koutou ko aku tisipulo, mo kapau e koutou mau te feofaaki ia koutou.” (Soane 13:34, 35) Ko te apositolo ko Soane neʼe ina tohi fenei: “Koeni te mea ae e iloga kehekehe ai te u fanau a te Atua mo te u fanau a te tiapolo: Ko ae e mole mauli i te maonioni e mole hau ia mai te Atua, tatau mo ae e mole ofa ki tona tehina. Koteuhi ko te mea ae nee fakaha atu kia koutou pea nee kotou logo ki ai talu mai te kamataaga: E tonu ke tou feofaofani ia tatou.” (1 Soane 3:10, 11) Ko te ʼofa mo te logotahi ʼe iloa kehe ai te kau Fakamoʼoni ʼa Sehova ko te ʼu tisipulo moʼoni ʼa Kilisito. Pea ko te kautahi ʼaia ʼe fakaʼaogaʼi e Sehova moʼo fakamafola te logo lelei ʼo te Puleʼaga ʼo te ʼAtua ki te malamanei katoa.—Mateo 24:14.

12, 13. Kotea ʼae ʼe lolotoga fai e te toe hahaʼi tokolahi ia ʼaho nei, pea kotea ʼae kua vave hoko anai kia natou?

¹² Ko te ʼu kaugana ʼa Sehova ia ʼaho nei ʼae ʼe natou faʼufaʼu te toe hahaʼi tokolahi, ʼe natou ʼomai mai te ʼu potu kehekehe ʼo te malamanei. Pea ko te tokolahi ia natou ʼaia, ʼe natou fakaha tanatou lagolago ki te Puleʼaga ʼo te ʼAtua. Ko natou ʼaia “nee omai mai te mamahi lahi; pea kua natou fo onatou kofu, pea kua natou fakahihina natou i te toto o te Akeno,” ʼaki tanatou fakaha tanatou tui ki te sakilifisio ʼo Sesu. Ko natou ʼo te toe hahaʼi tokolahi, ʼe natou ʼoʼofa kia Sehova mo tona ʼAlo pea ʼe natou tauhi kia Sehova “i te aho mo te po.”—Apokalipisi 7:9, 14, 15.

 ¹³ Kua vave hoko pe te pulihi e te ʼAtua te malama agakovi ʼaeni ʼi te “mamahi lahi.” (Mateo 24:21; lau ia Selemia 25:32, 33.) Kaʼe ko Sehova ʼe ina haofaki anai mo takitaki ʼana kaugana ki tona malama foʼou koteʼuhi ʼe ʼofa kia natou. Ohage ko tana fakapapau neʼe ina fai kua hili kiai taʼu ʼe teitei 2 000, “e ina holoholoi anai te u loimata fuli mai onatou mata, pea e mole toe mau anai te mate: E mole toe mau anai he tagi, mo he lauga, mo he mamahi.” ʼE ke loto koa la ke ke maʼuli ʼi te Palatiso ʼi te ʼosi pulihi ʼo te agakovi, te mamahi pea mo te mate?—Apokalipisi 21:4.

14. ʼE feafeaʼi te tuputupu ʼo te toe hahaʼi tokolahi?

¹⁴ ʼI te kamata ʼo te ʼu ʼaho fakaʼosi ʼi te taʼu 1914, neʼe ko te kiʼi toko lauʼi afe kaugana pe ʼa te ʼAtua. Kaʼe ko te kiʼi kutuga ʼo te ʼu tehina mo tuagaʼane fakanofo ʼaia, neʼe natou tala te logo lelei ʼo te Puleʼaga logo la te ʼu faigataʼaia, koteʼuhi neʼe natou ʼoʼofa ki ʼonatou tatau pea neʼe natou maʼu tokoni mai te laumalie maʼoniʼoni ʼo te ʼAtua. Kotea te ʼu fua ʼo tanatou faifakamafola? Ia ʼaho nei, ko te toe hahaʼi tokolahi ʼae ʼe natou ʼamanaki ke maʼuʼuli ʼo heʼe gata ʼi te kele ʼe lolotoga fakatahitahiʼi nei natou. Ko te teitei toko valu miliona kau Fakamoʼoni ʼa Sehova ia kokelekasio ʼe 115 400 tupu ʼi te malamanei, pea ʼe kei hoko atu pe tanatou tuputupu. Ohage la, ko te toko 275 500 tupu kau Fakamoʼoni neʼe papitema lolotoga te taʼu gaue 2014. Ko tona fakafuafua ko te teitei toko 5 300 kau papitema ʼi te vahaʼa.

15. ʼE feafeaʼi te tuputupu ʼo te gaue faifakamafola ia ʼaho nei?

¹⁵ Ko te tuputupu ʼo te gaue faifakamafola ʼe fakaofoofo. Koia, ia ʼaho nei, ko ʼatatou tohi kua maʼu ia lea ʼe 700 tupu. Ko Te Tule Leʼo, ko te nusipepa ʼae kua lahi tona tufa ʼi te malamanei katoa. ʼI te mahina fuli, ko Tule Leʼo ʼe nimagofulu ma lua miliona tupu ʼe ta ia lea ʼe 247. Pea ko te tohi ako Koteā ʼAē ʼe Akoʼi Moʼoni Mai ʼi Te Tohi-Tapu? neʼe fakaliliu ia lea ʼe 250 tupu. ʼI te temi nei, ko tohi ʼe luageau miliona tupu neʼe kua ta.

16. He koʼe ko te kautahi ʼa Sehova ʼe hoko atu pe tana tuputupu?

¹⁶ ʼE hoko atu pe te tuputupu ʼo tatatou kautahi, koteʼuhi ʼe tou tui ki te ʼAtua pea ʼe tou tali te Tohi-Tapu ko tana Folafola. (1 Tesalonika 2:13) Logo la te fehiʼa mo te fakafeagai ʼa Satana kia tatou, kaʼe ʼe tapuakinaʼi aipe tatou e Sehova.—2 Kolinito 4:4.

17, 18. ʼE loto e Sehova ke feafeaʼi tatatou aga kia natou ʼae ʼe mole tauhi kia te ia?

¹⁷ ʼE kehekehe te tali e te hahaʼi tatatou gaue faifakamafola. ʼE ʼi ai ʼihi ʼe fakalogo, kaʼe ko ʼihi ʼe fehihiʼa ki te logo lelei. ʼE loto e Sehova ke feafeaʼi tatatou aga kia natou ʼae ʼe mole tauhi kia te ia? Tatau aipe pe kotea te manatu ʼa te hahaʼi ʼo ʼuhiga mo te logo, kaʼe ʼe tou mulimuli ki te tokoni ʼa te Tohi-Tapu ʼae ʼe ui fenei: “Ke alu tuumau te kalasia i akotou palalau, pea ke konakonai natou e te masima, uhi ke kotou iloi te tali ae e aoga ki te tagata takitahi.” (Kolose 4:6) ʼI te ʼu temi ʼae ʼe tou tauʼi ai tatatou tui, ʼe tonu ke tou fai “i te agamalu mo te fakaapaapa” koteʼuhi ʼe tou ʼoʼofa ʼi ʼotatou tatau.—1 Petelo 3:15.

¹⁸ Pe ʼe iita te hahaʼi peʼe natou fakafisi ki te logo lelei, kaʼe ʼe tou fakaha aipe te ʼofa ki totatou tatau ʼo tou faʼifaʼitakiʼi ia Sesu. ʼI te temi fuli pe neʼe manukiʼi ai Sesu pea mo lotomamahi, neʼe mole ina tali ʼaki te kovi, kaʼe neʼe falala pe kia Sehova. (1 Petelo 2:23) Koia, ʼe tonu ai ke tou fakaha  tuʼumaʼu te agavaivai mo maʼuliʼi te tokoni ʼaeni: “Aua naa kotou totogi te kovi ki te kovi, pee ko te laukovi ki te laukovi, kae ke kotou tapuaki.”—1 Petelo 3:8, 9.

19. ʼE feafeaʼi anai tatatou aga ʼo ʼuhiga mo ʼotatou fili?

¹⁹ Ko te agavaivai ʼe tokoni mai ke tou fakalogo ki te pelesepeto maʼuhiga neʼe tuku mai e Sesu ʼe ui fenei ai: “Kua kotou logo nee fakaha: E ke ofa anai ki tou oloi pea e ke fehia anai ki tou fili. Kae ko au, e au ui atu kia koutou: Kotou ofa ki okotou fili, koutou tapuaki kia natou ae e natou tutuku koutou, koutou fai te mea ae e lelei kia natou ae e fehihia mai kia koutou, pea koutou hufaki natou ae e agakovi mai kia koutou pea mo fakatagai koutou, o tupu ke kotou liliu ko te u foha o takotou Tamai ae e nofo i te atu lagi; koteuhi e ina fakahopo fakatatau tana laa ki te kau agakovi pea mo te kau agalelei, pea e ina fakato fakatatau tana ua ki te kau agatonu pea mo te kau agahala.” (Mateo 5:43-45) Ko tatou ko te ʼu kaugana ʼa te ʼAtua, koia ʼe tonu ke tou ʼoʼofa ki ʼotatou fili, tatau aipe pe kotea tanatou faʼahiga aga kia tatou.

20. He koʼe ko te ʼofa kia Sehova mo totatou tatau ʼe mafola anai ʼi te kele katoa? (Vakaʼi te ʼuluaki pāki.)

²⁰ ʼE tonu ke tou fakaha ʼe tou ʼoʼofa kia Sehova mo totatou tatau ʼi te temi fuli pe. Tatau aipe pe ʼe fakafeagai mai te hahaʼi kia tatou peʼe ki te logo ʼae ʼe tou fakaha, kaʼe ʼe tonu ke tou tokoni kia natou mo kapau ʼe ʼaoga. Neʼe tohi fenei e te apositolo ko Paulo: “Aua naa kotou tuu maua ki he tahi, kae ke kotou maua feofaofani i okotou vahaa, koteuhi ko ae e ofa kia natou ake ae kua ina fai te lao. Koia ko te u fekau: E mole ke tono anai, e mole ke fakapo anai, e mole ke kaihaa anai, e mole ke manumanu anai, pea mo ihi atu fekau, e fakanounou fuli i te folafola aeni: E ke ofa anai ki tou kaiga o hage ko koe totonu. E mole fai e te ofa he kovi ki te kaiga: Koia ko te ofa ko te katoaaga aia o te lao.” (Loma 13:8-10) ʼI te malama agakovi, agamalohi, mo maveuveu ʼaeni, ko te ʼu kaugana ʼa Sehova ʼe natou fakaha aipe tonatou ʼofa moʼoni ki tonatou tatau. (1 Soane 5:19) Ka pulihi anai e Sehova ia Satana mo ʼana temonio, mo tona malama agakovi, ʼe maʼu anai te ʼofa ʼi te kele katoa. Ko he toe tapuakina mo kapau ʼe ʼoʼofa anai te hahaʼi ʼo te kele katoa kia Sehova mo tonatou tatau.