1. Waswe, preaching waka hem important long Jesus? Minim kam.

JESUS laekem tumas for story abaotem Kingdom bilong God. Taem Jesus stap long earth, main samting wea hem story abaotem nao hem Kingdom. Taem Jesus duim ministry bilong hem, hem story abaotem Kingdom winim 100 taem. Kingdom hem barava important long Jesus.—Readim Matthew 12:34.

2. Haomas pipol nao herem komand wea Jesus talem long Matthew 28:19, 20, and why nao iumi sei olsem? (Lukim footnote.)

² No longtaem bihaen Jesus laef bak, hem story witim wanfala grup bilong winim 500 pipol. (1 Cor. 15:6) Maet long datfala taem nao Jesus talem komand for preach long “pipol long evri kantri.” Hem bae no isi for duim datfala waka. * Jesus sei preaching waka bae gohed for longfala taem go kasem “taem wea world hem finis.” Taem iu duim preaching waka distaem, iu wanfala  long olketa wea mekem datfala profesi kamap tru.—Matt. 28:19, 20.

3. Wanem nao thrifala samting wea helpem iumi for preachim gud nius?

³ Bihaen Jesus talem datfala komand for preach, hem sei: “Bae mi stap witim iufala.” (Matt. 28:20) So Jesus promisim olketa disaepol bilong hem, hem bae sapotim olketa long preaching waka and helpem olketa for preach long full world. Jehovah sapotim iumi tu. Hem givim iumi “evri gud samting” for helpem iumi duim preaching waka. (Heb. 13:20, 21) Long disfala study, iumi bae storyim thrifala gud samting hia wea Jehovah givim long iumi: (1) olketa tul wea God givim long iumi, (2) olketa difren wei wea iumi duim datfala waka, and (3) training wea iumi kasem. Firstaem, iumi bae story abaotem samfala tul wea iumi iusim for duim preaching waka insaed 100 year wea go pas finis.

4. Long wanem wei nao olketa difren tul wea iumi iusim helpem iumi long preaching waka?

⁴ Jesus sei Kingdom message hem olsem olketa seed wea man plantim long olketa difren kaen graon. (Matt. 13:18, 19) Man wea wakem garden savve iusim olketa difren kaen tul for redyim graon for plantim seed. Long sem wei tu, King bilong iumi givim iumi olketa tul for iusim for redyim heart bilong pipol for acceptim message abaotem Kingdom. Samfala tul hia pipol bilong God iusim for lelebet taem nomoa, and samfala nara tul iumi gohed for iusim distaem. Bat evri tul hia helpem iumi for kamap gud long wei for preach long pipol.

5. Wanem nao testimony card, and hao nao olketa pablisa iusim datwan?

⁵ Long 1933, olketa pablisa start for iusim olketa testimony card. Hem wanfala tul wea helpem staka for duim preaching waka. Testimony card hem smol card wea garem shortfala message from Bible wea hem isi for pipol minim. Samfala taem, organization bilong God givimaot olketa niu card wea garem difren message. Taem Brata Erlenmeyer hem samting olsem ten year, hem nao firstaem wea hem iusim testimony card. Hem sei: “For startim story mifala savve sei, ‘Plis, iu savve readim disfala card?’ Bihaen haosholder readim datfala card, mifala savve offerim samfala pablikeson and then mifala go long nara haos.”

6. Hao nao testimony card helpem olketa pablisa for preach?

⁶ Testimony card helpem olketa pablisa long olketa difren wei. Olsem example, nomata samfala barava laek for duim preaching waka, olketa savve shame and no savve wanem for talem long pipol. Olketa nara pablisa no fraet. Olketa savve storyim staka samting long haosholder insaed tu-thri minute nomoa, bat staka taem olketa savve tok stret tumas. Testimony card helpem evri pablisa for preachim message wea klia and isi for pipol minim.

7. Wanem nao happen taem samfala pablisa iusim testimony card?

⁷ Samfala samting no isi tu taem olketa pablisa iusim testimony card. Sista Grace Estep sei: “Samfala taem, olketa haosholder savve sei long mifala, ‘Wanem nao card ia talem? Iu talem kam nomoa.’” And tu, samfala haosholder no savve readim message long testimony card. Samfala haosholder tekem card and satem door. From samfala les long message wea olketa pablisa preachim, olketa brekem datfala card. Nomata olsem, testimony card helpem olketa pablisa for preach long olketa narawan abaotem Kingdom.

8. Hao nao olketa pablisa iusim phonograph machine? (Lukim piksa long start bilong study.)

 ⁸ Nara tul wea olketa pablisa iusim bihaen long year 1930, hem olketa phonograph machine. Samfala Witness nemim datfala machine Aaron bikos hem nao story for olketa. (Readim Exodus 4:14-16.) Sapos haosholder willing for lisin, pablisa bae pleim wanfala short Bible tok long phonograph and then hem offerim samfala pablikeson. Samfala taem, full famili nao savve sidaon and lisin long wanfala tok! Long 1934, Watch Tower Society start for wakem olketa phonograph wea olketa pablisa savve iusim long ministry. Gogo, olketa brata recordim 92-fala difren tok for olketa pablisa pleim long phonograph.

9. Hao nao phonograph helpem staka pablisa for preach?

⁹ Taem Hillary Goslin herem wanfala long olketa tok hia, hem askem pablisa for hem iusim phonograph for wanfala week mekem hem savve helpem olketa neiba bilong hem for savve long message abaotem Kingdom. Datwan mekem samfala pipol for interest long truth and gogo olketa baptaes. Bihaen, tufala gele bilong Brata Goslin attendim Gilead Skul and kamap olketa missionary. Phonograph helpem staka pablisa for duim preaching waka. Gogo, King bilong iumi iusim Theocratic Ministry Skul for trainim pipol bilong hem for kamap olketa gudfala teacher.

10, 11. Long wanem wei nao pipol bilong God iusim radio and olketa niuspepa for preach long pipol, and wanem gud samting nao kamaot from datwan?

¹⁰ King bilong iumi Jesus helpem pipol bilong God for iusim olketa difren wei for preach mekem olketa preach long staka pipol. Hem important for iusim olketa difren wei hia long taem wea no staka wakaman stap for preach. (Readim Matthew 9:37.) Olsem example, long bifor pipol bilong God iusim olketa niuspepa for preachim gud nius. Evri week, Brata Russell savve sendem wanfala Bible tok long wanfala company wea kolektem nius. Then company hia sendem tok bilong hem go long pipol wea printim olketa niuspepa long Canada, Europe, and United States. Long 1913, samting olsem 2,000 difren niuspepa company printim olketa tok bilong Brata Russell, and klosap 15,000,000 pipol nao readim olketa tok hia!

¹¹ Pipol bilong Jehovah iusim tu radio for preach long staka pipol. Long April 16, 1922, Brata Rutherford iusim radio for givim wanfala tok, and samting olsem 50,000 pipol nao herem datfala tok. Datwan hem wanfala long olketa taem wea hem iusim radio for givim olketa tok bilong hem. Then long February 24, 1924, iumi start for iusim radio station bilong iumi wea iumi kolem WBBR, for preachim gud nius. The Watch Tower bilong December 1, 1924, sei: “Long tingting bilong mifala, wei for iusim radio hem barava gudfala wei wea no expensive tumas for helpem staka pipol herem olketa tru samting long Bible.” Olketa niuspepa and radio helpem pipol bilong God for preach long staka pipol long olketa ples wea tu-thri pablisa nomoa stap.

12. (a) Wanem kaen wei for duim pablik witnessing nao iu laek for duim? (b) Wanem nao savve helpem iumi for no fraet for duim pablik witnessing?

¹² Pablik witnessing hem gudfala wei for preach long pipol distaem. Pipol bilong Jehovah waka hard distaem for preach long pipol long olketa bas stop, train station, car park, and tu, long olketa pablik ples, and long olketa market. Waswe, iu fraet for  duim pablik witnessing? Sapos olsem, prea long Jehovah for helpem iu, and ting raonem samting wea Brata Manera wea hem wanfala traveling overseer hem talem. Hem sei: “Mifala ting long eni niu wei for preach hem olsem nara wei for duim wanem Jehovah laekem, and for showimaot mifala faithful long hem nomata samfala taem hem no isi, and mifala laekem tumas for showimaot mifala willing for duim eni samting wea hem laekem.” Taem iumi followim olketa niu wei for preach nomata iumi fraet, iumi strongim wei wea iumi trustim Jehovah and datwan helpem iumi for kamap gud long wei for duim preaching waka.—Readim 2 Corinth 12:9, 10.

13. Why nao hem gud for story long pipol abaotem website bilong iumi, and wanem gud samting nao iu kasem taem iu duim olsem?

¹³ Staka pablisa story long pipol abaotem website bilong iumi, jw.org, wea pipol savve readim and daonlodim olketa Bible pablikeson bilong iumi long winim 700 languis. Evriday, winim 1.6 million pipol go long website bilong iumi. Long bifor, pipol bilong God iusim radio for preach long pipol wea stap long olketa farawe ples. Distaem, website bilong iumi helpem pipol long staka ples for savve long gud nius.

14. Wanem kaen training nao olketa pablisa needim, and wanem skul nao helpem olketa for kamap gudfala teacher?

¹⁴ Olketa tul and olketa difren wei for preach wea iumi storyim kam finis helpem staka pipol for herem gud nius. Nomata olsem, olketa pablisa long datfala taem needim training long hao for preach. Olsem example, samfala taem haosholder no agree long wanem hem herem long phonograph. Samfala haosholder interest and laek for savve long samfala samting moa. Olketa pablisa needim training for savve hao for story gud long pipol wea no agree long message wea olketa herem and hao for kamap gudfala teacher. Holy spirit helpem Brata Knorr for luksavve hem important for olketa pablisa kasem training for helpem olketa savve hao for story long pipol. So long 1943, olketa kongregeson start for garem Theocratic Ministry Skul. Disfala skul helpem evriwan for kamap gudfala teacher.

15. (a) Hao nao feeling bilong samfala wea joinim Theocratic Ministry Skul bifor? (b) Hao nao Jehovah helpem iu olsem hem promisim long Psalm 32:8?

¹⁵ Long bifor, staka brata no getius long  wei for story front long staka pipol. Brata Ramu tingim yet firstfala tok wea hem duim long 1944. Hem duim tok abaotem wanfala man long Bible wea nem bilong hem Doeg. Hem sei: “Mi fraet and barava seksek tumas.” Hem sei moa: “Datwan nao firstfala tok wea mi givim, bat mi no givap.” Olketa pikinini tu givim tok long skul nomata hem no isi for olketa. Brata Manera tingim yet samting wea happen taem wanfala young wan duim first tok bilong hem. Hem sei: “From hem seksek tumas, hem start for krae taem hem duim tok bilong hem. Bat from hem laekem tumas for givim tok, hem krae go kasem taem hem finisim tok bilong hem.” Maet iu no givim koment long taem bilong meeting or iu no joinim Theocratic Ministry Skul bikos iu man for shame or iu tingse hem hard for iu duim datwan. Sapos olsem, askem Jehovah for helpem iu for no fraet for duim olketa samting hia. Hem bae helpem iu olsem hem helpem olketa wea joinim Theocratic Ministry Skul bifor.—Readim Psalm 32:8.

16. Wanem nao goal bilong Gilead Skul (a) long bifor and (b) start long 2011?

¹⁶ Organization bilong God iusim tu Gilead Skul for trainim olketa brata and sista. Wanfala goal bilong datfala skul hem for helpem olketa student for barava tinghae long preaching waka. Gilead Skul hem start long 1943, and start kam long datfala taem winim 8,500 student kasem training, and olketa kasem assignment for go long 170 kantri. Start long 2011, olketa wea kasem invitation for attendim Gilead hem olketa spesol pioneer, traveling overseer, Bethelite, and olketa field missionary wea no go yet long Gilead Skul.

17. Wanem gud samting nao kamaot from Gilead Skul?

¹⁷ Staka gud samting kamaot from training wea olketa brata and sista kasem long Gilead Skul. Tingim gud samting wea happen long Japan. Long August 1949, samting olsem tenfala pablisa nomoa stap long Japan. Bat long end bilong 1949, 13-fala missionary duim preaching waka witim olketa pablisa long there. Distaem, Japan garem samting olsem 216,000 pablisa, and klosap haf long olketa pablisa duim pioneer waka!

18. Wanem nao samfala nara skul wea iumi garem?

¹⁸ Iumi garem staka nara skul tu, olsem Kingdom Ministry Skul, Pioneer Service Skul, Skul for Olketa Kingdom Pablisa, Skul for Olketa Circuit Overseer and Waef, and Skul for Olketa Branch Komiti Member and Waef. Olketa brata and sista kasem gudfala training long olketa skul hia, and datwan strongim faith bilong olketa. Tru tumas, Jesus gohed for trainim staka pipol!

19. Wanem nao Brata Russell talem abaotem preaching waka wea happen distaem?

¹⁹ Kingdom bilong God hem rul for winim 100 year finis. King bilong iumi, Jesus Christ, hem gohed for leadim preaching waka. Long 1916, Brata Russell luksavve pipol bilong God bae preachim gud nius evriwea long world. Hem sei: “Preaching waka hem gohed gud, and iumi bae preach long staka pipol moa bikos iumi mas preach abaotem kingdom evriwea long world.” (Faith on the March, long page 69, wea A. H. Macmillan raetem) Samting wea hem talem hem happen distaem! Iumi thankiu long Jehovah, God wea givim peace, wea givim iumi evri samting wea iumi needim for duim wanem hem laekem!