1, 2. (a) Ki preocupacion algun mayor tin ora nan yiunan ta birando teenager? (b) Con bo yiunan por beneficia di nan adolescencia?

UN DI e momentonan di mas feliz pa un mayor ta ora su yiu batisa. Un ruman cu yama Berenice tin cuater yiu cu a batisa prome cu nan a haci 14 aña. El a bisa: “Esey tabata un experencia hopi emocionante pa nos. Nos tabata feliz cu nos yiunan a dicidi di sirbi Jehova. Pero nos tabata sa tambe cu nos yiunan lo enfrenta hopi desafio como teenager.” Si bo tin yiu cu ta teenager bo por compronde e preocupacion di Berenice.

² Un experto riba tereno di desaroyo di mucha a reconoce cu adolescencia ta un desafio tanto pa e mayornan como e teenager. El a bisa: “Adolescencia no ta un periodo di locura of inmadurez. Mas bien, e ta un periodo cu nan ta desaroya nan creatividad, emocionnan y capacidad pa socialisa cu otro hende.” Mientras cu bo yiunan ta teenager nan por imita Hesus. Con? Wel, nan por desaroya un bon amistad cu Jehova, pone metanan spiritual, tuma nan mes decision pa dedica nan bida na Jehova y biba di acuerdo cu e decision ey. (Lesa Lucas 2:52.) Kico boso como mayor por haci durante e añanan importante ey? Laga nos mira con Hesus a desplega amor,  humildad y discernimento despues cu el a bira adulto. Con e cualidadnan aki por yuda bo entrena bo yiu pa sirbi Jehova?

3. Con bo por ripara cu Hesus y su apostelnan tabata bon amigo?

³ Hesus tabata un amigo amoroso y leal. (Lesa Juan 15:15.) Den tempo biblico, no tabata comun pa un doño bisa su esclavonan loke e tabata pensa y sinti. Sinembargo, Hesus a demostra di ta tanto un maestro como un amigo pa su apostelnan fiel. El a dedica tempo na nan, comparti su sintimento cu nan y a presta atencion ora nan tabata desahoga nan mes cu ne. (Mar. 6:30-32) E manera amoroso ey di comunica a haci nan mas uni y a prepara nan pa responsabilidadnan mas grandi cu Jehova lo a duna nan den futuro.

4. Con bo por ta un amigo di bo yiu sin perde bo autoridad como mayor? (Wak e prome plachi.)

⁴ Michael, un tata di dos yiu, a bisa: “Aunke nos no ta nan pareu, nos por ta nan amigo si.” Amigonan ta pasa tempo hunto. Kisas bo por dedica menos tempo na trabou of otro actividadnan pa asina bo tin mas tempo pa bo yiunan. Lo ta bon pa bo haci oracion tocante esaki. Hopi biaha amigonan ta gusta e mesun tipo di cosnan. Pesey, mustra interes den cosnan cu bo yiu ta gusta, manera su musica, peliculanan of deportenan faborito. Ilaria, cu ta biba na Italia, a bisa: “Mi mayornan a mustra interes den e musica cu mi ta scucha. Mi tata a bira mi mihor amigo, y mi a sinti mi liber pa papia cu ne tocante asuntonan delicado.” Si bo ta purba di ta amigo di bo yiunan y ta yuda nan disfruta di un relacion “intimo” cu Jehova, no ta nifica cu bo ta perde bo autoridad como mayor. (Sal. 25:14) Al contrario, bo ta mustra cu bo ta stima nan, respeta nan y bo ta bira mas acercabel. Asina nan lo ta mas habri cu bo.

5. Con Hesus a yuda su discipelnan haya goso den nan sirbishi na Jehova?

⁵ Hesus tabata sa cu su discipelnan lo ta feliz si nan sirbi Jehova cu celo y keda ocupa den e trabou di predica. Pesey, Hesus a anima su discipelnan pa traha duro den sirbishi, y el a sigura nan bondadosamente cu e lo yuda nan pa nan tin exito.—Mat. 28:19, 20.

6, 7. Dicon ta amoroso pa mayornan yuda nan yiunan mantene un bon rutina spiritual?

⁶ Sin duda, bo kier pa bo yiunan tin un bon relacion cu Jehova. Y Dios kier pa bo cria bo yiunan den su disciplina y “inculca su manera di pensa den nan.” (Efe. 6:4) Pues, uza e responsabilidad cu Dios a duna bo pa establece y mantene un rutina spiritual. Pa ilustra: Bo ta haci sigur cu bo yiunan ta bay scol pasobra bo sa cu educacion ta importante y bo kier pa nan gusta siña. Di igual manera, mayornan amoroso ta haci sigur cu nan yiunan ta beneficia di e instruccion di Jehova cu nan ta haya na reunion, asamblea y den nan Adoracion Como Famia. E educacion aki, cu ta bin for di Jehova, por salba nan bida. Pesey, yuda nan mira con dushi ta pa siña mas tocante Jehova y mustra nan con e educacion aki lo haci nan sabi. (Prov. 24:14) Mescos cu Hesus a yuda su discipelnan, abo tambe por yuda bo yiunan tin exito den sirbishi. Con? Wel, bo por yuda nan haya e deseo pa papia cu hende tocante Bijbel y yuda nan sali den sirbishi regularmente.

⁷ Con un bon rutina spiritual por yuda hobennan? Erin, un ruman muher cu ta biba na Sur Africa, a admiti: “Como mucha, hopi biaha nos tabata gusta keha  ora nos mester a studia Bijbel, bay reunion of sirbishi. Tin biaha pa malo nos tabata purba di stroba e estudio di famia. Pero mi mayornan no tabata permiti esey. E entrenamento ey a yuda mi haya perseverancia. Pesey, ora algo stroba mi di mantene mi rutina spiritual, mesora mi ta haci tur cos posibel pa haya mi rutina bek. Mi no ta kere cu esey lo tabata e caso si mi mayornan no a haci nan best pa mantene e rutina spiritual di nos famia. Mi ta sigur cu si nan no a para firme, lo mi no tabata determina pa sigui bay mi reunionnan of participa den otro actividadnan spiritual.”

8. (a) Con Hesus a mustra cu e ta humilde? (b) Con Hesus su humildad a yuda su discipelnan?

⁸ Aunke Hesus tabata un homber perfecto, humildemente el a reconoce cu e tin limitacion y cu e mester a depende riba Jehova. (Lesa Juan 5:19.) Acaso Hesus su discipelnan a perde respet p’e door cu e tabata humilde? Claro cu no. En realidad, mas e tabata depende riba Jehova, mas su discipelnan tabata confi’e. Despues, nan a imita Hesus su humildad.—Echo. 3:12, 13, 16.

9. Ora bo ta admiti bo foutnan y bisa sorry, con esaki lo yuda bo yiu?

⁹ Contrario cu Hesus, nos ta imperfecto y ta haci hopi fout. Pesey, nos mester ta humilde. Nos mester compronde cu tin hopi cos cu nos no por haci y nos tin cu admiti nos foutnan. (1 Juan 1:8) Ken lo bo respeta mas? Un doño di trabou cu ta admiti cu e ta fout of un doño cu nunca ta bisa sorry? Asina tambe, bo yiu lo respeta bo mas si bo bisa sorry ora bo haci un fout. E lo por hasta siña admiti su mes erornan. Rosemary, un mama di tres yiu adulto, a bisa: “Nos tabata admiti ora nos tabata fout, y esey a motiva nos yiunan pa papia cu nos libremente ora nan tabatin problema. Nos a mustra nan unda nan por haya e mihor solucion pa nan problemanan. Ora nan tabatin mester di yudansa, semper nos tabata encurasha nan pa busca informacion den nos publicacionnan basa riba Bijbel, y nos tabata haci oracion cu nan.”

10. Con Hesus a mustra humildad ora di bisa su discipelnan kico pa haci?

¹⁰ Hesus tabatin autoridad pa bisa su discipelnan kico pa haci. Pero door cu Hesus ta humilde, hopi biaha e tabata splica nan pakico nan mester a haci algo. Por ehempel, e no a djis bisa su discipelnan pa busca prome e Reino y e husticia di Dios, pero el a bisa nan tambe: “Y lo e duna boso tur e cosnan aki.” Despues cu Hesus a bisa “stop di husga”, el a splica: “Pa boso no ser husga, pasobra cu e huicio cu boso ta husga, boso lo ser husga.”—Mat. 6:31–7:2.

11. Dicon ta sabi pa splica bo yiu pakico bo a pone un regla of tuma un cierto decision?

¹¹ Semper purba di splica bo yiu e motibo pakico bo a pone un regla of tuma un decision. Si bo yiu ta compronde pakico bo a tuma un cierto decision, e lo ta mas dispuesto pa obedece bo. Barry, kende a lanta cuater yiu, a bisa: “Ora bo duna nan un splicacion, esey lo yuda nan confia bo mas pasobra nan ta mira cu bo decisionnan ta basa riba principio, e no ta djis algo cu bo a dicidi na e momento ey.” Corda cu un teenager ta birando un adulto y ta siñando con pa uza su mes “capacidad di pensa.” (Rom. 12:1) Barry ta splica: “Un teenager mester siña pensa pakico e ta tuma un cierto decision y no djis laga su emocionnan influenci’e.”  (Sal. 119:34) Pues, sea humilde y splica bo yiu e motibo pakico bo a tuma un cierto decision. Di e manera ey, bo yiu lo mira cu bo ta reconoce cu e ta birando un adulto y e ta siña tuma su mes decisionnan cu su “capacidad di pensa.”

12. Con Hesus a uza discernimento pa yuda Pedro?

¹² Hesus tabatin discernimento y a compronde ki yudansa su discipelnan tabatin mester. Por ehempel, cu tur bon intencion apostel Pedro a bisa Hesus pa ta bondadoso cu su mes pa e no ser mata. Pero Hesus tabata sa cu e manera cu Pedro a rasona no tabata bon. Con Hesus a yuda Pedro y e otro discipelnan? Prome, Hesus a corigi Pedro. Despues el a splica nan kico lo pasa si nan no haci Jehova su boluntad hasta ora esaki ta dificil, y el a mustra nan e beneficionan di tin un spirito di sacrificio propio. (Mat. 16:21-27) Pedro a compronde e les.—1 Ped. 2:20, 21.

13, 14. (a) Kico lo por ta un indicacion cu bo yiu su fe ta birando zwak? (b) Con bo por uza discernimento pa compronde y yuda bo yiu?

¹³ Pidi Jehova duna bo discernimento pa bo por compronde den ki area bo yiu mester ayudo. (Sal. 32:8) Por ehempel, con bo por sa si bo yiu su fe ta birando zwak? Kisas e ta perdiendo su goso, e ta papia malo di e rumannan of bo ta sinti cu tin algo cu e no kier bisa bo. Mayornan no mester conclui di biaha cu nan yiu ta hiba un bida dobel of cu el a comete un pica serio. * Di otro banda, si un mayor mira cu su yiu tin un problema, e no mester ignora esey y pensa cu e ta djis un fase cu lo pasa.

¹⁴ Pa haya sa con pa yuda bo yiu, bo mester imita Hesus su manera di haci pregunta, esta, cu tacto y respet. Bo por compara esaki cu ora un hende ta saca awa for di un pos. Si e saca e awa mucho lihe, un tiki awa lo basha afo. Algo similar lo por pasa si bo no tin pasenshi y bo  ta purba di forsa bo yiu pa expresa su mes. Bo lo perde un oportunidad valioso pa haya sa kico e ta pensa y sinti. (Lesa Proverbionan 20:5.) Ilaria, cu nos a menciona anteriormente, a bisa: “Durante mi adolescencia, mi tabata kier a sirbi Jehova pero tambe mi tabata kier a pasa mas tempo cu mi compañeronan di scol. Mi mayornan a ripara cu algo tabata molestia mi. Un anochi, mi mayornan a bisa mi cu nan a ripara cu mi ta down, y nan a puntra mi si tin algo cu ta preocupa mi. Na yoramento mi a splica nan e situacion, y mi a pidi nan yudansa. Nan a brasa mi, bisa mi cu nan ta compronde mi y nan a priminti cu nan lo yuda mi.” Di biaha Ilaria su mayornan a cuminsa yud’e haya bon amigo den congregacion.

15. Splica con Hesus a uza discernimento den e manera cu e tabata trata cu otro hende.

¹⁵ Hesus a mustra discernimento tambe door di mira e bon cualidadnan di su discipelnan. Por ehempel, ora cu un homber cu yama Natanael a tende cu Hesus a bin for di Nazaret, el a bisa: “Acaso algo bon por sali for di Nazaret?” (Juan 1:46) Basa riba e pregunta ey, kico lo bo a pensa di Natanael? Lo bo a pensa cu e tabata critico, sin fe of cu e tabatin prehuicio? Hesus a mustra discernimento y a concentra riba Natanael su bon cualidadnan. El a yam’e “un Israelita den ken sigur no tin engaño.” (Juan 1:47) Hesus por a lesa curason y a uza e habilidad ey pa busca e bon cualidadnan den hende.

16. Con bo por yuda bo yiu cultiva bon cualidadnan?

¹⁶ Abo no por lesa curason mescos cu Hesus, pero bo por tin discernimento si. Jehova por yuda bo mira e bon cualidadnan di bo yiu. Nunca yama bo yiu rebelde of problematico. Hasta si bo yiu faya, lag’e sa cu bo ta mira su potencial y su deseo sincero di haci loke ta bon. Tuma nota di cualkier progreso cu e ta haci y elogi’e. Yud’e cultiva bon cualidad door di dun’e mas responsabilidad ora ta posibel. Esey ta loke Hesus a haci cu su discipelnan. Mas o menos un aña y mey despues cu el a conoce Natanael (conoci tambe como Bartolomeo), Hesus a scog’e pa bira un apostel, y Natanael a demostra cu e ta un cristian celoso. (Luc. 6:13, 14; Echo. 1:13, 14) En bes di laga bo yiu sinti cu constantemente e ta faya, dun’e elogio y animacion. Yud’e mira cu e por haci abo y Jehova contento, y cu e por uza su habilidadnan pa sirbi Jehova.

17, 18. Kico lo por ta e resultado ora bo sigui yuda bo yiunan pa sirbi Jehova?

¹⁷ Kisas bo ta sinti bo mes manera apostel Pablo, kende a bira un tata spiritual pa hopi hende. E tabata preocupa hopi pa tur esnan cu el a yuda siña tocante Jehova, y e tabata stima nan hopi. Pesey, e no tabata kier pa ningun di nan stop di sirbi Jehova. (2 Cor. 2:4; 1 Cor. 4:15) Victor, kende a lanta dos yiu homber y un yiu muher, a bisa: “E añanan di adolescencia no tabata facil. Pero toch e momentonan bon tabata hopi mas cu e retonan cu nos a enfrenta. Cu Jehova su yudansa, nos a disfruta di un amistad intimo cu nos yiunan.”

¹⁸ Sigui haci esfuerso pa entrena bo yiunan pa sirbi Jehova. Tambe, no keda sin mustra nan cuanto bo ta stima nan. Djis pensa con contento lo bo ta ora bo yiunan dicidi di sirbi Jehova y “sigui cana den e berdad.”—3 Juan 4.