Longorani Kuti Mukuwonga Yehova

JULANI

YEHOVA ni Chiuta uyo wakupeleka kwawanangwa. (Yak. 1:17) Pakuti Yehova wakupeleka kwawanangwa, vilengiwa vyake vyose, vya kuchanya na pa charu chapasi vikumulumba na kumuwonga.—Sal. 65:12, 13; 147:7, 8; 148:3, 4.

Wamasalimo wakawonga chomene Yehova, ndipo wakalemba sumu yakulumba milimo ya Yehova. Ŵazgani lemba la Salmo 104, na kuwona umo namwe mungawongera Yehova. Wamasalimo wakati: ‘Nimuyimbirenge Yehova umoyo wane wose. Niyimbirenge malumbo Chiuta wane nyengo yose iyo niliri wamoyo.’ (Sal. 104:33) Kasi namwe mukukhumba kumuwonga Yehova?

CHIYELEZGERO CHIWEMI CHAKUPELEKA

Yehova wakukhumba kuti nase tipelekenge kwawanangwa. Wakutiphaliraso chifukwa icho tikwenera kuchitira nthena. Mazgu gha Chiuta ghakuti: “Uŵasambizge awo mbasambazi mu nyengo iyi kuti ŵangaŵanga ŵakujikwezga yayi, ndiposo ŵangaŵikanga chigomezgo chawo mu usambazi wambura kutchintha yayi, kweni mwa Chiuta, uyo wakutipa kwawanangwa vinthu vyose ivyo ise tikukondwa navyo. Uŵaphalire kuti ŵachitenge uwemi, ŵaŵenge ŵasambazi mu milimo yiwemi, ŵapenge mwawanangwa, ŵakunozgeka kugaŵana na ŵanyawo, ŵasunge usambazi wawo pa malo ghakukhora, mwakuti ŵakoleske umoyo wanadi.”—1 Tim. 6:17-19.

Mu kalata yachiŵiri iyo Paulosi wakalembera mpingo wa Korinte, wakachiska Ŵakhristu kuti ŵaŵe na mtima wakupeleka. Iyo wakati: “Waliyose wachite umo wadumulira mu mtima wake, mwakukwenyelera yayi panji mwakuchichizgika, chifukwa Chiuta wakutemwa uyo wakupeleka mwakukondwa.” (2 Kor. 9:7) Pamanyuma, Paulosi wakati vyawanangwa ivi vikovwira ŵakusoŵerwa, ndipo awo ŵakupeleka ŵakutumbikika mwauzimu.—2 Kor. 9:11-14.

Paumaliro, Paulosi wakapeleka ukaboni wankhongono kulongora kuti Yehova ni mupi nadi. Wakati: “Tikuwonga Chiuta chifukwa cha chawanangwa chake chambura mayowoyeko.” (2 Kor. 9:15) Chawanangwa cha Yehova ni vinthu vyose viwemi ivyo wakupeleka ku ŵanthu ŵake kwizira mwa Yesu Khristu. Yehova watipa vinthu viwemi vinandi, mwakuti tikusoŵa na mazgu gha umo tingamuwongera.

Kasi tingalongora wuli kuti tikuwonga vinthu ivyo Yehova na Yesu ŵakutichitira? Nthowa yimoza ndiyo kupeleka nyengo, nkhongono, na vyuma panji katundu withu kuti viwovwire pakuteŵetera Yehova. Kwali ndise ŵasambazi kwali ŵakavu, tose tikwenera kupeleka kwa Yehova chilichose icho tingakwaniska.—1 Mid. 22:14; 29:3-5; Luka 21:1-4.

Umo Ŵanyake Ŵakupelekera Vyawanangwa vya Mulimo wa pa Charu Chose

Nga umo vikaŵiranga mu nyengo ya mpositole Paulosi, ŵanandi mazuŵa ghano ‘ŵakuŵika kanthu padera,’ panji kupangirathu bajeti ya ndalama zakuti ŵakaponye mu bokosi la mpingo la vyawanangwa, lakulembeka kuti, “Vyakupeleka vya Mulimo wa pa Charu Chose.” (1 Kor. 16:2) Mwezi uliwose, mipingo yikutumizga vyakupeleka ivi ku ofesi ya Ŵakaboni ŵa Yehova ya mu charu chawo. Kweniso mungatuma mwekha vyawanangwa vinu ku wupu wakuzomerezgeka na dango uwo Ŵakaboni ŵa Yehova mu charu chinu ŵakugwiliskira ntchito. Kuti mumanye zina la wupu uwo Ŵakaboni ŵa Yehova mu charu chinu ŵakugwiliskira ntchito, fumbani ofesi ya munthavi. Adiresi ya ofesi ya munthavi mungayisanga pa www.pr418.com. Vyawanangwa ivyo mungatumizga mwekha ni ivi:

VYAWANANGWA IVYO VIKUWEZGEKA YAYI

Vyawanangwa ivi ni ivyo vikupelekeka kwizira pa makina gha ku banki ghakutumizgira ndalama, ndiposo pa makadi gha ku banki. Kweniso ku maofesi ghanyake gha munthavi, vyawanangwa vikupelekeka kwizira pa jw.org, panji pa webusayiti yinyake yakusoleka.
Mungapeleka ndalama, majuda, panji katundu munyake. Pakupeleka vinthu ivi, lembani kalata yakulongosora kuti vyawanangwa ivi kuzakaniwezgera yayi.

VYAWANANGWA IVYO VIKUWEZGEKA PARA MWENEKO WAVIKHUMBA

Ni ndalama izo zikupelekeka ndipo zingawezgeka usange mweneko wazikhumba.
Pakupeleka ndalama izi mulembe kalata yakulongosora kuti zizakawezgeke.

VYAWANANGWA VINYAKE IVYO MUNGAPELEKA

Padera pa kupeleka ndalama na katundu munyake, paliso nthowa zinyake izo mungawovwilirapo pa mulimo wa Ufumu wa pa charu chose. Nthowa izi zili pasi apa. Pa nthowa yiliyose iyo mungatemwa kupelekera vyawanangwa vinu, chakwamba fumbani ofesi ya munthavi iyo yikulaŵilira mulimo mu charu chinu kuti mumanye nthowa izo zilipo mu charu chinu. Pakuti charu chilichose chili na malango ghake gha misonkho, ntchakuzirwa kuti mufumbenge dankha awo ŵakumanya malango gha misonkho na gha charu pambere mundasankhe nthowa yakupelekera vyawanangwa iyo yingaŵa yiwemi kwa imwe.

Inshuwalansi: Mungalembeska kuti wupu uwo Ŵakaboni ŵa Yehova ŵakugwiliskira ntchito ndiwo uzakapike ndalama zinu za inshuwalansi panji za penshoni.

Maakaunti gha ku Banki: Mungalembeska kuti wupu uwo Ŵakaboni ŵa Yehova ŵakugwiliskira ntchito ndiwo uzakatore ndalama zinu para mwafwa. Kweniso mungalembeska kuti para mwafwa ndiwo uzakapike ndalama zinu za penshoni izo mwasungiska ku banki. Pakuchita ivi, mukwenera kulondezga malango gha mabanki gha mu charu chinu.

Masheya: Mungapeleka masheya agho muli nagho ku kampani nga ntchawanangwa ku wupu uwo Ŵakaboni ŵa Yehova ŵakugwiliskira ntchito. Kweniso mungalemba kuti para mwafwa wupu uwu ndiwo uzakatore masheya ghinu.

Malo na Nyumba: Mungapeleka malo panji nyumba nga ntchawanangwa ku wupu uwo Ŵakaboni ŵa Yehova ŵakugwiliskira ntchito. Vinthu ivi viŵe vyakuti vingaguliskika. Usange ni nyumba iyo mukukhalamo, mungalutilira kukhalamo apo muchali ŵamoyo.

Kupeleka Ndalama Panji Katundu Munyake Kuti Viwezgekenge Pachokopachoko Chaka Chilichose: Pa ndondomeko iyi, munthu wangapeleka ndalama panji katundu munyake ku wupu uwo Ŵakaboni ŵa Yehova ŵakugwiliskira ntchito, na kupangana kuti chaka chilichose umuwezgenge pachokopachoko panji kwa munyake uyo mweneko wasankha. Munthu ŵakumukhizgirako msonkho mu chaka icho wapelekera vyawanangwa ivi.

Chuma Icho Chikhalenge Para Mwafwa: Mungalemba wilu yakuzomerezgeka na boma kuti wupu uwo Ŵakaboni ŵa Yehova ŵakugwiliskira ntchito uzakapike katundu panji ndalama zinu para mwafwa. Para wilu yinu mwalemba kuti wupu wa chisopa ndiwo uzakapokere chuma chinu, mukulipira msonkho ukuru yayi.

Mazgu ghakuti “vyawanangwa vinyake ivyo mungapeleka,” ghakulongora kuti uyo wapelekenge vyawanangwa ivi wakunozgekera. Awo ŵakukhumba kupeleka vyawanangwa ivi ku mulimo wa pa charu chose wa Ŵakaboni ŵa Yehova, ŵaŵazge burosha la mutu wakuti, Charitable Planning to Benefit Kingdom Service Worldwide. Burosha ili lili mu Chingelezi na Chisipanishi. Burosha ili, likulongosora umo ŵanthu ŵangapelekera vyawanangwa mu nthowa zakupambanapambana, kwali apo ŵachali ŵamoyo panji kuti vizakapelekeke para ŵafwa. Nyengo zinyake, fundo izo zili mu burosha ili zingayana viŵi yayi na umo vinthu viliri mu charu chinu chifukwa malango gha misonkho ndiposo malango ghanyake ghakupambana. Ntheura, para mwaŵazga burosha ili, dumbiskanani na ŵanthu awo ŵakumanya vya malango gha charu na gha misonkho. Mwakugwiliskira ntchito nthowa izi, ŵanandi ŵawovwirapo pa mulimo withu kweniso wakovwira ŵanthu ŵakusoŵerwa pa charu chose ndipo ŵachepeskako msonkho uwo ŵakuŵadumura. Usange mu charu chinu burosha ili lilimo mungapempha kwa mulembi wa mpingo winu.

Kuti mumanye vinandi, mungalemba kalata panji kwimba telefoni ku ofesi ya munthavi ya mu charu chinu.