1. Mationan-o kaimportante kan Jesus an pagsangyaw nga buruhaton? Isaysay.

NALIPAY gud hi Jesus ha pag-istorya mahitungod ha Ginhadian han Dios. Sumala ha Biblia, mas agsob niya ito ig-istorya kay han iba nga topiko—gin-unabi niya ito hin sobra 100 ka beses ha iya ministeryo. Importante gud kan Jesus an Ginhadian.—Basaha an Mateo 12:34.

2. Pira an posible nga nakabati han iginhatag an sugo ha Mateo 28:19, 20, ngan kay ano nga makakasiring kita hito?

² Waray pag-iha katapos banhawon hi Jesus, nakigkita hiya ha sobra 500 nga potensyal nga magwarali han Ginhadian. (1 Cor. 15:6) Posible nga hito nga higayon iginhatag niya an sugo nga isangyaw an mensahe han Ginhadian ha “mga tawo han ngatanan nga nasud”—usa nga daku gud nga buruhaton! * Igintagna ni Jesus nga ini nga buruhaton magpapadayon tubtob ha “ikatarapos hini nga sistema.”  Kon iginsasangyaw mo an maopay nga sumat yana, nakikigbahin ka ha pagtuman hito nga sugo ngan tagna.—Mat. 28:19, 20.

3. Ano an tulo nga butang nga nakakabulig ha aton ha pagtuman han sugo nga magsangyaw?

³ Katapos ihatag an sugo nga magsangyaw, hi Jesus nagsaad ha iya mga sumurunod: “Kaupod niyo ako.” (Mat. 28:20) Salit inin daku nga buruhaton nga pagsangyaw tutumanon han iya mga sumurunod ilarom han iya paggiya. Ngan igintatagana ha aton han Dios an “tagsa nga maopay nga butang” basi matuman naton ito nga sugo. (Heb. 13:20, 21) Hini nga artikulo, hihisgotan naton an tulo hiton maopay nga mga butang: (1) an mga garamiton nga igintatagana ha aton, (2) an pamaagi nga aton ginagamit, ngan (3) an pagbansay nga aton nakakarawat. Siyahan, hisgotan naton an pipira han garamiton nga gin-gamit naton han naglabay nga 100 ka tuig.

4. Kay ano nga nagamit kita hin iba-iba nga garamiton ha pagsangyaw nga buruhaton?

⁴ Iginpariho ni Jesus an “pulong mahitungod han Ginhadian” ha liso nga iginsabwag ha iba-iba nga klase han tuna. (Mat. 13:18, 19) An usa nga hardinero bangin gumamit hin iba-iba nga garamiton basi iandam an tuna nga iya tatamnan. Ha pariho nga paagi, an aton Hadi nagtatagana hin mga garamiton nga nabulig ha aton ha pag-andam han kasingkasing han minilyon nga tawo ha pagkarawat han mensahe han Ginhadian. An iba hito nagin mapulsanon ha pipira la ka panahon, samtang an iba mapulsanon pa gihapon yana. Pero ito ngatanan nakabulig nga mag-uswag an aton abilidad ha pagsangyaw.

5. Ano an testimony card, ngan paonan-o ito gin-gamit?

⁵ Usa nga garamiton nga nakabulig ha damu nga kabugtoan ha pagtikang ha pagsangyaw amo an testimony card, nga gin-gamit han mga magwarali han Ginhadian tikang han 1933. Ito nga card mga tulo ka pulgada an kahilapad ngan lima ka pulgada an kahilaba, ngan may-ada ito halipot nga mensahe tikang ha Biblia. Ha panapanahon, nagpupublikar hin bag-o nga mga card nga may bag-o nga mensahe. Simple la an presentasyon! Hi C. W. Erlenmeyer mga dyes anyos han siyahan nga nakigbahin hiya hini nga klase han pagsangyaw. Hiya nagsiring: “An kasagaran nga introduksyon amo an, ‘Puydi makialayon pagbasa hini nga card?’ Katapos basahon han tagbalay an card, tatanyagan namon hiya hin literatura ngan kahuman nabaya na kami.”

6. Paonan-o nagin mapulsanon an testimony card?

⁶ An testimony card nagin mapulsanon ha damu nga paagi. Pananglitan, bisan kon hingyap gud han pipira nga magwarali nga makigbahin ha pagsangyaw, naawod hira ngan diri maaram han ira iyayakan. An iba naman damu an iginyayakan. Iginsusumat nira ha tagbalay an ngatanan nira nga hinbabaroan ha sulod hin pipira la ka minuto, pero an ira presentasyon usahay diri mataktika. An testimony card nakabulig ha ngatanan nga magwarali nga makagsangyaw hin matin-aw ngan simple nga mensahe.

7. Ano nga mga problema an naeksperyensyahan han pipira ha paggamit han card?

⁷ Syempre, may mga binangon liwat nga problema. Hi Grace A. Estep nga maiha na nga Saksi, nagsiring: “Usahay, ginpapakianhan kami, ‘Ano an nakasurat dida? Diri ba puydi nga isumat mo na la ito ha akon?’” Dugang pa, may mga tagbalay nga diri nakakabasa han nakasurat ha card. An iba liwat naghuhunahuna nga ira na an card, salit ginkukuha ito ngan ginsasadhan na an purtahan. May mga tagbalay nga nadiri gud ha aton mensahe ngan gin-gigisi nira an card. Bisan pa hini nga mga problema, nahibaro an aton kabugtoan nga makasangyaw ha mga tawo ngan maipakilala an ira kalugaringon sugad nga magwarali han Ginhadian.

8. Isaysay kon paonan-o gin-gamit an portabol nga ponograpo. (Kitaa an retrato ha tinikangan hini nga artikulo.)

 ⁸ Usa pa nga garamiton nga nagin mapulsanon ha pagsangyaw an portabol nga ponograpo. Gin-gamit ito ha dekada han 1930 ngan temprano ha dekada han 1940. Ginngaranan ito han iba nga kabugtoan nga Aaron tungod kay ito an nagyayakan para ha ira. (Basaha an Eksodo 4:14-16.) Kon tumugot an tagbalay, patutokaron han magwarali an upat ngan tunga ka minuto nga basado-ha-Biblia nga pahayag, ngan katapos magtatanyag hiya hin mga literatura. Usahay, bug-os nga pamilya an nagtitirirok basi mamati ha nakarekord nga pahayag! Han 1934, an Watch Tower Society nagtikang paghimo hin portabol nga mga ponograpo nga gindisenyo para ha ministeryo. Ha urhi, nagkaada rekording hin mga pahayag ha 92 nga topiko.

9. Mationan-o kaepektibo an paggamit han ponograpo?

⁹ Han nabatian ni Hillary Goslin an usa han mga nakarekord nga basado-ha-Biblia nga pahayag, ginhuram niya ha magwarali an ponograpo ha sulod hin usa ka semana basi ipabati an mensahe han Ginhadian ha iya mga amyaw. Han binalik an magwarali, may bag-o nga mga interesado nga naghuhulat ha iya. Ha urhi, nabawtismohan an damu ha ira, ngan an duha nga anak nga babaye ni Hillary nag-eskwela ha Gilead ngan nagin misyonera. Pariho ha testimony card, an ponograpo nakabulig ha damu nga magwarali ha pagtikang ha pagsangyaw. Ha urhi, pinaagi han Teokratiko nga Eskwelahan ha Ministeryo, babansayon ni Jehova an iya katawohan nga magsangyaw nga hira mismo an nagyayakan.

10, 11. Paonan-o gin-gamit an peryodiko ngan an radyo ha pagpasarang han kamatuoran ha Biblia, ngan kay ano nga epektibo ito nga pamaagi?

¹⁰ Ha paggiya han Hadi, nagamit an katawohan han Dios hin iba-iba nga pamaagi basi masangyawan an mas damu nga tawo han maopay nga sumat. Importante gud ito labi na han gutiay pa la an mag-arani. (Basaha an Mateo 9:37.) Temprano han ika-20 ka siglo, gin-gamit an peryodiko basi masangyawan an damu nga tawo ha mga lugar diin gutiay la an magwarali. Kada semana, nagpapadara hi Charles Taze Russell hin pahayag nga basado ha Biblia ha usa nga ahensya han balita. Katapos, iginpapadara hito nga ahensya an pahayag ha mga peryodiko ha Estados Unidos, Canada, ngan Europa. Han 1913, an mga pahayag ni Bugto Russell iginpublikar ha 2,000 nga peryodiko ngan nabasa han mga 15,000,000 nga tawo!

¹¹ Han namatay hi Bugto Russell, usa pa nga epektibo nga pamaagi an gin-gamit ha pagpasamwak han maopay nga sumat. Han Abril 16, 1922, iginpresenta ni Joseph F. Rutherford an iya siyahan nga pahayag nga iginbrodkast ha radyo, ngan mga 50,000 an nakabati hito. Ngan han Pebrero 24, 1924, nagtikang pagbrodkast an siyahan nga estasyon han radyo han organisasyon, an WBBR. May kalabotan hinin bag-o nga pamaagi ha pagsangyaw, an Disyembre 1, 1924 nga The Watch Tower nagsiring: “Natoo kami nga an radyo amo an pinakadiri-magasto ngan epektibo nga paagi ha pagpasarang han mensahe han kamatuoran.” Pariho han peryodiko, nakabulig an radyo nga masangyawan an damu nga tawo ha mga lugar diin gutiay la an magwarali han Ginhadian.

12. (a) Ano nga klase han pagsangyaw ha publiko an imo gud naruruyagan? (b) Ano an makakabulig ha aton nga malamposan an kahadlok ha pagsangyaw ha publiko?

¹² Yana, gintatagan hin dugang nga importansya an pagsangyaw ha publiko: ha mga hurulatan hin bus, estasyon han tren, paradahan, plasa, ngan merkado. Nahahadlok ka ba pakigbahin hiton pipira nga klase han pagsangyaw ha publiko? Kon oo, pag-ampo para hin bulig ngan hunahunaa an ginsiring han maiha na nga nagbibiyahe nga paramangno nga hi Angelo Manera,  Jr.: “Ginhuhunahuna namon an tagsa nga bag-o nga klase han pagsangyaw ha publiko sugad nga usa pa nga paagi ha pag-alagad kan Jehova, usa pa nga paagi ha pagpakita han amon pagkamaunungon ha iya, usa pa nga pagsari ha amon integridad, ngan karuyag gud namon pamatud-an nga andam kami ha pag-alagad ha iya ha bisan ano nga paagi nga iya karuyag.” An pakigbahin ha bag-o nga pamaagi han pagsangyaw—ha usa nga diri kita komportable—nabulig ha aton nga maparig-on an aton pagsarig ngan pagtoo kan Jehova ngan magin epektibo nga mga magwarali.—Basaha an 2 Corinto 12:9, 10.

13. Kay ano nga epektibo an paggamit han aton website nga jw.org ha ministeryo, ngan ano an imo eksperyensya ha pag-aghat ha mga tawo nga gamiton ito?

¹³ Damu nga magwarali an nalilipay ha pag-aghat ha mga tawo nga gamiton an aton website nga jw.org, diin puydi hira magbasa ngan mag-download hin basado-ha-Biblia nga mga literatura ha sobra 700 nga yinaknan. Kada adlaw, sobra 1.6 ka milyon nga tawo an nabisita ha aton website. Pariho han radyo hadto, naipapasamwak han aton website an maopay nga sumat ha damu nga tawo, bisan ha mga lugar nga makuri kadtoan.

14. Ano nga pagbansay an ginkinahanglan han mga magwarali han Ginhadian, ngan ano nga eskwelahan an nakabulig ha ira nga magin epektibo nga magturutdo?

¹⁴ An mga garamiton ngan pamaagi han pagsangyaw nga aton ginhisgotan nagin epektibo gud. Pero kinahanglan bansayon an kabugtoan nga magin epektibo nga magwarali. Pananglitan, usahay an tagbalay diri nauyon han iya nabatian ha ponograpo. An iba liwat interesado ngan karuyag mahibaro hin dugang pa. Kinahanglan mahibaro an mga magwarali kon paonan-o mataktika nga aatubangon an pagriwa ngan kon paonan-o epektibo nga tututdoan an sinsero nga mga tawo. Waray ruhaduha nga tungod han bulig han espiritu han Dios, nakita ni Nathan H. Knorr nga kinahanglan bansayon an mga magwarali nga gamiton ha ministeryo an ira abilidad ha pagyakan. Salit tikang han 1943, gin-organisar an Teokratiko nga Eskwelahan ha Ministeryo ha mga kongregasyon. Ito nga eskwelahan nabulig ha aton nga magin epektibo nga magturutdo.

15. (a) Ano an naeksperyensyahan han pipira han iginpresenta nira an ira bahin ha Teokratiko nga Eskwelahan ha Ministeryo? (b) Paonan-o mo napamatud-an nga tinuod an saad ni Jehova ha Salmo 32:8?

¹⁵ Damu nga kabugtoan an diri hiara ha pagyakan ha atubangan hin damu nga mamarati. Nahinunumdoman pa ni Julio S. Ramu an iya siyahan nga bahin ha eskwelahan han 1944. An iya bahin mahitungod ha tawohan han Biblia  nga hi Doeg, nga gin-unabi ha lima la nga bersikulo han Biblia. Hi Julio nagsiring nga nangungurog an iya tuhod, kamot, ngan baba tungod han duro nga kulba. Hiya nagdugang: “Iginpresenta ko an akon bahin ha sulod hin tulo ka minuto. Ito an akon siyahan nga eksperyensya ha pagyakan ha plataporma, pero waray ako umundang.” Nagpaenrol liwat ha eskwelahan an kabataan bisan kon diri masayon para ha pipira an pagpresenta hin bahin ha kongregasyon. Nahinumdoman ni Angelo Manera, nga gin-unabi kanina, an siyahan nga bahin han usa nga batan-on nga lalaki: “Ginkukulba gud hiya nga han nagtikang hiya han iya bahin, nagtangis hiya. Kondi determinado gud hiya nga tapuson ito, bisan kon nagtatangis hiya ha iya bug-os nga bahin.” Nag-aalang ka ba ha pagkomento o pakigbahin ha mga katirok tungod kay naaawod ka o naabat nga diri mo ito mahihimo? Pangaro hin bulig kan Jehova nga maatohan mo an imo kahadlok. Bubuligan ka niya sugad la nga ginbuligan niya an mga estudyante hadto ha Teokratiko nga Eskwelahan ha Ministeryo.—Basaha an Salmo 32:8.

16. Ano an katuyoan han Gilead School (a) han naglabay? ngan (b) tikang han 2011?

¹⁶ Diri la an Teokratiko nga Eskwelahan ha Ministeryo an ginagamit ni Jehova ha pagbansay ha iya katawohan. Nagpahimulos gud an mga misyonero ngan an iba pa nga naggradwar ha Gilead School. Sumala ha usa nga instruktor, an usa nga katuyoan han eskwelahan amo an “pagpasilsil ha mga estudyante hin mas hilarom nga hingyap ha pakigbahin ha pag-ebanghelyo.” Nagtikang an Gilead han 1943, ngan tikang hito nga panahon, sobra 8,500 na an nabansay. An mga misyonero nga nabansay ha Gilead igintoka ha mga 170 nga nasud. Tikang han 2011, an gin-iimbitar na la nga umiskwela hito amo adton aada na ha espesyal nga bug-os-panahon nga pag-alagad—mga espesyal payunir, nagbibiyahe nga paramangno, Bethelite, o misyonero nga waray pa makaeskwela hito.

17. Mationan-o kaepektibo an pagbansay ha Gilead School?

¹⁷ Mationan-o kaepektibo an pagbansay ha Gilead School? Tagda ini. Han Agosto 1949, waray magnapulo an magwarali ha bug-os nga Japan. Ha ikatarapos hito nga tuig, 13 nga misyonero nga nabansay ha Gilead an maduruto nga nagsangyaw kaupod han mga magwarali didto. Yana, mga 216,000 na an magwarali ha Japan, ngan haros 42 porsyento hito an payunir!

18. Ano an iba pa nga eskwelahan nga nakakabulig ha kwalipikado nga mga Saksi nga mag-uswag ha espirituwal?

¹⁸ An iba nga eskwelahan, sugad han Kingdom Ministry School, Pioneer Service School, School for Kingdom Evangelizers, School for Circuit Overseers and Their Wives, ngan an School for Branch Committee Members and Their Wives, nakakabulig gud ha pag-uswag han espirituwalidad ngan ha pagin epektibo han katawohan han Dios. Matin-aw nga padayon nga ginbabansay han Hadi an iya katawohan!

19. Ano an ginsiring ni Charles Taze Russell may kalabotan ha pagsangyaw nga buruhaton, ngan paonan-o ito natutuman?

¹⁹ Sobra 100 ka tuig na nga nagmamando an Ginhadian han Dios. An aton Hadi, hi Jesu-Kristo, padayon nga nagbabansay ha aton. Antes mamatay hi Charles Taze Russell han 1916, natoo gud hiya nga an pagsangyaw han maopay nga sumat paghihimoon ha bug-os nga kalibotan. Hiya nagsiring: “Madagmit nga nag-uuswag an buruhaton, ngan padayon ito nga mag-uuswag tungod kay isasangyaw an ‘ebanghelyo han Ginhadian’ ha bug-os nga kalibotan.” (Faith on the March, ni A. H. Macmillan, p. 69) Husto gud hiya! Ngan mapasalamaton kita nga padayon nga igintatagana han Dios han kamurayawan an aton kinahanglan para hinin makalilipay nga buruhaton! Oo, igintatagana niya an “tagsa nga maopay nga butang” basi mabuhat naton an iya kaburut-on!