1. Con importante e trabou di predica tabata pa Hesus? Splica.

HESUS tabata gusta papia tocante e Reino di Dios. Segun Bijbel, el a papia mas tocante e Reino cu cualkier otro tema. El a referi na dje mas cu 100 biaha durante su sirbishi. E Reino tabatin un luga special den su curason.—Lesa Mateo 12:34.

2. Cuanto hende tabata presente ora Hesus a duna e mandato na Mateo 28:19 y 20, y dicon nos por saca e conclusion ey?

² Un poco despues di su resureccion, Hesus a reuni cu mas cu 500 hende cu lo por a bira predicador di Reino. (1 Cor. 15:6) Kisas ta na e momento ey el a duna e mandato pa hiba e mensahe di Reino na “hende di tur nacion.” Esey tabata un trabou inmenso pa e tempo ey. * Hesus a predeci cu nan lo haci e trabou ey “te na conclusion di e era aki.” Ora abo participa den e trabou di predica awe, bo ta yuda cumpli cu e profecia ey.—Mat. 28:19, 20.

3. Den ki tres manera Dios a ekipa nos pa predica e bon noticia?

 ³ Despues cu Hesus a duna e mandato pa predica, el a priminti su siguidornan: “Mi ta cu boso.” (Mat. 28:20) Pues, ta Hesus mes lo dirigi e inmenso trabou di predica aki. Y nos Dios a ekipa nos cu “tur cos bon” pa yuda nos cumpli cu e mandato ey. (Heb. 13:20, 21) Den e articulo aki nos lo considera tres di e bon cosnan aki: (1) e hermentnan cu nos a haya, (2) e metodonan cu nos a uza, y (3) e entrenamento cu nos a haya. Prome, laga nos considera algun di e hermentnan cu nos a uza durante e ultimo 100 añanan.

4. Dicon nos a uza diferente tipo di herment den nos trabou di predica?

⁴ Hesus a compara “e palabra di Reino” cu un simia cu a ser sembra den diferente tipo di tera. (Mat. 13:18, 19) Un hardinero por uza diferente tipo di herment pa prepara su hardin pa e planta simia. Asina tambe, a traves di añanan, nos Rey a duna nos hermentnan cu nos por uza pa prepara e curason di miyones di hende pa ricibi e mensahe di Reino. Algun herment tabata util kisas pa un decada so, mientras cu otronan ainda ta util. Pero tur e hermentnan aki, di un of otro manera, a yuda nos mehora nos habilidad como predicador.

5. Kico tabata un carchi di testimonio, y con nos tabata uz’e?

⁵ Na aña 1933, publicadornan di Reino a cuminsa uza e carchi di testimonio, un herment cu a yuda hopi hende cuminsa predica. E carchi tabata 7,6 pa 12,7 centimeter grandi y e tabatin un mensahe cortico di Bijbel riba dje. De bes en cuando tabata sali un carchi nobo cu un mensahe nobo. E presentacion tabata simpel. C. W. Erlenmeyer tabatin mas o menos dies aña ora el a cuminsa uza e carchi di testimonio pa predica. El a conta: “Nos tabata uza e siguiente introduccion: ‘Bo por lesa e carchi aki por fabor?’ Despues cu e doño di cas lesa e carchi, nos tabata ofrece literatura y bay.”

6. Con e carchi di testimonio a yuda e publicadornan?

⁶ E carchi di testimonio a yuda nos den varios manera. Aunke algun publicador tabatin hopi gana di participa den e trabou di predica, nan tabata timido y nan no tabata sa kico pa bisa. Otronan tabatin hopi di bisa. Nan tabata bisa e doño di cas tur loke nan tabata sa den un par di minuut, pero no ta semper nan presentacion tabata cu tacto. En cambio, cu algun palabra bon scogi, tabata comosifuera e carchi di testimonio tabata papia pa e publicador.

7. Ki desafionan algun ruman a enfrenta ora di uza e carchinan?

⁷ Claro cu tabatin desafionan. Grace A. Estep, kende ta un Testigo pa hopi aña, ta conta: “Tin ora e hendenan tabata puntra nos: ‘Wel, kico e ta bisa? Bo no por djis bisa mi?’” Pio ainda, algun doño di cas no por a lesa loke tabatin riba e carchi. Otronan tabata pensa cu e carchi ta pa nan, y nan tabata tum’e for di e publicador y cera e porta. Tin biaha e doño di cas tabata asina contra cu e tabata kibra e carchi na pida pida. A pesar di esey, e carchinan aki tabata yuda nos rumannan custumbra di papia cu hende y identifica nan mes abiertamente como representante di e Reino.

8. Splica con nos rumannan tabata uza e tocadisco portatil. (Wak e prome plachi.)

⁸ Un otro herment cu nos rumannan  tabata uza durante e decada di 1930 y na cuminsamento di e decada di 1940 tabata e tocadisco portatil. Algun ruman tabata yama e tocadisco portatil aki Aaron pasobra e tabata papia pa nan. (Lesa Exodo 4:14-16.) Cu permiso di e doño di cas, e publicador tabata toca un discurso biblico di cuater minuut y mey, y despues e tabata ofrece algun literatura. Tin biaha, henter famia tabata bin hunto pa scucha e grabacion di un discurso biblico. Na aña 1934, e Sociedad Watch Tower a cuminsa traha tocadisco portatil specialmente pa e trabou di predica. Cu tempo, e rumannan a graba mas cu 92 discurso.

9. Con efectivo e tocadisco portatil tabata?

⁹ Despues di a scucha un di e discursonan biblico, un doño di cas cu yama Hillary Goslin a haya permiso di e publicador pa fia e tocadisco portatil pa un siman pa laga su bisiñanan tambe scucha e mensahe di Reino. Ora e publicador a bin bek, el a haya varios personanan nobo interesa cu tabata ward’e. Cu tempo, un gran cantidad di e hendenan ey a dedica nan bida na Jehova, y Hillary su dos yiu muhernan a asisti na e Scol di Galaad y nan a haya asignacion pa bay otro pais. Mescos cu e carchinan di testimonio, e tocadisco portatil a yuda hopi hende cuminsa predica. Despues, e Rey lo a pone palabra den nan boca mediante e Scol di Ministerio Teocratico.

10, 11. Con nos rumannan a uza corant y radio pa plama berdadnan biblico, y dicon e metodonan ey tabata efectivo?

¹⁰ Bou di guia di e Rey, Dios su pueblo a uza diferente metodo tambe pa alcansa mas tanto hende posibel cu e bon noticia. Esaki tabata hopi importante specialmente ora e trahadornan tabata poco. (Lesa Mateo 9:37.) Na comienso di siglo 20, a uza corant pa alcansa un publico grandi den areanan caminda no tabatin hopi testigo di Jehova. Tur siman Charles Taze Russell tabata manda un discurso biblico pa un agencia di noticia. Despues, nan tabata manda su discurso pa corantnan na Merca, Canada y Europa. Segun calculo, pa aña 1913, e discursonan di ruman Russell a alcansa mas o menos 15.000.000 hende pa medio di 2.000 corant.

¹¹ Despues cu ruman Russell a muri, nos rumannan a cuminsa uza un otro metodo efectivo pa plama e bon noticia. Riba 16 di april di aña 1922, Joseph F. Rutherford a duna su prome discurso transmiti via radio na un publico di mas o menos 50.000 hende. Despues, nos a cuminsa uza nos mes radioemisora, cu yama WBBR, y el a bay den aire dia 24 di februari di aña 1924. Encuanto e metodo di predica aki e revista The Watch Tower di 1 di december 1924 a bisa: “Nos ta kere cu te aworaki radio ta e manera mas economico y efectivo pa transmiti e mensahe di e berdad.” Mescos cu corant, radio a yuda nos pa alcansa un publico grandi den areanan caminda no tabatin hopi publicador di Reino ta biba.

12. (a) Ki faceta di predicacion na luganan publico abo ta gusta mas? (b) Kico por yuda nos vence cualkier miedo cu nos por tin ora di predica den luganan publico?

¹² Awor nos ta pone mas y mas enfasis riba predicacion na luganan publico: na parada di bus, stacion di trein, parkeerplaats, plasa publico y mercado. Si bo ta bira nervioso ora di participa den un di e facetanan di sirbishi aki, lo ta bon pa bo haci oracion y medita riba e  comentario di Angelo Manera, Jr., kende ta un superintendente biahero pa hopi tempo. El a bisa: “Nos ta mira cada faceta nobo di sirbishi como un otro manera pa sirbi Jehova, un otro manera pa mustra cu nos ta leal na dje, un otro prueba di nos integridad, y nos ta ansioso pa mustra cu nos ta dispuesto pa sirbie den cualkier manera cu e pidi nos.” Ora nos participa den un faceta nobo di sirbishi, kisas uno cu nos no ta custumbra cu ne, esey lo yuda nos haya mas confianza y fe den Jehova, y nos lo bira mihor predicador.—Lesa 2 Corintionan 12:9, 10.

13. Dicon nos website, jw.org, ta un metodo efectivo pa predica, y ki experencia abo tin den uza e website?

¹³ Hopi publicador ta gusta conta hende tocante nos website, jw.org, unda nan por lesa y download literatura biblico den mas cu 700 idioma. Tur dia, mas cu 1,6 miyon hende ta bishita nos website. Mescos cu loke nos a logra cu e radio den pasado, awe nos website ta yuda nos alcansa hende cu e bon noticia, hasta den areanan aisla.

14. Ki entrenamento publicadornan di Reino tabatin mester, y cua scol a yuda nan bira maestronan efectivo?

¹⁴ Nos a trata algun di e herment- y metodonan cu nos rumannan a uza pa plama e bon noticia. Awor, kico di e entrenamento cu nos a haya? Imagina bo mes cu e doño di cas no tabata di acuerdo cu loke el a scucha riba e tocadisco portatil. Of un otro hende a mustra interes den loke el a lesa riba e carchi di testimonio. E publicadornan mester a siña con pa uza tacto pa contesta hende cu tabata bin cu obhecion y con pa yuda hende di curason sincero. Sin duda, Dios su spirito santo a yuda Nathan H. Knorr mira e necesidad di entrena publicadornan pa uza e don di papia den sirbishi. Kico tabata e solucion? E Scol di Ministerio Teocratico. E scol aki a cuminsa na aña 1943 y a yuda nos bira maestronan efectivo.

15. (a) Ki experencia algun studiante tabatin ora nan a duna nan prome parti den e Scol di Ministerio Teocratico? (b) Con e promesa di Jehova na Salmo 32:8 a cumpli den bo caso?

¹⁵ Hopi hende mester a custumbra di papia dilanti di un publico. Julio S. Ramu ta corda ora el a duna su prome discurso den e scol na aña 1944. Di kico e mester a papia? E mester a  papia tocante Doeg, un homber menciona den solamente cinco versiculo di Bijbel. Pues, Julio mester a basa henter su discurso riba e cinco versiculonan ey. El a bisa: “Mi rudianan y mannan tabata tembla, y mi djentenan tabata bati riba otro. Mi a duna mi discurso den tres minuut. Esey tabata mi prome experencia papiando riba plataforma, pero mi no a entrega.” Muchanan tambe tabata participa den e scol, aunke esey no tabata facil pa nan. Angelo Manera, cu nos a menciona anteriormente, ta corda kico a pasa ora un mucha homber a duna su prome parti. El a bisa: “E tabata asina nervioso cu ora el a cuminsa papia, el a cuminsa yora. Pero debi cu e tabata determina pa duna su discurso, el a dun’e full na yoramento.” Abo a yega di keda sin duna comentario of participa den reunionnan pa motibo di timidez of algun limitacion? Pidi Jehova yuda bo vence bo miedo. Lo bo mira cu e lo yuda bo mescos cu el a yuda e prome studiantenan di e Scol di Ministerio Teocratico cu nos a caba di menciona.—Lesa Salmo 32:8.

16. Kico tabata e proposito di e Scol di Galaad (a) den pasado y (b) desde aña 2011?

¹⁶ E entrenamento cu Jehova ta duna su pueblo no ta limita na e Scol di Ministerio Teocratico. Hopi ruman a haya entrenamento mediante e Scol di Galaad. Segun un instructor, un di e metanan di e scol aki ta “pa inculca den e studiantenan un deseo mas intenso pa participa den e trabou di predica.” E scol di Galaad a cuminsa na aña 1943, y for di e tempo ey te cu awor mas cu 8.500 ruman a haya entrenamento na e scol ey. Misioneronan entrena na Galaad a sirbi den mas cu 170 pais. Desde aña 2011, e scol aki ta solamente pa rumannan cu ya caba ta den un of otro forma di sirbishi special di tempo completo, manera pionero special, superintendente di circuito, betelita y misionero cu ta traha den sirbishi di veld pero cu no a bay e scol ainda.

17. Con efectivo e entrenamento di Galaad ta?

¹⁷ E entrenamento aki tabata efectivo? Laga nos wak un ehempel. Na augustus 1949, tabatin menos cu 10 publicador na Japon. Na final di e aña ey, 13 misionero cu a bay e Scol di Galaad tabata predica na Japon. Awe, tin mas cu 216.000 publicador na Japon, y casi 42 porciento di nan ta traha como pionero.

18. Menciona algun di e otro scolnan cu tin.

¹⁸ Tin varios otro scol tambe, manera Scol di Ministerio di Reino, Scol di Sirbishi di Pionero, Scol pa Predicador di Reino, Scol pa Superintendente di Circuito y nan Esposa y Scol pa Miembronan di Comite di Sucursal y nan Esposa. E scolnan aki a yuda entrena rumannan y fortalece nan fe. Sin duda, e Rey ta sigui entrena su subditonan.

19. Kico Ruman Russell a bisa tocante e trabou di predica, y dicon nos por bisa cu e tabatin rason?

¹⁹ Mas cu 100 aña a pasa desde cu e Reino di Dios a ser estableci. Nos Rey, Hesucristo, ta sigui entrena nos. Un poco prome cu su morto na aña 1916, Charles Taze Russell tabata sigur cu e trabou di predica e bon noticia lo yega na tur parti di mundo. El a bisa un bon amigo di dje: “E trabou ta creciendo hopi lihe, y e lo sigui crece, pasobra e trabou di predica e ‘evangelio di e reino’ mester tuma luga rond mundo.” (Faith on the March, skirbi pa A. H. Macmillan, pag. 69) E tabatin rason. Y esta agradecido nos ta cu e Dios di paz ta sigui ekipa nos pa e trabou di mas dushi cu tin! En berdad, e ta duna nos “tur cos bon” cu nos tin mester pa haci su boluntad.