Apresyaen so Inkamaiter nen Jehova

I-PLAY

SI Jehova et maiter ya Dios. (Sant. 1:17) Nanengneng ed karakel na bitewen ed tawen tan nanduruman klase na kiew tan tanaman ed dalin ya sikatoy maiter.—Sal. 65:12, 13; 147:7, 8; 148:3, 4.

Agaylay panangapresya na salmista ed Amalsa kanian nanggaway kansion ya ditan et indeskribe toy pandinayew tod saray kimey nen Jehova. No basaen moy Salmo 104, seguradon naliknam met so alikna na saman ya salmista. Imbaga to: “Kansionan ko si Jehova diad interon bilay ko; kansionan ko na panangidayew so Dios ko legan a mabilay ak.” (Sal. 104:33, NW) Kasin ontan met so labay mon gawaen?

SANKAABIGAN YA ALIMBAWA NA INKAMAITER

Labay nen Jehova ya magmaliw tayon maiter a singa sikato. Tan imbaga toy rason no akin ya nepeg a magmaliw tayo met ya maiter. Imanoen so impaisulat tod si apostol Pablo: “Bilin mo iramay mayayaman ed sayan kaplesan a sistema na mundo ya ag-ira magmaliw a mapaatagey, tan iteen day ilalo ra, aliwan diad agnapanmatalkan iran kayamanan, noagta diad Dios, a daakan a mangitatarya ed sikatayo na amin a bengatlan panliketan tayo; a manggawa ra na maong, magmaliw iran mayaman ed saray maabig a gawa, mabunlok, akaparaan a manginabang, a maalwar iran mantipon parad inkasikara na sakey a maabig a pundasyon parad arapen, ta pian makabemben iran malet ed peteg a bilay.”—1 Tim. 6:17-19.

Diad samay komaduan sulat nen Pablo ed kongregasyon ed Corinto, indanet to so dugan motibo ed pangiter. “Gawaen komon na kada sakey so unong ed ginetma to ed puso to,” so kuan nen Pablo, “ya aliwan ambelat ed liknaan to odino lapud napapasootan, ta aaroen na Dios so maliket a mangiiter.” (2 Cor. 9:7) Insan imbaga nen Pablo no siopay nagunggonaan ed maliket ya pangiter: samay mangawat, ya niiter so pankaukolan to; tan samay angiter, ya nabendisyonan na dakel diad espiritual ya paraan.—2 Cor. 9:11-14.

Diad bandad sampot na sayan sulat nen Pablo, tinukoy to so sankaabigan ya paneknek ya maiter so Dios. “Salamat ed Dios lapud alay abig a regalo to,” so kuan nen Pablo. (2 Cor. 9:15) Say tutukoyen dia nen Pablo ya regalo nen Jehova et say amin ya kamaongan ya iiter Tod totoo panamegley nen Jesu-Kristo. Alay-abig itan ya regalo, ya kulang so salita pian nadeskribe so kablian to.

Panon tayon nipanengneng ya aapresyaen tayo so amin ya ginawa tan gawaen ni nen Jehova tan na Anak to parad sikatayo? Say sakey ya paraan et diad pangiter tayoy panaon, biskeg, tan kaykayarian tayo parad dugan panagdayew, melag man itan odino baleg.—1 Awa. 22:14; 29:3-5; Luc. 21:1-4.

NO PANON A MANGIITER NA KONTRIBUSYON SO ARUM PARAD SANKAMUNDOAN A KIMEY

Singa ed panaon nen apostol Pablo, dakel natan so ‘mangibibiig,’ odino mangibabadyet na kuarta, tan ipepelag da itan ed contribution box ya amarkaan na “Worldwide Work.” (1 Cor. 16:2) Binulan ya ipapawit na kada kongregasyon so atugyop ya kontribusyon diad branch office a makansakop ed bansan kawalaan da. Sarag yo met ya direktan ipawit so donasyon yo diad korporasyon ya uusaren na Saray Tasi nen Jehova diad lugar yo. Pian naamtaan no antoy manunan korporasyon ya uusaren na Saray Tasi nen Jehova ed bansa yo, ipangasin kontaken so branch office ya makansakop ed bansan kawalaan yo. Saray address na branch office et naromog ed www.pr418.com/pag. Niraya so klase na donasyon a sarag yon ipawit:

DIREKTAN PANGIDONASYON

Donasyon panamegley na electronic bank transfer, debit card, o credit card. Diad arum ya branch, posible met iya panamegley na jw.org odino arum nin apilin website.
Pandonasyon na kuarta, alahas, odino arum nin mablin kayarian. Mangilaktip na sulat a mangibabagan say kuarta odino kayarian et idodonasyon yo.

DONASYON A WALAAY KONDISYON

Pangidonasyon iya na kuarta a say kondisyon et naala itan na samay angidonasyon no kaukolan to la.
Mangilaktip na sulat a mangibabagan say donasyon et walaan na kondisyon.

CHARITABLE PLANNING

Likud ed pangidonasyon na kuarta tan mabli iran kayarian, wala ni arum a paraan na panagdonasyon a makatulong ed kimey na Panarian ed interon mundo. Nabasa itan ed ontumbok iran parapo. Antokaman so paraan a labay yon usaren, ipangasin ontawag nin unona ed branch office ya makansakop ed lugar yo pian naamtaan no anto ran paraan na panagdonasyon so nayari ed bansa yo. Lapud nanduruma iray legal a totontonen ontan met ed babayaran a buis, importantin onkonsulta ed kualipikadon tax tan legal adviser antis a manpili na sankaabigan a paraan na pandonasyon.

Insurance: Sarag yon gawaen ya beneficiary na life insurance policy odino retirement/pension plan yo so korporasyon ya uusaren na Saray Tasi nen Jehova.

Saray Bank Account: Saray bank account, certificate of deposit, odino individual retirement account et nayarin imatalek odino ingaran ed korporasyon ya uusaren na Saray Tasi nen Jehova depende ed requirement na bangko yo.

Saray Stock tan Bond: Sarag iyan idonasyon ed korporasyon ya uusaren na Saray Tasi nen Jehova bilang regalo odino panamegley na dokumento ya mangibabagan iyalis itan ed ngaran na korporasyon no say sakey et naandi lad bilay.

Lote tan Abung: Say lote tan abung a nayarin ilako et sarag ya idonasyon ed korporasyon ya uusaren na Saray Tasi nen Jehova bilang regalo. No residential itan, nayarin manggaway kasulatan imay angidonasyon ya manayam ditan anggad mabilay ni.

Gift Annuity: Say kuarta odino saray stock tan bond et nayarin idonasyon ed korporasyon ya uusaren na Saray Tasi nen Jehova tan samay angidonasyon odino siopaman a pangipiyaan to et makaawat na espisipikon annuity payment kada taon legay bilay to. Say angidonasyon et makaalay income-tax deduction diad samay taon ya ginmapo so gift annuity.

Saray Testamento tan Trust Fund: Saray kayarian odino kuarta so nayarin ipatawir ed korporasyon ya uusaren na Saray Tasi nen Jehova panamegley na legal a testamento, odino satan ya korporasyon so gawaen ya beneficiary na trust agreement. Lapud satan, nayarin nabawasan iray babayaran yon buis.

Nanengneng ed terminon “charitable planning” a kaukolan ya manplanon maong so mandonasyon no dinan ed saraya so pilien to. Pian natulongan iray malabay a mandonasyon ed sankamundoan a kimey na Saray Tasi nen Jehova panamegley na charitable planning, walay brosyur diad English tan Spanish ya Charitable Planning to Benefit Kingdom Service Worldwide. Sayan brosyur et im-publish pian mangiter na impormasyon ed nanduruman paraan na panagdonasyon, ya iter natan odino ipatawir sano naandi lad bilay imay akanggawa. Saray impormasyon a nabasad sayan brosyur et nayarin ag-onaplikad amin ya situasyon lapud ganggan ed panagbuis odino arum nin ganggan ed bansa yo. Kanian, kayari yon basaen iyan brosyur, nepeg ya onkonsulta ed saray legal odino tax adviser. Panamegley na sarayan paraan na panagdonasyon, dakel so makakasuportad sankamundoan a kimey tayo tan ed itutulong tayod saray mankaukolan. Makakaala met iray diskuento ed babayaran dan buis. No wala iyan brosyur ed bansa yo, sarag yoy onkerew na kopya ed sekretaryo na kongregasyon yo.

Parad kaaruman ya impormasyon, kontaken so branch office a makansakop ed bansan kawalaan yo.

Ompan Nagustoan Mo Met

Tutorial ed Pandonasyon

Nengnengen no anto iray opsyon tan paraan pian makapandonasyon.

SAY PANAG-BANTAYAN—PANARALAN YA EDISYON