Mosisecheklii a Ngelekem el Mo Mesiou er a Jehovah

“Ak ulengit . . . me ngikel chad er a Dios el mulderchii lluut el mei, me le sbedemam el kmo aki mo mekera er ngii el buik sel le mechell.”​—MEN. 13:8.

CHELITAKL: 41, 6

KE MEKERANG E OUKEREBAI ER A JESUS . . .

el olecholt er a bltikerreng?

el olecholt er a klengariourreng?

el olecholt er a klemedengei?

1. Ngmilekerang a Manoa er sera bo lodengei el kmo ngdi kmedu el mo oungalek?

 A MANOA me a bechil a mle ulterekokl a rengrir el kmo ngdiak el sebechir el mo oungalek. E a ta er a klebesei e a anghel er a Jehovah a silbedii a bechil a Manoa el kmo, ngmo er ngii a ngelekel el sechal. Me ngkmal mlo ungil a rengul me sera lesbedii a Manoa e ngdirrek el kmal mlo ungil a rengul. Me nguaisei, engdi a Manoa a mle medengei el kmo ngmla moterekokl er ngii a klou el ngerachel. Me te mekerang e mo ungil el osisecheklii a ngelekir el mo betik a rengul er a Jehovah e mo mesiou er ngii er a chelsel a beluu er a Israel el kmal betok a remekngit el chad er ngii? A Manoa a milluluuch el mo er a Jehovah el kmo, “Ak ulengit e RUBAK, me ngikel chad er a Dios el mulderchii lluut el mei, me le sbedemam el kmo aki mo mekera er ngii el buik sel le mechell.”​—Men. 13:1-8.

2. Ngkirem el olisechakl er a rengelekem er a ngerang, e mekerang a omoruul er ngii? (Dirrek el momes er a baks el “ A Kot el Ngaruchei el Chad el Mosuub a Biblia el Obengkel.”)

² Me a lsekum ke oungalek e ke locha medengelii a uldesuel a Manoa. E le ngdirrek el ngerechelem el olengeseu er a rengelekem el mo medengelii e mo betik a rengrir er a Jehovah. (Osi. 1:8) Ngar er a temel  a omengull el telungalek e ngsebechem el melemolem el olisechakl er tir el kirel a Jehovah me a Biblia. Engdi ngar er ngii a lmuut el betok el tekoi el dirk kirem el meruul, el diak di lomesubel a Biblia el obengterir e lemerekong. (Monguiu er a Duteronomi 6:6-9.) Ngera dirrek el sebechel el ngosukau el olisechakl er a rengelekem el mo betik a rengrir er a Jehovah e mesiou er ngii? Ngar tia el suobel e kede mo mesaod er a kerebil a Jesus. Alta e ngdimlak loungalek, engdi ngsebechem el suub a betok er sel rolel er a lomekrael e lolisechakl er a redisaiplo er ngii. Ngmle betik a rengul er tir e dirrek el kmal mle ngariou a rengul. Ngdirrek el mle klou a klemedengei er ngii e le ngmle ungil el medengei a uldesuir e mle meduch el olengeseu er tir. Mada me bo desa rolel e ngsebeched el oukerebai er a Jesus.

BO LEBETIK A RENGUM ER A RENGELEKEM

3. A redisaiplo er a Jesus te milekerang e mo medengei el kmo ngbetik a rengul er tir?

³ A Jesus a mle blechoel el ouchais er a redisaiplo er ngii el kmo ngbetik a rengul er tir. (Monguiu er a Johanes 15:9.) Ngdirrek el milengoit er a klou el temel el obengterir. (Mk. 6:31, 32; Jn. 2:2; 21:12, 13) A Jesus a dimlak di el sensei er tir e ngdirrek el mle sechelirir. Me te ulterekokl el mle medengei el kmo ngkmal mle betik a rengul er tir. Me ngera sebeched el suub er a Jesus?

4. Ke mekerang e ochotii er a rengelekem el kmo ngbetik a rengum er tir? (Momes er a siasing er a uchelel a suobel.)

⁴ Mouchais er a rengelekem el kmo ngbetik a rengum er tir e mochotii er tir el kmo te meklou a ultutelir er a uldesuem. (Osi. 4:3; Tit. 2:4) A Samuel el kiei er a Australia a kmo: “Sera dirk kekerei e a demak a mle bek el kesus el longuiu er A Babilengek el kirel a Cheldecheduch er a Biblia el mei er ngak. Ngdi mle blechoel el onger a kerik, e omechull er ngak e melungel er a medak er a bek el taem el bo kmechiuaiu. Me ngkmal mlo mechas a renguk er a uriul er a bo kudengei el kmo a Demak a mlukeroul er a chelsel a telungalek el dimlak a klaiuechull me a ketungel mad er a chelsel! Me nguaisei, engdi ngmera el ulechotii a bltkil a rengul el me er ngak el mlo uchul a kmes el delongelam e ak mlo melechesuar a ulekerreu.” Me mngesuterir a rengelekiu el mo oubltikerreng el okiu sel bo blechoel el dmu er tir el kmo, “Ngbetik a renguk er kau.” Momechull e molungel a mederir, e mongoit a temem el mengedecheduch e momengur e moilil el obengterir.

5, 6. (a) Ngera ngmirruul er ngii a Jesus el mo er a rebetik er a rengul el disaiplo er ngii? (b) A ruungalek ngkirir el mekerang a lollach er a rengelekir?

⁵ A Jesus a dilu el kmo: “Ak uungeroel e omals er tirkel rokui el betik a renguk er tir.” * (Och. 3:19) El ua tiang, a redisaiplo er ngii a mle betok el taem el lekaititekangel el kmo ngtecha kot el ngarbab er tir el rokui. Me a Jesus a dimlak lolechib a osengel er tia el mondai. Ngbai uleba kllourreng e omeklatk er tir el betok el taem. Engdi ngmilengiil el mo er a ungil el taem me a basio e omeklemalt a uldesuir.​—Mk. 9:33-37.

⁶ Me kemiu el betik a rengmiu er a rengelekiu a uchul me kom medengei el kmo ngkmal kiriu el mellach er tir. A lebebil er a taem e ngsebeched el di smodii el mo er tir sel uchul me a tekoi el dilubech a melemalt me a lechub e ngcheleuid. Engdi ngmekerang a lsekum te di melemolem el diak lolengesenges? (Osi. 22:15) Sel bo leuaisei e moukerebai er a Jesus. Bo leklou a rengum e molemolem el mellach er tir el omekrael e olisechakl e omeklemalt er tir. Momes er a ungil el taem me a techall, e mollach er tir el ngar er a ungil el rolel. A odos er kid er a South Africa el Elaine a melatk er sel rolel er a demal me a delal a lollach er ngii. Te mle blechoel el ouchais er ngii a uldesuir. Me a lsekum te dilu er ngii el kmo ngmo mechelebed sel bo lak lorrenges e te mo rullii a tekoi el ledillii. Engdi ngdmu el kmo: “Ngdimlak a ta el taem el  lekesib a rengrir e lollach er ngak me a lechub e lak louchais er a uchul me ngkirek el mechelebed.” Me ngokiu a omerellir e ngmle ungil el medengei el kmo a demal me a delal a betik a rengrir er ngii.

BO MOBA KLENGARIOURRENG

7, 8. (a) Ngera te silubii a redisaiplo er a nglunguchel a Jesus? (b) Ngmekerang a nglunguchem e osisecheklterir a rengelekem el mo ultuil er a Dios?

⁷ Sel taem er a bochu lobdechem a Jesus e lokodir, e ngullengit er a Demal el kmo: “Chedam, Chedam! A rokui el tekoi a kmal di sebechem. Mnguu tial kob el choridii er ngak. Ngdi diak le sel soak; di le bor sel soam.” (Mk. 14:36) Ka molatk a uldesuir tirke el disaiplo er a lerengesii me a lechub e blo lodengelii a nglunguchel a Jesus er a uriul. Te mlo medengei el kmo alta ngmle cherrungel, engdi ngdirk ullengit a ngeso er a Demal. Me te silubii el kmo, tir me ngdirrek el kirir el mo ngariou a rengrir e dirrek el mo ultuil er a Jehovah el kirel a ngeso.

⁸ A rengelekem a sebechir el suub a betok el tekoi er a nglunguchem. Engdi tiang a diak lebelkul a kmo ke di meluluuch el olisechakl er tir e merekong. Sel moluluuch e lorrenges er kau e te mesuub el mo ultuil er a Jehovah. Me lak di moluluuch el olengit er a Jehovah me lolengeseu er tir, e bai molengit er ngii me lengesukau el dirrek. A Ana el kiei er a Brazil a kmo: “Sel lebo er ngii a mondai er a demak me a delak, el ua sel taem er a bo lsecher a remechudelang el demerir me a derrir, e te ullengit er a Jehovah me lebesterir a klisichir me a llomeserreng me bo el sebechir el outekangel e bo lungil el melilt a tekoi el loruul. Me ngmo lmuut er a taem el kmal mo meringel a mondai e te di oterekokl el rokui er a Jehovah. Me a omerellir a ngilsukak el mo meduch el ultuil er a Jehovah.” Me a lsekum a rengelekem a rongesau el olengit er a Jehovah me lebeskau a blekeu el mo sebechem el ousioning el mo er a tonari me a lechub e ke olengit er a merredelem me lekengei er kau el olengull e mo er a klou el ongdibel er kid, e te mo medengei el kmo ke ultuil er a Jehovah el kirel a ngeso, e dirrek el suubii el kmo ngkirir el meruul el uaisei.

9. (a) Ngmilekerang a Jesus e osisecheklterir a redisaiplo er ngii el mo ngariou a rengrir e melatk er a rebebil? (b) Ngera te suubii a rengelekem a lsekum e ngariou a rengum e melatk er a rebebil?

 ⁹ A Jesus a ullisechakl er a redisaiplo er ngii el mo ngariou a rengrir e mo melatk er a rebebil. E ngii a dirrek el ulechotii a ungil el kerebai. (Monguiu er a Lukas 22:27.) Me a rechapostol a dirrek el ulemes er a omesiungel el mo er a Jehovah el olengeseu er a rechad me te mlo meruul a tekoi el oukerebai er ngii. Me kau me ngdirrek el sebechem el osisecheklterir a rengelekem el okiu a omerellem. A Debbie el ngar er ngii a reteru el ngelekel a kmo: “Ngdimlak a ta el bo kmechechei a lsekum a bechik el mesiou el ta er a remechuodel a mengoit a temel el obengterir a rebebil. E le ak mle medengei el kmo sel taem el ki mousbech er ngii e ngulterekokl el ngosukemam.” (1 Ti. 3:4, 5) Me ngera ngrirellii er a telungalek er tir a blekerdelel a Debbie me a bechil er a Pranas? A Pranas a dmu el kmo a rengelekel a mle blechoel el sorir el olengeseu er a temel a meklou el ongdibel. Te mle dmeu a rengrir e ulemak a ungil el klausechelei er tir e dirrek el kmal mle sorir el teloi er a rudam me a rudos. Me chelechang e te rokui el ngar er a mui el taem el omesiou. Me a lsekum e ngariou a rengum e dirrek el melatk er a rebebil, e mosisecheklterir a rengelekem el mo sorir el olengeseu er a rebebil.

BO MOLECHOLT ER A KLEMEDENGEI

10. Ngmilekerang a Jesus e ochotii a klemedengei er a lemei a rebebil el chad el osiik er ngii?

¹⁰ A Jesus a mle cherrungel a klemedengei er ngii. Ngdimlak di lomes a tekoi el loruul a rechad, e ngbai ulemtab a uchul me te meruul ngii el tekoi. Ngmle sebechel el menguiu a rengrir. A ta er a taem e a rebebil el chad er a Galilea a mle osiik er ngii. (Jn. 6:22-24) Ngmle medengelii a uchul me te ulsiik er ngii. Ngdimlak el sorir el orrenges a osisecheklel, e ngbai kall a uchul me te ulsiik er ngii. (Jn. 2:25) Me tia el klemedengei er ngii a uchul me nguleba kllourreng e mesmechokl er tir e silodii a uchul me ngmle kirir el melodech a blekerdelir.​—Monguiu er a Johanes 6:25-27.

11. (a) Ke mekerang e mo medengei a uldesuir a rengelekem el kirel a odingel? (b) Ke mekerang e ngosuterir el mo semeriar el oldingel a obliil?

¹¹ Me alta e ngdiak el sebechem el menguiu a reng, engdi ngsebechem el mo oba klemedengei. El ua tiang, ngsebechem el melasem el mo medengei a uldesuir a rengelekem el kirel a odingel. Ngsebechem el omtab el kmo, ‘Tirka te di mo oldingel e le te semeriar er sel temel a ulengull me bo lomengur e lolim a kmung ngerang?’ Me a lsekum ke mtebengii el kmo ngdiak el sal sorir el oldingel a obliil, e molasem el omeksemeriar er tir el mesterir a mekekerei el ngerechelir me bo el sebechir  el melatk el kmo ngar er ngii a sebechir el rullii.

12. (a) Ngera el tekoi a lulemeklatk er a redisaiplo er ngii a Jesus? (b) Ngera uchul me a redisaiplo er a Jesus a kmal uluusbech er tia el uleklatk?

¹² A Jesus nguluusbech er a ngera el ta er a rolel a klemedengei? Ngmle medengei el kmo a ta el cheleuid el tekoi a sebechel el mo uchul e a chad a ruebet er a oberaod el klengit. Sei a uchul me ngmilengelechel er a redisaiplo er ngii el kirel tia el tekoi. El ua tiang, a redisaiplo er ngii a mle medengei el kmo a laokreng a kmal mekngit. Engdi a Jesus a milengelechel er tir er a tekoi el sebechel el mo uchul e a chad a ruebet er a laokreng el kmo: “A chad el omes er a redil e mo nguibes er ngii a mla mor a laokreng er a chelsel a rengul. Misei e a lsekum a kadekmel a medam a rullau me ke mor a klengit, e bechetir el nguu el choitii!” (Mt. 5:27-29) A redisaiplo er a Jesus a kiliei el teloi er a rechad er a Rom, el tir a kmal mle sorir el omes a klekool el chelsechusem er a deleboes el omeruul me a mekikiongel el tekoi. Me ngbltkil a rengul a Jesus a uchul me ngulemeklatk er a redisaiplo er ngii me longeroid er tir er a ngii di el tekoi el mle sebechel el rullii me ngmo meringel er tir el meruul a llemalt.

13, 14. Ke mekerang e ngosuterir a rengelekem el mo cheroid er a mekikiongel el rolel a ongelaod?

¹³ Me kid a ruungalek a dirrek el sebeched el oba klemedengei e omekerreu er a rengeleked me lak bo loruul a tekoi el tomellii a rengul a Jehovah. Ngklengiterreng, e le chelecha el taem e ngmo lmuut er a rekmal mekekerei me ngar er ngii a techellir el mes a siasing er a remeau me a lmuut el bebil el mekikiongel el tekoi. Me nguaisei el kired el ouchais er a rengeleked el kmo ngmekngit a domes a ngii di lengerang el melisiich a tekoi er a deleboes. Engdi ngar er ngii a lmuut el betok el sebechem el meruul el mo omekerreu er tir. Molatk el kmo: ‘A rengelekek te medengelii a uchul me ngmekngit a domes a siasing er a remeau? Ngera sebechel el rulleterir el mo sorir el omes aika el siasing? Ngak ak rulleterir me ngbeot er tir el subedak er a ngii di el tekoi, me ngmo sebechir el olengit a ngeso el mo lmuut er a taem el bo lemekesuseu el mo omes aika el siasing?’ Ngmo lmuut er a kmal dirk kekerei el ngalek me ngsebechem el dmu er ngii el kmo: “A ngii di el tekoi el mesang er a Internet el rullau el mo soam el oker a tekoi el kirel a durs e mo soam el omes er ngii, e a kulengit me mouchais er ngak e dechadecheduch el kirel. Ngdiak bo medakt me a lechub e ke merur el olengit a ngeso, e le ngkmal soak el ngosukau.”

¹⁴ Me sel molilt a tekoi er a ongelaod el bo moruul e mkerekikl el melatk er a rolel e ke mo ungil el kerebai el kirir a rengelekem. A Pranas el dulsaod er ngii er a uchei a kmo: “Ngsebechem el dmung a kmal betok el tekoi, engdi a rengelekem a di omes a omerellem e mo mesuub er kau.” Me a lsekum ke blechoel el kerekikl sel molilt a chelitakl me a babier me a mubi el klikiid e ungil, e ngsebechem el ngosuterir a rengelekem el mo meruul a osisiu el tekoi.​—Rom 2:21-24.

A JEHOVAH A MO NGOSUKAU

15, 16. (a) Ngera me ngulterekokl a rengum el kmo a Jehovah a mo ngosukau el olisechakl er a rengelekem? (b) Ngera kede mo mesaod er a ongingil el suobel?

¹⁵ Ngera dilubech el mo er a Manoa er sera lolengit a ngeso er a Jehovah me bo lungil el chedam? A “Dios a rirellii sel lullengit er ngii a Manoa.” (Men. 13:9) Me kemiu a ruungalek, a Jehovah a dirrek el orrenges a nglunguchiu e ngosukemiu el mo ungil el olisechakl er a rengelekiu. Ngdirrek el ngosukemiu el mo ungil el ochotii a bltkil a rengmiu e mo oba klengariourreng me a klemedengei.

¹⁶ Me a Jehovah a sebechel el ngosukau el mo ungil el olisechakl er a rengelekem sel dirk lemekekerei, me ngdirrek el sebechel el ngosukau el olisechakl er tir sel lebo lengeasek. Me ngar er a ongingil el suobel, e kede mo mesaod er a rolel e a Jesus a mle ungil el kerebai el kirel a bltikerreng me a klengariourreng me a klemedengei. E tiang a mo ngosukau el mo ungil el osisecheklii a ngeasek el ngelekem el mo mesiou er a Jehovah.

[Aike el footnote]

[Aike el Ker er a Suobel]

[Baks el ngar er a 10 el llel]

 A Kot el Ngaruchei el Chad el Mosuub a Biblia el Obengkel

SEL dosuub el obengterir a rechad e kede blechoel el ousbech er a babier el Ngerang Mera el Lolisechakl a Biblia? el ngosuterir el mo medengelii a Jehovah e dirrek el mo medengei a klemerang el ngar er a Biblia. Kede dirrek el mesuub er a babier el “Keep Yourselves in God’s Love” el ngosuterir el mo mekurulii a bltkil a rengrir el mo er a Jehovah me a llechul.

Me a rengelekem a kot el ngaruchei el chad el mosuub el obengterir. Ngkmal kirir el mesuub el kirel a Jehovah e mo betik a rengrir er ngii e dirrek el mo medengei aike el soal a bo loruul. Me bo mosuub el obengterir a rengelekem el ousbech er a Biblia Olisechakl me sel “God’s Love” el babier, alta e a bechim a diak losiou er a Jehovah. (Osi. 6:20) Ngsebechem el ousbech aike el study guide el ngar er a jw.org el ngosuterir a rengelekem el mo medengei a tekoi el losuub er sel Biblia Olisechakl el babier, e bo lemeduch el ousbech e loltaut a tekoi el lesuub.​—Momes er cheungel a BIBLE TEACHINGS > TEENAGERS. *

[Footnote]