JEHOVÁ ningo imbaʼeporãiterei ha ipojera (Sant. 1:17). Upéva ojekuaa opa mbaʼe haʼe ojapóvape, por ehémplo, pe yvága omimbipáva ha ko yvy henyhẽva mbaʼe porãgui. La Biblia heʼi koʼã mbaʼe omombaʼeguasuha Ñandejárape (Sal. 65:12, 13; 147:7, 8; 148:3, 4).

Pe salmísta omombaʼe vaʼekue Ñandejárape ipyʼaite guive, upévare ojapo peteĩ purahéi omombaʼeguasu hag̃ua chupe. Eleemína pe Salmo 104, ikatu voi nde avei reñeñandu pe salmístaicha. Haʼe heʼi vaʼekue: “Apurahéita Jehovápe aikove aja pukukue, tódo el tiémpo amombaʼeguasúta Ñandejárape” (Sal. 104:33, NM).

Jehová oipota ñande avei ñanembaʼeporã ha ñandepojera haʼéicha. Ha oexplika voi mbaʼérepa iporã jajapo upéicha. Por ehémplo, heʼi vaʼekue apóstol Páblope oskrivi hag̃ua: “Ere umi ipláta hetávape ko tiémpope, ani hag̃ua oñembotuicha, ha ani ojerovia umi mbaʼerepy ikatúvare oñehundi. Upéva rangue tojerovia Ñandejárare, omeʼẽrasapáva ñandéve opa mbaʼe ñanembovyʼáva. Ere chupekuéra tombaʼapo iporãvare, tojapo heta mbaʼe porã ha taipojera, taikyreʼỹ okomparti hag̃ua ótrondi umi mbaʼe orekóva. Péicha haʼetéta ombyatýva hína umi mbaʼerepy oúva Ñandejáragui, upéva heʼise haʼekuéra omoĩha peteĩ simiénto iporãva tenonderãme g̃uarã, ikatu hag̃uáicha oñakarama hatã pe jeikove añeteguávare” (1 Tim. 6:17-19).

Apóstol Pablo oskrivírõ guare umi ermáno oikóvape Coríntope, heʼi chupekuéra mbaʼe aktitúpa oreko vaʼerã okontrivuíta jave. Haʼe heʼi: “Káda uno tomeʼẽ ipyʼapýpe odesidiháicha, anítei omeʼẽ tovapukúpe ni ojejopýgui chupe; Ñandejára ohayhúgui upe vyʼapópe omeʼẽvape” (2 Cor. 9:7). Upéi haʼe omensiona avei máva mávapa oñevenefisia péicha ojejapóramo. Primero umi orresivíva, pórke oñemeʼẽ chupekuéra umi mbaʼe oikotevẽva. Ha segundo umi omeʼẽva, pórke Ñandejára ovendesi umi ipojerávape (2 Cor. 9:11-14).

Upéi apóstol Pablo omomanduʼa avei chupekuéra mbaʼeichaitépa Ñandejára imbaʼeporã. Haʼe heʼi: “Jaagradese Ñandejárape pe rregálo ijojahaʼỹva omeʼẽvare ñandéve” (2 Cor. 9:15). ¿Mbaʼépa pe rregálo omeʼẽva Ñandejára? Upépe oikepaite hína opa mbaʼe porã Ñandejára ojapóva ipuévlo rehehápe Jesús rupive. Ha jaʼekuaa añetehápe koʼã mbaʼe haʼeha peteĩ rregálo ijojahaʼỹva.

Jehová ha Jesús ningo hetaiterei mbaʼéma ojapo ñanderehehápe, ha heta mbaʼe gueteri ojapóta. ¿Mbaʼéichapa ikatu jahechauka jaagradeseha umívare? Ikatu ñameʼẽ ñane tiémpo, ñane mbaretekue ha umi mbaʼe jarekóva ñaipytyvõ hag̃ua Jehová organisasiónpe. Ha noimportái michĩpa térã tuicha la ñameʼẽva, la iñimportánteva hína ñandepojera (1 Crón. 22:14; 29:3-5; Luc. 21:1-4).