Pasani Ntengo Kupasa Mwakudzala Manja Kwa Yahova

LIZANI

YAHOVA ndi Mulungu wakupasa mwakudzala manja. (Tgo. 1:17) Kubulukira kudzulu kwakudzala na nyenyezi mpaka tsanga yakubithimira inaphimbira dziko yapantsi na pyonsene pidacitwa na Mulungu ‘pisasimba’ Yahova thangwi yakupasa kwace mwakudzala manja.—Sal. 65:12, 13; 147:7, 8; 148:3, 4.

Nyamasalmo akhapasa ntengo kakamwe Nciti wace, pyenepi pyankulumiza toera kuimba nyimbo yakusimba mabasa a Yahova. Lerini Masalmo 104, mwakukhonda penula, imwe munakhala na mabvero mabodzi ene ninga a nyamasalmo adalonga kuti: ‘Ndinaimbira Yahova mu umaso wanga onsene; mbandiri maso ndinaimbira Mulungu wanga.’ (Sal. 104:33) Kodi nee muli na cifuno cibodzi cene?

CITSANDZO CIKULU CA KUPASA MWAKUDZALA MANJA

Yahova asafuna kuti titowezere citsandzo cace cakupasa mwakudzala manja. Pontho, iye asatipasa mathangwi adidi toera kukhala anthu akupasa mwakudzala manja. Mpostolo Paulu apumirwa na Yahova toera kulemba: ‘Upange anyakupfuma a pantsi pano kuti akhonde kuumirwa, akhonde kukhulupira upfumi wapezi, mbwenye akhulupire Mulungu, anatipasa pyonsene toera tikomerwe napyo. Acite pinthu pyadidi, apfume na kupicita, apasembo anthu anango nee kumana. Tenepa agumanye upfumi wakuwanga wa kutsogolo toera agumane umaso wandimomwene.’—1 Tim. 6:17-19.

Pidalemba iye tsamba yace yaciwiri ku mpingo wa ku Korinto, Paulu agomezera maonero akulinganira thangwi yakupasa. Paulu alonga: ‘Munthu onsene apase ninga mudapifunira iye muntima mwace, mbakhonda kudungunya, mbakhonda kukakamizwa, thangwi Mulungu asafuna munthu anapasa mwakukomerwa.’ (2 Akor. 9:7) Buluka penepo, Paulu apangiza kuti mbani anaphindula na nzimu wakupasa mwakudzala manja: Ale anatambira mbaphedzeka, na ale anapereka pinthu pyawo, thangwi asatambira nkhombo zauzimu.—2 Akor. 9:11-14.

Paulu amalisa kapitulu 8 na 9 ya tsamba yace yaciwiri mukugomezera cipangizo cikulu cakupasa mwakudzala manja kwa Mulungu. Paulu alemba: ‘Mphapo tipereke takhuta kuna Mulungu thangwi ya pyonsene pidatipasa iye pyakukhonda kulengeseka.’ (2 Akor. 9:15) Muoni wa Yahova usaphataniza udidi onsene unapereka Mulungu kuna atumiki ace kubulukira mwa Yezu Kristu. Muoni unoyu ndi ukulu kakamwe wakuti ife nkhabe mafala toera kufokotoza mwakukwana ntengo wace.

Tinapangiza tani kupereka takhuta thangwi ya pinthu pyonsene pidaticitira Yahova na Mwanace, na pire pinafuna iwo kuticitira ntsogolo? Njira ibodzi yakupangiza kupereka kwathu takhuta ndi kupereka ndzidzi wathu, mphambvu zathu, pinthu pyathu na kobiri yathu toera kuphedzera ulambiri wandimomwene wa Yahova. Tinakwanisa kucita pyenepi mwakukhonda tsalakana khala pinapereka ife ndi pyakucepa peno pizinji.—1 Pya. 22:14; 29:3-5; Luka 21:1-4

Kodi Anango Asaphedzera Tani Basa Ya Dziko Yonsene?

Ninga mu ntsiku za mpostolo Paulu, azinji lero ‘asakoya’ peno asaikha pakhundu ntengo wa kobiri toera kuikha m’bokosi ya pyakupereka pa mpingo idalembwa “Obra Mundial.” (1 Akor. 16:2) Nthanda zonsene, mipingo isatumiza kobiri ineyi ku ofesi ya Mboni za Yahova mu dziko yawo. Munakwanisambo kutumiza pyakupereka pyanu mu kuphatisira dzina yakutawirika inaphatisirwa na Mboni za Yahova mu dziko yanu. Toera kudziwa dzina yakutawirika inaphatisirwa na Mboni za Yahova mu dziko yanu, taphata miyendo, pitani ncibverano na ofesi ya filiali. Mbuto za maofesi zisagumanika mu www.pr418.com. Mitundu ya pyakupereka pyakuti munakwanisa kupitumiza ndi ipi:

PYAKUPEREKA PYAKUTI NKHABE KUBWEZERWA

Pisacitwa kubulukira mu kucinja kobiri mu konta ya banku, cartão de débito peno ya crédito. M’maofesi a filiali anango pyenepi pisacitwambo mukuphatisira site jw.org peno site inango yakutawirika.
Kupereka kobiri, pinthu pyantengo ninga joias peno pinango. Pakucita pyenepi, tumizani pabodzi na tsamba mbamupangiza kuti pinthu pyenepi nkhabe funika kubwezerwa.

PYAKUPEREKA PYAKUTI PISAFUNIKA KUBWEZERWA

Kupereka kobiri na cifuno cakuti kobiri ineyi ibwezerwe mwanaciro angaifuna.
Phatanizani tsamba mbamufokotoza kuti kobiri ineyi isafunika kubwezerwa.

NJIRA ZINANGO ZAKUCITA PYAKUPEREKA

Kusiyapo kupereka kobiri na pinthu pyanu pyantengo, pana njira zinango zakucita pyakupereka toera kuphedzera basa ya Umambo pa dziko yonsene. Njira zenezi zisagumanika pantsi apa. Mwakukhonda tsalakana njira inafuna imwe kuphatisira, taphata miyendo, pakutoma pitani ncibverano na ofesi ya filiali ya dziko yanu toera kudziwa njira zinaphatisirwa. Nakuti mitemo na miyambo ya misonkho isasiyana, mphyadidi kubvundzisa anyakutsalakana pya misonkho mbamudzati kucita cisankhulo canu toera kudziwa njira yadidi yakucita pyakupereka pyanu.

Seguros: Pyakuperekwa pinacitwa mu kuphatisira dzina yakutawirika inaphatisirwa na Mboni za Yahova toera kuphindula na seguro ya umaso peno masasanyiro a phanceni.

Makonta a ku Banku: Makonta a ku banku, maphaso a depósito peno makonta a munthu paekha wakuti akhatambira phanceni mbaasiya toera kuphatisirwa na dzina yakutawirika ya Mboni za Yahova, mu kuphatisira tsamba ya cibverano peno toera kulipwa pakufa kwace mwakubverana na pitsogolero pya mabanku a pacisa.

Ações e Títulos: Pinthu pyakuti pisaperekwa mu kuphatisira tsamba ya cibverano inatawirisa kuti pakufa kwa mwanaciro, pinthu pyenepi piphatisirwe na dzina yakutawirika ya Mboni za Yahova mwakukhonda dikhira kubwezerwa.

Mbuto peno Nyumba: Munakwanisa kupereka mbuto peno nyumba toera kuguliswa na Mboni za Yahova. Munakwanisa kucita pyenepi mbamukhonda dikhira kubwezerwa, khala ndi nyumba inakhala imwe, munakwanisa kupitiriza kukhala mwenemu mu ndzidzi wakuti muciri maso.

Doação de Renda Vitalícia: Munakwanisa kupereka kobiri, meza, mipando na pinthu pinango pya n’nyumba toera kuphatisirwa na Mboni za Yahova, mbwenye musafunika kucita tsamba ya cibverano. Mwanaciro anakwanisa kutambira kobiri pa caka mu umaso wace onsene. Anakwanisambo kubwezerwa ntengo wa nsonkho mu caka cakutoma ca kukhazikiswa kwa cibverano ceneci.

Testamentos e Fideicomisso: Pinthu peno kobiri pinakwanisa kusiyirwa Mboni za Yahova mu kuphatisira tsamba ya cibverano peno kulemba tsamba mbamupangiza kuti pinthu pyenepi pisafunika kuphatisirwa na Mboni za Yahova pakufa kwanu. Cibverano ceneci ciri na maphindu pa kulipa misonkho.

Njira zidapangizwa padzulu toera kuphedzera basa ya dziko yonsene ya Mboni za Yahova zisaphemba kucita masasanyiro. Toera kuphedza ale akuti asafuna kucita pyakupereka pyawo, kwacitwa bruxura mu Cingerezi, Cizungu, na Cixipanyola. Bruxura ineyi iri na nsolo wakuti, Planejamento Caritativo para Beneficiar o Serviço do Reino Mundialmente. Bruxura ineyi yacitwa toera kupangiza njira zakusiyana-siyana zakucita pyakupereka lero peno pakufa kwa munthu. Panango mphangwa za bruxura ineyi nee zisabverana na makhaliro anu thangwi ya mitemo yakulipa nsonkho peno mitemo inango ya dziko yanu. Natenepa, pakumala kuleri bruxura ineyi, mphyadidi kusaka maonero a ule anakuphedzani m’masasanyiro akulipa nsonkho peno munthu anadziwa pyenepi. Mukuphatisira njira zenezi zakucita pyakupereka, azinji asakwanisa kuphedzera basa yathu yakumwaza mphangwa na yakuphedza anthu pangaoneka pidengwa pa dziko yonsene, na kuphindula na mitemo yakulipa nsonkho. Khala bruxura ineyi isagumanika mu dziko yanu, munakwanisa kulonga na mulembi wa mpingo wanu toera kuiphemba.

Toera kudziwa mphangwa zizinji, pitani ncibverano na ofesi ya filiali ya Mboni za Yahova.

Panango Munakomerwa Kudziwa Ipi

Making Donations Electronically

NCENJEZI (WA PFUNDZIRO)