JEHOVAH yin Jiwheyẹwhe alọtlútọ. (Jak. 1:17) Nudida Jehovah tọn lẹ, he bẹ sunwhlẹvu susugege he tin to olọn mẹ lẹ hẹn, kakajẹ ogbé he gọ́ aigba ji lẹ ji nọ pagigona alọtútlú etọn.—Ps. 65:12, 13; 147:7, 8; 148:3, 4.

Pinpẹn-nutọn-yinyọnẹn he Psalm-kantọ lọ tindo na Mẹdatọ etọn whàn ẹn sọmọ bọ e pà ohàn de nado pagigona azọ́n Jehovah tọn lẹ. Hia Psalm 104 bo pọ́n eyin a ma na tindo numọtolanmẹ etọn lẹ nkọ! Psalm-kantọ lọ dọmọ: “Yẹn na to hànji hlan OKLUNỌ sọle yẹn tin to ogbẹ̀ dẹnsọ: Yẹn na to pipà hànji hlan Jiwheyẹwhe ṣie whenuena yẹn tin to ogbẹ̀.” (Ps. 104:33) Be ojlo hiẹ lọsu tọn niyẹn ya?

Jehovah jlo dọ mí ni nọ tlúalọ dile emi nọ wà do. E sọ na mí whẹwhinwhẹ́n nujọnu tọn lẹ he wutu mí dona yin alọtlútọ. Doayi e go dọ ewọ gbọdo apọsteli Paulu nado wlan dọmọ: “Gbẹnuna mẹhe yin adọkunnọ to titonu ehe mẹ lẹ ma nado nọ yigo, podọ ma nado ze todido yetọn sinai do adọkun he ma tindo jidide lẹ ji, ṣigba do Jiwheyẹwhe, mẹhe nọ na mí onú lẹpo susugege na mí nido duvivi etọn lọ ji; nado nọ wà dagbe, nado nọ sudeji to azọ́n dagbe lẹ mẹ, nado yin alọtlútọ, bo wleawu nado mánamẹ, bosọ nọ bẹ adọkunnu whlá na yede, yèdọ dodonu dagbe de he ji yé na dó do to sọgodo, na yé nido sọgan tẹdo ogbẹ̀ nujọnu tọn lọ go gligli.”—1 Tim. 6:17-19.

To whenue Paulu kàn wekanhlanmẹ gbọdo etọn awetọ hlan agun Kọlinti tọn, e zinnudo pọndohlan dagbe tintindo gando nunamẹ go ji. Paulu dọmọ: “Mì gbọ omẹ dopodopo ni basi kẹdẹdile e ko magbe etọn to ahun etọn mẹ do.” Ewọ sọ yidogọ dọmọ: “E ma yin po awuwhiwhle po kavi po huhlọn yí do hẹnmẹ po gba, na Jiwheyẹwhe nọ yiwanna nunamẹtọ homẹhunnọ.” (2 Kọl. 9:7) Enẹgodo, Paulu donù mẹhe nọ mọaleyi sọn nunina he yè yí homẹdagbe do basi mẹ lẹ go: mẹhe mọ nunina yí lọ nọ yí i do hẹn pekọ wá na nuhudo etọn lẹ; podọ nunamẹtọ lọ nọ yin hinhẹn zun adọkunnọ gbọn dona gbigbọmẹ tọn he e nọ mọyi lẹ gblamẹ.—2 Kọl. 9:11-14.

Paulu donù kunnudenu daho hugan lọ he do alọtútlú Jiwheyẹwhe tọn hia go nado dotana adà wekanhlanmẹ etọn tọn ehe. Paulu wlan dọmọ: “Opẹ́ wẹ na Jiwheyẹwhe na nunina vọnu mayọnjlẹ etọn.” (2 Kọl. 9:15) E họnwun dọ nunina Jehovah tọn bẹ dagbewà etọn lẹpo he e dohia omẹ etọn lẹ gbọn Jesu Klisti gblamẹ hẹn. Ehe klo sọmọ bọ hogbe lẹ whè nado basi zẹẹmẹ lehe e họakuẹ do tọn to gigọ́ mẹ.

Nawẹ mí sọgan dohia dọ mí yọ́n pinpẹn nuhe Jehovah po Visunnu etọn po ko wà gọna nuhe yé na wá wà na mí lẹ tọn gbọn? Aliho dopo wẹ nado yin alọtlútọ gbọn whenu mítọn, huhlọn mítọn po nutindo mítọn lẹ po yiyizan dali nado nọgodona sinsẹ̀n-bibasi wiwe-ṣeke Jehovah tọn, vlavo e sù kavi whè.—1 Otan. 22:14; 29:3-5; Luku 21:1-4.