1, 2. (a) Ni hangya-hangya lyahi erya babuthi bakabya nalyo abaana babu bakakulha? (b) Omunyethu Omukristayo erikulha-kulhana angakolhaki?

SIHALI ekikatsemesaya omubuthi Omukristayo ng’erilhangira omwana wiwe akabatizibwa. Mulikyethu Berenice athi abaana biwe abosi bbani mubaghenda bakabatizibwa isibali bahikya myaka 14. Akabugha athi: “Mukyathutsemesya kutsibu. Omwa kwenene, muthwatsema eriminya ngoku abaana bethu banzire erikolera Yehova.” Akathasya bugha athi: “Aliriryo, muthwaminya ngoku obunyethu obwa balimu obo bunawithe bitsibu byabu.” Wamabya iwunawithe omwana oyuli omwa lhulengo olho, wukayitheghereraya eriyowa lya Berenice.

² Eriminya ngoku obunyethu bwanganabya kitsibu okwa babuthi n’eminyethu iyoyene-yene, omulhume oyusomire okwa mikulire y’abaana akabugha athi: “Obunyethu si buthuku bw’eribya mw’eriri ‘ng’isire’ kutse ‘olhwanana.’ Aliriryo ni buthuku obw’omunyethu erikangania eriyowa liwe, eriyihira okwa bandi, n’erikangania amenge omwa by’akakolha.” Abaana bawu banganabya n’engolangana mbuya na Yehova ibane minyethu, ibayihiriraho ebilhubirirwa n’eribikwamirira omw’ithulira n’eritheka h’akaghalha eriyihayo  oku Yehova n’erikolha erikwamana n’eriyihayo lyabu. Ibakendi yilhangirira ngoku obu ni buthuku obuwene erikulha bunyakirimu ngoku Yesu anakolha omughulhu abya mwana. (Soma Luka 2:52.) Iwe ng’omubuthi, ni kyahi ekya wukakolha omwa myaka eyikalire eyi? Wulebaye ngoku Yesu akanganaya olhwanzo, eriyikehya, n’amenge omwa bukulhu bwiwe. Emibere eyi yanga kuwathikya yithi wuk’eghesya omunyethu wawu erikolera Yehova?

3. Ni kyahi ekyaleka Yesu iniahulha abakwenda biwe mwa banywani?

³ Yesu abya munywani oyuwithe olhwanzo kandi muthaleghulha. (Soma Yoane 15:15.) Ngoku biri omwa Biblia, kera omukama isyalibwira abaghombe biwe b’esyombitha n’eriyowa liwe. Aliriryo, Yesu iyo abya mukama kandi munywani w’abakwenda biwe abatheleghulha. Iniakasiba nabu, iniababwira ngoku akayowa, kandi iniabahulikirira bakamubwira ebitsibu byabu. (Mk. 6:30-32) Erikanirania ery’olhwanzo ng’eri mulyaleka ihabya obunywani obukamathire ahakathi-kathi ka Yesu n’abakwenda biwe. Kandi eki mukyabathegheka erisyakolha bingyi omwa mubiiri wa Nyamuhanga.

4. Wangabya wuthi munywani w’omwana wawu kandi iwunemukolesya obuthoki bwawu ng’omubuthi? (Lebaya ekisasani ekiri okw’itsuka.)

⁴ Michael, thatha w’abaana babiri akabugha athi “Nomwakine indi ithwe ng’ababuthi sithwang’ingana n’abaana bethu, thwanganabya banywani babu.” Abanywani bakasiba haghuma. Kwesi lebaya nga wangana kehya okwa mibiiri yawu kutse ebindi erithoka eribana obuthuku obukaghunza obw’eribya n’abaana bawu. Kandi abanywani bakatsemera ebindu bighumerere. Lengaho eritsemera eby’omusuko wawu akatsemera—omuziki, esyofilimu, kutse eby’amasatha. Ilaria, oyuwikere e Italy, akabugha athi: “Ababuthi baghe ibatsomene omuziki owangahulikirira. Omo kwenene, thatha waghe mwabya munywani waghe kutsibu, kandi isindisagha erimubwira emyatsi yaghe y’embitha.” Iwe mubuthi wamanywana omwana wawu n’erimuwathikya eribya munywani wa Yehova, wukabya isiwathayighunia-ghunia. (Esy. 25:14) Aliwe, wukabya iwamakangania ngoku wubanzire kandi ngoku wubasikirye, neryo ibathakusagha. Ekyo ikikendi leka ibakubwira ebikabalyambaya.

5. Yesu mwawathikya athi abigha biwe eriyilhangirira obutseme bw’eriyihwerya omwa mubiiri wa Yehova?

⁵ Yesu mwanza abigha n’abanywani biwe bayilhangirire obutseme obukalhwa omw’iyihwerya omwa mubiiri wa Yehova. Neryo mwanza babye n’omuhwa w’erisangira omwa by’obunyakirimu. Yesu aby’anzire babye n’omuhwa munene w’eriyira abigha! Kandi mwakakasya abigha biwe ngoku akendi bawathikya.—Mt. 28:19, 20.

6, 7. Busana naki ni ky’olhwanzo ababuthi erikwamirira esyondegheka sy’eby’obunyakirimu?

⁶ Ng’ababuthi, mwanzire emyusuko yenyu yibye iyine ndeke bunyakirimu. Na Yehova anzire imwakulyabo “n’erikungabo n’erikangiriryabo omw’ikangirirya ly’Omukama.” (Efe. 6:4) Neryo wukolesaye olhusunzo olhwa Nyamuhanga abirikuha erihira h’esyondegheka sy’obunyakirimu n’erisikwamirira. Eky’erileberyako: Wukahathikana wuthi abaana bawu basome kundi esukuru ni y’omughaso neryo iwalhangira wuthi wukabahira mw’omuhwa w’erianzayo. Kuthya n’ababuthi b’olhwanzo bakanza abaana babu ibaghasirwa “omw’ikangirirya ly’Omukama” okwa mihindano n’esindi ndegheka sy’obunyakirimu. Kundi erikangirirya lya Nyamuhanga ni ry’omughaso munene, wukalengaho erihira omwa baana bawu mw’omuhwa w’erianza obwenge n’emyatsi y’obunyakirimu. (Emi. 24:14) Ngoku Yesu anakangiriraya abigha biwe, nawu wangana kangirirya emyusuko yawu erithulira, iwabahira mw’omuhwa w’erianza erikangirirya  Ekinywe kya Nyamuhanga n’eribawathikya erianza esyondegheka sy’eriyathulira.

⁷ Eribya n’endegheka y’obunyakirimu n’erikwamirirayo kyangaghasira kithi emyusuko? Erin owe South Africa, akabugha athi: “Ithwe baana ithukayineghenaya bikahika okw’igha, erighenda okwa mihindano, n’erithulira. Ihakanayira ithwakighenderera eritabura erigha ly’eka nuku thuleke erigha. Ababuthi bethu mubathalhuhirira.” Ak’ongerako athi: “Erikangiriribwa eryo mulyangwathikya eribya n’omubere w’eriyiyinia. Esyondegheka syaghe sy’obunyakirimu syamabya nga syamatalibana, nganza ingasisuba-subania lhuba. Sindi lengekanaya indi nangabere n’omubere oyu ababuthi bethu kubathabya bakakwama-kwamania esyondegheka sy’obunyakirimu. Kubalhuhirira, kyangabere kyolho ingye eribulha okwa mihindano n’esindi ndegheka sy’obunyakirimu.”

8. (a) Yesu mwakangania athi ngoku ayikehirye? (b) Yesu eriyikehya mukyahamba kithi okwa bigha biwe?

⁸ Yesu nomwanabya ahikene, iniakayikehaya n’eriminya kw’akayithagha obuwathikya bwa Yehova. (Soma Yoane 5:19.) Mbwino eriyikehya lya Yesu mulyanaleka abigha biwe ibathamusikya? Eyihi. Nibya ibbwa ibakabya bakalhangira ngoku ayikethere Yehova nabu ibak’ongera erimuyikethera. Enyuma waho nabu mubagherererya eriyikehya lya Yesu.—Emib. 3:12, 13, 16.

9. Emyusuko yawu yangana hambawako yithi wamayikehya, wukasaba ekighanyiro, n’eriminya obulemwa bwawu?

⁹ Thukalemererawa kutsibu kandi sithuhikene ngoku Yesu abya ahikene, neryo thukasobaya. Omw’iyikehya minya obulemwa bwawu n’eriligha ebisobyo byawu. (1 Yn. 1:8) Okwa babiri bano, nindi oyowangasikya kutsibu? Omukulhu oyukaligha amasobya kutse omukulhu oyuthesaba ekighanyiro? Omunyethu wawu akabya am’owa wukasaba ekighanyiro, nayu ak’ongera erikusikya. Nayu iniakend’igha eriligha ebisobyo biwe. Rosemary omubuthi w’abaana basathu akabugha athi: “Ithukaligha ebisobyo byethu, n’ekyo mukyaleka abaana bethu ibabya isibangabisirira bamakolha ekindu. Muthwaminya obulemwa bwethu, neryo muthwakangirirya abaana bethu aho bangabana obuwathikya. Ithukabakangirira ebitabu byethu ebiseghemere okwa Biblia n’erisaba haghuma nabu.”

10. Yesu mwakangania athi eriyikehya akaha abigha biwe b’ebilhaghiro?

¹⁰ Yesu abya n’obuthoki bw’eriha abigha biwe b’ebilhaghiro. Aliwe omw’iyikehya iniakabwira abigha b’ekikaleka iniabaha ekilhaghiro kirebe. Ng’eky’erileberyako mwathakwama kya bwira abigha biwe athi batsuke erisondya Obwami n’erithunganene lya Nyamuhanga, aliwe mwabugha athi: “Nayu asyabaha ebindu byosi ebi.” Abere abiribugha athi, “Simutswere,” Yesu mwaha enzumwa eno: “Mukasyatswerwa na Nyamuhanga; kusangwa omusindo mukatswera gho na Nyamuhanga asyabatsweramo.”—Mt. 6:31–7:2.

11. Omughulhu kithokekene, busana naki ni ky’amenge erisoborera enzumwa eyirekire iwahira h’ekilhaghiro kirebe?

¹¹ Kyamathokekana, soborera ekyamaleka iwahiraho ekilhaghiro kirebe. Omwana amaminya enzumwa eyikaleka iwahira h’ekilhaghiro kirebe, ikyangana leka iniakighondera ahathe erikakwa. Barry, oyuwakulhaya abaana bbani akabugha athi, “Eribwira abaana ekikaleka iwahira h’ekilhaghiro kirebe likaleka ibakuyikethera kundi bakalhangira ebilhaghiro byawu isiby’eriyitsomana, aliwe ibikakanganaya ku wubatsomene.” Omusuko akabya inianemukulha erihika okw’ibya iniangana yithwiramu. Barry athi: “Abaana batholere ibaminya erithwamu ndeke butsira erikwamana n’eriyowa lyabu aliwe ngoku omundu atholere iniabya n’enzumwa eyuwene eyikaleka iniathwamu.” (Esy. 119:34)  Omw’iyikehya, wamaha omusuko wawu y’enzumwa ey’erithwamu lyawu, iniakendi minya ngoku wunasi kw’anemukulha, neryo ekyo ikyamw’eghesya nayu erikolesya ndeke amenge wiwe akathwamu.

12. Yesu mwakolesya athi amenge eriwathikya Petero?

¹² Yesu iniakakolesaya amenge kandi iniakaminya ah’abigha biwe bakayithagha obuwathikya. Ng’eky’erileberyako, omukwenda Petero sy’abya n’amalengekania mabi akabwira Yesu athi ayikwire obulighe syendikwa. Aliwe Yesu mwaminya ngoku amalengekania wa Petero syahikire. Eriwathikya Petero n’abandi bigha, Yesu mwamukunga embere sy’abandi, amababwira akabi akali omw’isaghirira, n’eribugha emighisa eyikalhua omw’iyihayo. (Mt. 16:21-27) Petero mw’igha erisomo.—1 Pet. 2:20, 21.

13, 14. (a) Ni kyahi ekyanga kangania ngoku erikirirya ly’omwana wawu lirimutseka? (b) Wanga kolesya wuthi amenge eriminya n’eriwathikya mwali wawu kutse mughalha wawu?

¹³ Saba Yehova akuhe amenge wangaminya ah’omusuko wawu akayithagha obuwathikya. (Esy. 32:8) Ng’eky’erileberyako, ni kyahi ekyanga kangania ngoku erikirirya ly’omusuko wawu lirimutseka? Obundi syakiwithe tseme, alimutsweba balikyethu, kutse abiritsuka eribisirira eriyowa liwe. Isiwathwamu lhuba-lhuba wuthi obo ekyo kikakanganaya kithi anawithe ekibi ekikalire eky’anemukolha. * Aliwe ibbwa kandi isiwagheghena ebiminyikalho ng’ebi, kutse amayisolholha, isiwabugha wuthi ali omwa buthuku bw’eriyithwa athya.

¹⁴ Nga Yesu, bulhaya ebibulyo omwa bwolho-bwolho n’omw’isikya. Ngoku erisumba lhuba-lhuba amaghetse awawukatheha omwa muthobero lyangana leka awandi iniuthangika, kuthya n’eribya nga wamakalha okwa musuko wawu ikyangana leka iwaherya akaghisa k’eriminya ebiri omwa malengekania wiwe. (Soma Emisyo 20:5.) Ilaria, akathasyabugha athi: “Omwa busuko bwaghe, munabulha nga ngathwemu kyahi, okw’ibya omwa kwenene n’eribya omwa banywani baghe abanga soma nabu. Ekitsibu ekyo mukyanyihambako  kutsibu kandi ababuthi baghe mubakilhangira. Kiro kighuma, mubambwira bathi babirilhangira ngoku singakiwithe etseme, bamambulya ekitsibu nga niki. Munalira, namababwira ekitsibu, namabasaba obuwathikya. Mubanyiwa omwa kikuba, bamambwira bathi ekyo bakakiyitheghereraya, n’eribugha bathi bakendi ngwathikya.” Ababuthi ba Ilaria mubatsukiraho erimuwathikya eribana abanywani abuwene omwa kithunga.

15. Soborera Yesu nga mwakangania athi amenge akakolangana n’abandi.

¹⁵ Kandi Yesu iniakakolesaya amenge omw’iminya aha bigha biwe bakayithagha obuwathikya n’aha babya bakakolha ndeke. Ng’omughulhu omulhume oyuwabya asibwe mwa Natanaeli owa ngoku Yesu ni we Nazareti, mwabugha athi: “Ekindu kyuwene kyanganalhua e Nazareti kwehi?” (Yn. 1:46) Habw’ebinywe ebyo, Natanaeli wangamuthwere ng’omundu oyuli athi? Oyukatsweba abandi? Ow’akasolholho? Oyuthawithe erikirirya? Yesu mwakangania obuyitheghererya omw’isondekania omu Natanaeli mw’ebibuya. Yesu mwamwahulha mo “Omuisraeli kwenene oyuthe mo mathebo.” (Yn. 1:47) Yesu iyo iniakaminya ebiri omwa muthima, neryo mwakolesya amaaka ayo eritsomana ekibuya ekiri omwa mundu.

16. Wanga wathikya wuthi omwana wawu omunyethu erikulha-kulhania emibere yiwe mibuya?

¹⁶ Iwe ng’omubuthi siwanga minya ekiri omwa muthima, aliwe Nyamuhanga iniakendi kuha amenge. Wunemwendi kolesya amenge ayo erisondekania ebibuya omwa mwana wawu? Sihali oyukanza eryahulha mwa “mutsibu.” Omwa malengekania wawu kutse omw’ibugha, isiw’ahulha omwana wawu mwa “mwana muthowa” kutse “mwana mubi.” Nomukyangabya indi kwenene omwana wawu anemusobya, mukanganaye ku wunamwasi ng’oyuwangana thoka kandi ng’oyunanzire erikolha ekihikire. Ibya iwunemulebya ebikakanganaya kw’anemulholha embere erikulha-kulhana, n’erimusingya. Muwathikaye erikulha-kulhania emibere yiwe mibuya omw’imuha obuthoki bw’erikolha mibiiri mirebe, kyamayithaghisibwa. Ekyo kya Yesu abya akakolha okwa bigha biwe. Enyuma w’omwaka mughuma n’embindi Yesu alibanangene na Natanaeli (oyukathasyahulhawa mo Bartolomayo), Yesu mwamusombolha mwa mukwenda, kandi Natanaeli mwabya Mukristayo w’omuhwa. (Lk. 6:13, 14; Emib. 1:13, 14) Erisima n’eribya iwunemuhira omwa mwana wawu mw’omuhwa ikikendi leka iniathayilhangira ng’oyukabera erilemwa, aliwe iniakendi yilhangira ng’Omukristayo oyo Yehova angana kolesya.

17, 18. Wamahathikana eriwathikya abaana bawu erikolera Yehova ikyangana lhwiririra mwaki?

¹⁷ Wukendibya wunemukulya abaana bawu, iwangana yowa ng’omukwenda Paulo, nayu oyuwabya ng’omubuthi okwa abawathikaya erigha ekwenene. Mwabya “n’obulighe bunene n’eriaghalhwa ly’omuthima” busana “n’olhwanzo lhunene” olhwabya awithire Abakristayo be Korinto, ababya ng’abaana biwe b’obunyakirimu. (2 Kor. 2:4; 1 Kor. 4:15) Victor, oyuwakulhaya abalhwana babiri n’omusika mughuma, akabugha athi: “Omughulhu bahika omwa myaka y’obusuko, mukitha thw’olhobera. Aliwe nomukyanabya kithya, etseme eyo thwabana haghuma nabu y’eyanabya nene okwa bitsibu. Yehova mwathuwathikya eribya ithune bughuma n’abaana bethu.”

¹⁸ Wulhole embere eryeghesya abaana bawu erikolera Yehova. Wukendibya wunemulengaho eribakangania ku wubanzire kutsibu, ambi iwabana tseme nene ey’erilhangira bakasa omwa kwenene n’eribya baana abanzire Yehova abakendibya “ibanemukwama ekwenene.”—3 Yn. 4.