1, 2. 1) Xii nga ni jma riguu xizaa bixhoze binni ora maʼ ziyaca xiiñiʼ solteruhuiiniʼ, o binnidxaapaʼ huiiniʼ. 2) Xi cosa galán zanda guni ca solteruhuiiniʼ ne ca binnidxaapaʼ huiiniʼ.

TOBI de ca cosa ni jma rusiecheʼ ca testigu stiʼ Jiobá nga ora chúʼnisa xiiñicaʼ. Guzéʼtenu de ti hermana láʼ Berenice, laa napa tapa xiiñiʼ ne guyuunisa cada tobi de laacaʼ ante gusaa 14 iza. Laabe ne xheelabe nabé riéchecabe purtiʼ gudixhe ique guiráʼ xiiñicabe gúnicaʼ ni na Jiobá. Peru laaca guyuucabe xizaa purtiʼ maʼ ziyaca ca baʼduʼ stícabe solteruhuiiniʼ ne zadxaagalucaʼ stale guendanagana. Pa maʼ solteruhuiiniʼ ca xiiñiluʼ, o pa maʼ binnidxaapaʼ huiiniʼ laacaʼ la? nánnadu laaca riuuluʼ xizaa.

² Ti sicólogo guníʼ, ora maʼ ziyaca xiiñiʼ binni solteruhuiiniʼ, o binnidxaapaʼ huiiniʼ la? raca ni nagana para laacaʼ ne para bixhózecaʼ ne jñaacaʼ. Nuu binni riníʼ ique puru guendahuati nga rireené ca xiiñiʼ ne ruluiʼcaʼ xcuidi pur cani rúnicaʼ. Peru sicólogo riʼ cusiene nabé riuulaʼdxiʼ xiiñiʼ binni guni stale cosa ora maʼ ziniisi, laaca runi sentir stale cosa ni qué riene ne caquiiñeʼ tiempu para chuʼné ca xhamigu. Racá ridúʼyanu zanda guni ca solteruhuiiniʼ ne ca binnidxaapaʼ huiiniʼ stale cosa galán. Zanda gaca xhamígucabe Jiobá, cásica biʼniʼ Jesús dxi naca ti hombrehuiiniʼ (biindaʼ Lucas 2:52).  Laaca zanda guiziidicabe gucheechecabe diidxaʼ jma jneza ne guiale de ndaaniʼ ladxidóʼcabe gúnicabe stale cosa para Jiobá. Ne laaca zanda quixhe íquecabe gudiicabe xquendanabánicabe Dios ne guzuubacabe stiidxaʼ. Pa nápaluʼ xiiñiluʼ ni maʼ ziyaca solteruhuiiniʼ, o binnidxaapaʼ huiiniʼ, ximodo zanda gacaneluʼ laacabe gúnicabe ni na Jiobá yaʼ. Yenanda ejemplu stiʼ Jesús. Guidúʼyanu chonna modo zanda gusihuínniluʼ nadxiiluʼ ca xiiñiluʼ, riéneluʼ laacaʼ ne qué rudxiibaluʼ laca lii.

3. Xiñee nanna ca apóstol que xhamigu Jesús laacaʼ.

³ Ca binni gupa esclavu tiempu ruzeeteʼ Biblia, qué rábicaʼ laacabe xi caníʼ íquecaʼ ne xi cayuni sentircaʼ. Peru qué ñuu dxi ñuni Jesús ca apóstol stiʼ zacá. Guniʼbe qué ruuyabe laacaʼ casi esclavu stibe, sínuque casi xhamígube (biindaʼ Juan 15:15). Gunnaxhiibe laacaʼ ne bisihuínnibe ni ora guleebe tiempu para laacaʼ ne ora gúdxibe laacaʼ xi caníʼ íquebe ne xi cayuni sentirbe. Laaca bicaadiágabe laacaʼ ora gúdxicaʼ laabe xi caníʼ íquecaʼ ne xi cayuni sentircaʼ (Marcos 6:30-32). Gucané guiráʼ ndiʼ ca apóstol que gaca xhamígucaʼ Jesús ne chuʼcaʼ listu para dxiiñaʼ chigúnicaʼ.

4. Ximodo zanda gaca xhamigu binni xiiñiʼ. (Biiyaʼ foto ni zeeda ra ruzulú tema riʼ.)

⁴ Dxandíʼ zanda guni mandarluʼ xiiñiluʼ. Peru laaca zanda gaca xhamíguluʼ laacabe. Ximodo yaʼ. Primeru la? gulee tiempu para laacabe. Para ganda guʼnuʼ ndiʼ zándaca naquiiñeʼ guireeluʼ de dxiiñaʼ jma tempranu o gusaana de gúniluʼ xcaadxi cosa ti gápaluʼ jma tiempu. Nabé risaca ni, nga runi, biʼniʼ orar ne guníʼ ique de laani. Ne guiropa la? biiyaʼ ximodo gannuʼ gunáʼ nga ca cosa ni riuulaʼdxiʼ ca xiiñiluʼ. Guzéʼtenu ti ejemplu. Ñee nannuʼ xi canción, xi película o xi deporte jma riuuláʼdxicabe la? Biʼniʼ stipa pur chuuláʼdxiluʼ ni riuuláʼdxicabe. Guzéʼtenu de Ilaria, ti Testigu de Italia. Laabe guniʼbe biyubi bixhózebe ne jñaabe modo chuuláʼdxicaʼ ca canción ni riuuláʼdxibe. Pur ngue nabé guca xhamígube bixhózebe. Ne bidii ngue confianza laabe para gábibe laa intiica cosa. Nga runi, cadi guiníʼ íqueluʼ maʼ qué zanda guni mandarluʼ ca xiiñiluʼ pa gaca xhamíguluʼ laacaʼ o pa gacaneluʼ laacaʼ gaca xhamígucaʼ Jiobá (Salmo 25:14). Jmaruʼ si zuuyaʼ ca xiiñiluʼ nadxiiluʼ laacaʼ ne runi respetarluʼ laacaʼ. Ne zudii nga confianza laacabe para güinécabe lii de intiica cosa.

5. Xi naquiiñeʼ guni ca discípulo para chuʼcaʼ nayecheʼ.

⁵ Nanna Jesús ziuu ca discípulo stiʼ nayecheʼ pa chuuláʼdxicaʼ gúnicaʼ ni na Jiobá ne pa gucheechecaʼ diidxaʼ né stale gana. Ngue runi gúdxibe laacaʼ gucaa íquecaʼ gucheechecaʼ diidxaʼ ne guniʼbe zacanebe laacaʼ gaca dxiiñaʼ que (Mateo 28:19, 20).

6, 7. Xiñee rihuinni nadxii binni xiiñiʼ ora rusiidiʼ laacabe gúnicabe xhiiñaʼ Jiobá.

⁶ Lii laaca racalaʼdxuʼ gaca xhamigu ca xiiñiluʼ Jiobá. Ne maʼ bisaanabe lii para gusiidiluʼ ne para uguu jnézaluʼ laacabe (Efesios 6:4). Nga runi naquiiñeʼ guʼyaʼ chaahuiluʼ cadi gusaana de guiziidicabe ni zeeda lu Biblia. Guníʼ ique ndiʼ. Xiñee ruseendaluʼ xiiñiluʼ scuela. Purtiʼ nannuʼ zaquiiñebe ni ora maʼ guiniisibe. Yanna, cadi jma naquiiñeʼ gúʼyaluʼ cadi guiaadxaʼ ca xiiñiluʼ ca reunión, ca asamblea stinu ne chuʼcaʼ ora gápatu Adoración en Familia la? Bietenalaʼdxiʼ, zanda guilácabe pur ni guiziidicabe de Jiobá. Nga runi, gucané laacabe chuuláʼdxicabe gunibiáʼcabe Jiobá ne guiénecabe zanda gacané Dios laacabe para gánnacabe xi naquiiñeʼ gúnicabe (Proverbios 24:14). Bisiidiʼ laacabe pabiáʼ risaca gucheechecabe diidxaʼ. Yenanda ejemplu stiʼ Jesús ne gucané ca xiiñiluʼ chuuláʼdxicaʼ gusiidicaʼ binni de Biblia.

⁷ Ñee dxandíʼ ribeendú xiiñiʼ binni stale cosa galán pa gatigá chigucheeche diidxaʼ,  guni estudiar Biblia ne cheʼ ca reunión stinu la? Guzéʼtenu ejemplu stiʼ ti hermana de Sudáfrica. Laabe ne ca bizáʼnabe huaxiéʼ riuuláʼdxicabe guni estudiárcabe Biblia, chécabe reunión ne chigucheechecabe diidxaʼ. Ne nuu tiru laapécabe ruyúbicabe xi gúnicabe ti cadi gápacabe Adoración en Familia. Peru qué ñuu dxi niree bixhózebe ne jñaabe gana. Nabé rudiibe xquíxepeʼ bixhózebe ne jñaabe, purtiʼ gucanecaʼ laabe gánnabe pabiáʼ risaca chigucheechebe diidxaʼ ne chebe reunión. Yanna riʼ, ora chuʼ xiixa ni gucueeza laabe, nagueendaca ruyúbibe ximodo ganda gúnibe cani bisiidiʼ bixhózebe ne jñaabe laabe.

8. 1) Ximodo bisihuinni Jesús qué rudxiibaʼ laca laa. 2) Ximodo gucané ejemplu stiʼ Jesús ca discípulo stiʼ.

⁸ Neca guca Jesús ti binni sin donda, qué ñuu dxi nudxiibaʼ laca laa ne gudxi ca discípulo stiʼ caquiiñeʼ gacané Jiobá laa (biindaʼ Juan 5:19). Peru cadi pur ngue maʼ huaxiéʼ biʼniʼ respetar ca discípulo stibe laabe. Cumu ruuyacabe nabé rinabaʼ Jesús gacané Jiobá laa la? jmaruʼ si gúpacabe confianza laabe. Ra gudiʼdiʼ dxi, yenándacabe ejemplu stibe ne gúcacabe binni ni qué rudxiibaʼ laca laa (Hechos 3:12, 13, 16).

9. Xi zabeenduluʼ pa qué gudxiibaluʼ laca lii ne gusihuínniluʼ laaca rucheeluʼ.

⁹ Peru lii guleneluʼ donda ne qué zanda guʼnuʼ guiráʼ cosa jneza. Nga runi, ora gucheeluʼ la? guníʼ dxandíʼ bicheeluʼ ne cadi gudxiibaluʼ laca lii (1 Juan 1:8). Zacané ejemplu stiluʼ ca xiiñiluʼ guiniʼcaʼ pora bicheecaʼ ne jmaruʼ si zuni respetarcaʼ lii. Tu binni jma runi respetarluʼ yaʼ. Ti jefe ni riníʼ dxandíʼ ruchee la? o tobi ni qué riníʼ pa ruchee ne qué rinabaʼ gutiidiláʼdxicabe donda stiʼ. Guzéʼtenu de ti hermana láʼ Rosemary. Laabe ne xheelabe nabé bíʼnicabe stipa pur gusihuínnicabe nezalú guionnaʼ xiiñicabe laaca rucheecabe stale biaje. Gucané ngue ca xiiñicabe para gábicaʼ laacabe xi guendanagana cadíʼdicaʼ. Rosemary ne xheelaʼ qué nusaana de nusiidicaʼ laacabe naquiiñeʼ guni orárcabe Jiobá ne gúʼyacabe xiná ca publicación stinu ora gápacabe xiixa guendanagana.

10. Ximodo bisihuinni Jesús qué rudxiibaʼ laca laa dede né ora gudxi ca discípulo stiʼ xi naquiiñeʼ gúnicaʼ.

¹⁰ Ñanda ñabi Jesús ca discípulo stiʼ xi naquiiñeʼ gúnicaʼ, purtiʼ laa nga runi mandar laacabe. Peru cumu qué rudxiibabe laca laabe la? stale biaje bisiénebe laacaʼ xiñee naquiiñeʼ gúnicaʼ ni cayábibe laacaʼ. Ti biaje gúdxibe laacaʼ: «Cadi gusaanatu de guyúbitu primeru reinu stiʼ Dios ne gúnitu ni jneza ni rinabaʼ Dios laatu» (Mateo 6:33, TNM). Peru laaca bisiénebe laacaʼ xi zabeenducaʼ ora gúnicaʼ ni, laabe guniʼbe: «Óraque zudii laatu cani riuu tu xizaa pur laa». Sti biaje biʼniʼ mandarbe laacaʼ: «Cadi gudxiiba lu donda ique stobi». Peru laaca gúdxibe laacaʼ xiñee cadi naquiiñeʼ gúnicaʼ ni: «Purti donda ca gudxiiba lu ique stobi que, ngue ca guiaana luguiá luʼ» (Mateo 6:31–7:2).

11. Xiñee galán gusiéneluʼ ca xiiñiluʼ xi pur caguixhe íqueluʼ gúniluʼ xiixa.

¹¹ Cada biaje quixhe íqueluʼ gúniluʼ xiixa ni zacané ca xiiñiluʼ la? biyubi pora rábiluʼ jma galán gusiéneluʼ laacabe xiñee chigunuʼ ni. Zacá jma nagueenda zuzuubacabe stiidxaluʼ. Ti hermanu ni napa tapa xiiñiʼ na jma rapa ca solteruhuiiniʼ confianza bixhózecaʼ ne jñaacaʼ ora rusiénecaʼ laacabe xiñee gudixhe íquecaʼ gúnicaʼ xiixa. Racaneni laacabe guiénecabe napa bixhózecabe razón para guni xiixa. Bietenalaʼdxiʼ, maʼ cadi ti xcuidi ca xiiñiluʼ. Maʼ caziidicabe guiníʼ íquecabe ne gánnacabe xipeʼ nga naquiiñeʼ gúnicabe (Romanos 12:1). Hermanu ni bizéʼtenu riʼ laaca cusiene naquiiñeʼ guiziidiʼ ca solteruhuiiniʼ ne ca binnidxaapaʼ huiiniʼ qué zanda diʼ gúnicaʼ intiica chuuláʼdxicaʼ purtiʼ si runi sentircaʼ maʼ zanda gúnicaʼ ni (Salmo 119:34). Nga runi, cadi gudxiibaluʼ  laca lii ne bisiene laacabe xiñee chigunuʼ xiixa. Zacá zaziidicabe de ejemplu stiluʼ. Ne zuuyacabe runi respetarluʼ laacabe ne maʼ ruuyuʼ laacabe casi binni huaniisi.

12. Ximodo gucané Jesús Pedru.

¹² Maca nanna Jesús ximodo gacané ca discípulo stiʼ. Guzéʼtenu ti ejemplu. Dxi bisiénebe laacaʼ maʼ chigátibe, gudxi Pedru laabe cadi gudiibe lugar guuticabe laabe. Nanna Jesús cayabi Pedru laa zaqué purtiʼ nadxii laabe. Peru laaca nánnabe cadi jneza modo caníʼ ique Pedru. Ximodo gucané Jesús Pedru ne xcaadxi apóstol que ya. Primé la? guluu jnézabe Pedru. De raqué maʼ bisiénebe xi zazaaca binni pa qué guzuubaʼ stiidxaʼ Jiobá ora gapa guendanagana. Últimu la? guniʼbe zudii Jiobá ti premiu ca binni guni ni na Dios dede ora gatiʼ (Mateo 16:21-27). Nánnanu biziidiʼ Pedru xii ngue racalaʼdxiʼ Jesús (1 Pedro 2:20, 21).

13, 14. 1) Ximodo zanda gannuʼ pa caquiiñeʼ gacaneluʼ tobi de ca xiiñiluʼ gaca fe stiʼ jma naguidxi. 2) Xi naquiiñeʼ guʼnuʼ pa racalaʼdxuʼ gannuʼ ximodo gacaneuʼ ca xiiñiluʼ.

¹³ Gunabaʼ Jiobá gacané lii guiéneluʼ ca xiiñiluʼ ne gánnaluʼ ximodo gacaneluʼ laacabe (Salmo 32:8). Zándaca gueeda guuyaluʼ nuu tobi de laacabe triste o riníʼ mal de ca hermanu. O zándaca gudiiluʼ cuenta nuu xiixa ni qué naʼ ti xiiñiluʼ gabi lii. Cadi nagueendaca guiníʼ íqueluʼ cayúnibe xiixa cosa malu nagaʼchiʼ. * Peru laaca cadi guʼnuʼ casi ora cadi cayaca gastiʼ o guiníʼ íqueluʼ zaca chaahuiʼ guendanagana stibe zacasi. Zándaca caquiiñeʼ gacaneluʼ laabe para gaca fe stibe jma naguidxi.

¹⁴ Pa racalaʼdxuʼ gannuʼ ximodo gacaneuʼ ca xiiñuʼ la? gupa cuidadu ne respetu ora guinabadiidxuʼ laacabe xiixa. Zeeda gaca ndiʼ casi ora nibeeluʼ nisa ndaaniʼ ti bizé. Pa qué chuʼluʼ cuidadu ne qué gapuʼ paciencia la? zuxhiiluʼ stale nisa. Nga runi, ora guinabadiidxaluʼ ca xiiñiluʼ xiixa la? gupa cuidadu ne paciencia. Pacaa qué zanda diʼ gannuʼ xi caníʼ íquecabe ne xi cayuni sentírcabe. Biblia na: «Casi nisa ziaʼ nga ca conseju ni nuu ndaaniʼ ladxidóʼ ti hombre, peru tobi ni nuu xpiaaniʼ zanda cuee cani» (Proverbios 20:5). Lu párrafo 4 que guninu de ti hermana láʼ Ilaria. Dxi maʼ nácabe ti binnidxaapaʼ huiiniʼ, nabé  guyuuláʼdxibe chizanebe ca xcompañérube ora maʼ biluxe clase. Peru nánnabe cadi jneza diʼ ngue, ne pur ngue runi sentirbe mal. Biiyaʼ bixhózebe ne jñaabe nuu xi cuchiiñaʼ laabe. Ti dxi biiyacabe nuube triste ne gunabadiidxacabe laabe pa cuchiiñaʼ xiixa laabe. Bizulú biinabe, óraque gúdxibe laacaʼ xi cayácabe ne gunábabe gacanecaʼ laabe. Gudiidxi bixhózebe ne jñaabe laabe, gúdxicaʼ laabe riénecaʼ xi cayácabe ne guniʼcaʼ zacanecaʼ laabe. Nagueendaca gucanécabe laabe gápabe xhamígube lade ca binni ridagulisaa ra riécabe.

15. Bizeeteʼ ti ejemplu ni gusihuinni biene Jesús binni.

¹⁵ Bisihuinni Jesús riene ca discípulo stiʼ ne biiyaʼ ca guenda galán nápacabe. Guzéʼtenu ti ejemplu. Dxi binadiaga Natanael de Nazaret Jesús la? guníʼ: «Zanda xa iree ni iquiiñe de Nazaret» (Juan 1:46). Pa ñuuluʼ óraque, ñee niníʼ íqueluʼ nácabe ti hombre ni qué riníʼ ique jneza, ni runi menu binni de sti raza o qué gapa fe la? Jesús qué niníʼ ique zacá. Biénebe Natanael ne biiyabe napa caadxi guenda sicarú. Ngue runi gudxi Jesús laabe: «Laguuya ndi nga tobi ni dxandí pe naca binni Israel, laabe qué rusiguii be» (Juan 1:47). Gunda bidii Jesús cuenta xi riníʼ ique xcaadxi binni ne biquiiñeʼ gracia riʼ para guʼyaʼ xi guenda sicarú napa binni.

16. Ximodo zanda gacaneluʼ ca xiiñiluʼ para cadi gusaana de guiziidicaʼ.

¹⁶ Laatu qué zanda diʼ gánnatu xi caníʼ ique ca xiiñitu, peru zanda gúnitu stipa para guiénetu laacabe. Jiobá zacané laatu para gúʼyatu xi guenda sicarú nápacabe. Ne pa gueeda guchee ca xiiñiluʼ la? qué chuʼ ora guiniʼluʼ malu laacabe o maʼ qué zanda gaca chaahuicabe. Cadi lica guiníʼ íqueluʼ ni. Jma galán gábiluʼ laacabe ruuyaluʼ ca guenda sicarú nápacabe ne nannuʼ racaláʼdxicabe gúnicabe ni jneza. Biiyaʼ stipa cayúnicabe pur gúnicabe ni jneza ne gudxi laacabe jneza modo cayúnicabe dxiiñaʼ. Ne ora guʼyuʼ maʼ zanda la? bidii laacabe jma dxiiñaʼ para cadi gusaana de guiziidicabe. Ngapeʼ nga ni biʼniʼ Jesús né ca discípulo stiʼ. Gudiʼdiʼ si ti iza arondaʼ de binibiaʼbe Natanael (o Bartolomé), biʼniʼ nombrarbe laa para gaca apóstol. Ne biʼniʼ Natanael dxiiñaʼ bidiibe laa modo naquiiñeʼ gaca ni (Lucas 6:13, 14; Hechos 1:13, 14). Nga runi, yenanda ejemplu stiʼ Jesús. Cadi guʼnuʼ xiixa ni gucaa ca xiiñiluʼ guiníʼ íquecaʼ qué gánnacaʼ gúnicaʼ gastiʼ. Jma galán uguuluʼ gana laacabe ne guiecheneluʼ laacabe. Gudxi laacabe riecheʼ Jiobá ne laaca riécheluʼ pur stipa cayúnicabe, ne zanda iquiiñecabe ca gracia stícabe para gúnicabe ni na Jiobá.

17, 18. Xi zándaca cueenduluʼ pa gusiidiʼ chaahuiluʼ ca xiiñiluʼ.

¹⁷ Gucané apóstol Pablu stale xpinni Cristu para gunibiaʼcaʼ Jiobá. Beeda gácabe casi bixhózecaʼ, gunnaxhiibe laacaʼ ne guyuube xizaa pur laacaʼ. Para laabe la? pa ñanda nin tobi qué nusaana de ñuni ni na Jiobá (1 Corintios 4:15; 2 Corintios 2:4). Zándaca laaca nuu tiru nabé riuuluʼ xizaa pur ca xiiñiluʼ cásica guyuu Pablu xizaa. Peru guníʼ ique xi guníʼ ti Testigu láʼ Victor. Despué de bisiniisibe chonna xiiñibe, guniʼbe jma nagana ni ora maʼ ziyaca xiiñiʼ binni solteruhuiiniʼ, o binnidxaapaʼ huiiniʼ, peru guniʼbe guyuu jma cosa ni bisiecheʼ laabe que cani guluu laabe triste. Gucané Jiobá laabe ne xheelabe para gunda guca xhamígucabe ca xiiñicabe.

¹⁸ Nánnadu guizáʼ nadxiitu ca xiiñitu ne cayúnitu stipa pur gusiidiʼ chaahuitu laacabe. Nga runi, cadi guireetu gana. Laguiníʼ ique pabiáʼ guiéchetu ora quixhe íquecabe gúnicabe ni na Jiobá ne qué chuʼ dxi gusaanacabe laa (3 Juan 4).