1. ¿Kunatsa Jesusatakejj Diosan Reinopat parlañaw wali wakiskirïna sasin sistanjja?

JESUSAJJA jaqenakarojj Diosan Reinopat parlapunirïnwa. Uka toqet parlañaw jupatakejj wali wakiskirïnjja. Aka Oraqenkkäna ukhajja, 100 jila kutiw uka toqet parläna. Cheqas Diosan Reinopatpunwa jukʼamp parlirïna (Mateo 12:34 liytʼañataki).

2. Mateo 28:19, 20 qellqatan jikjjataski uka arunakjja, ¿qawqhanirus Jesusajj sispachäna, ukat kunatsa ukham sistanjja?

² Jesusajj jiwatat jaktkäna uka qhepatjja, 500 jaqenakaruw uñstäna (1 Cor. 15:6). Inas Jesusajj uka jaqenakar aka arunak sischïna: “Taqe akapachankir jaqenakar yatiyir sarapjjam” sasa. * Ukampis taqe jaqenakar yatiyañajj chʼamakïñapänwa. Ukatwa Jesusajj walja jaqenakar purtʼañatakejj tiempow munasini sasin  säna. Cheqas ‘akapachan tukusiñapkamaw’ yatiyasiñapäna. Ukhamajja, yatiyir sarasajj Jesusan arunakap phoqasiñapatakiw yanaptʼasktanjja (Mat. 28:19, 20).

3. ¿Kuna yanaptʼanaksa Diosajj yatiyañatak churawayistu?

³ Yatiyir sarapjjam sasin Jesusajj siskäna ukhajja, akham sasaw arkirinakapar säna: ‘Jumanakampïsktwa’ sasa (Mat. 28:20). Uka arunakarjamajja, Jesusan yanaptʼataw arkirinakapajj aka Oraqpachan yatiyapjjañapäna. Jichhürunakanjja, Jehová Diosajj ukhamarakiw ‘taqe askinak’ churasajj yanaptʼaskistu (Heb. 13:20, 21, MT). Aka yatichäwinjja, Diosajj kunanaksa yatiyañatakejj churawayistu, kunjamanakatsa yatiysna, jukʼamp sum yatiyañatakejj kunjamsa Diosajj wakichtʼawayistu ukwa uñjaskañäni. Kunanakampis aka qhepa patak maranakan yatiyawaytan ukanakat mä qawqha jichhajj uñjañäni.

4. Yanaptʼanak katoqawayktan ukanakajja, ¿kunatakis yanaptʼawayistu?

⁴ Diosan Reinopat yatiyañajj jathampi sasiwa sasaw Jesusajj säna (Mat. 13:18, 19). Mä yapuchirejja, janïr satantkasajj oraq wakichañatakejj kunayman herramientanakampiw yanaptʼasi. Diosan arunakap jaqenakan istʼañapatakejj ukhamarakiw herramientanakamp yanaptʼastanjja. Yatiyañatak herramientanaka, mä arunjja, yanaptʼanak Jesusaw churistu. Uka yanaptʼanakat yaqhepajj mä qawqha tiempokiw apnaqasiwayi, yaqhepasti jichhakamaw apnaqasiski. Ukampis taqe ukanakajj sum yatiyañatakiw yanaptʼawayistu.

5. Yatiyañataki tarjetanakajja, ¿kunjamänsa, ukat kunjamsa ukampejj yatiyapjjerïna?

⁵ Yatiyañataki tarjetanakampiw jilat kullakanakajj 1933 maran yatiyañ qalltapjjäna. Ukaw nayrïr kuti mistupki ukanakarus yanaptʼäna. Uka jiskʼa tarjetanakanjja, Bibliat apstʼat mä qawqha arunakaw qellqtʼatäna. Awisajja, machaq yatichäwinakan tarjetanakaw misturïna. ¿Kunjamsa uka tarjetanakampejj yatiyapjjerïna? Charles W. Erlenmeyer sat mä jilatajj tunka maranïkän ukhaw tarjetanakamp yatiyañ qalltäna, jupasti siwa: “‘¿Aka tarjeta liytʼasmati?’ sasaw parlañ qalltapjjerïta. Ukjjarusti, kuna qellqatanaktï jaytañatakejj apapkayäta uk churasaw sarjjapjjerïta” sasa.

6. ¿Kunjamsa yatiyañataki tarjetanakajj jilat kullakanakar yanaptʼawayi?

⁶ Yatiyañataki tarjetanakajj Diosan arunakap yatiyañan wal yanaptʼawayi. ¿Kunatsa ukham sistanjja? Janïr uka tarjetanakajj utjkäna ukhajja, yaqhep jilat kullakanakajj jaqenakar yatiyañ walsa munapkchïnjja, ajjsarayasiñat janiw kun sañs yatipkänti. Ukampis yaqhep jilat kullakanakajj jan ajjsartʼasaw kuntï yatipkäna uk mä qawqha minutonakan jaqenakar sapjjerïna. Jupanakasti awisajj jan sum amuytʼasaw kuns arsupjjerïna. Yatiyañataki tarjetanakajja, mä qawqha arunakampi wali qhana yatiyañatakiw jilat kullakanakar yanaptʼawayi.

7. Yatiyañataki tarjetampi yatiyañajja, ¿kunatsa awisajj chʼamakïnjja?

⁷ Yatiyañataki tarjetanakampi yatiyañajja awisajj chʼamakïnwa. ¿Kunatsa? Mä kullakajj akham siwa: “Awisajj jaqenakajj sapjjerïtuwa: ‘¿Tarjetajj kamsarakisti? ¿Janit juma pachpajj siskitasma?’” sasa. Yaqhepasti janiw liytʼañ puedipkänti, yaqhepasti tarjet katoqasisinjja, punkumpiw jistʼkatasinipjjerïna. Yaqhep jaqenakasti, Bibliat jan yatiñ munasajj tarjetjja chʼiyjapjjerïnwa. Ukhamäkchïna ukasa, jilat kullakanakajj walpun yatiyañataki tarjetanakampejj yanaptʼasiwayapjje, ukhamatarakwa Diosan Reinopat yatiyirit uñtʼatäpjjäna.

8. ¿Kunjamsa gramofononakampejj yatiyasirïna? (26 janankir foto uñjjattʼam.)

⁸ Khä 1930 ukhamarak 1940 maranakanjja,  gramófono sat mä aparatompiw Diosan arunakapajj yatiyasirakïna. Uka aparatompiw grabat discursonakajj jaqenakar istʼayasirïna. Uka gramofonorojj yaqhepajj Aarón sasaw sutichapjjäna, ¿kunatsa? Nayra tiemponjja Aarón chachaw Moisés lantejj parläna ukatwa ukham sutichapjjäna (Éxodo 4:14-16 liytʼañataki). Kunapachatï mä jaqejj istʼañ munäna ukhajja, mä jilatajj jan ukajj mä kullakajj gramofonor grabat mä discurso uchasaw istʼayirïna. Ukjjarusti mä qellqatamp jaytawayirïna. Awispachajja, familpachaw grabat discursonak istʼapjjerïna. 1934 maranjja, yatiyaskakiñatakejj Diosan markapaw gramofononak lurjjäna. Tiempompejja, 92 grabat discursonakaw utj-jjäna.

9. Gramofonomp yatiyasitapatjja, ¿kuna askinakas jikjjatasiwayi?

⁹ Mä kutejja, mä chachaw grabat mä discurso istʼäna, ukasti chuymaparupuniw purtʼäna. Ukatwa vecinonakapar istʼayañatakejj gramófono mä semanatak jilat kullakanakat maytʼasïna. Ukhamätapatjja, waljaniw Bibliat yateqasin bautisasipjjäna. Gramófono maytʼasir chachas bautisasjjarakïnwa. Qhepatsti, pä phuchanakapas misionerjamaw Diosar sirvjjapjjarakïna. Kunjamtï yatiyañataki tarjetanakajj walja jilat kullakanakar yatiyañ yanaptʼkänjja, ukhamarakiw gramófono aparatonakajj nayrïr kuti yatiyirinakarojj yanaptʼäna. Qhepatjja, Jehová Diosajj yatiyapjjañapatakejj servirinakapar yanaptʼaskakïnwa. ¿Kunjamsa? Diosan Arunakap Yatiyañatak Escuela sat tantachäwimpiw yanaptʼawayi.

10, 11. ¿Kunjamsa radiosa, periodicosa yatiyañatak yanaptʼawayistu, ukat kunatsa ukanak toqe yatiyañajj wali askïnjja?

¹⁰ Jesucriston yanaptʼatajja, Jehová Diosan servirinakapajj kunayman yanaptʼanakampiw jaqenakarojj yatiyawaytanjja. Kunapachatï Jehová Diosan Testigonakapajj jukʼanikïkayätan ukhaw uka yanaptʼanakajj yatiyañatak yanaptʼawayistu (Mateo 9:37 liytʼañataki). Uka yanaptʼanakat maynïrejja periodicönwa. Charles Taze Russell jilatajja, discursop periodiconakan mistuñapatakejj sapa semanaw encargat jilatanakar aptʼayirïna. Uka jilatanakasti, Canadá, Estados Unidos, Europa markanakaruw aptʼayapjjerïna, ukhamat periodiconakan qellqasiñapataki. 1913 marakamajja, Russell jilatan arstʼäwinakapajj 2.000 periodiconakanwa qellqasjjäna, uksti niya 15 millón jaqenakaw liytʼapjjarakïna.

¹¹ Diosan arunakap yatiyañataki yaqha yanaptʼajj radiönwa. Abril 16, 1922 maranwa Joseph F. Rutherford jilatajj nayrïr kuti radio toqejj arstʼäna. Jilatan discursopjja, 50.000 jaqenakaw istʼapjjäna. Mä qawqha tiempotjja, Diosan markapanjja mä radiow utj-jjäna. Uka radion nayrïr programapajj febrero 24, 1924 maranwa qalltäna. Yatiyañataki diciembre 1, 1924 maran mistkäna uka revistajj akham sänwa: “Radio toqe cheqa yatichäwinak yatiyasitapatjja, jichhakamajj waljaniw istʼawayapjje, ukhamarus ukatakejj janirakiw walja qollqejj munaskiti” sasa. Radiosa periodicosa, kawkhanakantï jukʼa yatiyirinakak utjkäna uka cheqanakan yatiyañatakiw yanaptʼawayistu.

12. 1) ¿Walja jaqenakajj sarnaqapki uka cheqanakan kawkhansa yatiyañajj gusttam? 2) Walja jaqenakajj sarnaqapki uka cheqanakan yatiyañatï ajjsaraystam ukhajja, ¿kunsa lurasma?

¹² Walja jaqenak sarnaqapki uka cheqanakan yatiyañaw jukʼamp jaqenakar yatiyañatakejj yanaptʼarakistu. Jiwasajja, kawkhanakarutï autonakasa, trenanakas puripki uka cheqanakanwa yatiytanjja, plazanakansa mercadonakansa, yaqha ukham cheqanakansa yatiyaraktanwa. Jumatï ukham cheqanakan yatiyañ  ajjsarsta ukhajja, ¿kunsa lurasma? Jehová Diosaruw yanaptʼa mayiñama, ukatsti tamanak tumptʼiri Angelo Manera jilatan arunakapatsa amuytʼañamarakiwa, jupasti sänwa: “Diosan arunakap kunayman toqet yatiyasajja, Jehová Diosar yaqha toqe servitaswa uñachtʼaytanjja. Ukatsti ukham yatiyasajj Diosar confiyatasa ukhamarak Jupar taqe chuyma serviñ munataswa uñachtʼayaraktanjja” sasa. Jilatajj saskakiwa: “Kunayman toqet yatiyasajja, Diosarojj ‘kuntï maykitäta uk luräwa’ siskiristsa ukhamawa” sasa. Cheqasa, kunayman toqenakat jan ajjsaras yatiytan ukhajja, Diosan suma serviripätaswa uñachtʼaytanjja, Juparus jukʼampiw confiyaraktanjja (2 Corintios 12:9, 10 liytʼañataki).

13. 1) ¿Kunatsa Internetankir jw.org cheqat jaqenakar parlañasa? 2) ¿Kunjamsa jumajj jw.org cheqampejj yatiyirïta?

¹³ Walja jilat kullakanakajja, Internetankir jw.org cheqatwa jaqenakarojj jukʼamp parlapjje. Ukatwa sapürojj 1.600.000 jaqenakajj uka cheqar mantapjje. Ukhamatwa Bibliat apstʼat qellqatanak 700 jila arunakat liytʼapjjaspa ukhamarak apaqapjjaspa. Kunjamtï nayrajj radio toqejj jaya cheqanakan jakasir jaqenakar cheqa yatichäwinakajj yatiyasirïkänjja, ukhamarakiw jichha tiemponjj Internet toqejj jaya cheqanakan jakasir jaqenakarojj yatiyasi.

14. 1) ¿Jilat kullakanakan kunan wakichtʼatäpjjañapas wakisïna? 2) ¿Kuna escuelas Bibliat suma yatichirïñatakejj yanaptʼawayistu?

¹⁴ Jehová Diosajj kuna yanapanaksa yatiyañatakejj churawayistu, kunjamanakat yatiyañatakis yanaptʼawayistu ukanakwa aka yatichäwin jichhakamajj yatjjatasktanjja. Ukampis janiw ukakïkiti, Diosajj markap toqew yatiyañatakejj wakichtʼawayistu. ¿Kunatsa ukajj wakisïna? Kunapachatï gramófono toqejj yatiyaskäna ukhajja, awisajj mä discurso istʼasajj jaqenakajj ‘janiw ukhamäkaspati’ sasaw sapjjerïna. Ukampis yaqhepajja, istʼasajj jukʼampiw Bibliat yatjjatañ munapjjarakïna. Ukhamasti suma yatichirïñatakisa, jan istʼañ munirinakar kunjam arusjjatañ yatiñatakisa jilat kullakanakarojj yatichasiñapänwa. Knorr jilatajja, qollan ajayun yanaptʼatäsinwa jilat kullakanakan wakichtʼatäpjjañap amuyäna. Ukatwa Diosan Arunakap Yatiyañatak Escuela tantachäwejj 1943 maran uttʼayasïna.

15. 1) Diosan Arunakap Yatiyañatak Escuelan arstʼirinakajja, ¿kunjamsa jikjjatasipjjäna? 2) Salmo 32:8 qellqatan jikjjataski uka arunakajja, ¿kunjamas jumar phoqasiwayi?

¹⁵ Jilat kullakanakasat waljanejja, jaqenak  nayraqatan arstʼañ wal ajjsarayasipjjerïna. Julio S. Ramu jilatajja, 1944 maranwa nayrïr kuti arstʼäna, jupajj akham siwa: “Arstʼäwijanjja Biblian qellqatäki uka Doeg chachatwa parlañajäna. Taqpach arstʼäwijanjja, pʼeqet kayukamaw ajjsarañat wal khatatiyäta, ukhampachas arstʼäwij tukuyayätwa” sasa. Diosan Arunakap Yatiyañatak Escuelanjja, jiskʼa wawanakas arstʼapjjarakiwa. Tamanak tumptʼirit 12 tʼaqan parltʼaniwayktan uka jilatajj akham saskakiwa: “Mä jiskʼa yoqall wawajja, nayrïri arstʼäwipan ajjsarañat niya jachirpachänwa. Ukhampachas arstʼäwipjja tukuyänwa” sasa. Yaqhep jilat kullakanakajj wali ajjsarirïpjjänwa, ukatwa taman arstʼañataki ampar loqtañsa, nayraqatar arstʼir makatañsa ajjsarayasipjjerïna. ¿Ukhaman uñjasirïtati? Ukhamächi ukhajja, jan ajjsarañatakejj Jehová Diosaruw yanaptʼa mayiñama. Jupasti kunjamtï Diosan Arunakap Yatiyañatak Escuelan nayrïr yateqerinakar yanaptʼkänjja ukhamarakiw yanaptʼätam (Salmo 32:8 liytʼañataki).

16. 1) ¿Kuna amtampis Galaad Escuelajj nayrajj apasïna? 2) ¿Kuna amtampis Galaad Escuelajj 2011 marat aksarojj apasjje?

¹⁶ Jehová Diosajj Galaad Escuela toqew servirinakapar yanaptʼawayaraki. Uka escuelajj yatiyir jukʼamp sarañ munapjjañapatakiw jilat kullakanakarojj yanaptʼi. Nayrïr escuelajj 1943 maranwa apasïna, ukhat jichhakamajj niya 8.500 jilat kullakanakaw ukar sarawayapjje, jupanakasti niya 170 markanakanwa misionerjam servisipki. 2011 maratjja, precursor especialanakaru, tamanak tumptʼirinakaru, betelitanakaru, jan ukajj uka escuelar janïr sarapki uka misioneronakaruw invittʼasjje.

17. Galaad Escuela utjatapatjja, ¿kuna askinakas jikjjatasiwayi?

¹⁷ Galaad Escuela utjatapatjja, ¿kuna askinakas jikjjatasiwayi? Japón markat amuytʼañäni. Agosto 1949 maranjja, janïraw tunka jilat kullakanakas uka markan utjkänti. Mä qawqha tiempotjja, Galaad Escuelat misturi 13 misioneronakaw Japón markar puripjjäna. Jupanakasti jilat kullakanakarojj yatiyapjjañapatakiw wal yanaptʼapjjäna. Jichhajja 216.000 jilat kullakanakaw uka markan utj-jje. Ukhamarus niya chikataniw precursorjam servisipki.

18. ¿Kuna yaqha escuelanakas Jehová Diosan markapan utji?

¹⁸ ¿Kuna yaqha escuelanakas Jehová Diosan markapan utji? Mä qawqhajj akanakawa: Diosan Arunakap Yatiyañatak Escuela, Precursoranakatak Escuela, Diosan Reinopat Yatiyirinakataki Escuela, Tamanak Tumptʼirinakataki ukat Warminakapampitak Escuela, Sucursal Sarayirinakataki ukat Warminakapampitak Escuela. Uka escuelanakaw walja jilat kullakanakarojj wakichtʼawayi, Jehová Diosar jukʼamp confiyañatakis yanaptʼawayaraki. Kunjamtï uñjtanjja, Jesusajj jichhürunakan wakichtʼaskakistuwa.

19. ¿Kunsa Russell jilatajj yatiyañ toqet amuyäna, ukat kunjamsa phoqasiwayi?

¹⁹ Diosan Reinopan uttʼayasitapatjja, pataka jila maranakaw pasawayjje. Ukhat jichhakamajj Jesucristo Reyisaw yatiyasiñapatak pʼeqtʼaski. 1916 maranjja, Charles Taze Russell jilatajj sänwa: “Diosan arunakapajj jukʼampiw yatiyasiski, jukʼampis yatiyasiskakiniwa. Jiwasaw ‘Diosan Reinopat suma yatiyäwinak’ aka Oraqpachan yatiyañasa” sasa (La fe en marcha, de A. H. Macmillan, 69 jana). Russell jilatajja, ‘Diosan arunakapajj aka Oraqpachanwa yatiyasini’ sasaw jan pächasis säna. Uka arunakapajj phoqasiwayapuniwa, jichhajj taqe cheqanwa yatiyasktanjja. Yatiyañataki kunayman yanaptʼanak churatapat Jehová Diosar walpun yuspärtanjja.