A Phaw Capar | Zeicah Kan Dinfel Awk A Si?
Dinfelnak cu Chan nih a Kaltak cang Maw?
Hitoshi cu Japan ram i rian kawlpiaknak company pakhat i tangka tlaihnak department ah rian a ṭuanmi a si. Tangka cazin an check lioah a bawipa nih cazin a hmaan loin tuah awkah a fial. Mah tikah Hitoshi nih a ding loin rian ṭuan awkah ka chiaṭha thleidannak lungthin nih a awnh lo tiah a ti. Cucaah a bawipa cu Hitoshi cungah a thin a hung tuk i a donghnak ah a rian in a phuah.
Thla tlawmpal a rauh tiang Hitoshi cu rian a hmuh lo caah a lung a hung dong. Tahchunhnak ah, rian pakhat a sawk lioah Hitoshi nih dinfelnak a um lomi rian cu ka ṭuan kho lai lo tiah a ti hna tikah biahaltu nih “na lungput cu aa thleidang tuk” tiah a ti. Hitoshi cu a chungkhar le a hawile nih dingfel tein um zungzal awkah tha an pek. Asinain Hitoshi cu lunghrinnak cheukhat a hun ngei. Tahchunhnak ah, Hitoshi nih “ka zumhnak ruang i dingfel tein ka ummi hi a ṭhatnak a um taktak hnga maw?” timi ruahnak ka hun ngei tiah a ti.
Dinfelnak hi mikip nih an sunsak lo ti kha Hitoshi hmuhtonnak nih a langhter. Mi cheukhat nih dinfelnak cu san a tlai lomi tuahsernak in an hmuh, a hleiin chawlehnak ah cutin an hmuh. Thlanglei Africa ah rian a ṭuanmi nu pakhat nih “ka pawngkam ah a ummi cu a dingfel lomi lawngte an si i a caan ah keimah hmanh kha anmah bantukin um ve awkah an ka hnek” tiah a ti.
Tuchan ah khoika hmun paoh i hmuhmi dinfel lonak phunkhat cu lihchimnak hi a si. A luancia kum tlawmpal lioah Massachusetts Amherst Sianghleiruun i lungthinlei a hlathlaitu Robert S. Feldman nih a cuza cangmi minung 100 ah 60 cu minit pahra hrawng bia an chim paohah a tlawm bik voikhat cu lih an chim tiah a ti. Feldman nih hitin a chim: “Mah cu khuaruahhar taktak a si. Mi nih lihchim kha rawl-ei, ti-din bantukin a sawhsawh men ah an ruah lai tiah kan ruat lo.” Mi tampi nih hlen an simi kha an fih tuk ko nain anmah theng nih lih an chim.
Tuchan ah lihchimnak, firnak le a dang dinfel lonak hna hi zeicah a tam tuk? Dinfel lonak nih minung dihlak kha zeitindah a hnorsuan? Mah nakin a biapi deuhmi cu dinfel lonak kha zeitindah kan hrial khawh?
