1. Kon Manoa a reakshoná ora el a tende ku lo e bira tata?

MANOA no por a kere loke e tabata tende: su esposa tabata na estado. Kon esei por tabata posibel si su kasá no por a haña yu? Un angel a aparesé na e esposa di Manoa i bis’é ku lo e bira mama. Sin duda, Manoa a bira masha kontentu, pero e tabata sa ku komo mayor esei lo a dun’é un responsabilidat grandi. Kon nan lo por a siña nan yu sirbi Yehova den un nashon den kua tabata reina asina tantu maldat? “Manoa a supliká SEÑOR i a bisa: ‘O SEÑOR, por fabor, laga e hòmber di Dios ku bo a manda bini serka nos atrobe, pa e siña nos kiko nos mester hasi pa e mucha ku mester nase.’”—Hues. 13:1-8.

2. Kiko bo tin ku siña bo yu, i kon bo por hasi esei? (Wak e kuadro “ Bo Studiante di Mas Importante.”)

² Si abo ta un mayor, bo por komprondé pakiko Manoa a roga Yehova pa yudansa. Abo tambe tin e responsabilidat grandi di yuda bo yu siña konosé Yehova i stim’é. (Pro. 1:8) Pa logra esei, mayornan kristian mester tin un bon programa di Adorashon Komo Famia pa yuda nan yunan. Ta klaru ku bo tin ku hasi mas ku djis studia ku bo yunan un biaha pa siman pa e bèrdat por keda grabá den nan mente. (Lesa Deuteronomio 6:6-9.) Kiko lo yuda bo inkulká e bèrdat den bo yunan?  E artíkulo akí i esun siguiente lo mustra kon mayornan por sigui e ehèmpel di Hesus. Aunke Hesus no tabata un tata, mayornan por benefisiá di e manera ku el a siña i entrená su disipelnan ku amor, humildat i disernimentu. Laga nos konsiderá kada un di e kualidatnan akí.

3. Kon Hesus a mustra su disipelnan ku e ta stima nan?

³ Hopi biaha Hesus a bisa su disipelnan ku e ta stima nan. (Lesa Huan 15:9.) El a demostrá e amor akí pasando hopi tempu ku nan. (Mar. 6:31, 32; Huan 2:2; 21:12, 13) Hesus tabata no solamente nan maestro; e tabata nan amigu tambe. P’esei, su disipelnan no tabatin niun duda ku Hesus tabata stima nan. Kiko bo por siña for di Hesus?

4. Kon bo por mustra bo yunan ku bo ta stima nan? (Wak e promé plachi.)

⁴ Bisa bo yunan ku bo ta stima nan, i mustra nan regularmente kon importante nan ta pa bo. (Pro. 4:3; Tito 2:4) Samuel, ku ta biba na Australia, a bisa: “Tempu mi tabata chikitu, mi tata tabata lesa Mi Buki di Relato Bíbliko tur anochi pa mi. E tabata kontestá mi preguntanan, brasa mi i duna mi un sunchi promé ku mi bai drumi. Mi a keda hopi sorprendí ora mi a haña sa despues ku mi tata a lanta den un famia ku no tabatin e kustumber di duna brasa i sunchi. Pero tòg e tabata hasi esfuerso pa mustra mi ku e ta stima mi. Komo resultado, mi tabatin un bon relashon kuné, i mi tabata sinti mi felis i safe.” Bo tambe por yuda bo yunan sinti asina si bo bisa nan regularmente: “Mi stima bo.” Mustra kariño na bo yunan. Papia ku nan, kome ku nan i hunga ku nan.

5, 6. (a) Kiko Hesus ta hasi pa esnan ku e ta stima? (b) Kon nos mester disipliná nos yunan?

⁵ Hesus a bisa: “Mi ta reprendé i disipliná  tur esnan ku mi tin kariño p’e.” * (Rev. 3:19) Por ehèmpel, konstantemente e disipelnan di Hesus tabata diskutí tokante ken tabata esun di mas grandi entre nan. Hesus no a sera wowo pa e problema akí. Al kontrario, el a sigui duna nan konseho. Semper e tabata amabel, i e tabata buska e momento i lugá apropiá pa reprendé nan.—Mar. 9:33-37.

⁶ Ora bo ta disipliná bo yunan, bo ta demostrá ku bo ta stima nan. Tin biaha bo tin ku djis splika nan pakiko loke nan a hasi ta bon òf malu. Pero, kiko si bo yu no hasi kaso di loke bo bis’é? (Pro. 22:15) Ora esei sosodé, imitá Hesus. Sigui duna bo yu e guia, entrenamentu i korekshon ku e tin mester na un manera suave i amoroso. I semper purba di skohe e momento i lugá apropiá pa hasi esaki. Un ruman muhé ku yama Elaine, ku ta biba na Sur Afrika, a bisa: “Ora mi mayornan tabata disipliná mi, semper nan tabata konsistente. Si nan a bisa mi ku lo tin konsekuensia si mi sigui komportá mi mes malu, semper nan tabata tene nan mes na nan palabra. Pero nunka nan a disipliná mi ku rabia òf keda sin splika mi pakiko nan a straf mi. Komo resultado, mi tabata sinti mi safe. Mi tabata komprondé e límitenan ku nan a pone pa mi i loke nan tabata spera di mi.”

7, 8. (a) Kiko e disipelnan di Hesus a siña di su orashonnan? (b) Kon bo orashonnan por siña bo yunan dependé riba Dios?

⁷ Poko promé ku nan a arestá i mata Hesus, el a roga su Tata: “Abba, Tata, tur kos ta posibel pa bo; kita e kopa akí for di mi. Sinembargo, no loke ami ke, sino loke abo ke.” * (Mar. 14:36) Imaginá kon e disipelnan lo a sinti nan ora nan a skucha òf a haña sa tokante e orashon ei. Nan a realisá ku asta Hesus komo un hòmber perfekto a dependé riba Yehova pa yudansa. Pues nan a siña ku nan tambe mester ta humilde i dependé riba Yehova.

⁸ Bo yunan por siña hopi di bo orashonnan. Ta bèrdat ku e motibu prinsipal pa hasi orashon no ta djis pa duna bo yunan un lès. Sinembargo, si nan ta skucha bo hasi orashon na un manera humilde, nan lo siña dependé riba Yehova. Ana, kende ta biba na Brazil, a bisa: “Ora mi mayornan tabatin problema, por ehèmpel tempu ku mi welanan tabata malu, nan tabata pidi Yehova pa duna nan forsa pa enfrentá e situashon i e sabiduria pa tuma bon desishon. Aunke nan tabata bou di hopi preshon, semper nan a laga tur kos den man di Yehova. Komo resultado, mi a siña dependé riba Yehova.” Ora bo hasi orashon ku bo yunan, no resa solamente pa nan. Pidi Yehova pa yuda bo mes tambe. Por ehèmpel, bo por pidié kurashi pa prediká òf pa papia ku bo doño di trabou pa bo haña dia liber pa asistí na kongreso. Si bo yunan mira ku bo ta humilde i ta dependé riba Dios, nan tambe lo siña hasi meskos.

9. (a) Kon Hesus a siña su disipelnan pa ta humilde? (b) Kiko bo yunan lo siña si nan mira ku bo tin un spiritu di sakrifisio propio?

⁹ Hesus a bisa su disipelnan pa ta  humilde, i e mes a pone un bon ehèmpel den esei. (Lesa Lukas 22:27.) El a siña su apòstelnan pa mustra un spiritu di sakrifisio propio den nan sirbishi na Yehova i den nan trato ku otro rumannan. Pa medio di bo ehèmpel di humildat i sakrifisio propio, bo por siña bo yunan e mesun lès. Debbie, mama di dos yu, a bisa: “Mi kasá ta un ansiano, pero nunka mi a hasi kos di yalurs pa e tempu ku e mester a dediká na otronan. Mi tabata sa ku semper nos por a dependé riba dje ora nos tabatin mester di su atenshon.” (1 Tim. 3:4, 5) Su esposo, Pranas, a konta kon nan ehèmpel komo mayor a yuda nan yunan. El a bisa: “Ora nos yunan a bira un poko mas grandi, nan tabata gusta partisipá den aktividatnan di kongregashon i yuda na asambleanan. Nan a hasi progreso, nan a haña amigu i nan tabata felis.” Awor, henter e famia ta sirbi Yehova den e trabou di tempu kompleto. Si bo ta humilde i ta mustra un spiritu di sakrifisio propio, bo yunan lo siña hasi meskos.

10. Ora un multitut a bini serka Hesus, kon el a mustra disernimentu?

¹⁰ Hesus a mustra disernimentu. E no tabata konsentrá solamente riba loke hende tabata hasi sino tambe e motibu pakiko nan tabata hasi algu. E por a lesa kurason. Por ehèmpel, na un okashon, tabata parse ku algun hende na Galilea kier a sigui Hesus. (Huan 6:22-24) Pero e por a diserní ku e hendenan tabata mas interesá den kuminda ku den loke e tabata siña nan. (Huan 2:25) Hesus a mira kiko tabata nan motivashon, el a korigí nan ku pasenshi i a splika nan kiko nan mester a hasi pa kambia.—Lesa Huan 6:25-27.

11. (a) Duna un ehèmpel kon disernimentu por yuda bo mira si bo yu ta gusta sirbishi òf nò. (b) Kon bo por yuda bo yu disfrutá di sirbishi?

¹¹ Aunke bo no por lesa kurason, bo tambe por mustra disernimentu i haña sa kiko bo yu ta pensa di sirbishi. Hopi  mayor ta tuma un pousa durante sirbishi pa nan yunan por deskansá i kome òf bebe algu. Bo por puntra bo mes: ‘Mi yu ta gusta sirbishi òf solamente e pousa ku nos sa tuma?’ Si bo ripará ku bo yu no ta gusta sirbishi mashá, purba di hasié mas interesante p’e. Dun’é kos chikitu pa hasi durante sirbishi pa e por sinti su mes útil.

12. (a) Ki spièrtamentu Hesus a duna su disipelnan? (b) Dikon e disipelnan di Hesus tabatin mester di e spièrtamentu akí?

¹² Den ki manera mas Hesus a mustra disernimentu? Wèl, e tabata sa kiko por pone un persona kometé piká. Por ehèmpel, su disipelnan tabata sa ku inmoralidat seksual ta malu. Pero Hesus a mustra nan kiko lo por pone un persona kometé inmoralidat. El a bisa: “Ken ku sigui wak un muhé ku pashon, ya kaba a kometé adulterio kuné den su kurason. Awor bon, si bo wowo drechi ta pone bo trompeká, sak’é tira afó.” (Mat. 5:27-29) E palabranan ei tabata nèt loke e kristiannan, ku tabata biba bou di e Imperio Romano, tabatin mester. Segun un historiadó, den e teaternan romano tabatin obranan yen di palabra malu i esenanan inmoral. El a bisa: “E esenanan mas erótiko tabata haña mas aplouso.” Pues, tabata hopi amoroso di Hesus su parti pa spièrta su disipelnan di kosnan ku por a stroba nan di keda moralmente limpi.

13, 14. Kon bo por protehá bo yunan di entretenimentu inmoral?

¹³ Disernimentu por yuda bo protehá bo yunan di kosnan ku lo por kousa nan daño spiritual. Awe ta mas fásil ku nunka pa mucha bini den kontakto ku pornografia òf otro entretenimentu inmoral. Ta klaru ku mayornan kristian ta siña nan yunan ku entretenimentu inmoral ta malu. Sinembargo, disernimentu por yuda bo komprondé kiko por lanta e kuriosidat di bo yu pa wak pornografia. Puntra bo mes: ‘Kiko ta loke por pone mi yu wak pornografia? E sa dikon pornografia ta peligroso? Mi yu tin e konfiansa pa bini serka mi si e haña su mes ku e tentashon pa wak pornografia?’ Asta si bo yunan ta hopi chikitu, bo por bisa nan: “Si bo topa ku un website inmoral i haña gana di wak e, bini serka mi i bisa mi. No tene bèrgwensa, mi ke yuda bo.”

¹⁴ Disernimentu lo yuda bo skohe bon entretenimentu. Nos mester duna nos yunan un bon ehèmpel den esei. Pranas, kende nos a menshoná mas promé, a bisa: “Bo por bisa bo yunan hopi kos, pero nan lo imitá loke abo ta hasi.” Si semper bo ta skohe músika, pelíkula òf buki ku ta moralmente limpi, bo yunan lo hasi meskos.—Rom. 2:21-24.

15, 16. (a) Dikon bo por ta sigur ku Dios lo yuda bo entrená bo yunan? (b) Kiko nos lo konsiderá den e siguiente artíkulo?

¹⁵ Kiko a sosodé ora Manoa a pidi Yehova pa yud’é kria su yu? “Dios a skucha bos di Manoa.” (Hues. 13:9) Mayornan, Yehova lo skucha boso tambe. E lo kontestá boso orashonnan i yuda boso entrená boso yunan. Boso por logra esei ku amor, humildat i disernimentu.

¹⁶ Meskos ku Yehova ta yuda mayornan entrená nan yunan chikitu ku éksito, asina tambe lo e yuda mayornan entrená nan yunan tiner. E siguiente artíkulo lo mustra kon bo por imitá Hesus su amor, humildat i disernimentu ora di entrená bo yu tiner pa sirbi Yehova.