1. Yesu inianzire athi omubiiri w’erithulira? Soborera.

YESU inianzire erikania okwa Bwami bwa Nyamuhanga. Kilhangirikire ndeke omwa Biblia ngoku mwakania kutsibu oko Bwami kwilhaba eyindi myatsi. Mwabukaniako emirundi eyilhabire omu 100 omw’ithulira liwe. Kwenene, Obwami bwabya okwa muthima wiwe.—Soma Matayo 12:34.

2. Ni bangahi abangabya ib’ababyaho ekihano ekiri omu Matayo 28:19, 20 kikahebwa, kandi ekyo thukakiminya thuthi?

² Yesu abere abirilhubuka, mwahindana haghuma n’abandu abalhabire omwa 500 ab’abya iniakayasighira omubiiri w’erithulhughania Obwami. (1 Kor. 15:6) Ekyo kyangabya iky’ekiro alhaghira athi bathwale engulhu y’Obwami “okwa bihanda byosi.” Olhu ka lhwabya lhukwamirwa olhukalire kutsibu omwa buthuku obo! * Yesu mwakangania ngoku omubiiri munene oyu akendi syakolhwa erihikira ighuma n’omwa buthuku ‘bw’erihwererera ly’emighulhu,’ kandi kwenene ekyo kyabiribya. Wanganabya iwunemusangira  omw’iberererya ekihano ekyo.—Mt. 28:19, 20.

3. Ni bindu byahi bisathu eby’abirithuthokesya erithulira engulhu yuwene?

³ Yesu abere abiribaha omubiiri w’erithulira, mwabalhaghanisya athi akendi syabya haghuma nabu. (Mt. 28:20) Kwesi abya iyukendisyabya akasondolha omubiiri munene w’erithulira oyu. Kandi kwenene Nyamuhanga wethu abirithuha “emyatsi eyitholere” eyanga thuwathikya eriberererya omubiiri oyu. (Ebr. 13:20, 21) Omwa mwatsi ono thukendi kania okwa bindu bisathu eby’okwa myatsi eyitholere eyi: (1) ebya thwabirihebwa erikolesya omwa mubiiri oyu, (2) esyonzira esyothukakolesaya, (3) n’erithendekwa eryathukabana. Thuthatsuka erikania okwa bya thwabirithakolesya omwa myaka 100 eyamabirilhaba.

4. Busana naki thwabirikolesya ebindu muthina-muthina omw’ithulira lyethu?

⁴ Yesu mwasosekania “ekinywe ky’Obwami” ng’embuthu eyikaherawa omwa myanya muthina-muthina. (Mt. 13:18, 19) Omulimi angana kolesya ebindu muthina-muthina erithegheka eririma liwe athali ahera. Kuthya, ahabw’emyaka mingyi, Omukama wethu abirithuha ebya thwanga kolesya omw’ithegheka emithima y’abandu nuku b’angirire engulhu y’Obwami. Ebindi mubyakolesibwa ahabw’emyaka ng’ikumi, aliwe ebindi bikinakolha erihika na munabwire. Aliwe ebyosi binawithe ku byabirithuwathikya eryuwania emibere yethu y’erikangirirya ng’abathuliri. 

5. E testimony card yabya iniki, kandi iyikakolesibawa yithi?

⁵ Ekighuma ky’okwa bya wathikaya abangyi omwa mubiiri w’erithulira ekyatsuka omwa 1933, y’ekadi eyik’ahulhawa mwa testimony card. Ekadi eyi yabya y’esyoyinji isathu okw’ithanu, ikune omwatsi muke we Biblia. Ihakabya ihanemuhulhuka esyokadi nyihya-nyihya ikune owundi mwatsi. Isikikalire eriha y’omundu! C. W. Erlenmeyer abya w’emyaka ng’ikumi akatsuka erithulira omw’ikolesya ekadi eyi. Akabugha athi: “Eriha y’omundu, ithukatsuka thuthi, ‘Ngakusaba, thasoma ekadi eno.’ Omundu iniakabya abirisomayo, ithukamuha ekitabu neryo ithwaghenda.”

6. E testimony card muyawathikya yithi?

⁶ E testimony card yabya y’omughaso omwa syonzira nyingyi. Ng’eky’erileberyako habya ihane abandi bathuliri, nomubanabya n’omuhwa w’erithulira, ibakanakwa esisoni kutse ibabulha eby’eribugha. N’abandi ibo ibasi eribugha. Iniangana bwira omundu y’ebyosi eby’asi omwa budakika buke buyira, aliwe ebyo balyabugha ibikanabya isibithahika okwa muthima w’omuhulikiriri! Aliwe, e testimony card iyiri kw’ebinywe bike ebisombwerwe ndeke, ebiri mw’enzumwa, ekadi “iy’eyikabughira” omuthuliri.

7. Abandi mubabana bitsibuki omw’ikolesya ekadi?

⁷ Aliwe yanabya yiwithe ebitsibu byayu. Mulikyethu Grace A. Estep, oyuwana kolesiryeyo akabugha athi: “Omundu iniakana kubulhaya athi, ‘Mbwire, kuli mwatsiki? Obo siwanga kwama kya mbwira ebiriko?’” N’abandi isibalinasoma ebiriko. Kandi n’abandi ibakalengekanaya bathi ekadi ni yabu, neryo ibakakwiha yoko n’erikinga olhuyi. Imukabya mwameya oyuthanzire omwatsi wenyu, iniangan’imya ekadi iniasathangyayo. Nomubyanabya bithya, ekyo mukyabeghesya erithoka erihika okwa bandu n’eriyiminyikalya ng’abimaniri b’Obwami.

8. Soborera eturunu nga yabya yikakolha yithi. (Lebaya ekisasani ekiri okw’itsuka.)

⁸ Ekindi ekya wathikaya omwa myaka eya 1930 erihika omwa 1940 yabya iy’eradio  eyabya yikahulhwa mwa fonograph (eturunu). Abandi baghalha bethu mubahayo erina Haruni, kundi kutsibu-tsibu iy’eyikakanaya. (Soma Eriluayo 4:14-16.) Omwinye nyumba iniakabya amaligha, ibakamubughiraya omukania owali okwa radio eyo omwa syodakika ini n’embindi n’erimuha ebitabu. Ihakanayira eka eyosi iy’ikalha haghuma erihulikirira omukania owaseghemere okwa Biblia oyo! Omwa 1934 e Watch Tower Society muyatsuka erihulhukya esyoturunu esyo erikolesibwa omw’ithulira. Neryo mubahulhukya esyokanda esiri kw’emyatsi muthina-muthina nga 92.

9. Eturunu muyawathikya yithi?

⁹ Omulhume mughuma oyukahulhawa mwa Hillary Goslin abere abirihulikirira omukania okwa turunu eyo, mwasaba mulikyethu athi amubwekeyo habw’eyenga nguma nuku abataka biwe banga hulikirira engulhu y’Obwami. Mulikyethu abere akasubulha, mw’eya abandu abanzisibirwe ibanamulindire. Endambi muyahika abangyi ba kubo bamayihayo oku Yehova, na bali ba Hillary babiri mubakulha-kulhana, bamaghenda n’okwa sukuru ye Gileadi, bamathumwa omwa kindi kihugho. E testimony card ngoku yanawathikaya, n’eturunu nayu muyawathikya abathuliri eribeghera omubiiri w’erithulira. Aliwe endambi yangahikire Omwami iniahira ebinywe by’omwa bunu bwabu erilhabira omw’Ithendekero ly’Ekiteokrasi.

10, 11. Esyombapura sy’amakuru n’eradio mubyakolesibwa bithi erithulhughania ekwenene ye Biblia, kandi busana naki mubyakolha ndeke?

¹⁰ Erilhabira omwa busondoli bw’Omwami, abandu ba Nyamuhanga babirikolesya esyonzira muthina-muthina erithoka erihikya okwa bandu bangyi kw’engulhu yuwene. Eki ky’ekyabya kitholere, na kutsibu-tsibu omughulhu ‘abaghesi babya bake.’ (Soma Matayo 9:37.) Omw’itsuka ly’ekighonye ekya 20, esyombapura sy’amakuru musyakolesibwa kutsibu erithoka erihika okwa bandu bangyi omwa myanya eyiri mw’Abema ba Yehova bake. Obuli yenga, mughalha wethu Charles Taze Russell iniakathumira abimaniri b’eby’amakuru b’omwatsi, neryo nabu ibathumiragho ab’esyombapura sy’amakuru omwa Amerika, Kanada, ne Yuropu. Kikakanganibawa indi ahathwahikira omwa 1913, emikania ya Mughalha wethu Russell yabya iyamabirihika okwa bandu 15,000,000 erilhabira omwa syombapura sy’amakuru 2,000!

¹¹ Mughalha wethu Russell abere abiriholha, muhatsuka eyindi nzira y’erithulhughanirya mw’engulhu yuwene. Omwa Kwakani, biro 16, 1922, Mughalha wethu Joseph F. Rutherford mwalhabya omukania okwa radio amowibwa n’abandu nga 50,000 ababya batheghire eradio eyo. Omwa Kwakabiri, biro 24, 1924, ekithunga kya Yehova mukyakyungulha eradio eyabya yik’ahulhwa mwa WBBR. E Watch Tower eya 1 Okwerikuminibiri, 1924, yabere yikakania okwa yindi nzira y’erithulira eyi, muyabugha yithi: “Thuyikethere ngoku erikolesya eradio ni nzira eyanga kolesya sente nyike omw’ithulhughania engulhu kandi yikakolha ndeke okwa sindi nzira syosi.” Ng’esyombapura sy’amakuru, eradio ye WBBR muyawathikya erihika okwa bandu bangyi omwa myanya eyiri mw’abathuliri bake.

12. (a) Ni nzira syahi sy’erithulira ahakabya bandu bangyi esya wukatsemera? (b) Ni kyahi ekyanga thuwathikya erihwa mw’obuba bw’erithulira ahakabya bandu bangyi?

¹² Hathya omuwatho akahiribawa okw’ithulira ahakabya bandu bangyi: ng’ahakimana esyobbasi, ahak’imana esyotreyini, okwa sya ofisi, omwa syotawuni, n’omwa hithali. Hamabya ihane omubere w’erithulira owa wukayowa iniakukalire, iwangana lengekania  okwa bya mughalha wethu omulebererya w’omuthimbo ya Angelo Manera, Jr abugha okwa mughulhu babya bakathulira, athi: “Obuli mubere muhya-muhya w’erithulira ow’abya akabanika, ithukalhangiragho ng’enzira y’erikangania obuthaleghulha bwethu oku Yehova, erikakangania erikirirya lyethu, kandi ithunayitheghekire erimukolera omwa nzira yosi-yosi ey’anganza.” Erisangira omwa mubere mulebe w’erithulira, kandi kwilhabirirya owathethw’olhobera, likathuwathikaya erighumya erikirirya n’eriyikethera lyethu omu Yehova, ikyaleka ithwakulha bunyakirimu.—Soma 2 Abanya Korinto 12:9, 10.

13. Omuthahulha wethu we jw.org anemuwathikya athi, kandi ni kyahi ekyawalholireko wukakangirira abandu b’omuthahulha oyo?

¹³ Abathuliri bangyi banemukangirira abandu bangyi omuthahulha wethu owa jw.org, okwa bangana somera kutse erilhusyako ebitabu ebiseghemere okwa Biblia omwa mibughe eyilhabire omwa 700. Obuli kiro, abandu abalhabire omu 1,600,000 bo bakahika okwa muthahulha wethu we Intaneti oyu. Ngoku eradio yanabya yikakolha kera, munabwire omuthahulha wethu we Intaneti anemuhikya engulhu mbuya okwa bandu, n’omwa myanya eyiri hali.

14. Ni thendekwa lyahi erya bathuliri b’Obwami bayithagha, kandi ni sukuru yahi eyabiribawathikya eribya bathuliri babuya?

¹⁴ Thwamabirikania okwa bike by’okwa byathwabiri kolesya omw’ithulhughania engulhu. Thuthakania n’okw’ithendekwa erya thwabiribana. Thuthabugha thuthi omwa buthuku obo, omundu amakangania ngoku syathayitheghererya eby’amowa okwa turunu kutse erikangania kw’amanzisibwa n’eby’alyasoma okwa testimony card. Abathuliri babya batholere ibaminya ngoku bangawathikya omwa menge oyuthithayitheghererya kutse abakanzisibawa. Ahathe erithika-thika omulimu wa Nyamuhanga w’awathikaya mughalha wethu, Nathan H. Knorr erilhangira ekiyithawa ky’erithendeka abathuliri eribya bakangirirya babuya omwa mubiiri w’erithulira. Mubakolhaki? Omwa 1943 mubatsukisya Erithendekero ly’Omubiiri w’Ekiteokrasi. Esukuru eyi yabirithuwathikya eribya bakangirirya babuya.

15. (a) Ni byahi ebyabiribya okwa bandi bakalhabya emikania yabu omw’Ithendekero ly’Omubiiri w’Ekiteokrasi? (b) Erilhaghanisya lya Yehova eriri omwa Esyonyimbo 32:8 lyabiri kuberererako lithi?

¹⁵ Okwa bangyi, mukyathwalha buthuku eribeghera erikanirya embere sy’abandu. Julio S. Ramu ak’ibuka ekitsweka kiwe ky’erimbere omwa sukuru omwa 1944. Wunasi ngakyabya kikakania okuki? Oku Doegi, omulhume oyukanibweko mirundi ithanu misa omwa Biblia! Julio akabugha athi: “Amarwe waghe mwayihindangania, ebyalha byamatukumira, n’ameno amayihindangania,” kandi athi omukania  wiwe aby’atholere iniaseghemera okwa masako athano ayo masa. “Munalhabya omukania waghe w’omwa dakika isathu. Ebyo by’ebyanyibyako omurundi waghe w’erimbere erikanirya embere sy’abandu, aliwe munathalhuhirira.” Nomwakine indi sikyabya kyolho erilhabya omukania omwa sukuru eyi, n’abaana mub’ingira muyo. Mughalha wethu Angelo Manera, ak’ibuka ekyabya okwa mulhwana mughuma mulere akalhabya omukania wiwe w’erimbere. “Aby’akwire obuba bunene kutsibu indi abere akatsuka omukania wiwe, mwakania inianemulira. Aliwe kundi aby’anzire kutsibu erilhabyagho, mwaghunzagho iniane mulira.” Mbwino wukanasagha erisubirya kutse erisangira omwa mihindano busana n’esisoni kutse habw’erilemererwa lirebe? Saba Yehova akuwathikaye. Iniangana kuwathikya ngoku anawathikaya balikyethu b’erimbere omw’Ithendekero ly’Omubiiri w’Ekiteokrasi.—Soma Esyonyimbo 32:8.

16. Esukuru ye Gileadi yabiri wathikya yithi (a) omwa myaka eyihwere (b) eritsuka 2011?

¹⁶ Erithendekwa ly’abandu ba Yehova siriri omw’Ithendekero ly’Omubiiri w’Ekiteokrasi lisa. Hane ne Sukuru ye Gileadi eyabiriwathikya kutsibu balikyethu abamisani n’abandi. Omughuma w’okwa bakakangiriraya omwa sukuru eyo akabugha athi ekighendererwa kyayu “ly’erihira omwa bakayamuyo mw’omuhwa munene w’eryanza erisangira omw’ithulira.” E Gileadi yatsuka 1943, kandi yamabirilhaba mw’abandu abalhabire omu 8,500. Abakathendekerawa omwa sukuru eyi babirikolera omwa bihugho nga 170. Eritsuka omwa 2011, abakaya muyo b’abatemburi b’embaghane, abalebererya b’omuthimbo, Abanya Beteli, kutse abamisani abathe bathaghenda kuyo.

17. Esukuru ye Gileadi yabiriwathikya yithi?

¹⁷ Esukuru eyi yabiriwathikya yithi? Eky’erileberyako kyakino. Omwa Kwomunani 1949, e Japan yabya abathuliri ng’ikumi basa. Omwaka oyo abere akahwa, abamisani 13 erilhua omwa sukuru ye Gileadi babya ibabirithumwa e Japan. Munabwire omwa Japan muli abathuliri 216,000, kandi hakuhi 42 okwa buli 100 ni batemburi!

18. Ahulha esindi sukuru esyabiriwathikya abathuliri erikulha-kulhana bunyakirimu.

¹⁸ Esindi sukuru, ng’Esukuru y’Omubiiri w’Obwami, Esukuru y’Abatemburi, Esukuru y’Abathuliri b’Obwami, Esukuru y’Abalebererya b’Omuthimbo na Bakali Babu, n’Esukuru ey’Abali okw’Akathunga ak’Omuthahulha n’Abakali Babu, syabiri leka abandu ba Yehova ib’ongera omuhwa wabu n’obunyakirimu bwabu. Ahathe erithika-thika, Omwami akinalholha embere erithendeka abandu biwe!

19. Charles Taze Russell mwasangwa abugha athiki okwa mubiiri w’erithulira, kandi kyabiribererera kithi?

¹⁹ Hamabirilhaba myaka 100 ah’Obwami bukanathatsukira. Omukama wethu, Yesu Kristo anemulholha embere erithuthendeka. Omwa 1916, mughalha wethu Charles Taze Russell athali aholha mwasangwa akania okw’ikanyirira ly’omubiiri w’erithulira. Mwabwira oyo babya bakakolha nayu athi: “Omubiiri anemw’ongera, kandi akendi lholha embere eriyongera, kundi hali omubiiri w’erithulha ‘engulhu y’Obwami’ omwa kihugho kyosi.” (Omwa kitabu kya A. H. Macmillan ekya Faith on the March, olhup. 69) Kwenene aby’ahikire! Kandi ka thukasima Nyamuhanga w’obuholho eribya iniane muthuthokesya omubiiri ow’akatsemesaya oyu! Kwenene, akathuha “emyatsi yosi eyitholere” eyathukayithagha erikolha erisonda liwe!