Qaaqquulleꞌne Yihowara Soqqantanno Gede Qajeelse
“Halaalaanchu Magani manchi . . . ilamanno qaaqqi daafira ma assa hasiissannonkero kulannonke gede assi ballo.”—MES. 13:8.
FAARSO: 88, 120
1. Maanuhe ooso ilannota kullisita ma assino?
MAANUHENNA minaamasi ooso ila dandiitannokkita affino. Ikkollana, mitto barra Yihowa sokkaanchi isera leelle dandaamannokkire lawannori ikkannota kulise. Isi insa labbaa qaaqqo ilannota kulise! Maanuhe tenne macciishshi wote lowo geeshsha hagiidhinoti egennantinote; ikkirono, ooso ila lowoha loosu qeecha abbitannosita huwatino. Bunshe batidhino alamera, isinna minaamasi qaaqqonsa Yihowara soqqamanno gede assite lossiꞌra dandiitannohu ma garinniiti? Maanuhe “Yihowa togo yee eegami: ‘Wona soyittohu halaalaanchu Magani manchi [sokkaanchu] galagale daye ilamanno qaaqqi daafira ma assa hasiissannonkero kulannonke gede assi ballo.’”—Mes. 13:1-8.
2. Qaaqquulleꞌne qajeelsate maa assa dandiitinanni? (“ Roorenka Xiinxallisa Hasiissannoꞌne Rosaano” yitanno saaxineno lai.)
2 Annuwanna amuuwa, Maanuhe eegame huuccatto assiꞌrino gari kiꞌnerano leellaꞌnera dandaanno. Kiꞌneno qaaqquulleꞌne Yihowa affannonna baxxanno gede kaaꞌla hasiissannoꞌneta affinoonni. (Law. 1:8) Konne assate, Kiristaana ikkino anninna ama Maatete Magansiꞌra pirogiraame horoonsidhe qaaqquullinsa Yihowa affanni hadhanno gede kaaꞌlitanno. Kayinni, Qullaawu Maxaafi halaali qaaqqiꞌne wodanira qaꞌmanno gede assate maatete xiinxallo calla diꞌꞌikkitanno. (Marro 6:6-9 nabbawi. a) Qaaqquulliꞌnera halaale rosiissinanni wote qarra ikkannoꞌnere qeela dandiitinannihu hiittoonniiti? Kuninna aananno birxichi, annunna ama Yesuusi lawishsha harunsa dandiitanno gara kulanno. Yesuusi ooso ilinoha ikka hoogirono, rosaanosi baxillunni, shooshanqetenni hattono wodanchatenni rosiisinonna qajeelsino daafira annuwunna amuuwu isi rosiisino doogonni lowore rosa dandiitanno. Hanni tenne akatta anna anna bande laꞌno.
QAAQQUULLEꞌNE BAXXE
3. Yesuusi rosaanosi baxannota leellishinohu hiittoonniiti?
3 Yesuusi rosaanosi baxannonsata kula difokkifatino. (Yohaannisi 15:9 nabbawi. b) Qoleno, isi ganye insawa aane hattono ledonsa yanna sayise baxannonsata leellishino. (Marq. 6:31, 32; Yoh. 2:2; 21:12, 13) Yesuusi insara godowa leellishiꞌra digiwino. Konni daafira, insa isi addinta baxannonsata dihuluullantino. Kiꞌne Yesuusi rosiisino gara harunsa dandiitinannihu hiittoonniiti?
4. Oosoꞌne baxxinanninsata affanno gede assa dandiitinannihu hiittoonniiti? (Umi misile lai.)
4 Qaaqquulliꞌnera baxxinanninsata kullensa; hattono ayewoteno muxxe ikkitinohu gede assitine laꞌinanninsata affanno gede asse. (Law. 4:3; Tit. 2:4) Awustiraaliyaho heeꞌrannohu Saamueeli togo yiino: “Qaaqqu noommo waro, anniꞌya hashshu kiiro Qullaawu Maxaafi Xagge Roseemmo Maxaafaꞌya yinanni maxaafa nabbawannoe. Isi xaꞌmeemmo xaꞌmora dawaro qolannoe, hanqafannoe, hattono sunqeꞌꞌe kae keere gali yaannoe. Gedenaanni hige, anniꞌya ooso hanqafanna sunqa hakkeeshshi geeshsha rosantinokki maate giddo lophinota afummoti dhagge assiꞌrummo! Ikkirono, isi ane baxannoeta leellishate lowo geeshsha sharramino. Tini qolte isi ledo lubbora baxammeemmo gede, hattono harshammi yeenna beꞌe yuummokki heeꞌreemmo gede assitinoe.” Kiꞌne qaaqquullino hatto ikkite lophitanno gede, ganyitine baxxinanninsata kullensa. Qaaqquulleꞌne baxxinannita leellishshe. Insa ledo hasaabbe, ledonsa sagaꞌle, hattono ledonsa godoꞌle.
5, 6. (a) Yesuusi baxannore ma assanno? (b) Qaaqquulle garunni seejja insa beꞌe yitukki lophitanno gedenna banxanninsata huwattanno gede assitanno gara xawisi.
5 Yesuusi, “Baxeemmore baalanka borooreemmo hattono seejjeemmo” yiino. c (Aju. 3:19) Yesuusi rosaano mereeronke roorannohu ayeti yitanni duucha higge heewisantinoha ikkirono, isi tenne ikkitonsanni hexxo dimudhino. Qoleno amaalinonsa amaale harunsitukki gattu yannarano lashshi asse diagurino. Yesuusi insa injiitanno yannaranna basera baxillunninna shaqqillunni seejjino.—Marq. 9:33-37.
6 Oosoꞌne baxxinannita leellishate seejjensa. Mito wote, mittu coyi gara ikkinohu woy ikkinokkihu mayiraatiro xawise kula calla ikkitanno. Wole wote kayinni, qaaqqu yitinoonnisire assikki gatara dandaanno. (Law. 22:15) Hattoo wote, Yesuusi lawishsha harunse. Injiitanno yannanna base laꞌine qaaqqiꞌnera biddishsha uyitine, qajeelsitine, hattono hayi yitine baxillunninna shaqqillunni seejje. Wodiidi Afirikira heedhannoti Ilaani yinanni rodoo anje noo warire kultanni togo yitino: “Anniꞌyanna amaꞌya agurtukki seejjitannoe. Insa busha gede ikka gawajjitannoeta kulte kaꞌinoeha ikkiro, uyitinoe amaale harunsanni noommaronna teꞌee harunsite laꞌanno. Ikkirono, insa hanqunni woy mayira seejjitanni nooero kultuekki seejjite diegentinoe. Hakko daafira, beꞌe yuummakki lophoomma. Insa danniꞌya mageeshshi geeshshaatiro kulinoe; qoleno ma assa hasiissannoero afoomma.”
SHOOSHAQOOTA IKKAꞌNE LEELLISHSHE
7, 8. (a) Yesuusi huucciꞌrino huuccatto shooshanqesi leellishshannohu hiittoonniiti? (b) Huuccattoꞌne qaaqquulliꞌne Magano addaxxa rossanno gede assitannohu ma garinniiti?
7 Yesuusi rosaano isi uullate aana heeꞌre assiꞌrinota jeefote huuccatto macciishshitu woy gedenaanni higge affu wote mayi macciishshaminonsaro hanni hedde. Isi togo yee huucciꞌrino: “Abba, Anna, duuchunkuri atera dandaamanno; konne tsuuwa hoolie. Ikkollana, ani hasiꞌroommori ikkikkinni ati hasiꞌroottori ikko.” d (Marq. 14:36) Yesuusi togo eeggifate huucciꞌrasi, harunsaanosi isi guuta Maganu Beetto ikke heeꞌrenni Maganu kaaꞌlo afiꞌrate shooshanqetenni huucciꞌrinota huwatte insano hatto assitanno gede rosiissinonsati dihuluullissannote.
8 Kiꞌne assidhinanni huuccattonni qaaqquulliꞌne maa rossanno? Hige huuccatto assidhinannihu qaru korkaati, qaaqquulleꞌne rosiisate diꞌꞌikkino. Ikkirono, qaaqquulliꞌne ledo heedhine shooshanqetenni huuccidhinanni wote insa Yihowa addaxxa rossanno. Biraazilete heedhannoti Aana togo yitino: “Qarru kalaqamanno wote, lawishshaho akaakkaꞌya xiwantanno yannara, anniꞌyanna amaꞌya dandee saꞌꞌate kaaꞌlitanno jawaantenna dancha doorsha doodhate hasiissanno hayyo aannonsa gede Yihowa huucciꞌranno. Insa lowo geeshsha yaadino wote nafa, qarransa Yihowa aana tuqqanno. Tini qolte Yihowa addaxxa roseemma gede assitinoe.” Qaaqquulliꞌne ledo heedhine huuccatto assidhinanni wote, insa daafira calla huuccitinoonte. Yihowa kiꞌne kaaꞌlannoꞌne gedeno huuccidhe; lawishshaho loosu halaqichiꞌne qoqqowu gambooshshe hadhinara fajjannoꞌne gede xaꞌmiꞌrate kaaꞌlaꞌnera, olliiꞌne mannira waajjitinikki farciꞌra dandiitinanni gede kaaꞌlo afiꞌrate, woy wolu garinni kaaꞌlaꞌnera Yihowa huucciꞌra dandiitinanni. Shooshanqetenni Magano addaxxe; hatto ikkiro, qaaqquulliꞌneno hatto assa rossanno.
9. (a) Yesuusi rosaanosi shooshanqetenni soqqantanno gede rosiisinohu hiittoonniiti? (b) Kiꞌne manna kaaꞌla baxxinanniha ikkiro, qaaqquulliꞌne maa rossanno?
9 Yesuusi coyiꞌrinorinnino ikko assinorinni rosaanosi shooshanqetenni wolootaho soqqantanno gede rosiisino. (Luqaasi 22:27 nabbawi. e) Isi hawaariyaatesi uminsa horo agurte Yihowara soqqantanno gedenna ammanate roduuwinsa horo balaxisiissanno gede rosiisinonsa. Kiꞌneno shooshanqetenni umiꞌne horo agurtine lawishsha ikkitinanniha ikkiro, qaaqquulliꞌne tenne rossanno. Lamu qaaqquulli ama ikkitinoti Debi togo yitino: “Minaanniꞌya songote cimeessa ikkasinni wolootu ledo yanna sayisanno wote dihinaaseemma. Minaanniꞌya maatenkera towaanyo hasiissanno yanna baalantera, towaatannonketa afoomma.” (1 Xim. 3:4, 5) Minaannise Piraanasi qole togo yiino: “Gedensaanni, qaaqquullinke jajjabu gambooshshi ledo xaado afiꞌrino loosonna wole tiokiraasete looso loosa baxxannore ikkitino. Insa hagiirraammaho, hattono dancha jaalla kalaqidhino; qoleno roduuwu ledo yanna sayisa lowo geeshsha baxxannore ikkitino!” Xa tenne maate miilla baalanti woꞌma yanna soqqamaano ikkite Yihowara soqqantanni no. Qaaqquulliꞌne kiꞌne shooshaqootanna umiꞌne horo agurtinannire ikkaꞌne laꞌannoha ikkiro, insano wole manna kaaꞌla rossanno.
WODANCHA NOOꞌNETA LEELLISHSHE
10. Yesuusi batinyu manni isiwa dayi yannara, wodancha noosita leellishinohu hiittoonniiti?
10 Yesuusi illete leellannore calla ikkikkinni, mittu manchi mitto coye assinohu mayiraatirono wodanchanno. Mitte yannara, Galiilaho isi rosiisanna macciishshinohu mitu manni iso harunsa hasiꞌrinoha lawe shiqino. (Yoh. 6:22-24) Yesuusi wodanaho noore afa dandaanno daafira, hakko manni isi rosiisinonsa rosinni roorse maalaamittete sagale baxinota huwatino. (Yoh. 2:25) Isi ikkitonsa gara ikkitinokkita lae cincatenni amaalinonsa; hattono woyyeessiꞌra hasiissannonsare xawise kulinonsa.—Yohaannisi 6:25-27a nabbawi. f
Qaaqqiꞌne sabbakate looso baxanno? Woy kuni loosi hagiirsiisannosi?(Gufo 11 lai)
11. (a) Qaaqqiꞌne soqqansho baxannoronna teꞌee afate wodancha kaaꞌlitannoꞌne gara leellishanno lawishsha kuli. (b) Qaaqqiꞌne soqqansho baxanno gede assa dandiitinannihu hiittoonniiti?
11 Kiꞌne mannu wodanira noore afa dandiitinannikkiha ikkirono, kiꞌneno wodancha nooꞌneta leellishanna qaaqqiꞌne qanchu soqqansho baxannoronna teꞌee buuxa dandiitinanni. Duuchu annuwinna amuuwi soqqanshote yannara qaaqquullinsa shiima geeshsha fooliishshiꞌranno gedenna mitore itanno gede assitanno. Hattoo yannara, ‘Qaaqqiꞌya soqqansho baxannonso roore baxannoti fooliishshote yannaati?’ yitine kiꞌneneeto xaꞌma dandiitinanni. Qaaqquulliꞌne soqqansho hakkeeshshi geeshsha baxxannokkita huwattiniro, insa kaaꞌlate mixo fushshidhe. Insa soqqanshote qeechu noonsata huwattanno gede soqqanshote yannara mitore assitanno gede asse.
12. (a) Yesuusi harunsaanosi mayi daafira kule qorowisiisino? (b) Yesuusi uyino qorowishshi hatte yannara malinoho yineemmohu mayiraati?
12 Yesuusi cubbunniwa qole massanno coye bade kule wodancha noosita leellishino. Lawishshaho, harunsaanosi foorre cubbo ikkitinota affino. Ikkollana Yesuusi foorrenniwa qole massanno coye kule qorowisiisanni togo yiinonsa: “Foora yora geeshsha meyaata laꞌꞌannohu baalunku hakkawote wodanisinni ise ledo soorrino. Qiniiticho illekki guficho ikkitannoheha ikkiro fushshite huni.” (Mat. 5:27-29) Tini amaale hakkawaro Roomu gashshooti giddo noo Kiristaanira lowo geeshsha hasiisse noote. Mittu xaggete fullahaanchi, Roomu daga tiyaatire shiqqanno yannara “illenna macca amanyoote bainore laꞌanno hattono macciishshitanno; qoleno rooru manni laꞌꞌa baxannohu maaeelino coyeeti” yee borreessino. Yesuusi amanyootunni xuru nookkire ikkine heeꞌra qarra ikkitanno gede assanno coye kule rosaanosi qorowisiisasi baxillaanchonna wodancha noosiha ikkinota leellishshanno!
13, 14. Qaaqquulleꞌne maaeelu boohaarshinni agara dandiitinannihu hiittoonniiti?
13 Wodancha qaaqquulleꞌne ayyaanaamittete gawajjonni agartinanni gede kaaꞌlitannoꞌne. Yannankera, albinni roore ooso anjensanni teeda baꞌino misillanna borro hattono wole amanyoote baino coye laꞌanno faro bacate. Kiristaana ikkino anninna ama amanyoote baino boohaarshi busha ikkinota oosonsara kultannoti egennantinote. Ikkollana wodancha, qaaqquulliꞌne afate quqquxante calla teeda baꞌino misilla laꞌꞌate kaꞌara dandiitannota huwattinanni gede assitannoꞌne. Kiꞌneneeto togo yitine xaꞌme: ‘Qaaqqiꞌya teeda baꞌino misilla laꞌꞌate hedanno gede kakkayisasira dandaannori maati? Togoo misilla baasa gawajjitannoti qaaqqiꞌyara leeltinosi? Qaaqqiꞌya miteekke hedeweelcho teeda baꞌino misilla lairo nafa daye kaaꞌlo xaꞌmiꞌrannoe gede, ani huxuxxi yiikki coyishiishannoe gedeeho?’ Qaaqquulliꞌne shiimmaadda ikkituro nafa togo yitinansara dandiitinanni: “Interneetete aana teeda bainori woy saalfachishannori tuncu yeennahe hedeweelcho hakkoye laittoro, mittoreno waajjittokki anera kulie. Anera kula saalfattooti. Ani ate kaaꞌla hasiꞌreemmo.”
14 Wodancha kiꞌne umiꞌne boohaarsha hayyotenni doodhitinanni gede kaaꞌlitannoꞌne. Aleenni qummi assinihu Piraanasi togo yiino: “Ninke annuwanna amuuwu danchaho yineemmo muuziiqi, filme, woy maxaafi maatenke harunsitannoha ikkanno. Duuchu coyi daafira duuchare coyidhinara dandiitinanni; oosoꞌne kayinni assitinannire laꞌanno hattono hakkoye harunsitanno.” Qaaqquulliꞌne kiꞌne qorophitine dancha boohaarsha doodhitinanna laꞌannoha ikkiro, insano hattonni dancha boohaarsha doodhitara dandiitanno.—Rom. 2:21-24.
HALAALAANCHU MAGANI HUUCCATTOꞌNE MACCIISHSHANNO
15, 16. (a) Yihowa qaaqquulleꞌne qajeelsidhinanni gede kaaꞌlannoꞌneta mayinni afa dandiitinanni? (b) Aananno birxichira maa ronseemmo?
15 Maanuhe qaaqqosi lossiꞌrate kaaꞌlo xaꞌmiꞌri wote mayi ikkino? “Halaalaanchu Magani Maanuhe yiinore macciishshino.” (Mes. 13:9) Annuwanna amuuwa, Yihowa kiꞌne huuccattono macciishshanno. Isi huuccattoꞌne macciishshe qaaqquulleꞌne qajeelsidhinanni gede kaaꞌlannoꞌne. Kiꞌneno baxillunni, shooshanqetenni hattono wodanchatenni konne assa dandiitinanni.
16 Yihowa annuwanna amuuwu shiimaadda qaaqquullensa qajeelsitanno gede kaaꞌlannonsante gede, wedella oosonsa qajeelsidhanno gedeno kaaꞌlannonsa. Aananno birxichi, wedella oosoꞌne Yihowara soqqantanno gede qajeelsitinanni wote Yesuusi baxille, shooshanqenna wodancha harunsa dandiitinanni gara kulanno.
a Marro 6:6-9: “Hajajanni noommoheta tenne hajajo wodanikkira wodhi; qoleno oosokki wodanira qaꞌmitanno gede assi; hattono minekki ofollatto wote, doogote haꞌratto wote, goxatto wotenna kaꞌꞌatto wote tenne hajajo coyiꞌri. Qaagiishsha ikkitannohe gede angakkira usudhi; hattono albikkira albaho usudhinannirichi gede assiꞌri. Ise minikki guwaneranna waalchikkira borreessiꞌri.”
b Yohaannisi 15:9: “Anniꞌya ane baxinoente gede, anino kiꞌne baxoommoꞌne; baxilliꞌya giddo heedhe.”
c Qullaawu Maxaafi rosiisanno garinni, seejjate yaa baxillunni biddishsha aate, qajeelsate, soꞌrinoha biddi assate, hattono mito wote qorichishate; kayinni hanqunni qorichisha diꞌꞌikkitino.
d Ze Internaashinaali Istaandardi Bayibili Insayikilopiidiya togo yaanno: “Yesuusi waro, abba yaanno qaali roorenka qaaqquullu annuwansa baxillunninna ayirrinyunni woshshitanno suꞌmaati.”
e Luqaasi 22:27: “Ofolle sagale itannohunna soqqamannohu giddo roorannohu ayeti? Ofolle itannoha diꞌꞌikkino? Ani kayinni mereeroꞌne soqqamanni noommo.”
f Yohaannisi 6:25-27a: “Baaraho widoonni isinni xaadduti, ‘Rebbii, kawira mamoote dayitto?’ yitusi. Yesuusi togo yee qolinsa: ‘Halaale yeemmoꞌne, hasidhinoonniehu maalale laꞌinoonni daafira ikkikkinni daabbo ittine duubbinoonni daafiraati. Baꞌanno sagale agurtine, hegere heeshsho afiꞌnanni gede assitannote geeddanno sagalera loosse.’”
