1, 2. Wai du Ziazia Kekeapai ayugo du nyemuse na nyanyakipaha?

NYEMUSE nga bangua sino Yekova Mbori. (1 Yo. 4:16) Gako bambata kusikusihe nangia Yesu, ko nga gu boro naraki na ko ngbangbaturũ yo tipa dungu agarã na ki wiriki wai ko aamangapai rogo nyemuse yo. (Koro. 1:15) Rogo ga Yesu raka yo naabaha, kodihe na ho ko adu ni auru kpotosende ane, ko ayuguhe nga ko ima gia tiko na gu nyemuse du ti Yekova Mbori, na ki wiriki gako nyemuse. Ngba gi gene re, ani ima rengba kadu na kido nga gu zogarago nika ngia ga Yekova na Yesu nika du na gu sino nga ga nyemuse.

² Ho i sana Yesu ni nga gini nga bakumba rugute, ko aya: “Mo kpí nyemu Gbia nga ga Mbori kpotoro yo dunduko, na mbisimoro dũ, na ga berã dũ. Gu rugute nga bakumba ha susi si nga gere. Kura ha wa kina ha nga gere, nga, mo nikpí nyemu kuaro wa mo akpi nyemu tiro.”—Mt. 22:37-39.

3. Da nga ‘kuarani’ watadu gaani murakporo?

³ Oni bi gupai nga Yesu amoi kpinyemu kurase ni uehe fuo kpinyemu Yekova. Gere nayugopa wai nyakipa yugo nyemuse rogo gaani pagume yo dunduko. Ono da nga ‘kuarani’ watadu murakporo? Kangia ani mangi rogatise, gaani murakporo nga  gaani badiarogatise. Na gu kura aboro nga gaani amurakporo nga agu aKristano du rogo dungurati, nga agu awirinarani ani airiso ndikidi Mbori na yo. Agu akurayo nga agu aboro ani agbia yo gene tungusapai yo. Agu aboro nairiso Yekova na kini pekefuo gu yugopai nga ga Wiriko, wai du si aida i yugu nyemuse fu gayo amurakporo?

4. Wai du rengbe aboro kadu na ngbarago rogo rogatise i ki vura ngia kpakpa aboro vurũ?

⁴ Yekova naasigira mburu bambata rogatise ni kusako Adamu na Eva na ki kpamia yo. Gupai ko aaidaha tipa yo nga i du na ngbarago, gayo ramukporo nyeanye kindi na i hiisi kpotosende na awiriyo. (Bam. P. 1:27, 28) Ono tie, gu samungu namangi kuti ga Yekova bakerepa gbia agbarasipa gu bambata rogatise re na ki ye na ingapai kurii aboro dunduko. (Rom. 5:12) Wa vura duhe wo, Ziazia Kekeapai nape gupai furani nga ani ima rengba ka gbia ngbarago rogo gaani rogatise yo. Si na wene arugute rogoho tipa rogatise bambiko si naye be Yekova nga gu boro nga Baenge pa rogatise.—Oni gedi 2 Timoteo 3:16, 17.

5. Wai du nyakipa nyemuse rogo rogatise yo?

⁵ Fugo Mbori nayugo gupai nga nyemuse nga guhe nazio boro kuti kurani, si na nyanyakipaha tipa aboro du na wene pagume dagbatiyo na ngbarago. Gere nga gu rengo du tipa rogatise. Gu mokedi nangia Pauro akepai fu dungurati nga: “Nyemuse nahi pai ni gbanga ha, ki du na weneringise; nyemuse akpi nga he te; nyemuse aabia nga tihe te, azaraga nga tihe te. Si amanga nga gu pai angba nga ya te, agbata nga gaha pai te, si aerã nga te, si aberã nga gbegberẽpai kuti boro te. Si angi nga mbiko irairapai te, ono si nangi mbiko rengo; Si nambu pa apai dunduko, si du gaha idapase, na gaha maabangirise na gaha hi pa apai anyasa nga te. Nyemuse adíga nga te.” (1 Kor. 13:4-8) Berãkurii agi afugo re na kini mangihe nika kiiso ngbarago rogo rogatise yo.

6, 7. (a) Ginipai Ziazia Kekeapai apehe tipa pa dukurii? (b) Wai du si aida gu kumbakudee nga Kristano mangi fu diako?

⁶ Nyemuse na nyanyakipaha mbiko gu pa dukurii du rogo ga Mbori mbakadapai yo. Pauro aya: “Mi nakpi nyemu oni ini he ya, ri akumba dunduko nga Kristo; ri de ki ngia kumba; ri Kristo ki ngia Mbori.”  (1 Kor. 11:3) Ono si aidanga boro mangisunge na gani pa dukurii ngba gbegberẽ gene te. Ni kpiapai, Yekova namangasunge na gako pagbia kurii Kristo ngba wene gene na Yesu na ngbarago tipa kadu tii gako pagbia. Yesu nabi padu Mbori kuriko na nyanyakipaha, si du ko aya ti ni wẽ: “Mi nakpi nyemu Buba.” (Yo. 14:31) Ka si adu nga Yekova amanganga sunge na gako pagbia ngba wene gene kurii Wiriko te, ka ko apenga gipai re te.

⁷ Wa vura duhe nga kumbakudee nga ri diako, Ziazia Kekeapai naruga ko nga ko ‘nifu irisa fu diako.’ (1 Pet. 3:7) Gene sa rengbe kumbakuadee ka fu irisa fu adiayo ngbaha nga berãpa agu apai du tipa adiayo na kini mbuyo i sia gupai ngbatiyo rogo kura apai yo. Nirengo, Fugo Mbori naya: “Akumba, oni kpí nyemu adiaroni, a wa Kristo akpi nyemu kanisa a, ki fu tiko tipa ha.” (Ef. 5:25) Nirengo, Yesu afu ungako tipa apefuoko. Ho kumbakudee awirika gu gene ni Yesu amangasunge na gako pagbia ngbaha, si nasaha taata fu diako ri kpinyemu ko, kini irisiko na kini ra fu gako pagbia.—Oni gedi Tito 2:3-5.

8. Wai du si aida airisi Yekova nibi akurayo aKristano?

⁸ Rogo zegino naabaha, dungu amirioni aboro nairiso Yekova na kini mangi dezirepai tipa rimoko gbiati gako ringbisapai. Wai du si aida airisi Yekova ni basasa nibi akurayo aidipase? Fugo Mbori nakaragapai nga: “Ani ki mangi gu pai amanga ngba angba fu aboro dunduko, fu kina agu yo gbe du ku idapase yo.” (Gara. 6:10; oni gedi ARomo 12:10.) Gu mokedi nangia Petero akepai ki ya: “Wa du wo du he oni azíasi mbisimoroni rogo gia sangba rengo dati wene kpi nyemu awirina, oni kpí nyemu akuaroni akpi kakaka kpotoroni yo.” Petero ape gupai fu akurako aidipase nga: “Oni du na bakere nyemuse dagba roni.”—1 Pet. 1:22; 4:8.

9, 10. Tipagine du du ga Mbori aboro na kodatise ti ni dagbatiyo?

⁹ Mbiko padu ani na bakere nyemuse tipa akuarani airisi Yekova, ani nasa gaani riigbu si du kia rogo zegino. Kurigure, mbiko ani nakpinyemu Yekova na kini irisi gako andiko, ko naundo rani na gu gako bakere ome du rogo zegino dunduko nga ziazia toro watadu gako zaza ome mangapai. Gipai re naundo rani ani gbia ngbarago ti gu kodatise nga ga awirina rogo zegino dunduko.—Oni gedi 1 Yoane 4:20, 21.

¹⁰ Pauro anyakasipa nyemuse dagba aKristano, ko ape gupai nga: “Oni úkadi ngbadu inapai, na weneringise, na umbasitise, na zera, na gbanga hipai; nihi pai fu akuaroni, nivu akuaroni, ka pai du bangiri gu boro kuti kura ni; wa Gbia avu roni, kina wo oni ka manga. Ku ri agi apai re dũ oni úkadi nyemuse, nga gu ũvodatise nga ga ziaziapai.” (Koro. 3:12-14) Nairiwo gu ngbarago du ani na ni nga nyemuse nga “gu ũvodatise nga ga ziaziapai” re ima maapai areme dagbarani zanga bipa gu ringara ani aye rogoho watadu ngbatunga rani!

11. Ginihe nayugo ga Yekova riigbu?

¹¹ Ndikidi nyemuse na kodatise nayugo ga Yekova amoyambu ni agu aboro namanga ndikidi pambori, bambiko Yesu aya: “Ka oni akpi nyemu akuaroni, si ka aboro ini ti ni dunduko ya gimi abawiriki nga oni.” (Yo. 13:34, 35) Na gu mokedi nangia Yoane aya: “Si nayugo awiri Mbori, na awiri bakitingbanga. Gu ni ka amanga nga rurupai ya ga Mbori ni nga ni te, na  gu ni adu nga nyemu wirinani ti ni ya. Bambiko gi nga gu pangbanga oni agi ho pai aenge ni re, ya nyemu akuarani du ti rani.” (1 Yo. 3:10, 11) Gu nyemuse nakoda aDezire Yekova nayugo gupai nga i nga ndikidi apefuo Kristo, nga agu aboro Mbori amangasunge na yo tipa i mangi gako ringbisapai ka tungusa wene pangbanga nga ga Kindo rogo zegino dunduko.—Mt. 24:14.

12, 13. Ginihe “bakere rimbasa aboro” amangaha awere, na ginipai nika manga barambeda kumbatayo fuyo?

¹² Dungu ga Yekova amoyambu nga papara “bakere rimbasa aboro . . . dagba rika aboro dunduko, na angbatunga yo, na aboro, na angbatunga afugo dunduko.” I ‘naru barangba mbatabakindo [nga ga Mbori], na barangba Wiri Kandoro [nga Yesu Kristo].’ Ada du nga yo? “Agi yo re nga agu yo naakuru rogo bakere gberãngbi, i azundu gayo aremu, ki vurusi he ni kure Wiri Kandoro” mbiko i na idapase kuti gu motumo tumorii nga ga Yesu. Agu aboro du rogo gu badona nga ga “bakere rimbasa” re i nakpinyemu Yekova na Wiriko na “i namanga pa [Mbori] uru na yuru.”—Yugo. 7:9, 14, 15.

¹³ Barambeda, Mbori nika gbarasa gi gbegberẽ zegino re ti regbo “bakere gberãngbi.” (Mt. 24:21; oni gedi Yeremaya 25:32, 33.) Mbiko ga Yekova nyemuse tipa gako amoyambu, ko nika bandayo ni badona na ki rimisi yo ku rogo vovo zegino. A wa i apehe bakuru kusayo agarã wa 2,000, Mbori “awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te.” Ya mo mo nakpinyemu ka raka rogo Paradizo fuo nyasa “bambata apai”?—Yugo. 21:4.

14. Bakio bakere rimbasa aboro awere wai?

¹⁴ Ho yangara arame atona ni rogo 1914, kina bete kutu amoyambu nga ga Yekova yo naadu rogo zegino dunduko. Mbiko gu nyemuse i adu na ni tipa gayo amurakporo, na wai ga Mbori toro aundo yo, gu umba badona nangia ga mbedimbedi aKristano re akpatagara kuti sunge tungusapa Kindo. Ni sangbana gipai re, areme, i nadungura gu bakere rimbasa aboro du na maabangirise ka raka auru kpotosende ane. Bangerani ima da ti 8,000,000 (amirioni muambe) rogo adungurati naima susa 115,400 rogo zegino dũ. Na ani nange kina kumbatayo. Ni kpiapai, aDezire bangeyo naima susa 275,500 azi bapatiza rogo gu garã nangia 2014, gure wa ka i ya aboro 5,300 aazio bapatiza rogo aposo dũ.

15. Oni sakingo pai tipa wai sunge tungusapai amanga awere.

¹⁵ Bakio wai sunge tungusapai andu awere ima iriwo. I nakusa gaani awaraga awere rogo afugo naima susa 700. Ngbaõbambu Sinziri nga gu magazini i akparakaha kisusi rogo zegino dunduko. I nakusa bangehe niima susa 52,000,000 (amirioni bisue bawe na ue) rogo adiwi ni basasa na rogo afugo nga 247. I ima kusà gu buku nga Gini Apai Nzunzu Ziazia Kekeapai Ayugoho? kisusi 200,000,000 (amirioni ue kama) rogo afugo naima susa 250.

16. Tipagine gu ga Yekova papara riigbu du auru kpotosende ane azugo ti ni rogo toro yo?

¹⁶ Gu iˈiriwo sonakumbatayo namanga areme re nga sangbana gaani idapase kuti Mbori gbiati ida kuti Ziazia Kekeapai nga Fugo Yekova gako toro adu kugiipa kehe. (1 Tesa. 2:13) Gu gbaarii akuraha nga, ga Yekova aboro nazugo rogo toro yo si ki vura du vurũ nga Satana nga “mbori gi zegino re” nasogo yo na kini sovura kutiyo.—2 Kor. 4:4.

17, 18. Gini bipai si aida ga Mbori amoyambu du na ni tipa agu aboro angianga aidipase ya?

¹⁷ Gini bipai si aida ga Yekova amoyambu du na ni tipa agu aboro airisongo ndikidi Mbori ya? Aboro naakaragapai ni bakiakia gene tungusapai, aguyo nadia rani kugume na ka aguyo adianga rani ya. Ono tie, ka gayo karagapai vura du kina wai vurũ, Fugo Mbori nayugo gupai si aida gako amoyambu mangihe. Si naya: “Oni fúra na undahe dedede, si ki hii na tikpo, si du oni ka ina ti ni ya wãi oni ka karaga ha fu akuaroni.” (Koro. 4:6) Ho ani akaragapai ni fu gu boro nasanahe tipa gaani maabangirise, ani karagapai funi “ni zera na irisa” mbiko gu nyemuse du ani na ni tipa gaani amurakporo.—1 Pet. 3:15.

¹⁸ Ani nakpinyemu gaani amurakporo zavura ho irakporo asoga gaani pangbanga ni na ki zingi kuti rani. Ani nawirika Yesu bambiko, ‘ho i aagberã ngbayo yo ni fu ko, ko aagberã nga ngbako yo fu yo te; ho ko aima ni, ko aaserã nga yo a te, ono ko afu tiko ku be gu ko [nga Yekova] nasapa ngbanga nzunzu.’ (1 Pet. 2:23) Singia ani na awirinarani nga aidipase watadu kura aboro, ani du na umbasitise na ki mangipai kuti gu arugute naya: “Ka oni káraga nga gbegberẽpai fu gbegberẽpai ya, na gberãngba yo fu gberãngba yo a ya; ono ku ba gure oni káraga kina maku.”—1 Pet. 3:8, 9.

19. Gini nyanyakipa rugute Yesu afuhe nibipa asogorani?

¹⁹ Ka ga Yekova amoyambu du na umbasitise, gure nga i namangapai kuti gu nyanyakipa rugute Yesu afuhe. Rogo gu gako tungusapai naadu rii bagangara yo, ko aya: “Oni agi he wa i agumba ha ya, ‘Mo kpí nyemu kuaro, ki sogo vuraro.’ Ono ya mi fu roni wẽ, Oni kpí nyemu avuraroni, ki kpari tipa aguyo narungosi roni; oni ki du ni awiri gu Baroni du ngbangbaturũ yo; bambiko ko nafu uru si kuru tipa agu yo nga gbegberẽ yo na agu yo nga wene yo a, ki kedi mai tipa ruru aboro na iraira yo a.” (Mt. 5:43-45) Nirengo, wangia ani ga Mbori moyambu, si naida ani wiriki ka ‘kpinyemu avurarani,’ ka i vura du na gbegberẽ bipai tipa rani vurũ.

20. Tipagine nyemuse tipa Mbori gbiati amurakporo nika hiiso vovo zegino ti ni? (Oni bi gu sura du ti tonatonaha.)

²⁰ Si naida ga Mbori aboro yuguhe rogo gayo sino raka yo na gayo bipai gbiati mangaapai naabaha nga i nakpinyemu Yekova na gayo amurakporo. Ni kpiapai, ka si du nga gu kura aboro adianga gu wene pangbanga nga ga Kindo kugume te, ani nayugo gaani nyemuse fuyo ho du yo ni rogo zingo. Gu mokedi nangia Pauro aya: “Ka oni du nga na ga boro bape wa sa ya, kina du mbisimo akuaroni ti roni: bambiko gu ni du mbisimo akurani ti ni ni digisi rugute. Bambiko gere, ‘Ka mo ra nga na dia boro ya, Ka mo imi nga boro ya, Ka mo di nga he ya, Ka mo kpi nga he ya,’ ka kura rugute du ho, i gbia ha kina ku rogo gi pai re nga, ‘Mbisimo akuaro du ti ro a wa du gamo.’ Nyemuse amanga nga gbegberẽpai fu kurani te; si du digisi nyemuse rugute ti ni.” (Rom. 13:8-10) Wangia ani aDezire Yekova, ani nayugo ndikidi nyemuse rogo gi zegino du na kparakaro re, na zuu rogo gi gbegberẽ zegino du kutiibe Satana re. (1 Yo. 5:19) Nirengo, nyemuse nika maapai rogo agu apai nikaa manga auru kpotosende ane tingbafuo dia yo Satana, gako adaimona gbiati agu aboro nasamungu kusayo. Nairiwo gu pa maku nika ngiaha re ho aboro dunduko auru kpotosende ane nika kpinyemu Yekova ni na gayo amurakporo!