1. Wetin Manoa bin du we i yɛri se i de kam bi papa?

MANOA ɛn in wɛf bin biliv se dɛn nɔ go ebul fɔ bɔn pikin. Bɔt wan de in wɛf kam tɛl am nyus we bin mek i rili sɔprayz. No nyus nɔ de we bin fɔ dɔn mek i sɔprayz pas dis. Jiova in enjɛl bin dɔn apia to di uman, ɛn di tin we nɔ bin pɔsibul kam fɔ bi tru: Manoa ɛn in wɛf de kam bɔn bɔy pikin! Manoa go mɔs dɔn gladi, bɔt i bin no se i gɛt big wok fɔ du. So aw in ɛn in wɛf go ebul fɔ mɛn dɛn pikin fɔ sav Gɔd we di Izrɛlayt dɛn bin de du bad bad tin dɛn? Manoa beg Jiova “lɛ i sɛn di enjɛl we i bin sɛn go bak to dɛn go tich dɛn aw dɛn go mɛn di bɔbɔ we i go bɔn.”—Jɔj 13:1-8.

2. Wetin i min fɔ tren yu pikin? (Luk di bɔks we gɛt di taytul “Yu Baybul Stɔdi we Impɔtant Pas Ɔl.”)

² If yu na mama ɔ papa, sɔntɛm yu go ɔndastand wetin mek Manoa bin rili beg Gɔd lɛ i ɛp am. Yusɛf gɛt big wok fɔ ɛp yu pikin fɔ no Jiova ɛn lɛk am. * (Prɔv. 1:8) Bikɔs mama ɛn papa dɛn we na Kristian no dis, dɛn dɔn arenj fɔ de du  Famili Wɔship we go rili ɛp dɛn pikin dɛn fɔ lan bɔt Jiova. Bɔt fɔ mek di tru tin dɛn we de na di Baybul tɔch yu pikin in at, nɔto famili wɔship nɔmɔ yu fɔ de du. (Rid Ditarɔnɔmi 6:6-9.) Wetin go ɛp yu fɔ mek di tru tin dɛn we de na di Baybul tɔch yu pikin in at? Dis atikul ɛn di nɛks wan go tɔk bɔt aw mama ɛn papa dɛn go falamakata Jizɔs in ɛgzampul. Pan ɔl we Jizɔs nɔto bin papa, plɛnti tin dɛn de we mama ɛn papa dɛn kin lan frɔm di we aw i bin de tich. Di we aw Jizɔs bin de tich ɛn tren in disaypul dɛn bin de sho se i lɛk dɛn, i ɔmbul, ɛn i bin de tink gud wan bɔt aw fɔ ɛp dɛn. Lɛ wi tɔk bɔt dɛn kwaliti dɛn ya wan bay wan.

3. Aw Jizɔs bin de sho se i lɛk in disaypul dɛn?

³ Jizɔs bin de tɛl in disaypul dɛn se i lɛk dɛn. (Rid Jɔn 15:9.) I bin sho bak se i lɛk dɛn we i bin de spɛn tɛm wit dɛn ɔltɛm. (Mak 6:31, 32; Jɔn 2:2; 21:12, 13) Nɔto tich nɔmɔ Jizɔs bin de tich dɛn, in na bin dɛn padi. So, dɛn nɔ bin de dawt if i rili lɛk dɛn. Aw yu go falamakata di we aw Jizɔs bin de tich?

4. Aw yu go mek yu pikin dɛn no se yu lɛk dɛn? (Luk di pikchɔ nia dis atikul in taytul.)

⁴ Tɛl yu pikin dɛn se yu lɛk dɛn, ɛn go de sho dɛn ɔltɛm se dɛn impɔtant to yu. (Prɔv. 4:3; Tay. 2:4) Wan brɔda na Ɔstrelia we nem Samiɛl, tɔk se: “We a bin smɔl, mi papa bin de rid Mi Baybul Stori Buk to mi ɛni ivintɛm. I bin de ansa mi kwɛstyɔn dɛn, ɔg mi, ɛn kis mi bifo a slip. A bin rili sɔprayz we a kam fɔ no se mi papa mɛn na famili usay dɛn nɔ bin de kis ɛn ɔg! Bɔt i bin de tray tranga wan fɔ sho se i lɛk mi. Dis bin mek mi ɛn mi papa kam fɔ bi tayt padi, ɛn a bin rili satisfay ɛn fil sef.” Fɔ ɛp yu pikin dɛn fɔ fil dis we, go de tɛl dɛn ɔltɛm se “A lɛk yu.” Sho se yu lɛk yu pikin dɛn. Tɔk wit dɛn, it wit dɛn, ɛn ple wit dɛn.

5, 6. (a) Wetin Jizɔs bin de du to di wan dɛn we i lɛk? (b) Ɛksplen aw gud trenin kin ɛp pikin dɛn fɔ fil sef ɛn no se dɛn mama ɛn papa lɛk dɛn.

⁵ Jizɔs bin tɔk se: “A kin kɔrɛkt ɛn tren ɔl di wan dɛn we a lɛk.” * (Rɛv. 3:19, NW) Pan ɔl we Jizɔs in disaypul dɛn bin de agyu ɔltɛm bɔt uswan pan dɛn fɔ bi di edman, Jizɔs nɔ bin taya pan dɛn. Jizɔs nɔ bin lɛf dɛn to dɛnsɛf we dɛn nɔ fala in advays. Bikɔs Jizɔs bin lɛk dɛn, i bin de tɔk saful wan fɔ kɔrɛkt dɛn na di rayt ples ɛn di rayt tɛm.—Mak 9:33-37.

⁶ Sho se yu lɛk yu pikin dɛn bay we yu de tren dɛn. Sɔm tɛm dɛn de yu pikin go obe yu we yu ɛksplen to am wetin mek sɔm tin rayt ɔ rɔng. Bɔt ɔda tɛm, i nɔ go du wetin yu dɔn tɛl am. (Prɔv. 22:15) We dis kayn tin apin, falamakata Jizɔs. Kɔntinyu fɔ tren yu pikin wit lɔv bay we yu de peshɛnt fɔ advays am ɛn kɔrɛkt am. Fɛn di rayt tɛm ɛn di rayt ples fɔ tren am, ɛn tek tɛm we yu de du am. Wan sista na Sawt Afrika we nem Ilen bin mɛmba aw in mama ɛn papa bin de tren am. I tɔk se: “If dɛn wɔn mi bɔt wetin dɛn go du to mi we a biev bad, dɛn de du wetin dɛn bin dɔn tɔk. Bɔt dɛn nɔ bin de ɛva kɔrɛkt mi wit wamat ɔ nɔ ɛksplen to mi di rizin we mek dɛn de kɔrɛkt mi. Bikɔs dɛn bin de tren mi dis we, i mek a fil sef. A bin no wetin-ɛn-wetin a nɔ fɔ du, ɛn a ɔndastand wetin a fɔ du.”

7, 8. (a) Aw Jizɔs bin sho se i ɔmbul we i de pre? (b) Aw di pre we yu kin pre go tich yu pikin dɛn fɔ abop pan Gɔd?

⁷ Tink bɔt aw Jizɔs in disaypul dɛn go dɔn fil we dɛn yɛri ɔ kam fɔ no bɔt wan pan di las prea dɛn we Jizɔs bin pre di tɛm we in na bin mɔtalman. We Jizɔs bin de pre to Jiova, i tɔk se: “Mi Papa, yu ebul du ɔltin, duya, nɔ mek a sɔfa dis sɔfa we a fɔ sɔfa, bɔt ɛniwe, nɔ du wetin a want, du wetin yu want.” (Mak 14:36) Jizɔs in prea go mɔs dɔn ɛp in disaypul dɛn fɔ no se if Gɔd in Pikin we bin pafɛkt bin de pre ɔmbul wan fɔ lɛ Gɔd ɛp am, dɛnsɛf fɔ du di sem tin.

⁸ Wetin yu pikin dɛn kin lan frɔm yu we yu de pre? Na tru se yu nɔ jɔs de pre to Jiova fɔ tich yu pikin dɛn. Bɔt we yu put yusɛf dɔŋ ɛn pre to Jiova bifo yu pikin dɛn, yu pikin dɛn go lan fɔ abop pan Jiova. Wan sista na Brazil we nem Ana tɔk se: “We prɔblɛm dɛn kin de, lɛk we mi granpa ɛn mi grani bin sik, mi mama ɛn papa kin beg Jiova fɔ ɛp dɛn fɔ bia wit di prɔblɛm ɛn gi dɛn sɛns fɔ disayd fɔ du di rayt tin. Ivin we tin kin dɔn rili mɔna dɛn, dɛn kin lɛf dɛn prɔblɛm dɛn na Jiova in an. Bikɔs dɛn bin de du dis, misɛf lan fɔ abop pan Jiova.” We yu de pre wit yu pikin dɛn, nɔ jɔs pre fɔ dɛn. Bɔt i go fayn mek yu beg Jiova lɛ i ɛp yusɛf, so dat i go ɛp yu fɔ tɔk to yu bɔs fɔ gi yu chans fɔ go kɔnvɛnshɔn, fɔ lɛ i mek yu nɔ fred fɔ prich to yu neba, ɔ fɔ ɛp yu ɔda we dɛn. We yu ɔmbul yusɛf ɛn abop pan Gɔd, yu pikin dɛn go lan fɔ du di sem tin.

9. (a) Aw Jizɔs tich in disaypul dɛn fɔ put dɛnsɛf dɔŋ we dɛn de sav ɔda pipul dɛn? (b) If yu rɛdi fɔ sav ɔda pipul dɛn, wetin yu pikin dɛn go lan frɔm dat?

⁹ Jizɔs bin tren in disaypul dɛn fɔ put  dɛnsɛf dɔŋ ɛn sav ɔda pipul dɛn bay di tin dɛn we i bin de tɔk ɛn du. (Rid Lyuk 22:27.) I tich in disaypul dɛn lɛ dɛn nɔ de tink bɔt dɛnsɛf nɔmɔ we dɛn de sav Jiova ɛn we dɛn de du tin wit dɛn kɔmpin Kristian dɛn. We yu bak put yusɛf dɔŋ ɛn nɔ jɔs de tink bɔt yusɛf, yu go tich yu pikin dɛn fɔ du di sem tin. Wan sista we nem Dɛbi, we gɛt tu pikin dɛn tɔk se: “A nɔ bin de ɛva jɛlɔs we mi man we na ɛlda de spɛn tɛm wit ɔda pipul dɛn. A bin no se ɛnitɛm we wi famili nid mi man, i de gi wi in atɛnshɔn.” (1 Tim. 3:4, 5) In man we nem Pranas, tɔk se: “Leta, wi pikin dɛn bin lɛk fɔ ɛp na wi asɛmbli dɛn ɛn ɔda program dɛn we wi kin gɛt fɔ sav Jiova. Dɛn bin gladi, dɛn bin gɛt gud padi dɛn, ɛn dɛn bin rili lɛk fɔ de wit di brɔda ɛn sista dɛn!” Naw di wan ol famili de yuz ɔl dɛn tɛm fɔ sav Jiova. We yu sho se yu ɔmbul ɛn yu nɔ jɔs bisin bɔt yusɛf, yu pikin dɛn go lan aw fɔ sav ɔda pipul dɛn.

10. We bɔku pipul dɛn kam fɔ si Jizɔs, aw i sho se i de tink gud wan?

¹⁰ Jizɔs bin sho se i de tink gud wan. Wetin mek wi se so? Na bikɔs i nɔ bin jɔs de si wetin pipul dɛn de du, bɔt i bin de tray fɔ ɔndastand wetin mek dɛn du sɔntin. Wan tɛm, i bin tan lɛk se sɔm pan di wan dɛn we de lisin to am na Galili bin gladi fɔ fala am. (Jɔn 6:22-24) Bɔt Jizɔs, we no wetin de na pɔsin in at, bin kam fɔ no se na di it mɔ di pipul dɛn bin lɛk, nɔto di tich we i bin de tich dɛn. (Jɔn 2:25) I si di prɔblɛm we dɛn bin gɛt, so i tek tɛm kɔrɛkt dɛn, ɛn ɛksplen to dɛn aw dɛn go chenj.—Rid Jɔn 6:25-27.

11. (a) Gi wan ɛgzampul we de sho se we mama ɔ papa tink gud wan, i kin ɛp am fɔ no if in pikin de ɛnjɔy di prichin wok. (b) Aw yu go mek yu pikin ɛnjɔy di prichin wok?

¹¹ Pan ɔl we yu nɔ de si wetin de insay pɔsin in at, yusɛf go sho se yu de tink gud wan ɛn tray fɔ no aw yu pikin de fil bɔt di prichin wok. Bɔku mama ɛn papa dɛn kin blo smɔl wit dɛn pikin dɛn ɛn it smɔl tin we dɛn dɔn prich fɔ sɔm tɛm. Bɔt yu kin tink gud wan ɛn aks yusɛf se, ‘Mi pikin kin ɛnjɔy di prichin wok ɔ na di blo we wi kin blo ɛn it na in nɔmɔ i kin ɛnjɔy?’ If yu kam fɔ no se yu pikin dɛn nɔ de rili ɛnjɔy di prichin wok, plan sɔntin we yu  go du wit dɛn fɔ mek dɛn ɛnjɔy am. Gi dɛn smɔl smɔl wok we dɛn go de du as dɛn de prich wit yu.

12. (a) Aw Jizɔs bin sho se i de tink gud wan we i wɔn in disaypul dɛn bɔt mami ɛn dadi biznɛs di we aw Gɔd nɔ want? (b) Wetin mek na di rayt tɛm Jizɔs bin wɔn dɛn?

¹² Jizɔs bin sho bak se i de tink gud wan we i sho wetin go mek pɔsin sin. Fɔ ɛgzampul, in disaypul dɛn bin no se i bad fɔ du mami ɛn dadi biznɛs wit pɔsin we dɛn nɔ mared to. Bɔt Jizɔs tɛl dɛn wetin go mek pɔsin du mami ɛn dadi biznɛs wit sɔmbɔdi we i nɔ mared to. I tɛl dɛn se: “Ɛni man we luk uman, we nɔto in wɛf, sote i want am fɔ insɛf, da man de dɔn tek ɔda man wɛf nain at. So if yu rayt yay de mek yu sin, rut am kɔmɔt ɛn trowe am!” (Mat. 5:27-29) Jizɔs bin gi dis advays di rayt tɛm fɔ Kristian dɛn we bin de ɔnda di Roman dɛn. Wan man we de rayt istri tɔk se we di Roman dɛn bin de akt ple na stej, “pipul dɛn bin de si ɛn yɛri tin dɛn we nɔ fayn ɛn na dɛn rud rud say dɛn na di ple pipul dɛn kin gladi fɔ mɔ.” Jizɔs sho se i rili lɛk in disaypul dɛn we i wɔn dɛn bɔt tin dɛn we go mek i nɔ izi fɔ dɛn fɔ du wetin rayt!

13, 14. Aw yu go protɛkt yu pikin dɛn lɛ dɛn nɔ put an pan ɛnjɔymɛnt we nɔ fayn?

¹³ We yu de tink gud wan, i go ɛp yu fɔ protɛkt yu pikin dɛn lɛ dɛn nɔ put an pan bad tin. Tide, pikin dɛn kin si dɛn rud rud pikchɔ dɛn pas aw i bin de bi trade. Na tru se mama ɛn papa dɛn we na Kristian kin tɛl dɛn pikin dɛn se i nɔ fayn fɔ ɛnjɔy dɛnsɛf di we we nɔ rayt. Bɔt we yu tink gud wan, i go ɛp yu fɔ no wetin go mek yu pikin want fɔ wach dɛn rud rud pikchɔ dɛn. Aks yusɛf dɛn kwɛstyɔn ya: ‘Wetin go tɛmt mi pikin fɔ wach dɛn rud rud pikchɔ dɛn? I no wetin mek i rili bad? A izi fɔ tɔk to, so dat i go kam to mi fɔ lɛ a ɛp am if ɛnitin tɛmt am fɔ wach dɛn rud rud pikchɔ dɛn?’ Ivin we yu pikin dɛn stil yɔŋ, yu kin tɛl dɛn se: “If yu ɛva si Wɛbsayt we de sho dɛn rud rud pikchɔ dɛn ɛn yu want fɔ wach dɛn, duya kam tɛl mi. Yu nɔ nid fɔ shem. A want fɔ ɛp yu.”

¹⁴ We yu tink gud wan, i go ɛp yu fɔ pik di rayt we fɔ ɛnjɔy yusɛf. Pranas tɔk se: “Di myuzik, fim, ɛn buk dɛn, we wi as mama ɛn papa dɛn de wach na in di famili sɛf go de wach. Yu go tɔk bɔku bɔt plɛnti tin dɛn, bɔt yu pikin dɛn go wach wetin yu de du ɛn falamakata yu.” If yu pikin dɛn si se yu de tek tɛm pik di we aw yu de ɛnjɔy yusɛf, dɛnsɛf go want fɔ du di sem tin.—Rom 2:21-24.

15, 16. (a) Wetin mek yu biliv se Gɔd go ɛp yu fɔ tren yu pikin dɛn? (b) Wetin wi go tɔk bɔt na di nɛks atikul?

¹⁵ Wetin apin we Manoa beg Gɔd lɛ i ɛp am fɔ mɛn in bɔy pikin? “PAPA GƆD yɛri Manoa in prea.” (Jɔj 13:9) Mama ɛn papa dɛn, Jiova go lisin to unasɛf. I go ansa una prea dɛn ɛn ɛp una fɔ tren una pikin dɛn. Una go ebul fɔ du so we una sho se una lɛk dɛn, una ɔmbul, ɛn una de tink gud wan.

¹⁶ Jɔs lɛk we Jiova kin ɛp mama ɛn papa dɛn fɔ tren dɛn smɔl pikin dɛn di rayt we, na so bak i go ɛp mama ɛn papa dɛn fɔ tren dɛn pikin dɛn we dɔn pas 12 ia. Di nɛks atikul go sho yu aw yu go falamakata Jizɔs fɔ sho lɔv, fɔ put yusɛf dɔŋ, ɛn tink gud wan we yu de tren yu pikin dɛn we dɔn pas 12 ia fɔ sav Jiova.