Mweshai Amba Musanta pa Bumpanyi bwa Yehoba

JIZHAI

YEHOBA ke Lesa upana. (Yakoba 1:17) Tumona bumpanyi bwanji mu bintu byonse byo alengele. Wayuzha jiulu na tubangabanga ne kuvwika ntanda na bichi byawama.—Salamo 65:12, 13; 147:7, 8; 148:3, 4.

Nembi wa Salamo 104 wasanchile bingi pa bintu byonse byalenga Yehoba, onkao mambo, wanembele lwimbo wa kumutota. Inge mwatanga uno salamo, nanchi ne anweba musanta byonka byasanchile nyimbi wa masalamo nyi? Waambile’mba: “Nkamwimbilanga Yehoba mu bwikalo bwami bonse; nkembanga nyimbo ya kutota Lesa wami moba onse a bumi bwami.” (Salamo 104:33) Nanchi ne anweba byo byo mukeba kuba nyi?

WA KUMWENAKO WAWAMA MU BUMPANYI

Yehoba ukeba’mba twikale bampanyi byonka byo aji. Kabiji witupa bintu byawama bitulengela kwikala bampanyi. Watangijile mutumwa Paulo kunemba’mba: “Wibakambizhe banonshi ba mu buno bwikalo amba kechi belundumikenga ne, kabiji kange baketekele mu bunonshi bwatutu ne, kana kuketekela mwi Lesa, yenka witupa bintu byonse byo twatemwa. Wibabuule’mba, bobenga byawama, bekale banonshi ba mingilo yawama, bampanyi, benengezha kukwashañana, beajile abo bene kitendekesho kyawama kya kulutwe kwikala kya buneme kyabo, pa kuba’mba bakwachishe ku bumi bwa kine kine.”—1 Timoti 6:17-19.

Mu nkalata yanji ya bubiji ku bena Kolinda, Paulo walumbulwile kine kintu kyafwainwa kwitulengela kupana bintu ku bakwetu. Waambile’mba: “Muntu yense obe monka mo afuukwila mu muchima wanji, kechi apane na bulanda nangwa na mambo a kumukanjikizha ne, mambo Lesa watemwa muntu upana na lusekelo.” (2 Kolinda 9:7) Bañanyi bo tukwasha inge twaikala bampanyi? Paulo waambile’mba tukwasha bakwetu inge twibapa byo bakajilwa, bino ne atweba bene twikwasha, mambo kupana kulengela Yehoba kwitupesha.—2 Kolinda 9:11-14.

Kepo Paulo aambile pa kishiino kikatampe kimwesha bumpanyi bwa Lesa byo aambile’mba: “Tusanchila Lesa na mambo a kya bupe kyanji kya kukankalwa ne mwa kwikilumbulwila.” (2 Kolinda 9:15) “Kya bupe” kya Yehoba kyavwangamo bintu byonse byawama byo etupa kupichila mwi Yesu Kilishitu. Kafwako byambo byo twakonsha kwingijisha kulumbulula buno bupe byo bwanema ne.

Twakonsha kumwesha byepi amba tusanta bingi pa byonse bitubila Yehoba ne Yesu ne byo baketubila kulutwe na lwendo? Jishinda jimo ke kwikala bampanyi kupichila mu kwingijisha kimye kyetu, bulume, ne bya bunonshi byetu mu kupopwela Yehoba ne kukwasha bantu kufunda pe aye. Twakonsha kuba bino nangwa inge tuji na bintu byavula nangwa bicheche.—1 Byambo bya Moba 22:14; 29:3-5; Luka 21:1-4

Mashinda Bamo O Bapainamo Bupe Bwa Kukwasha Mwingilo Wa Ntanda Yonse

Byonka byaubanga bena Kilishitu bajingako kala, bavula lelo jino nabo batulapo mali a bupe a kukwasha mwingilo wa ntanda yonse kabiji babika ano mali mu kabokoshi ka bupe kaji mu Nzubo ya Bufumu. (1 Kolinda 16:2) Pa ñondo pa ñondo, bipwilo bituma ano mali a bupe ku ofweshi wa Bakamonyi ba kwa Yehoba uji mu kyalo kyabo. Kabiji mwakonsha ne kutuma bupe ku kipamo kya Bakamonyi ba kwa Yehoba kyo banembesha ku kafulumende mu kyalo kyenu. Pa kuba’mba muyuke jizhina jo banembesheshamo kino kipamo ku kafulumende, yai pa www.pr418.com ne kwisamba na ba ku ofweshi wa Bakamonyi ba kwa Yehoba mu kyalo kyenu. Mwakonsha kupana bupe mu mashinda alondelapo:

BUPE

Kutuma mali mu banki kwingijisha Intaneti nangwa tubikachi twa mali twa ku banki. Mu byalo bimo, mwakonsha kutuma mali kwingijisha keyala wa jw.org nangwa keyala mukwabo wa pa Intaneti.
Mwakonsha kupana bupe bwa mali, bya kwikobaika bya buneme, nangwa bipe bikwabo bya buneme. Mwafwainwa kwibitumina pamo na nkalata ibena kulumbulula’mba ao mali nangwa bipe byo mwatuma bakebingijishe monse mo bakebela.

BUPE BO BABUULAÑANA BYA KWIBWINGIJISHA

Ke mali a bupe o mwapana kuba’mba beengijishe, pano bino, bakonsha kwimubwezhezha inge mwiakeba.
Mwafwainwa kutuma nkalata ibena kulumbulula’mba mwakonsha kukeba kwimubwezhezha bobo bupe.

MASHINDA AKWABO O MWAKONSHA KUPAINAMO BUPE

Panshipo paji mashinda akwabo o mwakonsha kupainamo bupe bwa kukwasha mwingilo wa kusapwila wa ntanda yonse. Saka mukyangye kupana bupe, tuminai ofweshi wa musampi wa mu kyalo kyenu bemubuule bupe bo bakonsha kuswa kwesakana na ko mwikala. Mizhilo ya kafulumende ne ya kupainamo misonko yapusana pusana, onkao mambo, ipuzhaipo umo wayuka mizhilo saka mukyangye kupana bobo bupe.

Mali a Kwivimbila: Inge muntu uji na kipao kya mali a kwivimbila nangwa a penshonyi, wakonsha kwiapana kwikala bupe kupichila mu kutongola kipamo kya Bakamonyi ba kwa Yehoba kyo banembesha ku kafulumende.

Mali aji ku Banki: Kwesakana na mizhilo ya mabanki ko mwikala, muntu wakonsha kupana mali anji aji ku banki, o alamina ku banki pa kimye kyabaya kwa kubula kwiafumyako, nangwa aji mu kipao kyo babikamo mali anji a penshonyi kuba’mba ekale ke bupe. Wakonsha ne kutongola kipamo kya Bakamonyi ba kwa Yehoba kyo banembesha ku kafulumende kuba’mba kikatambule ano mali inge wafwa.

Mali a Nsubu Afuma mu Busulu ne o Twakongwesha: Muntu wakonsha kupana ku kipamo kya Bakamonyi ba kwa Yehoba kyo banembesha ku kafulumende mali anji a nsubu afuma mu busulu ne o akongwesha ku makampanyi ne ku kafulumende. Wakonsha ne kunemba lulayañano lwa kuba’mba ano mali bakeatambule inge wafwa.

Bishimikwa ne Mpunzha: Inge muntu uji na kishimikwa nangwa mpunzha byo akonsha kupotesha, wakonsha kupana bino ku kipamo kya Bakamonyi ba kwa Yehoba kyo banembesha ku kafulumende. Inge po po ekala, wakonsha kutwajijila kwikala ponka kufikatu ne kimye kyo akafwa.

Bupe bwa pa Mwaka: Muntu wakonsha kupana mali anji ku kipamo kya Bakamonyi ba kwa Yehoba kyo banembesha ku kafulumende ne kunemba lulayañano lwa kuba’mba bakamupengako mali acheche pa mwaka pa mwaka kimye kyo akiji mumi. Mu yewo mwaka ye apainamo bobo bupe, bakonsha kumukepesheshako misonko.

Mulaye wa Lufu ne Mali o Babika mu Kipamo kya Busulu: Muntu wakonsha kunengezha kuba’mba bipe byanji nangwa mali anji bakeapane kwikala bupe inge wafwa. Wakonsha kuba bino kupichila mu kunemba mulaye wa lufu nangwa lulayañano lwa busulu ne kutongola kipamo kya Bakamonyi ba kwa Yehoba kyo banembesha ku kafulumende kuba’mba kikatambule byobyo bipe nangwa mali. Inge wauba bino, bakonsha kumukepesheshako misonko.

Inge mukeba kuyukilapo bikwabo pa mashinda a kupainamo bupe bwa kukwasha mwingilo wa ntanda yonse wa Bakamonyi ba kwa Yehoba, monai buloshuwa wa kuba’mba Charitable Planning to Benefit Kingdom Service Worldwide uji mu Kizungu ne mu Kisipanishi. Uno buloshuwa walumbulula mashinda apusana pusana muntu mo akonsha kupaina bupe. Mashinda amo anembwa mu uno buloshuwa kechi akonsha kwingila mu kyalo kyenu ne, na mambo a misonko ne mizhilo ikwabo. Onkao mambo, panyuma ya kutanga uno buloshuwa, mwafwainwa kwipuzha muntu wayuka mizhilo nangwa bya misonko. Bantu bavula bakwasha mwingilo wetu wa ntanda yonse kabiji bamwenamo bingi mambo bebakepesheshako misonko inge bapana mu ano mashinda. Umvwe uno buloshuwa mo aji mu kyalo kyenu, mwakonsha kutambulako umo ku munembeshi mu kipwilo kyenu.

Inge mukeba kuyukilapo byavula, mwakonsha kwipuzha ku ofweshi wa musampi wa Bakamonyi ba kwa Yehoba wa mu kyalo kyenu.