PANGUNANG TOPIKO | MAGMATINUD-ANON—NGANO?
Kinaraan Na ba ang Pagkamatinud-anon?
Si Hitoshi nagtrabaho sa departamento sa accounting sa usa ka ahensiya sa Japan. Dihang gisusi sa iyang superbisor ang gihimo niyang pinansiyal nga report, giingnan si Hitoshi nga gidahom siyang mohimog palsipikadong report. Gipatin-aw ni Hitoshi nga dili motugot ang iyang konsensiya nga himoon kana. Ingong resulta, gihulga siya sa iyang superbisor nga papahawaon sa trabaho, ug sa kadugayan gitangtang gyod siya.
Sa misunod nga mga bulan, naguol si Hitoshi kay lisod mangitag laing trabaho. Pananglitan, sa usa niya ka interbiyo, gisulti ni Hitoshi nga dili siya puwedeng manglimbong sa trabaho. Giingnan siya sa nag-interbiyo, “Dili kana normal!” Si Hitoshi gidasig sa iyang pamilya ug mga higala nga padayon lang nga magmatinud-anon, pero siya nagduhaduha na. Pananglitan, siya miingon, “Nakapangutana ko kon makatabang ba ang pagsultig tinuod bahin sa akong pagtuo.”
Makita nato sa kasinatian ni Hitoshi nga dili tanan ang may pagpabili sa pagkamatinud-anon. Giisip pa gani kini sa uban nga makadaot, ilabina sa negosyo. Usa ka babaye nga trabahante sa South Africa miingon, “Napalibotan kog mga tawong dili matinud-anon, ug usahay grabe kaayo ang pagpit-os nga sundogon sila.”
Ang usa ka matang sa pagkadili-matinud-anon nga komon kaayo karon mao ang pagpamakak. Pipila ka tuig kanhi, nakita sa pagtuon ni Robert S. Feldman, psychologist sa University of Massachusetts Amherst, nga sulod sa 10 minutos nga pag-estoryahanay, 60 porsiyento sa mga adulto ang mamakak labing menos kausa. Matod ni Feldman, “Makapakurat kaayo ang resulta. Wa mi magdahom nga ingon anâ ka komon ang pagpamakak.” Dili ba makapatingala nga bisag maglagot ang kadaghanang tawo kon bakakan sila, komon gihapon ang pagpamakak?
Nganong komon kaayo karon ang pagpamakak, pagpangawat, ug uban pang matang sa pagkadili-matinud-anon? Sa unsang paagi ang pagkadili-matinud-anon makaapektar sa katilingban? Ug labaw sa tanan, unsay atong himoon aron malikayan kini nga mga binuhatan?
