Plọn Ovi Towe Nado Sẹ̀n Jehovah
‘Gbọ omẹ Jiwheyẹwhe tọn lọ ni plọn mí nuhe mí na wà hlan ovi he yè na ji lọ.’—WHẸ. 13:8.
1. Nawẹ Manoa yinuwa gbọn to whenue e sè dọ emi na lẹzun otọ́ de?
ASI dawe lọ tọn ma ko do owẹ̀n jiawu ehe nkọtọn na ẹn pọ́n. Na nugbo tọn, asu po asi po lọ yọnẹn ganji dọ wẹnsinọ wẹ asi lọ. Ṣigba, angẹli Jehovah tọn ko wá asi lọ dè bo dọho de na ẹn he taidi nuhe ma yọnbasi dọ, Manoa po asi etọn po na wá ji visunnu de! Matin ayihaawe homẹ Manoa tọn hùn, ṣigba e sọ yọnẹn dọ azọngban daho de wẹ emi jlo na didá. Nawẹ ewọ po asi etọn po sọgan plọn visunnu yetọn whẹ́n nado sẹ̀n Jiwheyẹwhe to akọta he mẹ nuylankan wiwà gbayipe te enẹ mẹ gbọn? Manoa “vẹ̀ OKLUNỌ” dọmọ: “Yẹn vẹ̀ we, gbọ omẹ Jiwheyẹwhe tọn lọ [angẹli lọ] mẹhe hiẹ ko dohlan nisọ vọ́ mí dè gọwá, bo plọn mí nuhe mí na wà hlan ovi he yè na ji lọ.”
2. Nawẹ a sọgan plọn ovi towe gbọn? (Sọ pọ́n apotin lọ “ Omẹ Tintan He A Dona Plọn Biblu Hẹ.”)
2 Eyin mẹjitọ de wẹ a yin, e yọnbasi dọ a ni mọnukunnujẹ obiọ vẹkuvẹku Manoa tọn mẹ. Na hiẹ lọsu tindo azọngban pinpẹn lọ nado gọalọna ovi towe nado yọ́n Jehovah bo yiwanna ẹn. (Howh. 1:8) Nado jẹ yanwle enẹ kọ̀n, mẹjitọ Klistiani lẹ nọ hodo tito sinsẹ̀n-bibasi whẹndo tọn nujọnu tọn de to gbesisọ mẹ. Ṣigba, nado do nugbo Biblu tọn do ahun ovi de tọn mẹ, hiẹ dona wà nususu hú anadidena sinsẹ̀n-bibasi whẹndo tọn to sẹmẹsẹmẹ. (Hia Deutelonomi 6:6-9.) Nawẹ a sọgan duto avùnnukundiọsọmẹnu he nugbo lọ dido do ahun ovi towe lẹ tọn mẹ nọ bẹhẹn ji gbọn? Hosọ ehe po dehe bọdego po na dọhodo lehe mẹjitọ lẹ sọgan hodo apajlẹ Jesu tọn do ji. Dile etlẹ yindọ Jesu ma yin otọ́ de, mẹjitọ lẹ sọgan mọaleyi sọn aliho mẹpinplọn tọn etọn mẹ, na ewọ plọnnu devi etọn lẹ bo yí owanyi, whiwhẹ, po zinzin po do plọnazọ́n yé. Mì gbọ mí ni gbadopọnna jẹhẹnu ehelẹ debọdo-dego.
YIWANNA OVI TOWE
3. Nawẹ Jesu do owanyi hia devi etọn lẹ gbọn?
3 Jesu ma whleawu nado dọna devi etọn lẹ dọ emi yiwanna yé. (Hia Johanu 15:9.) Ewọ sọ do owanyi hia devi etọn lẹ gbọn gbẹdido hẹ yé pẹkipẹki podọ to gbesisọ mẹ dali. (Malku 6:31, 32; Joh. 2:2; 21:12, 13) E ma yin azọ́n kẹdẹ wẹ nọ kọ̀n Jesu po devi lẹ po dopọ. Enẹwutu, yé sọgan deji dọ ewọ yiwanna yé nugbo. Nawẹ a sọgan hodo apajlẹ aliho mẹpinplọn tọn Jesu tọn gbọn?
4. Nawẹ a sọgan hẹn ovi towe lẹ kudeji gbọn dọ a yiwanna yé? (Pọ́n yẹdide he tin to bẹjẹeji hosọ ehe tọn.)
4 Nọ dọna ovi towe lẹ dọ a yiwanna yé, podọ nọ do obá he mẹ yé họakuẹ na we jẹ hia yé whẹwhẹ. (Howh. 4:3; Titu 2:4) Samuel, he nọ nọ̀ Australie dọmọ: “To whenue n’tin to ovu, Papa nọ hia Owe Ṣie He Bẹ Otàn Biblu Tọn lẹ Hẹn na mi to whèjai lẹpo. E nọ na gblọndo kanbiọ ṣie lẹ tọn, nọ gbò mi fán, bo nọ donùnùgo na mi, bosọ nọ dọ e zun dọ́fọ́n na mi. E paṣa mi taun to whenue n’wá yọnẹn dọ Papa ma yin pinplọn whẹ́n to whẹndo he mẹ yè nọ gbò mẹ fán bo nọ donùnùgo namẹ te! Ṣogan, e dovivẹnu nujọnu tọn nado do owanyi hia mi. Enẹ zọ́n bọ n’wleawuna haṣinṣan pẹkipẹki de hẹ ẹ, podọ n’tindo ayajẹ po hihọ́ po.” Nọ gọalọna ovi towe nado tindo numọtolanmẹ dopolọ gbọn didọna ẹn whẹwhẹ dali dọ “N’yiwanna we.” Nọ dohia ovi towe lẹ dọ emi yiwanna yé. Nọ dọho hẹ yé, nọ dùnú hẹ yé, bosọ nọ daihun hẹ yé.
5, 6. (a) Nawẹ Jesu yinuwa hẹ mẹhe e yiwanna lẹ gbọn? (b) Nawẹ mẹplọnlọ nọ gọalọna ovi lẹ nado mọdọ mẹjitọ lẹ nọ basi hihọ́na yé bosọ yiwanna yé gbọn?
5 Jesu dọmọ: “Mẹhe yẹn yiwanna lẹpo wẹ yẹn nọ wọhẹ bo nọ domẹplọnlọ yé go.” * (Osọ. 3:19) Dile etlẹ yindọ devi Jesu tọn lẹ dọnnu pludopludo gando mẹhe klohugan to ṣẹnṣẹn yetọn go, agbọ́ yetọn ma pé Jesu. To whenue yé gboawupo nado hodo ayinamẹ etọn, ewọ ma yí nukunpẹvi do pọ́n nuyiwa yetọn. Ṣigba, e yí owanyi po homẹmimiọn po do gbẹnuna yé to ojlẹ he sọgbe mẹ podọ to fihe sọgbe.—Malku 9:33-37.
6 Nọ do owanyi hia ovi towe lẹ gbọn mẹplọnlọ dido yé go dali. To whedelẹnu, nuhewutu nuyiwa to aliho de mẹ do sọgbe kavi do ylan didọ poun ko pé. To ojlẹ devo mẹ, ovi lọ sọgan gboawupo nado wà nuhe a dọ. (Howh. 22:15) Eyin enẹ wá jọ, hodo apajlẹ Jesu tọn. Yí owanyi po homẹmimiọn po do domẹplọnlọ ovi towe go gbọn homẹfa yíyí do na ẹn anademẹ, do plọn ẹn podọ do wọhẹ ẹ dali to ojlẹ he sọgbe mẹ podọ to fihe sọgbe. Mẹmẹyọnnu Elaine sọn Afrique du Sud dọmọ: “Mẹjitọ ṣie lẹ nọ domẹplọnlọ go e whẹwhẹ. Eyin yé na mi avase dọ emi na domẹplọnlọ go e na nuṣiwa de, yé nọ wàmọ janwẹ. Amọ́ yé ma domẹplọnlọ go e po homẹgble po pọ́n kavi nọma dọ nuhewutu yé do domẹplọnlọ go e na mi. Taidi kọdetọn de, n’nọ mọdọ n’tin to hihọ́ glọ. N’yọ́n dogbó ṣie lẹ, bosọ nọ mọnukunnujẹ nuhe yé nọ biọ to asi e lẹ mẹ.”
NỌ DO WHIWHẸ HIA
7, 8. (a) Nawẹ Jesu do whiwhẹ hia to odẹ̀ etọn lẹ mẹ gbọn? (b) Nawẹ odẹ̀ towe lẹ sọgan plọn ovi towe lẹ nado nọ ganjẹ Jiwheyẹwhe go gbọn?
7 Yí nukun homẹ tọn do pọ́n numọtolanmẹ he devi Jesu tọn lẹ na ko tindo, to whenue yé sè kavi wá plọnnu gando dopo to odẹ̀ he e hò gbọngodo to aigba ji lẹ mẹ go dọmọ: “Abba, Otọ́, onú lẹpo wẹ yọnbasi na we; de kọfo ehe sọn dè e. Ṣogan, e ma yin nuhe yẹn jlo, ṣigba nuhe hiẹ jlo.” * (Malku 14:36) Matin ayihaawe, hodotọ Jesu tọn lẹ na ko plọn sọn hogbe ovẹvivẹ tọn etọn ehelẹ mẹ dọ eyin Visunnu pipé Jiwheyẹwhe tọn yí whiwhẹ do biọ alọgọ Jiwheyẹwhe tọn, emi lọsu dona wà nudopolọ.
8 Etẹwẹ ovi towe lẹ nọ plọn sọn odẹ̀ he a nọ hò lẹ mẹ? Nugbo wẹ dọ yanwle tintan he wutu a nọ hodẹ̀ hlan Jehovah ma yin nado plọnnu ovi towe lẹ. Etomọṣo, to whenue a yí whiwhẹ do hodẹ̀ to nukun yetọn mẹ, yé nọ plọn nado nọ ganjẹ Jehovah go. Ana he nọ nọ̀ Brésil dọmọ: “To whenue nuhahun lẹ fọ́n, taidi ojlẹ he mẹ mẹjitọ onọ̀ ṣie tọn lẹ to azọ̀njẹ, mẹjitọ ṣie lẹ nọ biọ Jehovah dọ ni na emi huhlọn nado pehẹ ninọmẹ lọ podọ nuyọnẹn nado basi nudide he sọgbe lẹ. Etlẹ yin to kọgbidinamẹnu sinsinyẹn lẹ glọ, yé nọ ze nuhahun yetọn lẹpo do alọmẹ na Jehovah. Enẹ zọ́n bọ yẹnlọsu plọn nado nọ ganjẹ Jehovah go.” To whenue a to dẹ̀ho po ovi towe lẹ po, ma hodẹ̀ na yewlẹ kẹdẹ blo. Nọ biọ Jehovah nado gọalọna hiẹ lọsu—vlavo nado biọgbè ogán towe na plidopọ daho de, kavi nado na we adọgbigbo nado dekunnuna kọmẹnu towe lẹ kavi nado gọalọna we to aliho devo lẹ mẹ. Eyin a nọ yí whiwhẹ do ganjẹ Jiwheyẹwhe go, ovi towe lẹ na plọn nado nọ wàmọ ga.
9. (a) Nawẹ Jesu plọn devi etọn lẹ nado nọ yí whiwhẹ do wadevizọn na mẹdevo lẹ gbọn? (b) Eyin a nọ tindo ojlo nado wadevizọn na mẹdevo lẹ, etẹwẹ ovi towe lẹ na plọn?
9 To ohó po walọ po mẹ, Jesu plọn devi etọn lẹ nado nọ yí whiwhẹ do wadevizọn na mẹdevo lẹ. (Hia Luku 22:27.) E plọn apọsteli etọn lẹ nado do gbigbọ mẹde-yido-sanvọ́ tọn hia to sinsẹ̀nzọn Jehovah tọn mẹ podọ to nuyiwa yetọn hẹ yisenọ hatọ lẹ mẹ. Eyin a nọ gbọn whiwhẹ dali ze apajlẹ mẹde-yido-sanvọ́ tọn dai, a sọgan plọn ovi towe lẹ nado nọ wà nudopolọ. Debbie, yèdọ onọ̀ de he tindo ovi awe dọmọ: “N’ma nọ whànwu gbede na whenu he asu ṣie nọ yizan hẹ mẹdevo lẹ taidi mẹho agun tọn. N’yọnẹn dọ asu ṣie na na ayidonugo whẹndo mítọn to whedepopenu he mí tindo nuhudo etọn.” (1 Tim. 3:4, 5) Asu etọn Pranas yidogọ dọmọ: “To nukọn mẹ, ovi mítọn lẹ nọ tindo ojlo nado wazọ́n to plidopọ lẹ whenu podọ nado tindo mahẹ to nuwiwa yẹwhehọluduta tọn lẹ mẹ. Yé gọ́ na ayajẹ, bo jihọntọn lẹ bosọ nọ dogbẹ́ hẹ mẹmẹsunnu lẹ!” To alọnu din, whẹndo lọ blebu wẹ to Jehovah sẹ̀n to sinsẹ̀nzọn whenu-gigọ́ tọn mẹ. Eyin a nọ do whiwhẹ po gbigbọ mẹde-yido-sanvọ́ tọn po hia, e yọnbasi dọ ovi towe lẹ na plọn nado nọ wadevizọn na mẹdevo lẹ.
NỌ YÍ ZINZIN ZAN
10. To whenue gbẹtọgun de wá Jesu dè, nawẹ e do zinzin hia gbọn?
10 Jesu nọ yí zinzin zan nado mọnú zẹ̀ awusọhia gbonu tọn go, bo nọ doayi nuhewutu gbẹtọ lẹ do yinuwa to aliho de mẹ go. To nujijọ de whenu to Galili, delẹ to hosetọ etọn lẹ mẹ yinuwa taidi mẹhe jlo na hodo e. (Joh. 6:22-24) Ṣigba, Jesu he sọgan mọnú jẹ ahun mẹ doayi e go dọ yé tindo ojlo na núdùdù hugan nuhe ewọ plọn yé lẹ. (Joh. 2:25) E doayi nuhe ma sọgbe lọ go, bo yí homẹfa do wọhẹ yé, bosọ dọ lehe yé sọgan basi vọjlado do na yé.—Hia Johanu 6:25-27.
Be ovi towe yiwanna azọ́n yẹwhehodidọ tọn bo nọ mọaleyi sọn e mẹ ya? (Pọ́n hukan 11)
11. (a) Nawẹ zinzin sọgan gọalọna we nado yọnẹn eyin ovi towe nọ mọ awuvivi to lizọnyizọn lọ mẹ gbọn? (b) Nawẹ a sọgan gọalọna ovi towe nado yiwanna lizọnyizọn lọ bo nọ mọaleyi sọn e mẹ gbọn?
11 Dile etlẹ yindọ a ma sọgan mọnú jẹ ahun mẹ, hiẹ lọsu sọgan yí zinzin zan nado yọ́n numọtolanmẹ ovi towe tọn gando lizọnyizọn kunnudegbe tọn go. Mẹjitọ susu nọ yí gbọjẹ kleun to kunnudegbe nado na dotẹnmẹ ovi yetọn lẹ nado gbọjẹ bo dùnú kavi fakọmẹ vude. Ṣigba, a sọgan mọnú zẹ̀ awusọhia gbonu tọn go bo kanse dewe dọ, ‘Be lizọnyizọn lọ wẹ nọ hẹn awuvivi wá na ovi ṣie ya kavi gbọjẹyíyí lọ?’ Eyin a doayi e go dọ ovi towe lẹ ma yiwanna lizọnyizọn lọ sọmọ kavi ma nọ mọaleyi sọn e mẹ, gọalọna yé nado ze yanwle lẹ dai. Kàn ayiha nado gọalọna yé, na yé nido nọ tindo mahẹ gigọ́ hẹ we to lizọnyizọn lọ mẹ.
12. (a) Avase tẹwẹ Jesu gbọn zinzin dali na hodotọ etọn lẹ? (b) Etẹwẹ dohia dọ avase Jesu tọn wá do gànmẹ?
12 Jesu sọ nọ yí zinzin zan nado yọ́n afọdide he nọ dekọtọn do ylando mẹ lẹ. Di apajlẹ, hodotọ etọn lẹ yọnẹn dọ galilọ ma sọgbe. Etomọṣo, Jesu na yé avase gando afọdide he nọ planmẹ jẹ galilọ kọ̀n lẹ go dọmọ: “Mẹdepope he zindonukọn nado to yọnnu de pọ́n kaka bo tindo ojlo zogbe de na ẹn ko deayọ hẹ ẹ dote to ahun etọn mẹ. Todin, eyin nukun towe adusiwhé tọn lọ to hinhẹn we dahli, sún in sẹ̀ bo ze e dlan sọn dewe go.” (Mat. 5:27-29) Avase ehe wá do gànmẹ taun na Klistiani he nọgbẹ̀ to gandudu Lomu tọn glọ lẹ. Whenuho-kantọ de wlan dọ to nupọntẹn Lomu tọn lẹ, “nukun nọ mọ bọ otó nọ sè onú gblezọn lẹ, podọ aihundida fẹnnuwiwa tọn lẹ wẹ gbẹtọ lẹ nọ hopẹ́ na hugan.” Lehe Jesu do owanyi po zinzin po hia do sọ, to whenue e na avase devi etọn lẹ gando nuhe sọgan hẹn ẹn vẹawuna yé nado gbọṣi wiweji to walọyizan-liho lẹ go!
13, 14. Nawẹ a sọgan basi hihọ́na ovi towe lẹ sọta ayidedai he ma sọgbe lẹ gbọn?
13 Zinzin sọgan gọalọna we nado basi hihọ́na ovi towe lẹ sọn nuhe sọgan yin owù na yé to gbigbọ-liho lẹ si. To egbehe, ovi lẹ sọgan pọ́n yẹdide fẹnnuwiwa tọn kavi hia nudọnamẹ mawé lẹ to ovu whenu hugan gbede pọ́n. Nugbo wẹ dọ mẹjitọ Klistiani lẹ nọ dọna ovi yetọn lẹ dọ ayidedai mawé lẹ ma sọgbe. Ṣigba, zinzin nasọ gọalọna we nado yọ́n nuhe sọgan sisẹ́ ovi towe nado jẹ ojlo tindo ji na yẹdide fẹnnuwiwa tọn pinpọn. Kanse dewe dọ: ‘Etẹwẹ sọgan sisẹ́ ovi ṣie nado pọ́n yẹdide fẹnnuwiwa tọn? Be e yọ́n nuhewutu e do yin owùnu sọmọ ya? Be n’yọ́n dọnsẹpọ sọmọ bọ e sọgan wá dè e nado biọ alọgọ to whedepopenu he e yin whiwhlepọn nado pọ́n yẹdide fẹnnuwiwa tọn ya?’ Eyin ovi towe lẹ tlẹ gbẹ́ yin yọpọvu taun, a sọgan dọna yé dọ: “Eyin mì yì nọtẹn Intẹnẹt tọn he nọ do yẹdide fẹnnuwiwa tọn hia de ji to mayọnẹn mẹ, bo yin whiwhlepọn nado pọ́n ẹn, mì jaale bo wá dọna mi. Mì ma kuwinyan blo. N’jlo na gọalọna mì wẹ.”
14 Zinzin nasọ gọalọna we nado nọ yí nuyọnẹn do de ayidedai towe lẹ. Pranas he yin nùdego wayi dọmọ: “Mẹjitọ lẹ nọ ze apajlẹ dai na whẹndo yetọn na nuhe dù húnhiho, sinima po owe he yelọsu nọ yiwanna lẹ po. A sọgan nọ dọho gando nususu go, amọ́ nuhe ovi towe lẹ mọdọ a nọ wà wẹ yelọsu na wà.” Eyin ovi towe lẹ mọdọ a nọ yí sọwhiwhe do de ayidedai he sọgbe lẹ, e yọnbasi dọ yelọsu na yin whinwhàn nado basi nudide dopolọ.—Lom. 2:21-24.
JIWHEYẸWHE NUGBO LỌ NA DOTOAINA WE
15, 16. (a) Naegbọn a sọgan kudeji dọ Jiwheyẹwhe na gọalọna we nado plọn ovi towe lẹ? (b) Etẹ ji wẹ mí na dọhodo to hosọ he bọdego mẹ?
15 Etẹwẹ jọ to whenue Manoa biọ alọgọ nado plọn visunnu etọn? “Jiwheyẹwhe sọ tuntoai na ogbè Manoa tọn.” (Whẹ. 13:9) Mẹjitọ lẹ emi, Jehovah na dotoaina mìlọsu. E na sè odẹ̀ mìtọn lẹ bo na gọalọna mì nado plọn ovi mìtọn lẹ. Mì sọgan tindo kọdetọn dagbe eyin mì nọ yí owanyi, whiwhẹ po zinzin po do wàmọ.
16 Kẹdẹdile Jehovah nọ gọalọna mẹjitọ lẹ nado plọn ovivu yetọn lẹ po kọdetọn dagbe po do, mọ wẹ e sọgan gọalọna mẹjitọ lẹ nado plọn jọja aflanmẹ yetọn lẹ do niyẹn. Hosọ he bọdego na dọhodo lehe a sọgan hodo apajlẹ owanyi, whiwhẹ po zinzin Jesu tọn po do nado plọn jọja aflanmẹ towe lẹ nado sẹ̀n Jehovah.
^ huk. 5 To Biblu mẹ, mẹplọnlọ nọ bẹ owanyi yíyí do deananamẹ, do plọnmẹ podọ do wọhẹmẹ hẹn. E sọ nọ bẹ yasanamẹ hẹn to whedelẹnu, ṣigba e ma nọ yin po homẹgble po gbede.
^ huk. 7 Otànwe de dọmọ: “To azán Jesu tọn gbè, ovi lẹ nọ saba yí hogbe lọ ʼabbāʼ zan to paa mẹ nado do haṣinṣan pẹkipẹki po sisi he yé tindo na otọ́ yetọn lẹ po hia.”—The International Standard Bible Encyclopedia.
