Jehovata mana michʼakoj Dios kasqanrayku jatunchana
JEHOVAQA mana michʼakoj Dioschu (Sant. 1:17). Cielopi lliphipej chʼaskas, chʼin pampaspi pasto qʼomerlla kasqanqa Jehová mana michʼachu kasqanta rikuchin (Sal. 65:12, 13; 147:7, 8; 148:3, 4).
Salmistaqa Jehovata may jatunpaj qhawasqanrayku, Jehovaj ruwasqasninta jatunchananpaj uj takiyta qhelqarqa. Salmo 104 capitulota leerispa pay jinachá ninki. Pay nerqa: “Noqatajrí kawsayniyoj kanaykamaqa Señorniy Tata Diosman takiykunata takisaj”, nispa (Sal. 104:33).
JEHOVALLA MANA MICHʼAKOJ DIOS
Jehovaqa mana munanchu michʼas kananchejta. Imaraykuchus pay ashkha imasnejta mana michʼachu kasqanta rikuchiwanchej. Kunantaj imatachus apóstol Pablowan qhelqachisqanta qhawarina. Pablo qhelqarqa: “Kay pacha imaspi qhapajkunata kamachiy ama umata oqharinankuta, amataj kapuyninkupi atienekunankuta, imaraykuchus chayqa qhasi manakajlla. Manachayri kawsaj Diospi atienekuchunku, pichus tukuy imata qowanchej mana michʼakuspa chay imaswan kusisqa kawsananchejpaj, chaypi. Kamachillaytaj allin kajta ruwanankuta, allin ruwanaspitaj qhapaj kanankuta. Wakichisqallataj kachunku, kapuyninkumanta wajkunaman jaywarinankupaj mana michʼakuspa. Ajinapi paykuna kikinkupaj kapuykunata tantashanku jamoj pʼunchaykunapaj, cheqa kaj kawsaymanta chʼipakuspa”, nispa (1 Tim. 6:17-19).
Pablo Corintopi kaj qotuchakuyman iskay kaj cartanta qhelqashajtin, imayna sonqowanchus qona kasqanmanta parlarqa, nerqataj: “Sapa uj churachun sonqompi yuyasqanman jina, mana llakikuspa, nitaj kamachisqa jinachu, imaraykuchus Diosqa munakun pichus kusiywan qojta”, nispa (2 Cor. 9:7). Chantapis Pabloqa tukuy sonqo qosqankuwan pisichikojkuna yanapasqa kasqankuta, qojkunataj bendicionesta japʼisqankuta nillarqataj (2 Cor. 9:11-14).
Pablo chay cartanta qhelqayta tukuchashaspa, Jehovaj jatun munakuyninmanta parlaspa, nerqa: “Diosman graciasta qona mana willay atinata qowasqanchejmanta”, nispa (2 Cor. 9:15). Chaytaj Jehová, Jesusnejta sumaj imasta qowasqanchej kanku. Chay qowasqanchej may sumajpuni kasqanraykutaj may valorniyoj.
Jehovawan, Jesuswan ima noqanchejrayku tukuy imata ruwasqankumanta, aswan qhepaman ruwanankumanta ima, ¿imaynatá agradecekusunman? Cheqa yupaychay ñauparinanpaj kallpanchejta, tiemponchejta, kapuyninchejta ima mana michʼakuspa qospa (1 Cró. 22:14; 29:3-5; Luc. 21:1-4).
Kaykunatapis qhawaykurillawajtaj
¿Imaynatá Diospa Gobiernonmanta willakunanpaj Internetnejta qolqeta churasunman?
Imaynasmantachus qolqeykiwan Internetnejta yanapakunaykita yachakuy.
