Mu Ayuweg Fakam ni Nge Pigpig ngak Jehovah

“Mu gagiyegnag fare moon ni reb e girdi’ rok Got . . . nge weliy ngomow e n’en nthingar gu rin’ew ngak fachi pagel ko ngiyal’ ni bay ni gargeleg riy.”​—JUDG. 13:8.

TANG: 41, 6

UW ROGON NRAYOG NI NGAM FOLWOK ROK JESUS U ROGON . . .

ni ngaum t’ufeg fakam?

ni ngaum dag e sobut’an’?

ni ngaum dag nib tamilangan’um u nap’an ni ga be ayuweg fakam?

1. Mang e rin’ Manoah u nap’an ni nang ni bayi fakay reb e bitir?

 KARI felfelan’ ma kari gin Manoah ko n’en ni ke yog leengin ngak. Bin riyul’ riy e, yow l’agruw ni yow manang ndabiyog ni nge diyen leengin. Machane, ke yib i m’ug reb e engel rok Jehovah ngak leengin, ma ke yog ngak ban’en nrib mo’maw’ ni nge mich u wan’row. Ke yog ni bay ra fakayew bochi pagel! Dariy e maruwar riy ni kari felfelan’ Manoah. Machane, manang ni aram e bay reb e maruwel nrib ga’ fan ni ke milfan ngak. Uw rogon ni ngar chuguliyew fakrow nib fel’ rogon me yag nra ayuwegew ni nge mang reb e tapigpig rok Got ni yow be par u reb e nam ni kari sug ko ngongol ni kireb? I “meybil Manoah ngak” Jehovah ni gaar: “Wenig ngom, mu gagiyegnag fare moon ni reb e girdi’ rok Got [ni fare engel] ni ka mol’og nge yib ngomow, nge weliy ngomow e n’en nthingar gu rin’ew ngak fachi pagel ko ngiyal’ ni bay ni gargeleg riy.”​—Judg. 13:1-8.

2. Mang e ba muun ko skul ni ga ma tay ko bitir rom? (Mu uneg fare kahol ngay ni kenggin e “ En Th’abi Ga’ Fan ni Ga Ma Fil e Bible Ngak.”)

² Faanra gur reb e gallabthir, ma dabisiy ni kag ma lemnag fapi thin ni wenignag Manoah u lan e meybil rok. Ya gur e ba milfan ngom ni ngam ayuweg fakam ni nge nang Jehovah me t’uf rok. (Prov. 1:8) Aram fan ni ma guy e pi gallabthir ni Kristiano rogon ni ngar ted e Fol Bible ni Tabinaw nib fel’ rogon me yib angin. Machane, riyul’ ni faanra ngari tamilang  e tin riyul’ u wan’ fakam, ma gathi kemus ni ngaum ted e tabinaw rom e fol Bible ni fan ko tabinaw u gubin e wik, ya ku bay boch ban’en nib t’uf ni ngam rin’ed. (Mu beeg e Deuteronomy 6:6-9.) Ere, uw rogon ni ngam fil e tin riyul’ ngak fakam nib fel’ rogon? Re article ney nge bin migid e be weliy rogon nrayog ni nge folwok e piin gallabthir rok Jesus. Yugu aram rogon ndariy e bitir rok Jesus, machane rayog ni nge fil e gallabthir ban’en u rogon ni i fil ban’en ko girdi’ ni bochan e i skulnag pi gachalpen ma i fil ban’en ngorad u fithik’ e t’ufeg, nge sobut’an’, nge tamilangan’. Chiney e ngad weliyed e pi fel’ngin ney nreb nge reb.

NGAM T’UFEG FAKAM

3. Uw rogon ni i dag Jesus ngak pi gachalpen ni yad ba t’uf rok?

³ Der ma magagawon Jesus ni nge yog ngak pi gachalpen ni yad ba t’uf rok. (Mu beeg e John 15:9.) Ku i dag ni yad ba t’uf rok ni aram e ma chag ngorad ni gubin ngiyal’. (Mark 6:31, 32; John 2:2; 21:12, 13) Gathi gubin ngiyal’ ni yigoo murung’agen e “maruwel” e ma weliy Jesus ngorad. Ere, aram fan nde t’uf ni ngaur pared ma yad be lemnag ko rriyul’ ni yad ba t’uf rok Jesus fa danga’. Ere, uw rogon nrayog ni ngam folwok u rogon ni i fil Jesus ban’en ngak pi gachalpen?

4. Uw rogon nrayog ni nge nang pi fakam ni yad ba t’uf rom? (Mu guy e sasing ni bay u tabolngin e re article ney.)

⁴ Nga u mog ngak pi fakam ni yad ba t’uf rom, ma gubin ngiyal’ ni ngaum dag ngorad feni ga’ farad u wan’um. (Prov. 4:3; Titus 2:4) Samuel ni ma par u Australia e yog ni gaar: “Nap’an ni ku gub achig, ma gubin e blayal’ ni ma beeg e Chitamag fare ke babyor ni kenggin e Babyor Rog ni Chep nu Bible ngog. U m’on ni nggu mol, ma ma pi’ e fulweg ko pi deer ni gu ma fith ngak, me gumuchmuch ngog, ngemu’ me faray owcheg. Boch nga tomuren mug nang ni ilal e Chitamag u reb e tabinaw ndanir ma rin’ e pi n’em riy, ma aram mug gin ngak! Ya yugu aram rogon, ma ri ma athamgil ni nga i dag ngog nri gub t’uf rok. Ma angin ni yib riy e yag ni nggu parew nrib chugur thilmow, ma gu ma par nib pagan’ug.” Ere, mu gay rogon ni ngki par e tha’ u thilmed pi fakam ni aray rogon, ma nga i lungum ngorad, “Gimed ba t’uf rog.” Ngaum dag ngak pi fakam ni yad ba t’uf rom. Um sabethingad, mu um abichgad u taabang, mu um fafelgad u taabang.

5, 6. (a) Mang e ma rin’ Jesus ni fan ngak e piin ni yad ba t’uf rok? (b) Mu weliy rogon nrayog ni nga i par e bitir nib pagan’ ni faanra un llowan’nag nrogon.

⁵ I gaar Jesus: “Gu ma puwan’ ma gu ma gechignag urngin e piin ni yad ba t’uf rog.” * (Rev. 3:19) Yugu aram rogon ni boor yay ni i maluagthin pi gachalpen ko mini’ e arorad nib tolang u fithik’rad, ma de mulan’ Jesus u puluwrad. Ku da i fek owchen rorad nda i yal’uwegrad u nap’an nda i yag ni ngaur folgad ko pi fonow rok. Ya i fonownagrad ko ngiyal’ nge gin’en nib puluw ni nge rin’ riy, ma ki i rin’ u fithik’ e t’ufeg nge sumunguy.​—Mark 9:33-37.

⁶ Mu dag ngak pi fakam ni yad ba t’uf rom ni aram e ngaum llowan’nagrad nrogon. Bay yu ngiyal’ nib gaman ni kemus ni ngan weliy fan nib fel’ ara fan nde fel’ ni ngan rin’ ban’en. Machane, bay yu ngiyal’ ni bayi n’en ma dabi fol fapi bitir ko n’en ni ka mog ngorad. (Prov. 22:15) Faanra buch ni aram rogon, ma ngam folwok rok Jesus. Mu gay e ngiyal’ nge gin’en nib fel’ ni ngam llowan’nag e bitir rom riy ni aram e ngam fonownag, mag skulnag, mag yal’uweg. Machane, ngam rin’ u fithik’ e t’ufeg nge sumunguy. I yog reb e walag nib pin u South Africa ni ka nog Elaine ngak ni gaar: “Der ma thilthilyeg e gallabthir rog rogon ni yow ma llowan’nageg. Faanra ka rognew ngog ni yow ra gechignageg ni faanra dab gu fol, ma aram rogon ni yow ma rin’. Machane, dariy ba ngiyal’ ni kar gechignagew gag u fithik’ e damumuw ara kar gechignagew gag nda rognew fan ngog. Angin ni ke yib riy ngog e ke yag ni nggu par nib pagan’ug. Gu ma par ni gu manang e gin ni nggu mus riy, ma ku gu manang e n’en nthingar gu rin’.”

MU DAG E SOBUT’AN’

7, 8. (a) Uw rogon ni m’ug ko meybil ni tay Jesus ni ir be’ nib sobut’an’? (b) Uw rogon nrayog ni nge fil pi fakam rogon ni ngaur taga’gad ngak Got ko meybil ni ga ma tay?

⁷ Am lemnag rogon laniyan’ pi gachalpen Jesus u  nap’an nrung’aged e bin tomur e meybil ni tay ngak e Chitamangin ni gaar: “Chitamag! Urngin ban’en ma rayog rom. Mu chuweg e re kap ney rog. Machane gathi tin nib m’agan’ug ngay e ngam rin’, ya tin nib m’agan’um ngay e ngam rin’.” * (Mark 14:36) Ere, nap’an ni yog Jesus e pi thin ney ma dariy e maruwar riy ni nang pi gachalpen ni faanra yugu aram rogon nib flont Jesus ma ke ning e ayuw ngak Got u fithik’ e sobut’an’, me ere ku aram rogon e n’en nsusun e ngar rin’ed.

⁸ Ere, mang e ma fil pi fakam u rogon e meybil ni ga ma tay? Riyul’ ni gathi kemus ni ga ma meybil ngak Jehovah ni bochan e ngam fil ban’en ko bitir rom. Machane, nap’an ni ga ra meybil ngak Jehovah u fithik’ e sobut’an’ ni yad bay, ma rayog ni ngar guyed nriyul’ ni ga be taga’ ngak Jehovah ni nge ayuwegem. Ana ni ma par u Brazil e yog ni gaar: “Faanra ke yib reb e magawon, ni bod rogon ni ke m’ar e tutuw nge titaw rog, ma ma meybil e gallabthir rog ngak Jehovah ni nge pi’ gelngirow nge yag nra athamgilgow u fithik’ fare magawon ni keb ngomad. Maku yow ma ning e gonop ngak ya nge yag nra dugliyew boch ban’en u fithik’ e gonop. Ki mada’ ko ngiyal’ ni kug mada’naged boch e magawon nrib ga’, ma yow ma pag fan urngin ban’en ngak Jehovah. Angin ni ke yib riy e ke yag ni nggu nang rogon ni ngaug taga’ ngak Jehovah.” Nap’an ni gimew ra meybil fakam u taabang, ma gathi kemus ni ngam meybil ni fan ngak. Ya ngkum wenig ngak Jehovah ni nge ayuwegem. Bod nrayog ni ngam wenig ngak ni nge ayuwegem u rogon ni nga mog ngak e en nib ga’ ko maruwel rom ni nge pi’ e matal ngom ya nge yag nim un ko convention, ara nge ayuwegem ndab kum rus ni ngam machibnag e piin ni yad ba migid ngom, ara nge ayuwegem u yugu boch e kanawo’. Faan ga ra taga’ ngak Got u fithik’ e sobut’an’, ma rayog ni nge nang pi fakam rogon ni ngkur rin’ed ni aram rogon.

9. (a) Uw rogon ni i fil Jesus ngak pi gachalpen rogon ni ngaur rin’ed boch ban’en ni fan ngak boch e girdi’? (b) Faanra m’agan’um ngay ni ngaum rin’ boch ban’en ni fan ngak boch e girdi’, ma mang e rayog ni nge fil pi fakam riy?

⁹ I fil Jesus ngak pi gachalpen rogon ni ngaur rin’ed boch ban’en ni fan ngak boch e girdi’ u fithik’  e sobut’an’ u daken e thin nge ngongol rok. (Mu beeg e Luke 22:27.) I fil ngak pi gachalpen ni ngaur paged farad ni fan ko pigpig ni yad be tay ngak Jehovah mu kur ayuweged e piin taareb e michan’ rorad. Ere, ku arrogon gur ni faan ga ra sobut’nag lanin’um ngaum pag fam u boch ban’en, ma rayog ni ngki ayuweg pi fakam ni ngar rin’ed e re n’ey. Debbie nreb e matin ni bay l’agruw e bitir rok e yog ni gaar: “Da gur ma taliyegnag e pumoon rog ni ma tay boch e tayim rok ni fan ngak boch e walag ni bochan e ir reb e piilal. Ya gu manang nra ngiyal’ ni ke t’uf ban’en romad chon e tabinaw rok, ma ra ayuwegmad ko tin nib t’uf romad.” (1 Tim. 3:4, 5) Miki yog Pranas ni pumoon rok ni gaar: “Boch nga tomuren, ma aram me adag gal fakmow ni ngaur piew e ayuw u nap’an e pi assembly nge ku boch ban’en ni yima rin’ u lan e ulung. Ra mon’oggow i yan, me yag boch e fager ngorow, mar adagew ni ngaur chaggow ko pi walag u lan e ulung!” Chiney e urngin chon e re tabinaw ney ni yad ma pigpig ngak Jehovah u polo’ e tayim rorad. Dariy e maruwar riy nra fil pi fakam rogon ni ngaur ayuweged boch e girdi’ u rogon ni ga ma dag e sobut’an’ nge rogon ni ga ma pag fam u boch ban’en.

NGE TAMILANGAN’UM

10. Nap’an ni yib ba ulung i girdi’ ni yad be lek Jesus, ma uw rogon ni dag Jesus nib tamilangan’?

¹⁰ Jesus e ir be’ nrib tamilangan’, ya gathi kemus ni ma tiyan’ ko pi n’en nrayog ni nge guy e girdi’, ya ku manang e n’en ni bay u gum’irchaen e girdi’. Immoy bayay ni yib boch e girdi’ u Galile ni yad be gay. (John 6:22-24) Machane, bochan nrayog ni nge guy Jesus e n’en ni bay u gum’irchaen e girdi’, ma aram me nang ni kab ga’ fan e ggan u wan’ fapi girdi’ ko n’en ni ke fil ngorad. (John 2:25) Manang e magawon rorad, me gum’an’nag ir nge yal’uwegrad, me weliy ngorad e pi n’en nib t’uf ni ngar thilyeged u rarogorad.​—Mu beeg e John 6:25-27.

11. (a) Mu weliy reb e ban’en ni be dag ni faanra ba tamilangan’um ma rayog ni ngam nang ko baadag pi fakam e machib fa danga’. (b) Mang boch ban’en nrayog ni ngam rin’ me adag pi fakam e machib miki yib angin ngorad?

¹¹ Yugu aram rogon ndabiyog ni ngam guy e n’en ni bay u gum’irchaen be’, machane rayog ni ngam dag nib tamilangan’um mu kum nang rogon ni ma lemnag e bitir rom e machib. Boor e gallabthir ni bay ranod pi fakrad ko machib, ma yad ma pagrad ni ngar talgad boch ngiyal’ u nap’an e machib ya nge yag nra toffanggad buchuuw mar unumed ara ked ban’en. Machane, rayog ni ngam fithem ni nge lungum, ‘Baadag e bitir rog e machib ni yima tay fa kemus ni yad baadag e ngiyal’ ni baaram ni yima tal ni ngan kay ara ngan unum ban’en?’ Faanra kam guy ni ka bay boch ban’en nrayog ni ngam rin’ ni nge ayuweg e bitir rom ni ngar adaged e machib, ma rayog ni ngam nameged boch ban’en ni ngam rin’ed u  taabang. Mu pagrad ni ngar rin’ed boch ban’en nib achig u nap’an e machib ya nge yag nra nanged ni yibe unegrad ko pi n’en ni yibe rin’.

12. (a) Uw rogon ni ginang Jesus pi gachalpen u murung’agen boch e ngongol nib kireb? (b) Mang fan nrib puluw e re fonow nem ni pi’ Jesus ngak pi gachalpen?

¹² Ke dag Jesus nib tamilangan’ ni bochan e manang e pi n’en nrayog ni nge waliy be’ i yan ko denen. Bod ni, manang pi gachalpen nib kireb e ngongol ndarngal. Machane, i puguran ngorad boch ban’en nrayog ni nge waliy be’ ni nge un ko ngongol ndarngal. I yog ni gaar: “En nra sap ngak be’ ni ppin me finey ni manga yugu ra pirew, e ke kireb e rok, ni fan e kar pirew u fithik’ i laniyan’. Ere faanra waliyem e ba’ ni mat’aw i owchem ngam denen, ma ga luf ngam n’ag!” (Matt. 5:27-29) Rib puluw e pi thin nem ni yog Jesus ni bochan e ngiyal’ nem e immoy e pi Kristiano u tan e gagiyeg rok piyu Roma. I yog be’ ni ma yoloy chepin e girdi’ ni bay boch ban’en ni ma rin’ piyu Roma ni nga i yaliy e girdi’ ni nge chuweg e chalban rorad ni “yima dag yaan boch ban’en riy nib puwlag ara yima yan u lingan ni nge rung’ag e girdi’, maku ba ga’ ni tin baaray ban’en nrib gel e puwlag riy e aram e tin nri baadag e girdi’ ni yad ma yaliy.” Ere, aram fan ni ginang Jesus pi gachalpen ndab ur yaliyed boch ban’en nrayog ni nge mo’maw’nag ngorad ni ngar rin’ed e tin nib mat’aw!

13, 14. Uw rogon ni ngam ayuweg pi fakam ndab ur chuweged e chalban rorad nga boch ban’en nib kireb?

¹³ Faanra ba tamilangan’um ma rayog ni ngam ayuweg pi fakam u boch ban’en nrayog ni nge kirebnag e tha’ u thilrad Jehovah. Chiney e ra ri kab bitir be’ mab mom nrayog ni nge guy yaan e ngongol ni puwlag nge ngongol ndarngal. Riyul’ ni ma yog e pi gallabthir ni Kristiano ngak pi fakrad nib kireb ni ngaur chuweged e chalban rorad nga boch ban’en nib kireb. Machane, faanra ba tamilangan’um ma rayog ni nge ayuwegem e re n’ey ni ngam nang boch ban’en nrayog ni nge k’aring fakam ni nge adag ni nge yaliy yaan boch e ngongol nib puwlag. Ere, ngam fithem ni nge lungum: ‘Mang boch ban’en nrayog ni nge waliy e bitir rog ni nge yaliy yaan e ngongol ni puwlag? Manang ko mang fan ni bay e riya’ riy, fa? Faanra kan waliy e bitir rog ni nge yaliy yaan e ngongol ni puwlag, mab mom rok nrayog ni nge yib i non ngog, fa?’ Mus ni faanra ri kab bitir fakam, ma rayog ni nge lungum ngak: “Faanra ga bay ko Internet, ma ke yib i m’ug reb e website nib kireb ma ga baadag ni ngam yaliy e n’en ni bay riy, ma dab mu magagawon ni nga mub mog ngog. Ku dab mu tamra’ ngay ya gu baadag ni nggu ayuwegem.”

¹⁴ Tamilangan’ e ku ra ayuwegem u rogon ni ngam fal’eg i mel’eg e pi n’en ni ga ma chuweg e chalban rom ngay. Pranas ni faan kan weliy murung’agen e yog ni gaar: “Pi musik, nge babyor, nge kachido ni gad ma pag e gallabthir pi fakdad ni ngaur chuweged e chalban rorad ngay e be dag rarogon e tabinaw rodad. Boor ban’en nrayog ni ngam weliy ngak pi fakam, machane bin riyul’ riy e, ma yaliy e bitir rom rarogon e ngongol rom mar folwokgad riy.” Faanra i guy pi fakam ni ga be kol ayuw u rogon e pi n’en ni ga ma mel’eg ni ngaum chuweg e chalban rom ngay, ma dabisiy ni ku aram rogon ni yad ra rin’.​—Rom. 2:21-24.

RA AYUWEGEM E BIN RIYUL’ E GOT

15, 16. (a) Mang fan nrayog ni nge pagan’um nra ayuwegem Got u rogon ni ngam skulnag pi fakam? (b) Mang e gad ra weliy ko bin migid e article?

¹⁵ Mang e buch u nap’an ni ning Manoah e ayuw u rogon ni nge chuguliy fak? I “rin’ Got e tin ni ke wenignag Manoah.” (Judg. 13:9) Ku arrogomed e pi gallabthir nra motoyil Jehovah ngomed. Ra fulweg taban e meybil romed maku ra ayuwegmed u rogon ni ngam skulnaged pi fakmed. Rayog ni nge ayuwegmed ni ngam rin’ed u fithik’ e t’ufeg, nge sobut’an’, nge tamilangan’.

¹⁶ Ra ayuweg Jehovah e piin gallabthir ni ngar skulnaged pi fakrad ni ka yad ba achig, maku ra ayuwegrad u rogon ni ngar skulnaged pi fakrad ni ke fel’ yangarrad. Bin migid e article e be weliy rogon nrayog ni ngam folwok u rogon ni i dag Jesus e t’ufeg, nge sobut’an’, nge tamilangan’ u nap’an ni ga be ayuweg fakam ni ke fel’ yangaren ni nge mang reb e tapigpig rok Jehovah.

[Boch e thin nra tamilangnag murung’agen]

[Deer ni ngan pi’ e fulweg riy]

[Kahol ko page 10]

 En Th’abi Ga’ Fan ni Ga Ma Fil e Bible Ngak

YOOREN e girdi’ e ba ga’ ni gad ma fil fare ke babyor ngorad ni Mang e Ri Be Fil e Bible? ya nge yag nda ayuweged yad ni ngar nanged Jehovah nge tin riyul’ u Bible. Ku gad ma fil fare ke babyor ni “Um Pired ni Gimed Ba T’uf rok Got” ngak e piin ni gad ma fil e Bible ngorad ni bochan e ngad ayuweged yad ni nge t’uf Jehovah rorad nge pi motochiyel rok.

Pi fakam e aram e piin th’abi ga’ fan ni ga ma fil e Bible ngorad. Ba t’uf ni ngar filed murung’agen Jehovah, miki t’uf Jehovah rorad, nge pi kenggin e motochiyel rok. Ere, mus ni faanra yigoo gur romew e en mabgol rom e ga be un ko tin riyul’, ma gamad be pi’ e athamgil nga lanin’um ni ngam fil fare ke babyor ni kenggin e Be Fil e Bible nge “T’ufeg rok Got” ko bitir rom. (Prov. 6:20) Faanra rayog, ma ga fanay fapi study guide ara boch ban’en ni kan tay ko jw.org ni bay boch e deer riy nrayog ni nge ayuweg pi fakam ni ngar fal’eged i lemnag e pi n’en ni gimed be fil ko fare ke babyor ni Be Fil e Bible ya nge yag ni taw nga gum’ircha’rad.​—Mu yaliy fare thin ni kenggin e BIBLE TEACHINGS > TEENAGERS. *

[Boch e thin nra tamilangnag murung’agen]