Kwal̦o̦k Kam̦m̦oolol kõn an Jeova Jouj im M̦õn̦õn̦õ in Letok
JEOVA ej juon Anij el̦ap an jouj im em̦õn̦õn̦õ in letok men otemjej. (Jemes 1:17) Aolep menin kõm̦anm̦an ko ãinwõt iju ko ilañ im aolep menin eddek ko ioon lal̦ in, rej kwal̦o̦k kõn jouj eo an Jeova.—Sam 65:12, 13, UBS; 147:7, 8; 148:3, 4.
Juon iaan ro ear je bokin Sam ear lukkuun l̦ap an kam̦m̦oolol Rũkõm̦anm̦an eo an. Kõn men in, ear je juon al ñan nõbar Jeova kõn jerbal ko an. Riiti bokin Sam jebta 104 ñan lale kwõj ke bar errã ippãn. Rijeje sam in ear ba: “Inaaj al ñan Jeova ium̦win iien aõ mour; inaaj al im nõbar aõ Anij ke ij pãdwõt im mour.” (Sam 104:33) Eñin ke men eo kokõn̦aan bar kõm̦m̦ane?
JOÑAK EO EM̦M̦ANTATA KÕN M̦ÕN̦ÕN̦Õ IN LEL̦O̦K
Jeova el̦ap an jouj im em̦õn̦õn̦õ in letok men otemjej ñan kõj im ekõn̦aan bwe jen l̦oore joñak in an. Ej bar kwal̦o̦k etke eaorõk bwe jen m̦õn̦õn̦õ in lel̦o̦k. Eñin unin ear kõm̦akũt rijjilõk Paul bwe en je naan kein me rej ba: “Kwõn kauwe ro rũm̦weiie kõn men ko an lal̦ in, bwe ren jab kõjatdikdik er kõn m̦weiuk ko me remaroñ m̦õkaj in jako, a kõn Anij, eo Ej wũjleptok ñan kõj men ko otemjej bwe jen m̦õn̦õn̦õ kaki; Bwe ren kõm̦anm̦an em̦m̦an, bwe ren m̦weiie kõn jerbal ko rem̦m̦an, im ren m̦ool kab pojak in lel̦o̦k men in tũriam̦o, im ren make kam̦m̦weiukiuk er kõn bo̦unteijen em̦m̦an m̦ae iien ej itok, bwe ren bõk mour eo em̦ool.”—1 Timote 6:17-19.
Ke Paul ear je lõta eo an kein karuo ñan eklejia eo ilo Korint, ear kaalikkar unin ad m̦õn̦õn̦õ in lel̦o̦k ak jabawõt. Ear ba: “Jabdewõt armej ãinwõt ear pepe ilo bũruon, ãindein en lel̦o̦k, jab ilo bũrom̦õj ak kõn an aikuj kõm̦m̦ane, bwe Anij ej yokwe eo em̦õn̦õn̦õ in lel̦o̦k.” (2 Korint 9:7) Tokãlik, Paul ear kwal̦o̦k kõn tokjãn ko rem̦m̦an rar wal̦o̦k ñan ro rar m̦õn̦õn̦õ in lel̦o̦k. Ear kwal̦o̦k bwe ro rar bõk men in lel̦o̦k ko jãn ro jet ear bwe aikuj ko aer. Anij ear kajeraam̦m̦an ro rar m̦õn̦õn̦õ in lel̦o̦k.—2 Korint 9:11-14.
Paul ear kõjem̦l̦o̦k lõta in an ilo an kar kwal̦o̦k kõn menin jouj eo el̦aptata an Anij. Paul ear je im ba: “Jen kam̦m̦oolol Anij kõn menin letok eo an el̦ap jãn maroñ in ba!” (2 Korint 9:15, UBS) Ta menin letok eo an Jeova ñan kõj? Ej aolep men ko rem̦m̦an Jeova ej litok ñan kõj ikijjeen Jijej Kũraij. Joñan an lukkuun em̦m̦an menin letok in an Anij, epen ad kõmel̦el̦eiki.
Ewi wãween ad kwal̦o̦k kam̦m̦oolol ñan Jeova im Nejin kõn aolep men ko rar kõm̦m̦ani ñan kõj im men ko renaaj kõm̦m̦ani ilo raan ko im̦aan? Juon wãween ej ilo ad m̦õn̦õn̦õ in lel̦o̦k iien ko ad, maroñ ko ad, im men ko m̦weied ñan kowõnm̦aanl̦o̦k kabuñ eo em̦ool an Jeova. Jemaroñ kõm̦m̦ane men in meñe edik ak el̦ap ad maroñ.—1 Kronikel 22:14; 29:3-5; Luk 21:1-4, UBS.
