JEHOVA en Nyasaye ma jachiwo. (Jak. 1:17) Chuech duto mag Jehova kaka sulwe ma rieny e polo kod gik moko duto ma twi e piny nyiso ayanga ni en jachiwo.—Zab. 65:12, 13; 147:7, 8; 148:3, 4.

Jandik-zaburi moro ne mor sidang’ gi gik ma Jachuech nochueyo momiyo ochuogo wer kopakogo tije Jehova. Som ane Zaburi 104 mondo ine kabe in bende inyalo winjo kaka nowinjo. Nowacho niya: “Nawer ni Jehova ka pod angima: Nawer wend pak ni Nyasacha ka pod antie.” (Zab. 104:33) Be mano e gima in bende igombo timo?

Jehova dwaro ni waluw ranyisi moketonwa mar bedo jochiwo. E wi mano, onyisowa gimomiyo onego wabed jochiwo. Ne ane gima jaote Paulo nondiko kotelne gi roho mar Nyasaye: “Chik joma gin jomwandu e ndaloni ni kik gibed jong’ayi kendo ni mondo giket genogi kuom Nyasaye ma chiwonwa gik moko duto e yo mogundho mondo wamorgo, to kik giket geno kuom mwandu ma korgi ok ong’ere. Nyisgi mondo gitim gik mabeyo, gibed jomwandu e timbe mabeyo, gibed jochiwo ka giikore pogo ne jomamoko gigegi, nikech kuom timo kamano, gibedo joma osekano ne gin giwegi mise maber ne kinde ma biro mondo gimak matek ngimano ma en ngima madier.”—1 Tim. 6:17-19.

Sama ne Paulo ndiko barua mar ariyo ne kanyakla man Korintho kitaye gi roho mar Nyasaye, nojiwo chuny ma ng’ato onego obedgo sama ochiwo gimoro. Nondiko niya: “Ng’ato ka ng’ato otim mana kaka oseng’ado ei chunye, ok gi chuny matek kata e yor achune, nimar Nyasaye ohero ng’at ma chiwo gi ilo.” (2 Kor. 9:7) Kae to Paulo nowuoyo kuom joma yudo ber ka ochiw gimoro gi chuny moil. Joma ochiwnegi yudo ber nikech dwachgi ochop, to joma ochiwo gino bende yudo ber nimar giyudo gueth moa ka Nyasaye.—2 Kor. 9:11-14.

Paulo notieko wuoyo e wi wachno ka nowuoyo e wi gima duong’ ma nyiso ni Nyasaye en jachiwo. Nondiko kama: “Erokamano odhi ne Nyasaye nikech michne ma ochiwo nono mokalo awacha.” (2 Kor. 9:15) Onge kiawa ni mich Jehova oriwo gik moko duto ma omiyo jotichne konyisigo berne kokalo kuom Yesu Kristo. Michno ni malo ahinya ma onge weche ma nyalo lero berne.

Ere kaka wanyalo nyiso ni waduoko erokamano kuom gik moko duto ma Jehova gi Wuode osetimonwa kendo biro medo timonwa? Yo achiel ma wanyalo timogo kamano, en tiyo gi thuolowa, tekowa, kod mwanduwa mondo wachwalgo lamo maler mar Jehova, bed ni wachiwogi e okang’ matin kata e okang’ malach.—1 Weche 22:14; 29:3-5; Luka 21:1-4.