1, 2. Ana Malemba gakusalosya mwatuli kusosekwa kwa cinonyelo?

CINONYELO cili ndamo jekulungwa ja Mlungu. (1 Yoh. 4:16) Jwalakwe ŵatandite ni kumpanganya Yesu, juŵatamaga najo kwinani kwa yaka yejinji. Yeleyi yakamucisye kuti Yesujo alijiganye ya cinonyelo ca Yehofa. (Akolo. 1:15) Paumi wakwe wosope, atamose paŵaliji pacilambo capasi, Yesu ŵalosisye kuti ŵamanyililaga kuti Yehofa ali Mlungu jwacinonyelo soni ŵasyasyaga cinonyelo cakweco. Yeleyi yikututendekasya kulupilila kuti Yehofa ni Yesu cacitulamulila mwacinonyelo mpaka kalakala.

² Mundu jwine paŵam’wusye Yesu yakwamba Lilamusi lyekulungwa mnope, jwalakwe ŵajanjile kuti, “‘Mumnonyeleje Yehofa Mlungu jwenu ni mtima wenu wosope, umi wenu wosope, ni nganisyo syenu syosope.’ Lyeleli lili lilamusi lyekulungwa soni lyandanda. Lyaŵili lyakulandana nalyo ni ali, ‘Mumnonyeleje mjenu mpela mwamkusalinonyelela mwasyene.’”—Mat. 22:37-39.

3. Ana “mjetu” ali ŵani?

³ Yesu ŵasasile kuti lilamusi lyandanda lili kumnonyela Yehofa, soni lyaŵili lili kumnonyela mjetu. Yeleyi yikulosya kuti tukusosekwa  kulosya ndamoji kwa Yehofa soni kwa acimjetu wosope. Nambo ana “mjetu” ali ŵani? Naga ali paulombela mjawo jwapamtima ali ŵamkwawo. Acimjetu ŵane ali wosope ŵatukusalambila nawo Mlungu jwakuwona. Ŵane ali ŵandu ŵatukusasimana nawo mu undumetume. Ana ŵakulambila ŵa Yehofa ŵakusakuya yaŵajiganyisye Yesu akusalosya catuli kuti akusiŵanonyela acimjawo?

4. Ana cici campaka cikamucisye kuti maŵasa gajendeje cenene atamose kuti tuli ŵangali umlama?

⁴ Yehofa ŵapanganyisye Adamu ni Hawa ni ŵalombesye. Liŵasa lyelelyo lyaliji lyandanda. Jwalakwe ŵasacile kuti jemanjaji aŵeje ŵakusangalala, ŵakamulana soni kuti cilambo cigumbale ni ŵanace ŵawo. (Gen. 1:27, 28) Nambo ligongo lyakuti jemanjaji ŵajimucile ulamusi wa Yehofa ulombela wawo wasokonecele soni yatendekasisye kuti ulemwa ni ciwa yiyicile ŵandu wosope. (Alo. 5:12) Nambope Baibulo jikusatusalila yampaka tutende kuti ulombela wetu ujendeje cenene. Baibulo jikusasala yakamucisya mnope pangani jeleji ligongo jili maloŵe ga Yehofa, juŵatandisye ulombela.—Aŵalanje 2 Timoteo 3:16, 17.

5. Ana cinonyelo cili cakusosekwa mwatuli mwiŵasa?

⁵ Maloŵe ga Mlungu gakusalosya kuti kunonyelana mnope kukusakamucisya kuti ŵandu aŵeje ŵakamulana. Liŵasasoni kuti liŵeje lyakamulana likusasosekwa kunonyelana. Paulo ŵalembile kuti, “Cinonyelo cili cakuwusimana mtima nambosoni cakulisinga. Cinonyelo cangatenda wiwu, cangalilapilila, cangalikwesya, cangatenda yangaŵajilwa, cangatenda yakusaka yakwepe, cangatumbila. Cangasunga magongo, cangasangalala ni yangalungama, nambo cikusasangalala ni usyesyene. Cikusasiŵa yindu yosope, cikusakulupilila yindu yosope, cikusajembeceya yindu yosope, cikusapilila yindu yosope. Cinonyelo cangamala.” (1 Akoli. 13:4-8) Ganicisya soni kamulicisya masengo maloŵe gelega mpaka kwakamucisye ŵandu ŵalombane kuŵa ŵakusangalala mnope.

6, 7. (a) Ana Baibulo jikusasala yatuli pakwamba ya umtwe? (b) Ana jwamlume jwaciklistu akusosekwa kutenda wuli yindu ni ŵamkwakwe?

⁶ Yehofa ŵasagwile jwakusosekwa kuŵa mtwe wa liŵasa. Paulo ŵatite, “Ngusaka amanyilile kuti mtwe wa jwamlume julijose uli Klistu. Mtwe wa jwamkongwe uli jwamlume, soni mtwe wa Klistu uli Mlungu.” (1 Akoli. 11:3)  Nambope ngakusosekwa kamulicisya masengo umtwe mwangalwe. Mwambone, Mlungu ŵakamulicisyaga masengo umtwe wakwe kwa Klistu mwacinonyelo soni mwangalinonyela. Yeleyi yamtendekasisye Yesu kuti asangalaleje ni umtwe wa Mlungu, mwati ŵatite, “Ngusinanonyela Atati.” (Yoh. 14:31) Yesu ngamkanapikana m’yiyi mumtima yikaŵe kuti Yehofa ŵatendaga najo yindu mwangalwe.

⁷ Baibulo jikusasalila acalume kuti ‘ŵacimbicisyeje’ aciŵamkwawo atamose kuti ali mitwe. (1 Pet. 3:7) Litala limo lyele jwamlume mpaka alosye kuti akusiŵacimbicisya ŵamkwakwe lili kusamala yakusaka ya ŵamkwakwewo soni kuya yasagwile ŵalakwe pa yindu yineyakwe. Baibulo jikusasala kuti, “Jemanja acalume, mwanonyeleje aciŵamkwenu mpela mwele Klistu ŵawunonyele mpingo ni kulipeleka ligongo lya mpingowo.” (Aef. 5:25) Yesu ŵayikene pakupeleka umi wakwe ligongo lya ŵakumkuya ŵakwe. M’yoyo, naga jwamlume akukamulicisya masengo umtwe wakwe mwacinonyelo mpela muŵatendelaga Yesu, yiciŵa yangasawusya kuti ŵamkwakwe amnonyeleje, kumcimbicisya soni kumpikanila.—Aŵalanje Tito 2:3-5.

8. Ana ŵakulambila ŵa Yehofa akusosekwa kwawona catuli Aklistu acimjawo?

⁸ Kusyungulila pacilambo cosope, pana ŵandu ŵajinji ŵakusamlambila Yehofa soni kulalicila ya lina ni lisosa lyakwe. Ana tukusosekwa kwawona catuli ŵakulambila acimjetu? Maloŵe ga Mlungu gakusati, “Kwende twatendele wosope yambone, nambo mnopemnope abale ni alongo ŵetu m’cikulupi.” (Aga. 6:10; aŵalanje Aloma 12:10.) Ndumetume Petulo ŵalembile kuti, “Sambano, pakuŵa aswejesye umi wawo mwa kuŵa ŵakupikanila usyesyene, yakuyicisya yakwe yili yakuti akusanonyela abale mwangali cinyengo, anonyelaneje mnope kutyocela mumtima.” Ndumetumeju ŵasalilesoni ŵakulambila acimjakwe kuti, “Kupunda yosope, anonyelaneje mnope.”—1 Pet. 1:22; 4:8.

9, 10. Ligongo cici ŵandu ŵa Mlungu akusakamulana?

⁹ Ligongo lyakuti tukusanonyelana mnope, tukusaŵa m’likuga lyapajika lyapacilambo cosope. Konjecesya pelepa, ligongo lyakuti tukusamnonyela Yehofa soni kupikanila malamusi gakwe, jwalakwe akusatukamucisya ni msimu wakwe weswela wawuli wamacili mnope. Yeleyi yikusatukamucisya kuti tuŵeje ŵakamulana pacilambo cosope.—Aŵalanje 1 Yohane 4:20, 21.

¹⁰ Pagombelecesya kusosekwa kwa cinonyelo pasikati pa Aklistu, Paulo ŵalembile kuti, “Awale canasa cekulungwa, umbone mtima, kulinandiya, kufasa, ni kupilila. Ajendelecele kundililana ni kululucilana ni mtima wosope, naga jwine akwete ligongo lyakudandaulila ya mjakwe. Mpela Yehofa ŵakululucile ni mtima wosope, jemanjasoni atende yeleyo. Nambo kojonjesya pa yosopeyi, awale cinonyelo, pakuŵa cikusakamulanya ŵandu mwamacili kupunda cindu cilicose.” (Akolo. 3:12-14) Tukusasangalala ligongo lyakuti tukusanonyelana atamose kuti tukusatyocela m’yilambo yakulekanganalekangana.

11. Ana cici cacikusalimanyikasya likuga lya Yehofa?

¹¹ Ŵakutumicila ŵa Yehofa akusamanyika kuti ali ŵakulambila ŵasyesyene ligongo lyakuti akusanonyelana. Yesu ŵatite, “Mwakutenda yeleyi, wosope cacimanyilila kuti ali ŵakulijiganya ŵangu, naga akusanonyelana.” (Yoh. 13:34, 35) Ndumetume Yohane ŵalembilesoni kuti, “Ŵanace ŵa Mlungu ni ŵanace ŵa Satana akusawonecela cenene ni maloŵe aga: Jwalijose jwangatenda yakulungama  jwangatyocela kwa Mlungu, mpelasoni jwangamnonyela m’balegwe. Pakuŵa awu uli utenga waŵapikene kutandila kundanda, kuti tunonyelaneje.” (1 Yoh. 3:10, 11) Cinonyelo cacikusasimanikwa pasikati pa Mboni sya Yehofa cikusamanyikasya jemanjaji kuti ali ŵakumkuya Klistu ŵasyesyene ŵele Mlungu akwakamulicisya masengo pakwanilisya lisosa lyakwe lyakuwandisya ngani syambone sya Ucimwene pacilambo cosope.—Mat. 24:14.

12, 13. Ana “likuga lyekulungwa lya ŵandu” apano likutenda cici, soni ana Mlungu ciŵatendele cici ŵali m’likuga lyekulungwali?

¹² Ŵakutumicila ŵa Yehofa ŵajinji ali “likuga lyekulungwa lya ŵandu . . . ŵakutyocela m’cilambo cilicose, m’mtundu wuliwose soni m’ciŵeceto cilicose.“ Jemanjaji “ajimi pameso pa citengu ca ucimwene [ca Mlungu] ni pameso pa Mwanace jwa ngondolo [Yesu Klistu].” Ana ŵandu ŵeleŵa ali ŵani? “Ŵeleŵa ni ŵakopwece pa yisawusyo yakogoya, soni acapile mikanjo jawo ni kujiswejesya m’miyasi ja Mwanace jwa ngondolo,” ligongo akusakulupilila mbopesi ja ciwombolo ja Yesu. Wosope ŵali ‘m’likuga lyekulungwali’ akusamnonyela Yehofa ni Mwanace jwakwe, soni ‘akusamtumicila [Mlungu] mwapajika musi ni cilo.’—Ciu. 7:9, 14, 15.

¹³ Pacangakaŵapa Mlungu cajonanje cilambo cakusakalaci pa “yisawusyo yakogoya.” (Mat. 24:21; aŵalanje Yeremiya 25:32, 33.) Ligongo lyakuti Yehofa akusiŵanonyela ŵakutumicila ŵakwe, cacakulupusya wosope mpela likuga ni kwajinjisya m’cilambo casambano. Mpela mwaŵalocesye kala ciŵandika yaka 2,000 yipiteyo, Mlungu “cacipukuta misosi josope m’meso mwawo, nipo ciwa ngasicipagwasoni. Ngasipapagwasoni kulila, kuwuwula kapena kupikana kupweteka. Ana akusasacilila kutama m’Paladaiso ‘yindu yakala yili yimasile’?—Ciu. 21:4.

14. Ana likuga lyekulungwa likusile catuli?

¹⁴ Pagatandaga moŵa ga mbesi mu 1914, papali ŵakutumicila ŵa Mlungu ŵamnono pacilambo cosope. Nambo ligongo lya cinonyelo soni cikamucisyo ca msimu weswela, Aklistu ŵasagulwe ŵakamwile masengo gakulalicila ya Ucimwene mwamtawu. Yakuyicisya yakwe, moŵa agano likuga lyekulungwa lyalikwete cembeceyo cakutama pacilambo capasi likutupilatupila. Pana ŵamboni ciŵandika 8,000,000 ŵakusasongana m’mipingo jakupunda 115,400 kusyungulila pacilambo cosope. Ciŵalanjiloci cikwendelecela kutupa. Mwambone, ŵamboni ŵakwana 275,500 ŵabatiswe m’caka ca undumetume ca 2014. Yeleyi yikulosya kuti ŵandu 5,300 ŵabatiswaga cijuma cilicose.

15. Ana ŵajinji akupikana catuli ngani syambone syakwamba Ucimwene moŵa agano?

¹⁵ Ŵandu ŵajinji moŵa agano apikene ngani syambone syakwamba ya Ucimwene. Mabuku getu gakusala ya Baibulo gakusimanikwa m’yiŵeceto yakupunda 700. Sanja ja Mlonda jili magasini jakuwanda mnope pacilambo cosope capasi. Mwesi wuliwose pakusakopoka Sanja syakwana 52,000,000 m’yiŵeceto 247. Konjecesya pelepa, mabuku gakuti Ana Baibulo Jikusajiganya Cici Kusyesyene? gatukusagakamulicisya masengo pakwiganyila Baibulo gakwana 200,000,000 gakopwece m’yiŵeceto yakupunda 250.

16. Ligongo cici likuga lya Yehofa likwendelecela kula?

¹⁶ Likuga lya Yehofa likwendelecela kula ligongo lyakuti tukusakulupilila Mlungu soni tukusajiwona Baibulo mpela Maloŵe gakwe. (1 Ates. 2:13) Tukwendelecela kusangalala ni majali ga Yehofa atamose kuti Satana akusatuŵenga soni kutusisya.—2 Akoli. 4:4.

17, 18. Ana ŵakutumicila ŵa Mlungu akusosekwa kwawona catuli ŵangalambila Mlungu?

¹⁷ Ana ŵakutumicila ŵa Yehofa akusosekwa kwawona catuli ŵandu ŵangalambila Mlungu? Patukulalicila tukusasimana ni ŵandu ŵakulekanganalekangana, ŵane akusakunda kuŵecetana nawo nambo ŵane ŵangakunda. Atamose kuti ŵandu akusatupocela mwakulekangana nambope Maloŵe ga Mlungu gakusatusalila yatukusosekwa kutenda. Gakusati, “Ndaŵi syosope maloŵe gawo gaŵeje gambone, gakunong’a mpela agatasile njete, kuti amanyilile mwampaka amjanjile mundu jwalijose.” (Akolo. 4:6) Patukwanga jwalijose jwakusaka kumanyilila ya cembeceyo cetu, tukusamjanga ni “mtima wakufasa soni mwaucimbicimbi” ligongo lyakuti tukusanonyela acimjetu.—1 Pet. 3:15.

¹⁸ Atamose ŵane akane utenga ŵetu, tukusalosyape kuti tukusitwanonyela. Tukusakuya cisyasyo ca Yesu. Ŵandu “paŵam’ŵecetelaga yacipongwe, nganawucisya yacipongwe. Paŵamsawusyaga, nganiŵajogoya, nambo jwalipelekaga kwa jucacilamula mwakulungama.” (1 Pet. 2:23) Cinga tukutenda yindu ni ŵakulambila acimjetu kapena ŵane, tukusosekwa kulosya mtima wakulinandiya ni kamulicisya masengo maloŵe gakuti, “Akawucisya cakusakala pa cakusakala kapena cipongwe pa cipongwe, nambo mmalo mwakwe ŵajaliweje.”—1 Pet. 3:8, 9.

19. Ana Yesu ŵaŵecete yatuli pakwamba ya ŵandu ŵakusatusisya?

¹⁹ Kulinandiya kukusakamucisyasoni kuti tupikanileje maloŵe gaŵaŵecete Yesu. Mungani jakwe jwaŵaŵecete petumbi, jwalakwe ŵatite, “Jemanja ŵapikene kuti ŵatite, ‘Mumnonyeleje mjenu ni kuŵengana ni mmagongo jwenu.’ Nambo une ngwasalila kuti, Ajendelecele kwanonyela ŵandu ŵakusiŵaŵenga ni kwapopelela ŵakusiŵalagasya, kuti alosye kuti ali ŵanace ŵa Atati ŵawo ŵakwinani. Ligongo jwalakwe akusaŵalisya lyuŵa lyakwe pa ŵandu ŵakusakala ni ŵambone, soni akusagwicisya wula ŵandu ŵakulungama ni ŵangalungama ŵakwe.” (Mat. 5:43-45) M’yoyo, mpela ŵakutumicila ŵa Mlungu tukusosekwa ‘kwanonyela acimmagongo ŵetu’ mwangajigalila yakusatutendela.

20. Ana tukumanyilila catuli kuti ŵandu pacilambo cosope cacimnonyelaga Mlungu soni cacanonyelaga acimjawo? (Alole ciwulili cacili kundanda kwa nganiji.)

²⁰ Pa yosope yakusatenda paumi wawo, ŵakutumicila ŵa Yehofa akusosekwa kulosya kuti akusamnonyela Yehofa soni acimjawo. Mwambone, atamose ŵane ali akanile kupikanila utenga wa Ucimwene, tukusalosya kuti tukusitwanonyela pakwakamucisya pakusosecela cikamucisyo cetu. Ndumetume Paulo ŵalembile kuti, “Akakola ngongole jilijose kwa mundu jwalijose, akaŵe kunonyelana, pakuŵa jwakusamnonyela mundu mjakwe akusakwanilisya cilamusi. Ligongo malamusi gakuti: ‘Mkatenda cikululu, Mkawulaga mundu, Mkajiŵa, Mkakumbila yindu yamsyene mwawiwu,’ nambosoni lilamusi lililyose lyalipali, maloŵe gakwe gakata gali gakuti, ‘Mumnonyeleje mjenu mpela mwamkusalinonyelela mwasyene.’ Cinonyelo cangamcisya mundu kumtendela mjakwe yakusakala, m’yoyo cilamusi cikusakwanilicikwa m’cinonyelo.” (Alo. 13:8-10) M’weji tukusosekwa kulosya cinonyelo cisyesyene m’cilambo cakusakala ca Satanaci cele ŵandu ŵakwe ali ŵangakamulana soni ŵangalwe. (1 Yoh. 5:19) Mlungu pacacijonanga Satana, yiŵanda yakwe, soni ŵandu ŵakusakala, cinonyelo cicigumbala pacilambo cosope. Tucisangalala ni majali gamajinji pandaŵi jele ŵandu wosope ŵacacitama pacilambo capasi cacimnonyelaga Mlungu soni cacanonyelaga acimjawo.