Vakavinavinakataka na Lomasoli i Jiova

SARAVA/ROGOCA

E KALOU lomasoli o Jiova. (Jeme. 1:17) Me tekivu mai na kalokalo ni lomalagi me yaco ina iubi ni vuravura, era seretaka na ibulibuli i Jiova na nona lomasoli.—Same 65:12, 13; 147:7, 8; 148:3, 4.

Na titobu ni nona vakavinavinakataka na Dauveibuli na daunisame e bulia kina e dua na sere me vakalagilagia na cakacaka i Jiova. Wilika na Same 104, qai raica ke o duavata kei na ka e tukuna: “Au na sere vei Jiova ena noqu bula taucoko, au na sere ena vakacaucau vua na noqu Kalou ena gauna kece ni noqu bula.” (Same 104:33) Vakacava o via cakava tale ga qori?

IVAKARAITAKI UASIVI NI LOMASOLI

E vinakata o Jiova meda muria nona ivakaraitaki ena nona daulomasoli. E vakarautaka tale ga vei keda na sala meda lomasoli kina. Dikeva mada na nona uqeta na yapositolo Paula me vola: “Vakaroti ira na vutuniyau ena veika ni vuravura qo mera kua ni dokadoka, mera kua tale ga ni vakanuinui ena iyau e sega ni dei. Mera vakanuinui ga vua na Kalou, o koya e vakarautaka vakayauyau vei keda na ka kece meda marau kina. Tukuna vei ira mera cakava na ka e vinaka, mera vakaitavi vakalevu ena cakacaka yaga, mera lomasavu, mera yalosolisoli, mera maroroya me nodra na yavu vinaka ni bula e se bera mai, mera taura matua kina na bula dina.”—1 Tim. 6:17-19.

Na ikarua ni ivola uqeti vakalou e vola o Paula ena ivavakoso e Korinica, e vakabibitaka na itovo ni rai me baleta na lomasoli. E kaya o Paula: “Me cakava na tamata yadua na ka e vakadeitaka e lomana, me kua ni cakava ena voraki se vuturi, baleta na Kalou e taleitaki koya e soli ka ena marau.” (2 Kor. 9:7) Sa qai cavuta o Paula na yaga ni lomasoli: era na marau o ira na ciqoma; ra qai vakalougatataki vakayalo o ira na lomasoli.—2 Kor. 9:11-14.

E tinia o Paula na nona ivola ena nona cavuta na ivakaraitaki levu duadua ni nona lomasoli na Kalou. E kaya: “Me vakavinavinakataki na Kalou ena nona loloma soli wale, na iloloma e sega ni vakamacalataki rawa.” (2 Kor. 9:15) Na iloloma i Jiova e umani kina na ka vinaka kece e solia vei keda ena vuku i Jisu Karisito. Na kena talei, e sega ni vakamacalataki rawa.

Eda na vakaraitaka vakacava noda vakavinavinakataki Jiova kei na Luvena ena veika erau sa cakava? Dua na sala meda lomasoli kina oya meda solia noda gauna, kaukaua, kei na iyau meda vakatetea kina na sokalou savasava vei Jiova, se mani lailai se levu.—1 Vei. 22:14; 29:3-5; Luke 21:1-4.

Sala Era Cau Kina Eso ena Cakacaka e Vuravura Raraba

Me vaka ga ena nona gauna na yapositolo o Paula, e levu nikua era “biuta vakatikitiki” se ra maroroya na ilavo me biu ena kato ni cau ni ivavakoso e volai kina na “Cakacaka e Vuravura Raraba.” (1 Kor. 16:2) Era dau vakauta e veivula na ilavo qo na ivavakoso yadua ina valenivolavola ni iVakadinadina i Jiova ena nodra dui vanua. O rawa tale ga ni vakauta vakadodonu na nomu cau ina isoqosoqo e vakadonui vakalawa meda vakayagataka na iVakadinadina i Jiova. Ke o via kila na yaca ni isoqosoqo vakalawa e vakayagataki ena nomu vanua, veitaratara ina valenivolavola ni tabana. E rawa ni laurai ena www.pr418.com na itikotiko ni valenivolavola ni tabana. Qo na cau o rawa ni vakauta sara ga vakadodonu:

CAU E SOLI VAKAILOLOMA

E rawa ni vakau na cau ena sala qo: electronic bank transfer, debit card, se credit card. E rawa tale ga ni cakava qori eso na valenivolavola ni tabana ni vakayagataki na jw.org se dua tale na website veiganiti.
Cautaki na ilavo, iukuuku vatutalei kei na so tale na ka vakamareqeti. Me dua na ivola me vakau vata kei na cau qori, me vakamacalataka ni ka e cautaki ya e soli vakailoloma.

CAU E TIKO NA KENA VEIDINADINATI

Cautaki na ilavo qai tiko na veidinadinati ni na rawa ni suka tale vei koya e cau ke mani vinakata.
Me dua na ivola me vakau vata kei na cau qori, me vakamacalataka ni tiko na kena veidinadinati.

SOLI KA E LALAWATAKI

Me ikuri ni kena cautaki na ilavo kei na ka vakamareqeti tale eso, e tiko eso tale na cau me yaga ena cakacaka ni Matanitu ni Kalou e vuravura. Qori ena qai vakamacalataki ena vica na parakaravu tarava. Se mani sala cava o via cau kina, yalovinaka veitaratara e liu kei na valenivolavola ni tabana ena nomu vanua mo rawa ni kila na sala e rawa ni cau kina e dua ena nomu vanua. E duidui na ka vakalawa kei na lawa ni saumi vakacavacava, e bibi gona mo veivosaki kei na dua na daunivakasala ni ivakacavacava kei na ka vakalawa ni bera ni o digia na sala vinaka duadua mo cau kina.

Inisua: E rawa ni volai ina dua na isoqosoqo vakalawa e vakayagataka na iVakadinadina i Jiova na nona inisua e dua se nona ilavo ni vakacegu se peniseni.

Akaude ena Baqe: Na akaude ena baqe, sitivikiti ni ilavo e curu ena baqe, se na akaude ni nona sa vakacegu mai na cakacaka saumi e dua e rawa ni taura tu ga vakawawa se qai soli me taukena e dua na isoqosoqo vakalawa e vakayagataka na iVakadinadina i Jiova ni sa mate e dua, me lakolako vata ga kei na ivakarau ni veiqaravi ni baqe ena noda dui vanua.

Stock kei na Bond: E rawa ni dau soli na stock kei na bond ina dua na isoqosoqo vakalawa e vakayagataka na iVakadinadina i Jiova me dua ga na cau e soli vakailoloma se me dua na veidinadinati vakaivola me qai soli me taukena ni sa mate e dua.

Qele kei na Vale: E rawa ni soli vakadua na qele se na vale ina dua na isoqosoqo vakalawa e vakayagataka na iVakadinadina i Jiova, e rawa tale ga ni caka e dua na veidinadinati se me tawana tiko mada na qele se vale o koya e solia me yacova nona mate.

iLavo me Saumi e Veiyabaki: Na ilavo e cautaki ina dua na isoqosoqo vakalawa e vakayagataka na iVakadinadina i Jiova qai tuvanaki me dau soli e dua na kena iwase vei koya e cautaka mai ena veiyabaki me yacova na nona mate. Ena yabaki e soli kina na ilavo ina ituvatuva qo, ena rawa ni musu na nona ivakacavacava o koya e cautaka mai.

Wili kei na Trust: E rawa ni soli na iyau se na ilavo ina dua na isoqosoqo vakalawa e vakayagataka na iVakadinadina i Jiova, ena tabaki e dua na wili se rawa ni vakayacori e dua na veidinadinati, me maroroya toka na isoqosoqo vakalawa qori na nona ilavo se iyau e dua me yacova na nona mate, sa rawa ni qai taukena na isoqosoqo. Qori ena rawa ni vakalailaitaka na saumi ni vakacavacava.

Na cau va qori e vakatokai me “soli ka e lalawataki,” kena ibalebale ena vinakati me lalawa sara ga vakavinaka o koya e via soli ka. Sa vakarautaki e dua na brochure vakavalagi kei na kena vakaSipeni e vakatokai na Charitable Planning to Benefit Kingdom Service Worldwide me dusimaki ira na via soli ka ina cakacaka ni iVakadinadina i Jiova e vuravura raraba. A volai na brochure qori me kilai kina na sala ni soli ka vakailoloma e rawa ni caka ena gauna qo se dua na gauna se bera mai, me vaka na gauna sa mate kina e dua. Na ivakamacala ena brochure qori ena rairai sega ni ganita sara na kemu ituvaki ena vuku ni ivakacavacava se so tale na lawa ena nomu vanua. Ni o wilika oti gona na brochure, veivosaki kei na nomu daunivakasala ni lawa se ivakacavacava. Ni vakayagataki e vica na sala sa cavuti oti mai, e levu era sa tokona na noda cakacaka kei na noda cakacaka ni veivuke e vuravura raraba, qai vakalailaitaki kina na ivakacavacava e dau lavaki. Ke tiko ena nomu vanua na brochure qori, o rawa ni kerea vua na vunivola ni ivavakoso.

Me ikuri ni ivakamacala, o rawa ni veitaratara ena valenivolavola ni tabana e qarava na nomu vanua.

Rawa ni o Wilika Tale ga

iDusidusi ni Cau ena Internet

Raica na iwalewale mo cau kina ena Internet.

NA VALE NI VAKATAWA (ITABATABA E VULICI)