1, 2. (1) Kotea ʼae ʼe tuʼania ki ai ʼihi matuʼā ʼo ʼuhiga mo ʼanatou fanau? (2) Kotea te ʼu lelei ʼe feala ke maʼu e te ʼu fanau ʼi tonatou temi tupulaga?

ʼE KO he lakaga fakafiafia ki te ʼu matuʼā moka papitema ʼanatou fanau. * (Vakaʼi te kiʼi nota.) Ko te ʼu fanau ʼe toko 4 ʼa Berenice neʼe natou papitema fuli kaʼe heʼeki natou taʼu 14. ʼE ina ui fenei: “Neʼe ko he lakaga fakafiafia kia maua. ʼE mahino ia, neʼe ma lotofakafetaʼi koteʼuhi ko te fia tauhi ʼama fanau kia Sehova. Kaʼe, ʼe ma toe iloʼi foki moka lahilahi ake ʼama fanau ʼe natou felaveʼi anai mo he ʼu faigataʼaia.” ʼE lagi kotou toe tuʼania foki ʼo ʼuhiga mo te faʼahi ʼaia, mo kapau ʼe liliu tokotou foha peʼe ʼofafine ko he talavou peʼe ko he finemui.

² ʼE ui e he tagata poto ko te temi tupulaga ʼe feala ke faigataʼa ki te ʼu matuʼā pea mo te ʼu fanau. Kaʼe, ʼe mole tonu ke manatu te ʼu matuʼā ko ʼanatou fanau ʼe natou vavale peʼe aga fakatamaliki. Kaʼe, ʼe ui e te tagata poto ʼaia, ʼe ʼi ai ʼanatou fakatuʼutuʼu, mo he ʼu meʼa ʼe natou logoʼi moʼoni pea ʼe ʼaoga ke natou fakatahi mo ʼonatou kaumeʼa. Koia ʼae ʼi tanatou kua lalahi, ʼe feala ki ʼakotou  fanau ke natou fakatuputupu ʼanatou felogoʼi mo Sehova, ohage pe ko tona fai e Sesu ʼi tana kei tupulaga. (Lau ia Luka 2:52.) ʼE feala ke natou toe hikihiki ʼonatou fealagia ʼi te faifakamafola pea mo tanatou fia gaue lahi ʼi te tauhi ki te ʼAtua. Pea ʼe feala pe ke natou toʼo ʼe natou totonu ʼanatou tonu ohage la ko te foaki ʼo ʼonatou maʼuli kia Sehova pea mo fakalogo kia te ia. Kaʼe, kotea ʼe feala ke kotou fai moʼo akoʼi ʼakotou fanau ʼae kua lalahi ke natou tauhi kia Sehova? Kotou ako mai te faʼahiga akoʼi e Sesu ʼana tisipulo ʼaki te ʼofa, mo te agavaivai pea mo te fakasiosio poto.

3. Neʼe iloʼi feafeaʼi e te kau apositolo ko Sesu neʼe ko tonatou kaumeʼa?

³ Ko Sesu neʼe mole pe ko te Pule ʼo ʼana apositolo. Kaʼe neʼe ko tonatou kaumeʼa. (Lau ia Soane 15:15.) ʼI te temi muʼa, ʼe mole ko te agamahani ʼa te tagata pule te palalau ki ʼana tagata kaugana ʼo ʼuhiga mo ʼana manatu mo te ʼu meʼa ʼae ʼe ina logoʼi. Kaʼe neʼe mole feia te aga ʼa Sesu ki ʼana apositolo, neʼe ina gaohi leleiʼi natou ʼo mole hage ko he ʼu kaugana. Neʼe ʼofa pea mo fakatahi tuʼumaʼu mo natou. Neʼe fiafia ʼi te fakaha age ʼana manatu pea mo te ʼu meʼa ʼe ina logoʼi. Pea neʼe fagono lelei moka fakaha age e ʼana apositolo ʼanatou manatu mo te ʼu meʼa ʼae ʼe natou logoʼi. (Maleko 6:30-32) Ko te felogoʼi ʼaia ʼa Sesu mo ʼana apositolo, neʼe natou liliu ai ko he ʼu kaumeʼa lelei. Pea neʼe tokoni te faʼahi ʼaia ki te gaue ka fakahoko anai e te kau apositolo ʼi te ka haʼu.

4. ʼU matuʼā, ʼe kotou lava kaumeʼa feafeaʼi mo ʼakotou fanau? (Vakaʼi te ʼuluaki pāki.)

⁴ Logo la ko kotou ʼae ʼe pule ki ʼakotou fanau kaʼe ʼe feala ke kotou liliu ko honatou kaumeʼa. Ohage pe ko te fakatahi tuʼumaʼu ʼa he ʼu kaumeʼa, ʼe lagi feala ke lahi age te temi ʼae ʼe kotou fakatahi ai mo ʼakotou fanau, ʼi te temi ʼae ʼe kotou gaue ai peʼe ko he tahi atu ʼu maʼua. ʼE ko he faʼahi ʼe tonu ke kotou faikoleʼi pea mo fakakaukau lelei ki ai. Ko he ʼu kaumeʼa ʼe natou fia fai ki he ʼu meʼa ʼe tatau. Koia, kotou faiga ke kotou iloʼi te meʼa ʼae ʼe leleiʼia ʼakotou fanau. Ohage la ko te musika, mo te ʼu ʼata peʼe ko te ʼu faigaoʼi ʼae ʼe natou leleiʼia. Pea kotou faiga ke kotou leleiʼia te ʼu meʼa ʼae ʼe natou leleiʼia. Ko Ilaria, ʼe maʼuli ʼi Italia, ʼe ina ui fenei: “ ʼE faiga ʼaku matuʼā ke nā leleiʼia te musika ʼae ʼe au fakalogo. ʼI tona fakahagatonu, kua au kaumeʼa lelei mo taku tamai. Pea ʼe au palalau faʼifaʼitaliha kia ia ʼo ʼuhiga mo he aluʼaga, tatau aipe pe ʼe faigataʼa.” Kapau ʼe kotou kaumeʼa mo ʼakotou fanau pea mo tokoni kia natou ke natou kaumeʼa mo Sehova, ʼe kotou pule pe anai ki ʼakotou fanau ʼi tokotou ʼuhiga matuʼā. (Taaga lea 3:32) Koia, ʼe tokagaʼi anai e ʼakotou fanau tokotou ʼofa mo takotou fakaʼapaʼapa ʼae kia natou. Pea ʼi takotou fai te faʼahi ʼaia, ʼe faigafua anai tanatou palalau atu ki he aluʼaga pe.

5. Neʼe feala ke maʼu feafeaʼi e te ʼu tisipulo ʼa Sesu ia he maʼuli fiafia?

⁵ Neʼe iloʼi e Sesu ʼe fiafia moʼoni anai ʼana tisipulo mo kapau ʼe natou maʼumaʼua ʼi te tauhi kia Sehova pea mo te fakamafola ʼo te logo lelei. Koia ʼae neʼe ina fakalotomalohiʼi ai natou ke natou faʼafai ʼi te gaue faifakamafola. Pea neʼe ina fakapapauʼi age ʼe nofo anai mo natou.—Mateo 28:19, 20.

6, 7. ʼE kotou fakaha feafeaʼi tokotou ʼofa ki ʼakotou fanau?

⁶ ʼE kotou loto ke nonofo ovi ʼakotou fanau kia Sehova. Pea ʼe loto e Sehova ke kotou akoʼi pea mo fakatonutonuʼi natou. Neʼe ina foaki atu te maʼua ʼaia ke kotou fai. (Efeso 6:4) Koia, ʼe tonu ke kotou tokakaga ʼo akoʼi tuʼumaʼu ʼakotou fanau. Kotou fakakaukauʼi age muʼa te aluʼaga ʼaeni: ʼE kotou tokakaga ke olo ʼakotou fanau ki te ako koteʼuhi  ʼe maʼuhiga kia natou te ako ʼaia. Pea ʼe kotou loto ke natou fiafia ʼi te ʼu meʼa foʼou ʼae ʼe natou ako. ʼO toe feia pe, kotou tokakaga ke natou kau ki te ʼu fono, mo te ʼu fakatahi pea mo te ako fakafamili. Pea tahi, ʼe feala ki te ako ʼae ʼe natou maʼu mai ia Sehova ke haofaki ai ʼonatou maʼuli. Koia ʼae kotou tokoni kia natou ke natou fiafia ʼi te ako ʼo ʼuhiga mo Sehova. Pea ke natou mahino ʼe feala ke ina akoʼi natou ke natou liliu ʼo fakapotopoto. (Taaga Lea 24:14) Koia, kotou akoʼi ki ʼakotou fanau ke natou olo tuʼumaʼu ki te gaue faifakamafola. Pea kotou faʼifaʼitakiʼi ia Sesu ʼo kotou tokoni kia natou ke natou fiafia ʼi te akoʼi ki ni ʼihi te Folafola ʼa Te ʼAtua.

⁷ Ko takotou agamahani ʼae ko te tauhi kia Sehova, ohage la ko te ako, mo te ʼu fono pea mo te gaue faifakamafola, ʼe tokoni anai feafeaʼi ki ʼakotou fanau? Ko Erin, ʼe maʼuli ʼi Afelika Saute, ʼe ina ui fenei: “ ʼI tamatou kei liliki, ka matou ako te Tohi-Tapu, mo olo ki te ʼu fono pea mo te gaue faifakamafola, neʼe matou pipiko. ʼI ʼihi temi, ʼe matou fai he meʼa ke mole fai ai tamatou ako fakafamili. Kaʼe neʼe mole he temi neʼe tuku ai ʼe ʼaku matuʼā.” Koia, neʼe lotofakafetaʼi ai ki ʼana matuʼā koteʼuhi neʼe nā tokoni ki ai ke mahino ki te maʼuhiga ʼo te ʼu faʼahi ʼaia. Ia ʼaho nei, ka to fono peʼe mole alu ʼo faifakamafola, ʼe foimo faiga ke ina toe maʼu ʼana agamahani ʼaia.

8. (1) Neʼe fakaha feafeaʼi e Sesu neʼe agavaivai? (2) Neʼe tokoni feafeaʼi te agavaivai ʼa Sesu ki ʼana tisipulo?

⁸ Logo la neʼe haohaoa ia Sesu, kaʼe neʼe agavaivai pea neʼe ina ui ki ʼana tisipulo ʼe ʼaoga kia ia te tokoni ʼa Sehova. (Lau ia Soane 5:19.) Neʼe mole kei hoko atu koa te fakaʼapaʼapaʼi ʼo Sesu e te ʼu tisipulo ʼuhi ko te faʼahi ʼaia? Kailoa. Koteʼuhi ʼi tanatou sisio ʼae ki tana falala kia Sehova, neʼe toe lahi age tanatou falala kia te ia. Ki muli age, neʼe natou faʼifaʼitakiʼi tana agavaivai.—Gaue 3:12, 13, 16.

9. Ka kotou fakaha ʼakotou lakahala pea mo faifakalelei, ʼe tokoni feafeaʼi te faʼahi ʼaia ki ʼakotou fanau?

⁹ ʼE mole tou hage ko Sesu, koteʼuhi ʼe tou agahala pea mo fai ni lakahala. Koia ʼae ʼe tonu ai ke tou agavaivai. ʼE tonu ke tou mahino ʼe lahi te ʼu faʼahi ʼe mole feala ke tou fai pea mo tou fakaha ʼatatou lakahala. (1 Soane 1:8) Koia ʼe mahino anai ʼakotou fanau ʼe tonu ke natou fakaha ʼanatou lakahala pea ʼe lahi age anai tanatou fakaʼapaʼapa kia koutou. Pea tahi, ko ai ʼae ʼe lahi age takotou fakaʼapaʼapa ki ai? Ko he patolo ʼe ina fakaha koa neʼe ina fai he meʼa ʼe kovi peʼe ko he tahi ʼe mole ina ui tuʼumaʼu ʼe au fakalelei atu? Ko Rosemary, neʼe ko ʼana fanau ʼe toko tolu, ʼe ina ui ko ia mo tona ʼohoana ʼe nā fakaha lelei ʼana lakahala. ʼE ina fakamahino fenei: “Ko te faʼahi ʼaia, neʼe ina ʼekenaki ai ʼama fanau ke ʼomai ʼo fakaha mai ʼonatou fihifihia.” ʼE ina hoko atu fenei: “Neʼe ma akoʼi ki ʼama fanau pe ʼe natou maʼu ʼifea te ʼu puleʼaki ki ʼonatou fihifihia. Moka ʼaoga kia natou he tokoni, ʼe matou kumi tuʼumaʼu ki ʼamatou tohi Fakatohi-tapu pea ʼe matou faikole fakatahi.”

10. Neʼe fakaha feafeaʼi e Sesu tana agavaivai logo la tona ʼuhiga pule?

¹⁰ ʼI te ʼuhiga pule ʼo Sesu, neʼe ina ui ai ki  ʼana tisipulo te ʼu meʼa ʼae ʼe tonu ke natou fai. Koteʼuhi neʼe agavaivai pea neʼe ina fakamahino tuʼumaʼu te tupuʼaga ʼo tanatou fai te faʼahi ʼaia. Ohage la, neʼe mole ina ui age pe ke natou kumi muʼa te Puleʼaga pea mo te faitotonu ʼo te ʼAtua. Kaʼe, neʼe ina toe ui fenei: “E fakalahi atu anai te u mea fuli aena kia koutou.” ʼI te temi ʼae neʼe ui age e Sesu kia natou ke ʼaua tanatou faifakamau, neʼe ina fakamahino fenei: “O tupu ke aua naa fakamaaui koutou. Koteuhi e fakamaaui anai koutou aki te fakamaau ae nee kotou fai.”—Mateo 6:31–7:2.

11. ʼE kotou tokoni feafeaʼi anai ki ʼakotou fanau moka kotou fakamahino te tupuʼaga ʼo takotou toʼo he tonu?

¹¹ Kotou kumi te temi lelei ʼae ke kotou fakamahino ai ki ʼakotou fanau te tupuʼaga ʼo takotou fai he lekula peʼe ko he tonu. ʼE natou fakalogo anai moka natou mahino ki tona tupuʼaga. Ko Barry, neʼe ina taupau ʼana fanau ʼe toko fa, ʼe ina ui fenei: “Kapau ʼe tou fakamahino te ʼu tupuʼaga, ʼe tokoni anai ki ʼakotou fanau ke natou falala kia koutou.” ʼE tokagaʼi anai e ʼakotou fanau neʼe mole pe kotou toʼo he tonu ʼuhi he ko kotou ʼae ʼe pule kaʼe ʼuhi ʼe kotou mahino ki tona tupuʼaga. Koia kotou manatuʼi, ko te ʼu fanau ʼae kua lalahi ʼe mole ko he ʼu fanau kei liliki. ʼE natou kamata ako pe ʼe feafeaʼi tanatou toʼo he tonu ʼe natou totonu. (Loma 12:1) ʼE fakamahino fenei e Barry: “ ʼE ʼaoga ki te ʼu fanau ʼae kua lalahi ke natou toʼo he ʼu tonu fakapotopoto neʼe natou fakakaukauʼi kaʼe mole ko he ʼu tonu neʼe hoko fai.” (Pesalemo 119:34) Koia, kotou agavaivai pea mo fakamahino ki ʼakotou fanau te tupuʼaga ʼo takotou toʼo he tonu. ʼI takotou fai te faʼahi ʼaia, ʼe natou ako anai ke natou toʼo e natou totonu ʼanatou tonu. Pea ʼe natou iloʼi anai ʼe kotou fakaʼapaʼapa kia natou pea ʼe kotou mahino ai ko he ʼu fanau kua fakapotopoto.

12. Neʼe tokoni feafeaʼi ia Sesu kia Petelo?

¹² Neʼe maʼu e Sesu te fakasiosio poto pea neʼe mahino ki te tokoni ʼae neʼe ʼaoga ki ʼana tisipulo. Ohage la, ʼi te temi ʼae neʼe ui ai e Sesu ki ʼana tisipulo ʼe kua vave matehi, neʼe ui e Petelo kia Sesu ke agalelei kia ia totonu pe. Neʼe iloʼi e Sesu neʼe ʼofa ia Petelo ia ia kaʼe neʼe toe mahino foki neʼe mole lelei ia te faʼahiga manatu ʼa Petelo. Neʼe tokoni feafeaʼi ia Sesu kia ia pea mo te tahi ʼu tisipulo? ʼUluaki, neʼe ina fakatonutonuʼi ia Petelo. Pea, neʼe fakamahino e Sesu te aluʼaga ʼae ka hoko anai kia natou ʼae ʼe fakafisi ki te fai ʼo te finegalo ʼo Sehova ʼi te ʼu temi faigataʼa. Neʼe toe ui e Sesu ko Sehova ʼe ina fakapale anai ia natou ʼae ʼe mole manatu pe kia natou totonu. (Mateo 16:21-27) Neʼe mahino lelei ia Petelo ki te ʼu palalau ʼaia ʼa Sesu.—1 Petelo 2:20, 21.

13, 14. (1) Kotea ʼae ʼe ha ai ʼe ʼaoga ki ʼakotou fanau ke fakamalohiʼi tanatou tui? (2) ʼE kotou iloʼi feafeaʼi te tokoni ʼae ʼe ʼaoga moʼoni ki tokotou foha peʼe ʼofafine?

¹³ Kotou kole kia Sehova ke kotou maʼu te fakasiosio poto, ke kotou mahino ki te faʼahi ʼae ʼe ʼaoga ki ʼakotou fanau. (Pesalemo 32:8) ʼE lagi kotou tokagaʼi ʼe mole natou fiafia ohage ko te agamahani peʼe natou palalau kovi ʼo ʼuhiga mo te ʼu tehina. Pe ʼe lagi kotou logoʼi ʼe ʼi ai he meʼa ʼe natou fufu atu. ʼAua naʼa kotou manatu atu aipe neʼe natou fai fakafufu ia he meʼa ʼe kovi. * (Vakaʼi te kiʼi nota.) Kaʼe, ʼaua naʼa kotou meʼa noaʼi te fihifihia peʼe kotou fakaʼamu ʼe puli anai. ʼE feala ke kotou tokoni kia natou ke fakamalohiʼi tanatou tui.

¹⁴ Kotou fai he ʼu fehuʼi ʼaki he agalelei pea  mo he fakaʼapaʼapa ke kotou iloʼi ai pe ʼe kotou tokoni feafeaʼi ki ʼakotou fanau. Ohage pe ko te ohu ʼo he moʼi vai mai he vai keli. Kapau ʼe kotou toho fakavilivili ake te pakete vai, ʼe mole feʼauga anai te moʼi vai ʼae kotou loto ki ai. ʼO toe feia pe, kapau ʼe mole kotou faʼa kataki moka kotou fai he ʼu fehuʼi peʼe kotou fakakinauʼi te fanau ke palalau ʼatu, ʼe lagi mole feala anai ke kotou iloʼi ʼanatou manatu moʼoni mo te ʼu meʼa ʼae ʼe natou logoʼi. (Lau ia Taaga Lea 20:5.) ʼE manatuʼi e Ilaria te temi ʼae neʼe kua lahi ai, neʼe fia fakatahi tuʼumaʼu mo ʼona kaugā ako kaʼe neʼe ina iloʼi neʼe mole lelei. Neʼe tokagaʼi e ʼana matuʼā neʼe hoha ʼo ʼuhiga mo he aluʼaga. ʼE ui fenei e Ilaria: “ ʼI te tahi afiafi, neʼe nā ʼomai koteʼuhi neʼe nā tokagaʼi ʼe hage neʼe au lotomamahi pea neʼe nā fehuʼi mai pe ʼe ʼi ai hoku fihifihia. Neʼe au tagi mamahi pea neʼe au fakamahino age te aluʼaga ʼae neʼe hoko. Neʼe au kole tokoni kia naua. Neʼe nā faʼufua mai ʼo fakaha mai tanā lotomahino. Pea neʼe nā fakapapauʼi mai ʼe nā tokoni mai anai.” Koia, neʼe tokoni atu aipe te ʼu matuʼā ʼa Ilaria kia ia ke ina maʼu ʼona kaumeʼa lelei ʼi te kokelekasio.

15. Kotea ia te tahi faʼahi neʼe fakaha e Sesu neʼe ina maʼu te fakasiosio poto?

¹⁵ Neʼe toe maʼu e Sesu te fakasiosio poto ʼi tana tokagaʼi te ʼu kalitate ʼo ʼana tisipulo. Ohage la, ʼi te logo ʼa Natanaele neʼe haʼu Sesu mai Nasaleti, neʼe ina ui fenei: “Pe e feala ke hau he mea e lelei mai Nasaleti?” (Soane 1:46) Kapau neʼe kotou logo ki te faʼahi ʼaia, ʼe lagi kotou manatu anai neʼe maʼu e Natanaele he ʼu manatu ʼe mole lelei, peʼe neʼe fakapalatahi, peʼe neʼe mole tui. Neʼe mole manatu feia ia Sesu. Kaʼe, neʼe ina maʼu te fakasiosio poto pea mo mahino ko Natanaele neʼe ko he tahi neʼe aga fakahagatonu, koia neʼe ina ui fenei ai: “Koeni he tagata Iselaele mooni, e mole pe mau he kaka ia ia.” (Soane 1:47) Neʼe iloʼi e Sesu te ʼu meʼa ʼae ʼi te loto pea neʼe ina fakaʼaogaʼi te fealagia ʼaia ke ina iloʼi te ʼu kalitate ʼo te hahaʼi.

16. ʼE kotou fakalotomalohiʼi feafeaʼi ʼakotou fanau ke natou hoko atu ʼanatou faiga?

¹⁶ Logo la ʼe mole feala ke kotou iloʼi te ʼu meʼa ʼae ʼi te loto ohage ko Sesu kaʼe ʼe feala ke kotou maʼu te fakasiosio poto. ʼE feala ke tokoni mai ia Sehova ke kotou tokagaʼi te ʼu kalitate ʼo ʼakotou fanau. Tatau aipe pe ʼe  fakamamahiʼi koutou e ʼakotou fanau, ʼaua naʼa kotou ui age ko he tahi ʼe agakovi peʼe fakatupu maveuveu. Pea ʼe mole tonu ke kotou maʼu he ʼu manatu feia ʼo ʼuhiga mo natou. Kaʼe, kotou fakaha age ʼe kotou tokagaʼi ʼonatou kalitate pea ʼe kotou tui papau ʼe natou fia fai te meʼa ʼae ʼe lelei. Kotou tokagaʼi te ʼu faiga ʼae ʼe natou fai pea mo vikiʼi ia natou. Kotou tokoni kia natou ke natou gaueʼi ʼonatou kalitate ʼo kotou foaki age he tahi ʼu gaue mo kapau e feala. Neʼe fai e Sesu te faʼahi ʼaia mo ʼana tisipulo. Hili te taʼu katoa vaelua mo tana felaveʼi mo Natanaele (ʼae neʼe toe higoa ko Patolomeo), neʼe foaki age e Sesu he gaue maʼuhiga. Neʼe liliu ia Natanaele ko he apositolo pea neʼe agatonu ki te gaue ʼae neʼe foaki age e Sesu. (Luka 6:13, 14; Gaue 1:13, 14) Koia, ʼaua naʼa kotou fai he meʼa ke manatu ʼakotou fanau ʼe mole lelei te meʼa ʼae ʼe natou fai kaʼe kotou vikiʼi pea mo fakalotomalohiʼi ia natou. Kotou faiga ke natou logoʼi ʼe natou fia fakafiafiaʼi ia koutou pea mo Sehova. Pea ʼe feala ke natou fakaʼaogaʼi ʼonatou fealagia ki te tauhi kia Sehova.

17, 18. Kapau ʼe kotou haga akoʼi ʼakotou fanau ke natou tauhi kia Sehova, kotea anai tona fua?

¹⁷ ʼI takotou taupau ʼakotou fanau, ʼe lagi kotou logoʼi ʼi ʼihi temi te faʼahi ʼae neʼe logoʼi e te apositolo ko Paulo. Koteʼuhi neʼe liliu ko te tamai fakalaumalie maʼa te tokolahi. Neʼe ina iloʼi te “mamahi lahi . . . mo he loto tuania” ʼuhi ko te “ofa lahi” ʼae neʼe ina maʼu ki ʼana fanau fakalaumalie ʼi Kolonito. (1 Kolinito 4:15; 2 Kolinito 2:4) Ko Victor, neʼe ina taupau ʼana fanau ʼe toko tolu, ʼe ina ui fenei: “Ko te temi tupulaga ʼe ko he aluʼaga faigataʼa. Kaʼe, ʼi te ʼu temi ʼae ʼe tou fakatahi lelei ai mo natou, ʼe tou galoʼi ai te ʼu faigataʼaia ʼo te temi tupulaga. Koia, ʼaki te tokoni ʼa Sehova ʼe tou fiafia ai ʼi te maʼu he ʼu felogoʼi lelei mo ʼatatou fanau.”

¹⁸ Tamai mo koe faʼe, ʼe kotou faiga ke kotou akoʼi ʼakotou fanau koteʼuhi ʼe kotou ʼoʼofa mamahi ia natou. ʼAua naʼa kotou lotovaivai. Kotou fakakaukauʼi age muʼa te fiafia lahi ʼe kotou maʼu anai moka toʼo e ʼakotou fanau ia te tonu ʼae ke natou haga tauhi agatonu ki te ʼAtua.—3 Soane 4.