Ba “T’uf Rom e En ni Ir e Mmigid Ngom ni Gowe Gur,” Fa?

“Thingari t’uf rom e en ni ir e mmigid ngom ni gowe gur.”​—MATT. 22:39.

TANG: 25, 36

RAYOG NIM FULWEG?

Mang fan nthingari m’ug e t’ufeg rok Jehovah ko pi tapigpig rok?

Uw feni ga’ fan e t’ufeg u lan e mabgol?

Uw rogon ni ke dag e pi tapigpig rok Got nib t’uf rorad e piin ni mmigid ngorad?

1, 2. Uw rogon ni be dag e Bible feni ga’ fan e t’ufeg?

 T’UFEG e aram e bin th’abi lingagil i fel’ngin Jehovah Got. (1 John 4:16) Jesus e ir e som’on ni sunmiy Got, ma bokum bilyon e duw ni i par rok u tharmiy miki fil rogon ni ma rin’ boch ban’en. (Kol. 1:15) I dag Jesus e re t’ufeg ney u nap’an ni immoy u tharmiy ngu nap’an ni yib nga fayleng. Ere, aram fan nrayog ni nge pagan’dad ni gubin ngiyal’ nra i gagiyegnagdad Jehovah nge Jesus u fithik’ e t’ufeg.

² Nap’an ni fith be’ ngak Jesus ko bin ngan e motochiyel e ir e th’abi ga’ u fithik’ e Motochiyel, me fulweg Jesus ni gaar: “‘Thingari t’uf rom Somol ni ir e Got rom u polo’ i gum’irchaem, ngu polo’ i lanin’um, ngu polo’ i lem rom.’ Ereray e bin th’abi ga’ nge bin th’abi ga’ fan e motochiyel. Ma bin migid ngay e motochiyel ni ku ba ga’ fan e bod e biney ni gaar, ‘Gin’en ni ga ba’ riy e thingari t’uf rom e en ni ir e mmigid ngom ni gowe gur.’”​—Matt. 22:37-39.

3. Mini’ e “en ni ir e mmigid” ngodad?

³ Mu tay fanam i yan riy ni tamilangnag Jesus ni bin th’abi ga’ e motochiyel e aram e nge t’uf Jehovah rodad, ma bin ni migid ngay e nge t’uf rodad e en ni ir e mmigid ngodad. Re n’ey e be dag feni ga’ fan ni ngaud daged e t’ufeg ngak urngin e girdi’. Machane, mini’ e “en ni ir e mmigid”  ngodad? Faanra gad ba mabgol, ma en mabgol rodad e aram e en ni ir e mmigid ngodad. Piin ni yad bay u lan e ulung ni Kristiano ni gad ma pigpig ngak e bin riyul’ e Got u taabang e ku aram e piin ni yad mmigid ngodad. Maku arrogon e piin ni gad ma mada’nagrad u nap’an e machib. Ere, uw rogon ni nga i t’ufeg e pi tapigpig rok Jehovah e piin ni mmigid ngorad mar folgad ko pi n’en ni i fil Fak?

NGAD T’UFEGED E EN MABGOL RODAD

4. Mang fan nrayog ni nge par e mabgol rok l’agruw ni’ nib fel’ ni yugu aram rogon ndawor ra flontgow?

⁴ Jehovah e ir e m’agpa’ e gal nsom’on e girdi’ ni aram Adam nge Efa, me tayrow nga taabang. Ba m’agan’ ngay ni ngar parew u taabang ni yow ba felfelan’ mar diyengow nge sug pi fakrow u fayleng. (Gen. 1:27, 28) Machane, nap’an nra togopuluwgow nga mat’awun Jehovah ni nge gagiyeg, ma aram me kireb e mabgol rorow, me af e denen nge yam’ ko girdi’. (Rom. 5:12) Machane, be weliy e Bible ngodad rogon nrayog ni nge par e mabgol rodad nib fel’. Boor e fonow u Bible nib manigil ni fan ko piin mabgol ni bochan e urngin e pi fonow nem ni ke yib rok Jehovah ni ir e En ni Sunmiy e mabgol.​—Mu beeg e 2 Timothy 3:16, 17.

5. Uw feni ga’ fan e t’ufeg u lan e mabgol?

⁵ Be tamilangnag e Thin rok Got ni faanra nga i par e tha’ u thilin e girdi’ nib fel’, mab ga’ fan ni ngaur pared ni bay e t’ufeg u thilrad. Maku arrogon e mabgol. I yog apostal Paul boch e thin ni fan ngak e pi walag kakrom ni gaar: “En nib t’uf Got rok nge girdi’ e ba gum’an’ ma ba gol; ma en nib t’uf Got rok nge girdi’ e der ma awan’, ma de uf, ma de tolangan’; en nib t’uf Got rok nge girdi’ e de kireb daken, ara ke mus ni ir e ma lemnag ir, ara ba papey e damumuw ngak; ma en nib t’uf Got rok nge girdi’ e der ma aw nga laniyan’ e n’en nib kireb ni kan rin’ ngak; en nib t’uf Got rok nge girdi’ e de fel’ u wan’ e ngongol nib kireb, machane ba felfelan’ ko tin nib riyul’. Be’ nib t’uf Got rok nge girdi’ e dabiyog ni nge pag ir ndab ki michan’, ma dab ki l’agan’, ma dab ki gum’an’. Rogon ni gadad ba t’uf rok Got nge rogon nib t’uf Got rodad nge girdi’ e ban’en nra par ndariy n’umngin nap’an.” (1 Kor. 13:4-8) Faanra ud fal’eged i lemnag e pi thin ney ma gad fol riy ma rayog ni nge ayuweg e mabgol rodad ni nge par ni bay e felfelan’ riy.

6, 7. (a) Mang e be yog e Bible u murung’agen e en ni ir lolugen e tabinaw? (b) Uw rogon nthingari ngongol e en figirngiy ni Kristiano ngak leengin?

⁶ Rib ga’ fan e t’ufeg ni bochan e n’en ni ke yarmiy Got ni aram e bay be’ ni ir lolugen e tabinaw. I weliy Paul ni gaar: “Gub adag ni ngam nanged fan ni Kristus e ir e lolugen urngin e pumoon, ma pumoon e ir lolugen leengin, mi Got e lolugen Kristus.” (1 Kor. 11:3) Machane, baadag Jehovah ni  nga i ngongol e en lolugen e tabinaw u fithik’ e t’ufeg, ma gathi nge gel lungun u puluwon girdien e tabinaw rok. Yugu aram rogon ni Jehovah e ir lolugen Kristus, machane ma maruwel nga mat’awun u fithik’ e sumunguy, ma der ma rin’ boch ban’en ni ir e nge fel’ ngak. Ere, bochan e re n’ey ma aram fan ni ma tay Jesus fan mat’awun Got ni ir lolugen, ya yog ni gaar: ‘Ba t’uf rog e en ni Chitamangiy.’ (John 14:31) Dabiyog ni nge t’ufeg Jesus e Chitamangin ni faan gomanga ir be’ nib kireb mab gel lungun.

⁷ Yugu aram rogon ni en figirngiy e ir lolugen leengin, machane be yog e Bible ni thingari ‘tay fan’ leengin. (1 Pet. 3:7) Reb e kanawo’ nrayog ni nge tay e piin figirngiy fan pi leengirad riy e aram e ngaur lemnaged e tin nib t’uf rorad mu ur m’oneged yad u boch ban’en. Be gaar e Thin rok Got: “Piin ni pumoon, ngari t’uf e piin nleengimed romed ni bod rogon feni t’uf girdien e galesiya rok Kristus me pi’ e pogofan rok ni fan ngorad.” (Efe. 5:25) Arrogon, i pi’ Jesus e yafas rok ni fan ngak pi gachalpen. Ere, faanra i ngongol e piin figirngiy u fithik’ e t’ufeg ni bod rogon Jesus, ma ra mom rok pi leengirad ni ngar t’ufeged yad, mi yad tay farad, mar folgad rorad.​—Mu beeg e Titus 2:3-5.

NGAM T’UFEG E PI WALAG U LAN E ULUNG

8. Susun ni nge uw rogon u wan’ e pi tapigpig rok Jehovah e piin taareb e michan’ rorad?

⁸ Bokum milyon e pi tapigpig rok Jehovah u ga’ngin yang e fayleng e ngiyal’ ney ni yad be weliy murung’agen fithingan ko girdi’ nge n’en nib m’agan’ ngay. Ere, susun ni nge uw rogon pi walagdad u wan’dad? Be gaar e Thin rok Got: “Ngad ngongliyed e ngongol nib fel’ ngak urngin e girdi’, machane nge ga’ fadad ngak e piin ni kad manged girdien e tabinaw rok Got u fithik’ e mich u wun’uy ngak Kristus.” (Gal. 6:10; mu beeg e Roma 12:10.) Ki yoloy apostal Peter ni gaar: “Chiney e kam machalbogniged gimed ni fan e kam folgad ko tin nib riyul’, ma gimed be par nrib t’uf romed e piin ni gimed ni ke mich Kristus u wun’rad ni bod gimed, ma ra bigimed ma ngari t’uf rok bigimed u polo’ i laniyan’.” Ki yog Peter ngak e piin taareb e michan’ rorad ni gaar: “Re n’en ni ir e th’abi ga’ fan u fithik’ urngin ban’en e ngari bigimed me t’uf rok bigimed.”​—1 Pet. 1:22; 4:8.

9, 10. Mang fan nib taareban’ e pi tapigpig rok Got?

⁹ Bochan nrib gel e t’ufeg u thildad ma aram fan ni ulung rodad e aram e taare ulung ni bay u fayleng ni yugu ba thil. Maku reb e, bochan nib t’uf Jehovah nge pi motochiyel rok u wan’dad, ma aram fan ni ma pi’ gelngin nib thothup ni nge ayuwegdad, ma gad manang ni aram e re gelngin nth’abi gel u ga’ngin yang e palpalth’ib. Re gelngin ney e ir e ma ayuwegdad ni ngad pared pi walagdad u ga’ngin yang e fayleng nib taareban’dad.​—Mu beeg e 1 John 4:20, 21.

¹⁰ I tamilangnag Paul feni ga’ fan e t’ufeg ni bay u thilin e piin Kristiano ni gaar: “Aram fan ni runguy, nge gol, nge sobut’an’, nge sumunguy, nge gum’an’ e thingar mon’ed nga dakenmed nge mang mad romed. Nge bigimed mi i ayuweg bigimed ko meewar rok u fithik’ e runguy, mu um n’iged fan u wun’med e n’en ni manga ke kirebnag bigimed u laniyan’ bigimed ko re ngiyal’ i n’en ni ba’ ban’en ni ke dabuy bigimed ni ke rin’ bigimed ngak. Thingar um n’iged fan u wun’med e n’en ni ke rin’ bigimed ngak bigimed ni bod rogon ni ke n’ag Somol fan u wan’ e tin ni kam rin’ed nib togopluw ngak. Nge rogon nib t’uf Got nge girdi’ romed e ngam puthuyed nga urngin e pi n’ey, ni ir e ma chugumiy urngin ban’en nga taabang nge par ni ke fel’ rogon.” (Kol. 3:12-14) Ere, ri gad ba felfelan’ ni yugu aram rogon nib thilthil e nam rodad, ma rib gel e t’ufeg u thildad ni aram e n’en ni “ma chugumiy urngin ban’en nga taabang nge par ni ke fel’ rogon!”

11. Mang e pow ko ulung rok Got?

¹¹ Pi tapigpig rok Jehovah e aram e piin ni yad ba muun ko baan riyul’ e teliw ni bochan e t’ufeg nge taareban’ ni bay u thilrad. I yog Jesus ni gaar: “Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.” (John 13:34, 35) I yoloy apostal John ni gaar: “Baaray e re n’en nib gagiyel nib thil u thilin e piin ni pi fak Got nge piin ni pi fak moonyan’:  en nde rin’ e tin nib mat’aw ara de t’uf rok e en ni walagen ni girdien Kristus e gathi ir be’ ni fak Got. Ya thin rok Got ni kam rung’aged ko tabolngin e baaray rogon: thingari bagadad me t’uf rok bagadad.” (1 John 3:10, 11) T’ufeg nge taareban’ ni bay u thilin e Pi Mich Rok Jehovah e aram e pow riy ni yad e tin riyul’ i gachalpen Kristus, ma yad e be fanayrad Got ni ngar rin’ed e n’en nib m’agan’ ngay ni aram e ngan machibnag fare thin nib fel’ ni murung’agen Gil’ilungun Got u ga’ngin yang e fayleng.​—Matt. 24:14.

YIBE KUNUY E GIRDI’ NIB “PIRE’ NI PIRE’”

12, 13. Mang e be rin’ fapi girdi’ ni ke muulung ni “pire’ ni pire’”? Mang e ra buch ko pi girdi’ ney boch nga m’on?

¹² Yooren e pi tapigpig rok Jehovah e yad ba muun ko fapi “girdi’ ni ke muulung ni pire’ ni pire’ . . . nra bad u gubin e nam, nge ganong, nge gubin mit e girdi’, ngu gubin e thin.” Pi girdi’ ney e kar bad ra “sak’iygad u p’eowchen tagil’ Got nge fare Fak e Saf [Jesus Kristus].” Mini’ e pi girdi’ nem? “Pi cha’nem e fapi girdi’ ni kar thapgad ngaray u fithik’ fare gafgow ni ba ga’ ntay ngorad. Kar lukniged e mad rorad kar wechwechniged nga rachaen fare Fak e Saf” ya ke mich fare biyul ni pi’ Jesus u wan’rad. Girdien fare ulung nib ga’ nib “pire’ ni pire’” girdien e yad ma t’ufeg Jehovah nge Fak ma yad “be pigpig ngak [Got] ni rran nge nep’.”​—Rev. 7:9, 14, 15.

¹³ Dabki n’uw nap’an me thang Got e re m’ag nib kireb ney u nap’an fare “gafgow” nib ga’. (Matt. 24:21; mu beeg e Jeremiah 25:32, 33.) Machane, ra ayuweg Jehovah e yafas rok e pi tapigpig rok me fekrad nga lan e bin nib beech e fayleng ni bochan e yad ba t’uf rok. Sogonap’an 2,000 e duw ni ke yan me micheg nra “n’ag urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith.” Ga be yim’ ni bochan ni ngam par u Paradis u tomuren ni ke chuw e “tin kakrom ban’en,” fa?​—Rev. 21:4.

14. Ke uw urngin e piin ni yad ba muun ko fare ulung nib ga’ e chiney?

¹⁴ Nap’an ni tabab e tin tomuren e rran ko duw ni 1914, ma kemus nri in e biyu’ e pi tapigpig rok Jehovah u ga’ngin yang e fayleng. Machane, bochan nib t’uf rorad e piin ni mmigid ngorad, nge ku bochan ni i ayuwegrad gelngin Got nib thothup, ma aram mar tababgad i machibnag murung’agen Gil’ilungun Got ni yugu aram rogon ni ur mada’naged boor e magawon. Angin ni ke yib riy e ke yag ni ngan kunuy girdien reb e ulung ni yad be athapeg e par u fayleng. Chiney e sogonap’an 8,000,000 e Pi Mich ni yad ma un nga 115,400 e ulung rodad u ga’ngin yang e fayleng, ma ka gad be yoor i yan. Bod nnap’an e pul ni September ko duw ni 2013 nge yib i mada’ ko August ko duw ni 2014, mab pag 275,500 e girdi’ ni kan taufenagrad, nra reb e wik ma sogonap’an 5,300 e girdi’ ni yibe taufenagrad.

15. Uw rogon ni be rung’ag e girdi’ fare thin nib fel’ e ngiyal’ ney?

¹⁵ Riyul’ ni yira ngat nga ga’ngin yang e gin ni yibe machibnag fare thin nib fel’ riy. Ke pag 700 mit e thin ni yibe pilyeg e pi babyor rodad riy nib puluw e thin riy ko Bible. Fare Wulyang ko Damit e aram e re ke magazine nth’abi yoor ken ni yibe wereg u fayleng e ngiyal’ ney, ya ra reb e pul mab pag 52,000,000 ken ni yibe ngongliy u 247 mit e thin. Ke pag 200,000,000 ken fare ke babyor ni gad ma fil ko girdi’ ni kenggin e Mang e Ri Be Fil e Bible? ni kan ngongliy u boor ko 250 mit e thin.

16. Mang fan ni ka be ga’ e ulung rok Jehovah i yan?

¹⁶ Be ga’ e ulung rodad i yan ni bochan e ba mich Got u wan’dad ma kub mich e Bible u wan’dad ni aram e Thin rok ni kan thagthagnag. (1 Thess. 2:13) Ku yira ngat nga rogon ni be tow’athnag Jehovah e girdi’ rok ni yugu aram rogon ni be fanenikayrad Satan ni fare “kan nib kireb” ni be gagiyegnag e re m’ag ney maku be togopuluw ngorad.​—2 Kor. 4:4.

NGAUM T’UFEG BOCH E GIRDI’

17, 18. Susun ni nge uw rogon e ngongol rok e pi tapigpig rok Got ngak e piin nde mich e thin rok Got u wan’rad?

¹⁷ Uw rogon ni baadag Jehovah ni nga i ngongol  e pi tapigpig rok ngak e piin ndarur pigpiggad ngak? Nap’an ni gad ra yan ko machib, mab thilthil rarogon e girdi’ ni gad ma mada’nag. Boch i yad e baadag ni nge motoyil ngodad, ma boch e danga’. Machane, demtrug rogon, ma be tamilangnag e Thin rok Got rogon e ngongol nthingari dag e pi tapigpig rok Got. Be gaar: “Gubin ngiyal’ nthingar umogned e thin ngorad nib fel’ ma ba’ fan, ma thingar mu nanged rogon ni ngam pied e fulweg nib mat’aw ko tin ni ke fith be’ nge be’ ngomed.” (Kol. 4:6) Nap’an ni gad ra pi’ e fulweg ko n’en ni ke fith be’ ngodad ni ngad weliyed u murung’agen e re n’en ni ir e ke l’agan’dad ngay, ma thingar da rin’ed u “fithik’ e sumunguy nge ta’ fan” ni bochan e ba t’uf rodad e piin ni mmigid ngodad.​—1 Pet. 3:15, 16.

¹⁸ Ku gad ma dag e t’ufeg ko girdi’ ni yugu aram rogon ni bay boch i yad ni ma damumuw ngodad ma dab ra motoyilgad ngodad. Gad ma folwok rok Jesus nnap’an ni yog e girdi’ e “thin nib kireb ngak ma de ta’ puluwon ni thin nib kireb; ma faan nni gafgownag ma de gaar e bayi fulweg taban ngak e piin ni yad be gafgownag, machane me pag fan urngin ban’en ngak Got, ni ir fare Tapufthin nib mat’aw.” (1 Pet. 2:23) Demtrug ko gad bay u fithik’ e piin ni taareb e michan’ rodad ara yugu boch e girdi’, ma gad ma dag e sobut’an’ maku gad ma fol ko fare fonow ni be gaar: “Dab mu puluwniged e tagan, ara mpuluwniged e thin nib kireb; machane ngam fulweged taban nga ban’en nib fel’.”​—1 Pet. 3:8, 9. 

19. Mang kenggin e motochiyel ni pi’ Jesus u murung’agen rogon e ngongol ni ngaud daged ko pi toogor rodad?

¹⁹ Faanra i par e pi tapigpig rok Jehovah nib sobut’an’rad ma aram e yad be fol u reb e kenggin e motochiyel ni weliy Jesus nib ga’ fan. Nap’an fare Welthin ni pi’ u Daken e Burey, me yog ni gaar: “Kam rung’aged ni ka nog ni ke lunguy, Nge t’uf rom e pi tafager rom, ma ga fanenikay e pi toogor rom. Machane chiney e nggog ngomed ni nge lungug, Nge t’uf romed e pi toogor romed, mpied e meybil rok e piin ni yad be ngongliy e kireb ngomed, ya nge yog ni mmanged pi fak e Chitamangimed ni bay u tharmiy. Ya be mateg ramaen e yal’ rok nga daken e girdi’ nib tagan nge girdi’ nib fel’ ntaareb rogon, ma be pi’ e n’uw ngak e piin ni yad be rin’ e tin nib mat’aw nge piin ni yad be rin’ e tin nib kireb.” (Matt. 5:43-45) Arrogon, bochan ni gadad e pi tapigpig rok Got, ma thingar da filed rogon ni ‘nge t’uf rodad e pi toogor rodad’ ndemtrug rogon e ngongol ni yad ra dag ngodad.

20. Uw rogon ni kad nanged ni t’ufeg rodad ngak Got nge girdi’ e aram e n’en nra gagiyegnag urngin ban’en ni gad ra rin’ u lan e bin nib beech e fayleng? (Mu guy e sasing ni bay u tabolngin e re article ney.)

²⁰ Gubin ngiyal’ nthingari dag e pi tapigpig rok Jehovah nib t’uf Jehovah rorad nge piin ni mmigid ngorad. Bod ni, yugu aram rogon ni bay boch e girdi’ ndubrad ni ngar motoyilgad ko fare thin nib fel’ ni gad be machibnag, machane faanra t’uf e ayuw rorad maku gad ma ayuweged yad. I yoloy apostal Paul ni gaar: “Dab mu tay e malfith ngak be’ ke mus nre malfith ni nge aw nga puluwmed e nge bigimed me t’uf bigimed rok. En nra t’uf e girdi’ rok e ke fol ko fare Motochiyel. Fapi motochiyel e ke gaar, ‘Dab mu pirew be’ ni gathi mabgol rom; dab mu li’ be’ ngem’; dab mmoro’ro’; dab mu chogow’​—urngin e tiney nge tin ni ka bay e kan ulunguy nga fithik’ taareb e motochiyel ni be gaar, ‘Demtrug e gin’en ni ga bay riy ma nge t’uf rom e en nib migid ngom ni gowe gur.’ En nib t’uf rok e en nib migid ngak e ri dabiyog ni nge rin’ ban’en nib kireb ngak. Ra t’uf e girdi’ rodad, ma aram e kad folgad ko fare Motochiyel ni polo’.” (Rom. 13:8-10) Bochan ni gadad e Pi Mich Rok Jehovah ma gad ma dag e bin riyul’ e t’ufeg ni yugu aram rogon ni gad be par u ba fayleng ndaki taareban’ e girdi’ riy, mab gel e cham ni yibe tay riy, ma Satan e ir e be gagiyegnag. (1 John 5:19) Dariy e maruwar riy nu tomuren ni yira chuweg Satan, nge pi moonyan’ rok, nge piin ni yad ba muun ngak, ma gad ra par u fithik’ e t’ufeg. Rib gel e felfelan’ ni gad ra tay u nap’an nra par e re fayleng ney ni urngin e girdi’ riy ni yad be t’ufeg Got nge piin ni mmigid ngorad!

[Deer ni ngan pi’ e fulweg riy]