YEHOVA ka Aôndo u wan nagh. (Yak. 1:17) Akaa a Yehova a gbe la, hii sha asan a ka se nenge a mi sha kwavaôndo tugh la zan zan ar sha imendenev mbi doon tsung, mbi mbi cir sha tar la cii, tese ér a wa nagh.—Ps. 65:12, 13; 147:7, 8; 148:3, 4.

Orpasalmi yange wuese Yehova, Orgban na kpishi je yô, kwagh ne mgbegha un u wan icam i wuese ityom na. Aluer u ôr pasalmi 104 yô, we kpa u lu a mnenge na la. Orpasalmi la kaa ér: “Me wa TER icam sha ayange a m lu uma yô, me wa icam me ter Aôndo wam er m lu her yô.” (Ps. 104:33) We kpa ka isharen you la ga he?

Yehova soo ér se dondo ikyav na i nan kwagh wuee la. Shi a na se atôakyaa a dedoo a a ne ve i gbe u se naan kwagh wuee yô. Nenge ase kwagh u Aôndo yange mgbegha apostoli Paulu nger ne, ér: “Mba ve lu mbanyarev ken tar u ainge ne yô, wa ve kwagh wer, ve̱ de gengese ayol a ve ga, ve de veren ishima sha inyaregh ki i fe kwagh sha min ken hemen ga la ze, kpa ve̱ ver ishima sha Aôndo u A ne se akaa cii wuee sha u se̱ er kwagh a mi yô. Ve̱ eren akaa a dedoo ve̱ lu mbanyarev sha aeren a dedoo, ve̱ naan iyua, ve̱ panden kwagh ve̱ naan mbagenev kpaa, nahan man vea wa imagh ki dedoo sha ci ve ayol a ve ken hemen ye, sha u vea kôr ave sha uma u a lu uma jim la.”—1 Tim. 6:17-19.

Shighe u Paulu nger washika na u sha uhar hen tiônnongo u ken Korinte la, yange pase mnenge u vough u i gbe u se lu a mi sha kwagh u nan iyua la yô. Paulu kaa ér: “Hanma or nana̱ na er nan we ken ishima i nan la nahan, i̱ de lu zunguruu ga, i̱ de lu sha apera kpaa ga, gadia ka or u nan ne kwagh sar sar la je nan doo Aôndo ishima ye.” (2 Kor. 9:7) Paulu ôron kwagh ne been yô, shi a ter ior mba ka sea na kwagh wuee ve ve zua a mtsera sha mi yô. Ka ior mba shon je ne: or u i ne nan kwagh, nan kur mgbe u nan a mi la; man or u nan ne iyua ve nan zua a iveren i ken jijingi la.—2 Kor. 9:11-14.

Paulu kure washika na ne sha u tesen er Yehova a hembe nagh cii yô. Paulu nger wener: “I̱ wuese Aôndo sha ci u iyua Na i i gande u ôron la.” (2 Kor. 9:15) Ikyav tese wang ér, iyua i Yehova ne kua hanma kwagh u dedoo u a ne ior nav sha ikyev i Yesu Kristu la cii. Erdoo la kehe je, ka u se fatyô u ôron mdoom nam been ga.

Se tese iwuese sha hanma kwagh u Yehova man Wan na ve er a vese shi vea va er ken hemen la nena? Gbenda môm yô, ka u nan shighe wase man agee a ase man akaa a ase mgbeghaa sha u suen mcivir u mimi u Yehova la, aluer vese shin vese ga kpaa.—1 Kron. 22:14; 29:3-5; Luka 21:1-4.