1. Aha do na diulahon si Manoa tingki diboto na laho gabe ama ibana?

SI MANOA dohot tunggani boruna porsea do nasida ndang na boi be marianakhon. Alai di sada tingki, surusuruan ni Jahowa paboahon tu tunggani boru ni si Manoa na laho tubuan anak ibana. Songgot do rohana mambege i. Tingki dipaboa ibana tu si Manoa, las hian ma rohana. Alai, sungkunsungkun do rohana songon dia do sahalak ama na dihalomohon Jahowa. Songon dia do ibana dohot tunggani boruna mangajari ianakhonna, asa mangkaholongi jala manomba Jahowa nang pe maringanan di tongatonga ni halak Israel na mangulahon na roa? Dipangido si Manoa do tu Jahowa asa disuru muse surusuruanNa. Didok ma, ”Sai ro ma nian sahalinari halak ni Debata, naung sinurum manopot hami, asa diajarhon tu hami manang aha sibahenonnami tu dakdanak situbuhononhon i.”—Pangh. 13:1-8.

2. Aha do na porlu ajarhononmu tu ianakhonmuna, jala songon dia do hamu mangulahon i? (Ida ma kotak “ Na Rumingkot laho Marsiajar Bibel.”)

² Molo nunga marianakhon hamu, tontu diantusi hamu do pangkilalaan ni si Manoa. Ingkon urupanmuna do ianakhonmu asa mananda jala mangkaholongi Jahowa. (Poda 1:8) Saleleng  panombaon na sasaripe, urupi ma nasida marsiajar taringot Jahowa dohot Bibel. Alai, ndang sae holan sahali saminggu mangajari nasida. (Jaha 5 Musa 6:6-9.) Aha do isara na asing na mangurupi hamu mangajari nasida asa dihaholongi jala disomba Jahowa? Di artikel on, taulas ma tiruan sian Jesus. Nang pe ndang sahalak ama Jesus, alai boi do hamu marsiajar sian isara ni ibana tingki mangajari dohot mangalatik siseanna. Jesus patuduhon holong, serep ni roha dohot pangantusion tu siseanna. Diantusi ibana do songon dia pangkilalaan ni siseanna jala diboto do songon dia mangurupi nasida. Taparrohahon ma songon dia hita boi maniru Jesus.

3. Boasa pos roha ni sisean na dihaholongi Jesus do nasida?

³ Jotjot do Jesus mandok tu siseanna molo ibana mangkaholongi nasida. (Jaha Johannes 15:9.) Dilehon do godang tingki ni ibana rap dohot siseanna. (Mrk. 6:31, 32; Joh. 2:2; 21:12, 13) Ndang holan gabe guru Jesus di nasida, alai dohot do gabe aleale. Alani i, pos do roha ni siseanna molo Jesus mangkaholongi nasida. Aha do na taparsiajari sian Jesus?

4. Songon dia do hamu patuduhon holong tu ianakhonmuna? (Ida gombar di mula ni parsiajaran.)

⁴ Paboa ma tu ianakhonmuna molo hamu mangkaholongi nasida, jala patudu ma na ringkot do nasida di hamu. (Poda 4:3; Tit. 2:4) Si Samuel na maringanan di Australia mandok, ”Tingki dakdanak ahu, dijahahon bapakku do Buku Cerita Alkitab tu ahu ganup borngin. Dialusi ibana do sungkunsungkunku, dihaol jala diumma do ahu. Songgot do rohangku dung huboto ndang somal bapakku dihaol dohot diumma tingki dakdanak! Alai, marsitutu do ibana patuduhon holongna tu ahu. Gabe lam solhot ma hami jala las rohangku jonok tu bapakku.” Alani i, jotjot ma dokkon tu ianakhonmuna, ”Holong do rohangku tu ho.” Haol jala umma ma nasida. Lehon ma godang tingkimuna rap dohot nasida, rap mangan jala rap marmeam.

5, 6. (a) Songon dia do Jesus patuduhon holong tu siseanna? (b) Songon dia do isara na denggan tingki maminsang ianakhonmuna?

⁵ Jesus mandok, ”Ai nasa na huhaholongi, angka i do hupinsang jala huajar.” * (Pgk. 3:19) Umpamana, jotjot do angka sisean ni Jesus marsalisi taringot ise na sumurung. Diparrohahon Jesus do parsalisian on. Alai, sabar do ibana mamodai nasida. Tongtong do dipatudu ibana burju ni roha. Jala dipaima do tingki dohot inganan na pas laho pasingothon nasida.—Mrk. 9:33-37.

⁶ Ala dihaholongi hamu do ianakhonmuna, tontu pinsangonmu do nasida. Sipata sae do holan tapatorang boasa ulaon i denggan manang sala. Alai, songon dia do molo ndang dioloi nasida? (Poda 22:15) Marsiajar ma sian Jesus. Patudu ma hasabaron tingki maminsang marhite manogunogu, dohot mangalatik nasida. Pillit ma tingki dohot inganan na pas laho maminsang jala patudu ma holong tingki pasingothon nasida. Sahalak donganta borua sian Afrika Selatan na margoar si Elaine mangingot songon dia natuatuana maminsang ibana. Dipaboa natuatuana do aha na dihalomohon sian si Elaine. Molo didok uhumonna si Elaine ala ndang mangoloi, diulahon natuatuana do songon i. Alai ibana mandok, ”Ndang hea natuatuangku maminsang ahu tingki  muruk. Tongtong do dipatorang boasa ahu porlu dipinsang.” On ma na mambahen si Elaine mamboto molo natuatuana mangkaholongi ibana.

7, 8. (a) Aha do na boi diparsiajari angka sisean sian tangiang ni Jesus? (b) Songon dia do tangiangmu mangajari ianakhonmuna mangasahon Debata?

⁷ Tingki laho ditangkup jala dibunu Jesus, martangiang do ibana tu Amana, ”Ale Amang, saluhutna do tarpatupa Ho! Salpuhon ma siinumon on sian Ahu! Alai ndada guru lomo ni rohangku, roham do!” (Mrk. 14:36) Pingkiri ma, songon dia pangkilalaan ni siseanna tingki ditangihon jala diparsiajari nasida tangiang ni Jesus. Diboto nasida ma, nang pe ndang halak na mardosa Jesus, alai tongtong do dipangido ibana pangurupion sian Amana. Alani i, nasida ingkon marsiajar marserep ni roha jala mangasahon Jahowa.

⁸ Ianakhonmuna boi marsiajar sian tangiangmuna. Unang ma holan angka na somal pangido hamu tingki rap martangiang dohot ianakhonmuna. Alai, patudu ma molo hamu mangasahon Jahowa. Unang ma holan ianakhonmuna na ditangiangkon hamu asa diurupi Jahowa, alai pangido ma asa diurupi nang hamu. Si Ana na maringanan di Brasil mandok, ”Tingki marsahit ompungku, martangiang do natuatuangku asa dilehon Jahowa gogo laho mangadopi sitaonon i jala dipangido bisuk mambahen haputusan na denggan. Tingki masa sitaonon na borat, dipasahat nasida do sude tu Jahowa asa diurupi nasida. Sian i, ahu marsiajar porlu do mangasahon Jahowa.” Tingki ditangihon ianakhonmu tangiangmuna mangido habaranion laho marbarita manang mangido cuti sian parkarejoan asa boi ro tu parpunguan bolon, botoon ni nasida ma molo hamu mangasahon Jahowa. Jala tiruonna ma hamu.

9. (a) Songon dia do Jesus mangajari siseanna asa marserep ni roha jala ndang mangkaringkothon dirina sandiri? (b) Molo marserep ni roha jala ndang mangkaringkothon diri sandiri hamu, aha do pangkorhonna tu ianakhonmuna?

 ⁹ Jesus mandok tu angka siseanna asa marserep ni roha jala unang mangkaringkothon dirina sandiri. Jesus mambahen tiruan mangulahon i. (Jaha Lukas 22:27.) Diida siseanna do molo Jesus mangalehon dirina laho manomba Jahowa dohot mangurupi na asing. Siseanna boi do marsiajar mangulahon i. Hamu pe natuatua boi do lehononmuna tiruan tu ianakhonmu. Si Debbie naung dua ianankhonna mandok, ”Ndang hea sogo rohangku tu tunggani dolingku tingki dilehon ibana godang tingkina rap dohot dongan sahaporseaon ala sintua do ibana. Huboto do tongtong diparrohahon ibana do keluarganami. Jala sai lehononna do tingkina tu hami.” (1 Tim. 3:4, 5) Songon dia do tiruan ni si Debbie dohot tunggani dolina, si Pranas marpangkorhon tu keluargana? Ibana mandok gabe rade ma angka ianakhonna mangurupi di huria. Las do roha ni nasida marsaor rap dohot dongan di huria. Saonari, nasida sakeluarga nunga mangalehon godang tingkina laho marhobas tu Jahowa. Molo ndang mangkaringkothon diri sandiri jala dipatudu hamu serep ni roha, na mangajari ianakhonmuna ma hamu asa rade mangurupi na asing.

10. Songon dia do Jesus mamangke pangantusionna tingki torop halak di Galilea mandapothon ibana?

¹⁰ Ala marpangantusion do Jesus, ndang holan hasalaan ni sasahalak na niida ni ibana. Alai, dipingkiri do boasa diulahon i. Ibana boi manjaha roha ni jolma. Di sada tingki torop halak Galilea mandapothon ibana. (Joh. 6:22-24) Diboto Jesus do, ndang na laho manangihon ibana umbahen ro nasida, alai alani sipanganon do. (Joh. 2:25) Diantusi Jesus do songon dia pangkilalaan ni nasida. Sabar do Jesus pasingothon jala dipatorang do aha na porlu paubaon ni nasida.—Jaha Johannes 6:25-27.

11. (a) Songon dia do asa diantusi hamu pangkilalaan ni ianakhonmuna taringot ulaon marbarita? (b) Songon dia do hamu mangurupi ianakhonmuna asa marhiras ni roha tingki marbarita?

¹¹ Nang pe ndang boi hamu manjaha roha ni sasahalak, alai boi do hamu marpangantusion. Umpamana, boi do  antusanmu songon dia pangkilalaan ni ianakhonmuna taringot ulaon marbarita. Boi do sungkunonmu dirimuna, ”Sian ias ni rohana do ibana dohot marbarita? Manang, asa adong do dalanna marmeam dohot mangallangi?” Molo diboto hamu do ianakhonmuna hurang marhiras ni roha tingki marbarita, urupi ma nasida. Tingki rap marbarita hamu, ajari ma ibana asa parsidohot di ulaon i, asa diboto na diargai do ibana.

12. (a) Aha do sipasingot na dilehon Jesus tu siseanna? (b) Boasa angka sisean porlu dipasingot taringot on?

¹² Songon dia do muse Jesus mamangke pangantusionna? Diboto ibana do sada hasalaan boi marpangkorhon tu dosa na balga. Alani i, dipasingot ma angka siseanna. Umpamana, diboto sisean do ulaon na sala parmainanon. Alai, Jesus pasingothon nasida, aha do na mambahen sasahalak mangulahon parmainanon. Ibana mandok, ”Manang ise na mamereng boruboru huhut marsangkap na roa, nunga saut dilangkup i di bagasan rohana. Molo digasipi mata siamunmi ho, pulsikkon ma i jala bolongkon!” (Mat. 5:27-29) Sisean ni Jesus mangolu di tongatonga ni halak Rom na somal manonton parmainanon dohot marhata na rorang. Alani i, dipasingot Jesus ma nasida asa unang parsidohot tu hasomalan ni halak Rom ala on mambahen nasida maol mangulahon na sintong.

13, 14. Songon dia do hamu mangurupi ianakhonmuna asa manat mamillit sitontonon?

¹³ Hamu natuatua, pangke hamu ma pangatusionmu mangondingi ianakhonmuna sian ulaon na so dihalomohon Jahowa. Saonari on, nunga godang dakdanak manonton film porno jala marparange na roa. Tontu, hamu ingkon paboahon tu ianakhonmuna molo manonton film porno i ndang denggan. Alai, ndang sae holan i bahenonmuna laho mangondingi nasida. Sungkun ma dirimuna, ”Diboto ianakhonku do boasa ndang denggan manonton film porno? Aha do na mambahen nasida naeng mangida i? Olo do nasida paboahon tu ahu boasa tarelaela nasida manonton i?” Nang pe otik umur ni ianakhonmuna, boi do dohononmu tu nasida, ”Molo diida ho di internet taringot seks jala naeng botoonmu, jolo sungkun tu oma dohot tu bapa. Unang ho mabiar jala maila manungkun i, ai urupannami do ho.”

¹⁴ Manat ma hamu mamillit sitontononmu, ala on boi tiruon ni ianakhonmuna. Si Pranas mandok, ”Nang pe godang na diajarhon hamu tu ianakhonmuna, alai nasida mangihuthon jala maniru na diulahonmuna.” Molo manat do hamu mamillit musik, buku, dohot film, tiruon ni ianakhonmuna ma i.—Rom 2:21-24.

15, 16. (a) Boasa pos rohamuna molo Jahowa mangurupi hamu mangajari ianakhonmuna? (b) Aha do na laho taulas di artikel na mangihut?

¹⁵ Aha do na masa tingki dipangido si Manoa tu Jahowa asa gabe natuatua na denggan ibana? Disurat do di Bibel, ”Ditangihon Debata ma suara ni si Manoa.” (Pangh. 13:9) Hamu pe angka natuatua, ditangihon Jahowa do tangiangmuna. Lomo do roha ni Jahowa mangurupi hamu mangajari ianakhonmuna. Jala Ibana mangurupi hamu patuduhon holong, serep ni roha dohot pangantusion.

¹⁶ Urupan ni Jahowa do hamu muse laho mangajari ianakhonmu dungkon lam magodang nasida. Di artikel na mangihut, taulas ma songon dia holong, serep ni roha, dohot pangantusion mangurupi hamu mangajari ianakhonmu na remaja asa manomba Jahowa.