1. Yesuusi sabbakate looso mageeshshi geeshsha kaffi asse laꞌꞌanno? Xawisi.

 YESUUSI uullate noo waro Maganu Mangistere hasaawa baxanno. Qullaawu Maxaafi kulanno garinni, isi wolu coyinni roorse rosiisinohu Maganu Mangistereeti; soqqanshosi yannara mite 100 hige tenne Mangistere coyiꞌrino. Ee, Maganu Mangiste Yesuusira loworeeti!—Maatewoosi 12:34 nabbawi. a

2. Yesuusi Maatewoosi 28:19, 20 noo hajajo uyi wote mageeshshi manni nooha ikkara dandaanno? Hatto yineemmo gede assannonkeri maati?

² Yesuusi reyotenni kaihunni shiima yanna gedensaanni, 500 saꞌꞌanno manni ledo xaadino. (1 Qor. 15:6) Isi Maganu Mangiste sokka ‘duuchante daga mannira’ iillishshe yitanno hajajo uyinohu hakkawote ikkikki digatino; hatte yannara konne looso loosa shota diꞌꞌikkitino! b Majjaha  ikkinokkihu kuni loosi “alamete gumulo geeshsha” loosamannota Yesuusi balaxe coyiꞌrino; isi yiinori qole woꞌmanni no. Atino tini masaalo woꞌmitanno gede kaaꞌlitanni noottoti egennantinote.—Mat. 28:19, 20.

3. Dancha duduwo sabbankeemmo gede uyinoonninke hajajo wonshate kaaꞌlitinonketi sase coyibba hiikkuriiti?

³ Yesuusi sabbakke yitanno hajajo uyihu gedensaanni harunsaanosira, “Ani . . . kiꞌne ledo noommo” yee qaale eino. (Mat. 28:20) Konni daafira kuni halaꞌladu sabbakate loosi loosamannohu isi aanno biddishshi garinniiti. Qoleno, Maganinke konne looso loosate hasiisannonkeha “dancha coye baalanka” wonshannonke. (Ibi. 13:20, 21) Konni birxichira, tenne dancha coyibba giddo sase laꞌneemmo; insano: (1) horoonsiꞌnoommo uduunne, (2) sabbankoommo doogga, hattono (3) uyinoonninke qajeelshaati. Hanni umo, saihu 100 diri giddo horoonsiꞌnoommoha mito uduunne laꞌno.

4. Sabbakate loosinkera duuchu gari uduunne horoonsiꞌnoommohu mayiraati?

⁴ Yesuusi “Maganu Mangiste qaale” duuchu gari bushshira winxoonni wixi ledo heewisiisino. (Mat. 13:18, 19) Mittu gawartichi wixa wixiꞌrara albaanni baatto babbaxxino uduunninni shaqqishanno. Hatteente gede, saꞌu dirra giddo Nugusinke Yesuusi lowo miliyoone ikkanno manni Maganu Mangiste sokka adhanno gede wodanansa qixxeessate kaaꞌlanno uduunne uyinonke. Mito uduunne harancho yanna geeshsha horoonsiꞌnoommo; mito kayinni xaa geeshshano horoonsiꞌnanni heeꞌnoommo. Ikkirono, kuni baalunku uduunni sabbakate dandoo lossiꞌneemmo gede kaaꞌlinonke.

5. Farciꞌrate horoonsiꞌnanni kaarde yinanniti maati? Ise horoonsiꞌnannihu hiittoonniiti?

⁵ Batinyu roduuwi soqqansho hanaffanno gede kaaꞌlinohu mittu uduunnichi, farciꞌrate kaaꞌlitanno kaardeeti; Mangistete halashshaano tenne kaarde horoonsiꞌra hanaffinohu 1933⁠nniiti. Tini kaarde soqqanshote rippoorte qolate horoonsiꞌneemmo woraqati geeshsha ikkitannotenna harancho Qullaawu Maxaafi sokka amaddinote. Yannate kiiro, haaro sokka amaddinoti wole hattoo kaarde fultanno. Tenne kaarde egensiisate coyiꞌnanniri batiꞌre diyaanno! Charlesi W. Erlenimeyeri kaardetenni soqqama hanafi yannara dirisi tonne meddi yaanno. Isi togo yee xawisino: “Rosaminohu hasaawu bitimi, ‘Tenne kaarde oohe nabbawattona?’ yaannoho. Qaete anni kaarde nabbawihu gedensaanni, borro uyine haꞌneemmo.”

6. Farciꞌrate horoonsiꞌnanni kaarde kaaꞌlitinohu hiittoonniiti?

⁶ Farciꞌrate horoonsiꞌnanni kaarde wole kaaꞌlono afidhino. Mite halashshaano sabbakate lowo hasatto noonsaha ikkirono, waajjitanno hattono mayitannoro diaffino. Wolootu qolte lowore coyidhanno. Kuri roduuwi shiimu daqiiqi giddo affinore baalankare qaete annira kultanno; kayinni coyidhannori woꞌmanka wote hayyo nooho yaa diꞌꞌikkino! Haranchonna kaajja gede doorantino qaalla amaddinoti farciꞌrate horoonsiꞌnanni kaarde kayinni halashshaanchu bayicho “coyidhanno.”

7. Mitu roduuwi kaarde horoonsidhe farcidhanna mayi tuncu yiinonsa?

⁷ Ikkollana, hatte yannara qarra ikkannori dino yaa diꞌꞌikkino. Halaalu giddo lowo diro keeshshitinoti Gireesi A. Istepi yinanni rodoo hakkawarita qaagge togo yitino: “Mito wote [qaete annuwa], ‘Mayi daafira kultannote? Kaarde yitannore mayira kiꞌne umiꞌne dikultinannie?’ yite xaꞌmitannonke.” Hakkiinni saeno, mite qaete annuwa kaardete aana noo borro nabbawa didandiitanno. Wolootu qolte kaarde adhite gatisidhara uyinoonninsaha lawannonsa daafira halashshaanote anganni adhite kaꞌe saanqa cufidhanno. Sokkanke giwannohu mitu manni qole, kaarde haare daddare hunanno. Ikkollana, farciꞌrate horoonsiꞌnanni kaarde roduuwinke olliichinsara farciꞌra rossanno gedenna Maganu Mangiste sawaakoota ikkansa baxxite leeltanno gede assitino.

8. Anga adhine haꞌra dandiinanni fonogiraafe horoonsiꞌnoonni gara xawisi. (Umi misile lai.)

⁸ Sabbakate loosira 1930⁠nni hananfe horoonsiꞌnoommohu wolu uduunnichi fonogiraafe yinanniho; anga adhine haꞌra dandiinannite tenne  maashinera mitu roduuwi Aarooni yite suꞌma fushshitino; korkaatuno insa riqibbe sokka kultannoti iseeti. (Wol. 4:14; Wolapho 4:15, 16 nabbawi. c) Halashshaano qaete anna fajjishiishidhu gedensaanni, shoole daqiiqanna daratu geeshsha keeshshitannota qaddaꞌnoonnita Qullaawu Maxaafi lallawo fante macciishshiishshanno; hakkiinni borro eltanno. Mito wote qaddaꞌnoonnita Qullaawu Maxaafi sokka macciishshate maate gudisidhe gamba yitanno! Agarooshshu Shae Maamari 1934⁠nni, roorenkanni soqqanshote horoonsiꞌrate injiitanno fonogiraafe qixxeessa hanafi. Xaphoomunni, 92 addi addi hajore kultanno sokka qaddaꞌne qixxeessinoonni.

9. Fonogiraafe loosinkera kaaꞌlitinohu hiittoonniiti?

⁹ Hilaarii Gosiliini yinannihu mittu qaete anni qaddaꞌnoonnita Qullaawu Maxaafi lallawo macciishshihu gedensaanni, olliisi manni Maganu Mangiste sokka macciishshanno gede assate mitte lamala geeshsha fonogiraafe argisasira halashshaancho xaꞌmiꞌri. Halashshaanchu galagale higanno wote, hasatto noohu wolu haammatu manni iso agaranni no. Yannate gedensaanni insa giddo gamu heeshshonsa Yihowara sayisse uyitino; qoleno Hilaariri lame seenni Giliyaadi Rosi Minira eihu gedensaanni wole gobbara soqqamara sonkoonni. Farciꞌrate horoonsiꞌnanni kaarde gede, fonogiraafeno batinyu roduuwi soqqansho hanaffanno gede kaaꞌlitino. Gedensoonni qole, Nugusu Yesuusi Tiokiraasennihu Soqqanshote Rosi Mini widoonni qajeelsha uyinonsa.

10, 11. Qullaawu Maxaafi halaale mannaho duduwate gaazeexxanna raadoone horoonsiꞌnoommohu hiittoonniiti? Tini doogga dancha guma abbitinohu mayiraati?

¹⁰ Nugusinke Yesuusi aanno biddishshi garinni, Maganu soqqamaano dandaaminsa deerrinni lowo mannira sabbakate kaaꞌlitannota batinye doogga horoonsidhino. Hakko iso ‘loosaasine shiima’ ikkite noo waro tini lowo geeshsha hasiissinote. (Maatewoosi 9:37 nabbawi. d) Lemiikki sani hanafora, Yihowa soqqamaasine kiiro shiima ikkitino qooxeessira heeꞌrannoha lowo manna kaaꞌlate gaazeexxa horoonsiꞌnoommo. Roduu Raasili lamalate kiiro Qullaawu Maxaafi sokka, gaazeexa qixxeessitanno dirijjitera soyanno. Hakkiinni hatti dirijjite hattee sokka Ameerikaho, Kanaadahonna Awuroppaho qixxaawanno gaazeexira fultanno gede sokkanno. Roduu Raasili lallawo 1913 geeshsha, 2,000 ikkitanno gaazeexxara attamante 15,000,000 meddi yaanno mannira iillitino!

¹¹ Roduu Raasili reyihu gedensaanni, dancha duduwo duduwate baasa kaaꞌlitinota wole doogo horoonsiꞌra hananfoommo. Dotteessa 16, 1922⁠nni Jooseefi F. Raazerfordi mito 50,000 ikkanno mannira mite yee raadoonetenni lallawo shiqishino. Hakkiinni Ammajje 24, 1924⁠nni WBBR yinanniha uminkeha raadoonete xaawa horoonsiꞌra hananfummo. Tenne haaro sabbakate doogo lainohunni Sadaasa 1, 1924 Agarooshshu Shae togo yitino: “Raadoone kageeshsha horoonsiꞌnoonni doogga baalantenni roore woxe qoxxowate kaaꞌlitannotenna halaalu sokka mannaho iillishate roore injiitannote.” Gaazeexu gede, raadooneno Mangistete halashshaano ajjino qooxeessira batinyu mannira sokkanke iillishate kaaꞌlitino.

12. (a) Gudumaaleho soqqammeemmo soqqansho giddo ate roore baxissannoheti hiitteeti? (b) Gudumaaleho sabbaka waajjishannonkeha ikkiro, waajjanke qeeꞌlate mayi kaaꞌlankera dandaanno?

¹² Xaa yannara gudumaaleho yaano otobise uurritannowa, baaburu xaawira, makeena uurrisiꞌnanni bayicho, hattono dikkote farciꞌrate roore illachinshanni heeꞌnoommo. Togoowa sabbaka waajjishannoheha ikkiro, lowo diro songuwa towaatanni soqqaminohu Anjeelo Maneera yinanni rodii yiinore huuccattotenni hedi; isi togo yiino: “Mitte mittenta haaro sabbakate hayyo Yihowara soqqammeemmo  doogo, isira ammanammoommore ikkanke leellinsheemmo doogo, mishsho noonkekkire ikkanke buuxinseemmo doogonna isi hasiꞌranno gari baalunkunni soqqama hasiꞌneemmota leellinsheemmo doogo ikkitino gede assine laꞌneemmo.” Waajjanke qeeꞌline ikkinummota ikkine haaro sabbakate hayyo horoonsiꞌranke, Yihowa albinni roore addaxxineemmo gedenna ayyaanaamittetenni lophineemmo gede kaaꞌlitannonke.—2 Qorontoosi 12:9, 10⁠b nabbawi. e

13. jw.org yinanni webisayitenke aana maa afiꞌra dandiinanni? Mannu webisayitenke horoonsiꞌranno gede assite afiꞌrootto woꞌnaalsha kuli.

¹³ Batinye halashshaano mannaho jw.org yinanni webisayitenke leellisha baxxanno; tenne webisayite aana 700 saꞌꞌanno afiinni Qullaawu Maxaafi aana xintantino borro nabbawanna dirrisiꞌra dandiinanni. Barru baala, 1.6 miliyoone ikkanno manni webisayitenke faꞌne laꞌꞌanno. Alba raadoone kaaꞌlitunkente gede, xaa yannara webisayitenke fafo gobbuwara noo manni nafa gatikki halaale afanno gede kaaꞌlitanni no.

14. Mangistete halashshaanora hiittoo qajeelshi hasiisinonsa? Rosiisate qajeeltinore ikkitanno gede kaaꞌlinonsa rosi mini hiikkonneeti?

¹⁴ Dancha duduwo duduwate horoonsiꞌnoommo uduunninna doogga giddo gama aleenni laꞌnoommo. Ikkina, uyinoonninke qajeelshi nooyya? Hanni, qaete anni qaddaꞌnoonni lallawo fonogiraafetenni macciishshe kae sokkanke giwinohu gede woy farciꞌrate horoonsiꞌnanni kaarde aana noo borro nabbawe kae hasatto noosita leellishinohu gede assite hedi. Halashshaano sokkanke giwanno manna amaddanno garanna danchu wodani noonsare rosiissanno gara afa hasiissannonsa. Roduu Naataani H. Noori halashshaano coyiꞌrate dandoonsa soqqanshote horoonsidhanno gede qajeelsha afiꞌra hasiissannonsata huwatanno gede Maganu ayyaani kaaꞌlinosi. Tennera maa assiniyya? Songuwate giddo 1943⁠nni kayinse Tiokiraasenniha Soqqanshote Rosi Mine hananfoonni. Kuni rosu mini rosiisate qajeelloommore ikkineemmo gede kaaꞌlinonke.

15. (a) Mite halashshaanora Tiokiraasennihu Soqqanshote Rosi Mine kifile shiqishshu yannara mayi macciishshaminonsa? (b) Faarso 32:8 aana Yihowa coyiꞌrino qaali heeshshokki giddo woꞌminohu hiittoonniiti?

¹⁵ Batinyu roduuwira mannu albaanni fule coyiꞌra rosate lowo yanna hasiissinonsa. Huuliyo S. Raamu yinanni rodii 1944⁠nni mite yee kifile shiqishi yanna qaaganno. Kifilesi cuꞌmo maati? Qullaawu Maxaafi giddo onte bayicho calla kulloonni manchire yaano Doyiqi daafira kultannote. Huuliyo togo yiino: “Hatte yannara, gulubbaꞌya qece yitino, angaꞌya huxidhino, hattono hinkoꞌya qece yitino.” Qoleno, kifilesi hattee onte qummeeshshuwa calla horoonsiꞌre shiqisha hasiissinosita coyiꞌrino. Lede togo yiino: “Kifileꞌya sasu  daqiiqinni shiqishoommo. Mite yee madirake fuloommohu hakko barraati; ikkirono lallawo shiqisha diaguroommo.” Qaaqquulluno konni rosi mine qajeelanno; ikkollana mitu qaaqquullira songote giddo kifile shiqisha shota ikkitinonsakki woti no. Aleenni kullihu Anjeelo Maneera, mittu shiimu qaaqqi mite yee rosaanote kifile shiqishi wote ikkinore qaage togo yiino: “Kifile shiqisha hanafiti lowo geeshsha waajjino daafira wiꞌla hanafi. Ikkollana kifilesi ikkita ikke shiqishate murciꞌrino daafira wiꞌlanni heeꞌrenni shiqishe gudino.” Atino waajjite woy wolu korkaatinni songote giddo dawaro qola woy wolu garinni beeqqa hoogootto? Yihowa waajja qeeꞌlatto gede kaaꞌlahera huucciꞌri. Isi albire Tiokiraasennihu Soqqanshote Rosi Mini rosaano kaaꞌlinonte gede ateno kaaꞌlannohe.—Faarso 32:8 nabbawi. f

16. Giliyaadi Rosi Mini (a) alba (b) 2011 kawa maaho kaaꞌlanni keeshshino?

¹⁶ Yihowa dagasi qajeelsannohu Tiokiraasennihu Soqqanshote Rosi Mini widoonni calla diꞌꞌikkino. Misiyoonenna wole roduuwa Giliyaadi Rosi Mini baasa kaaꞌlinonsa. Mittu konni rosi mini rosiisaanchi coyiꞌrinonte gede kuni rosu mini qixxaawinohu “rosaano wongeelu loosira noonsa hasatto lexxitanno gede assateeti.” Giliyaadi Rosi Mini hanafinohu 1943⁠nniiti; hakkuyinku hanafe 8,500 saꞌanno rosaano konni rosi mine qajeeltino. Giliyaadi Rosi Mine qajeeltino misiyoone mite 170 ikkitanno gobbuwara soqqantino. Ikkollana, 2011 kawa konni rosi minira eꞌannori baxxitinote woꞌma yanna soqqansho giddo noore calla ikkitanno gede assinoonni; insano: baxxitino suwisaano, songuwa towaattannori, Beeteelete soqqantannori, woy Giliyaadi Rosi Mine qajeeltinokki misiyooneeti.

17. 17. Giliyaadi Rosi Mini mayi guma abbino?

¹⁷ Kuni qajeelshi mayi guma abbino? Hanni mitto lawishsha laꞌno. Woxawaajje 1949⁠nni Jaappaanete gobbara tonne meddi yitanno halashshaano calla no. Hakkuyi diri jeefora, Giliyaadi Rosi Mine qajeeltinori 13 misiyoone hatte gobbara diinaggaabbe sabbaka hanaffu. Xaa yannara, Jaappaanete 216,000 meddi yitanno halashshaano no; kuri giddo xibbunni 42 anga ikkitannori suwisaanote!

18. Ikkadda Yihowa Farciꞌraasine ayyaanaamittetenni lophitanno gede kaaꞌlitinoti wole rosu minna hiikkuriiti?

¹⁸ Wole rosu minnano lawishshaho, Mangistete Soqqansho Rosi Mini, Suwisaanote Soqqansho Rosi Mini, Maganu Mangiste Sawaakooti Rosi Mini, Woradu Aliidi Laꞌꞌaanoranna Minaamuwinsara Qixxaawino Rosi Mini, hattono Sinu Biiro Komite Miillaranna Minaamuwinsara Qixxaawino Rosi Mini, Yihowa daga ayyaanaamittetenni lophitannonna guma laaltannore ikkitanno gede kaaꞌlino. Ee, Nugusu Yesuusi mannasi qajeelsa diagurino!

19. Charlesi Teezi Raasili sabbakate loosinke daafira mayino? Tini woꞌmitinohu hiittoonniiti?

¹⁹ Maganu Mangiste xintantunku 100 diro aleenni ikkitanno yanna saꞌino. Nugusinke Yesuusi Kiristoosi ninke qajeelsa diaguranno. Roduu Charlesi Teezi Raasili 1916⁠nni reyara albaanni, sabbakate loosi mageeshshi geeshsha halaꞌle loosamannoro seedise hedino. Isi ledosi loosanno rodiira togo yiino: “Loosu rahe halaꞌlanni no; qoleno, ‘mangistete wongeela’ sabbakate looso alame woꞌmate aana loosa hasiissanno daafira, albillitteno halaꞌlanni haꞌranno.” (A. H. Makimiilaani qixxeessinoha, Feezi Oni ze Marchi, qool. 69) Isi yiinori garankolla! Salaamete Magani konni kaajju loosira hasiisannore baalankare wonshannonke daafira galanteemmosi! Ee, isi fajjosi assate hasiisannonkeha “dancha coye baalanka” aannonke!